1 Gij mona egema deika beda Yesus jera efen ruforoker ruksons jah kota Kapernaum. Nou ongga rusnok gij kota insa koma ringg oida Yesus en fob, beda rusnok rufoukou rin skoita Yesus gu mod ongga Ofa engker gij. 2 Rua rin odudu deika jah suma onjoros mod egens koma ebera rot rua fob. Rusnok ragatit joug montoj awesi tein. Beda Yesus oftuftu rot Allah oga gu rua. 3 Askesi Ofa oftuftu mar ros, beda runa rufok tohkuru rurka osnok egens ongga ofumbohah skoita Ofa. 4 Tina rusnok rufoukou joug, jefeda enadaij nou rua ruira gij mod egens insa koma jinaga guru. Jefeda rua rusok mod insa koma ongga ejmeg erek edeider. Beda rua ruhoda meja efeyi ongga runroka mod insa koma jah skida ahah Yesus ebirfaga. Beda rua ritki mofka rot osnok egens ongga ofumbohah insa koma gu Yesus. 5 Nou ongga Yesus ek oida osnok egens insa koma odou ororu Ofa rot tenten fob, beda Ofa agot oida, "Edohuj, bebin mar ongga oska bera dusuna jeska budou efesi fob." 6 Guru-Guru agama ongga ringker gij mod insa koma ringg mar ongga Yesus anggot fob. Jefeda rua ragot moguma oida, 7 "Osnok egens kef bera idu fogora enagot mar erek kefo! Ofa oga oruh Allah! Jeska Allah esinsiyai ojgomu bera osuna rot mar ongga oska jeska rusnok rudou efesi ojgomu. Rusnok ebireira bera guru!" 8 Tina Yesus ejginaga gij odou efesi rot mar ongga rua runsujohu rot gij rudou efesi insa koma fob. Jefeda Ofa agot gu rua oida, "Mar ongga iwa insujohu rot koma bera erek tenten guru. 9 Erek Didif danggot gu osnok egens ongga ofumbohah koma oida, 'Didif dusuna bebin mar ongga oska,' beda koma erek mar ongga osufou ojgomu. Jeska iwa inejginaga rot guru oida ofa efen mar ongga oska bera onsuna rot tenten fob era gurei. Tina erek Didif dagot oida, 'Bua bidebecki, noba bufra bebin mofka fogora bija sons jah bebin mod,' beda iwa imejginaga rot tenten oida Didif dedin owesa efek nou dita eskeira gu rusnok tein. 10 Tina ebeibeyaif Didif dumocunc gu iwa rot oida Allah bera eita owesa efek gu Didif, Rusnok Efesa, jeskaseda dusuna rot mar ongga oska jeska rusnok rudou efesi gu mebif jera dita eskeira gu rusnok ongga marenir tein." 11 Beda Yesus agot gu osnok egens ongga ofumbohah insa koma oida, "Bua bidebecki, noba bufra bebin mofka fogora bija jah bebin mod." 12 Beda ainsa koma tein, osnok egens koma edebecki ebeirens, beda ofra efen mofka noba orogna jeska mod egens koma. Rusnok nomnaga ongga ringk mar ongga onswos insa koma bera rudou oubsaha eteb rot. Jefeda rua risitit gu Allah noba ragot oida, "Mimif minek mar onswos egema erek kef sis fob guru!" 13 Gij mona egema deika beda Yesus oksons jah meren Galilea efembra. Gij mona insa koma tein rusnok rufoukou ongga rin skoita Ofa jah suma. Noba Ofa oftuftu rua tein osok gij Allah oga. 14 Nou ongga koma oisa fob, beda Yesus ecira jah meren Galilea efembra deika. Beda Ofa orodosu jera osnok egens ongga engker gij kantor pajak ongga ofoka Lewi. Ofa koma bera Alfeus efen efesa. Ofa erek ebirfaga rot rusnok ongga runghoturu pajak nou raja Kaisar. Nou ongga Yesus engk Lewi beda Ofa agot gu ofa oida, "Bua bin noba buroru Didif ojgomu." Beda ainsa koma tein ofa orogna jeska kantor koma noba ororu Yesus ojgomuja. 15 Gij mona ongga Yesus jera efen ruforoker rint maat morototuma jera Lewi gij mod ongga ofa efen, beda ainsa koma tein rusnok rufoukou ongga runghoturu pajak jera rusnok enjgineg tein ongga Yahudi runsujohu rot oida rirek oska bera rit maat morototuma jera Yesus gonu Lewi jah suma. Jeska rusnok rufoukou insa koma ongga ruroru Yesus rejrej monuh egens koma. 16 Nou ongga Guru-Guru agama rineya jeska ebic Yahudi ongga ofoka Farisi ringk Yesus ent maat morototuma jera rusnok insa koma, beda rua rijeka gu Yesus efen ruforoker oida, "Teinefa fogora yeyin Guru koma enet maat morototuma jera rua ongga runghoturu pajak jera rua enjgineg tein ongga erek oska erek komo?" 17 Yesus eg, tina rua rinjeka erek koma, jefeda Ofa agot gu Guru-Guru agama insa koma oida, "Rusnok ongga riskeiramera bera runois gu dokter guru. Tina rusnok ongga marenir ojgomu bera rumois gu Dokter. Erek koma tein Didif dinen skoita rusnok ongga rusujohu rot oida risinsa rudou bera erek ebsi komowa fob guru. Tina Didif din jeskaseda dita eiteij ah ongga efeinah gu rusnok ongga rusujohu rot oida rerin mar ongga oska enah gij rudou efesi ojgomu." 18 Gij mona insa koma bera rua ongga ruroru Yohanes Pembaptis jera rua ongga ruroru ebic Farisi tein rinet maat nou mona juens guru, tina gij mona insa koma rua rum riteij gu Allah ojgomu. Jefeda rusnok rineya rin skoita Yesus noba rijeka gu Ofa oida, "Rusnok ongga ruroru Yohanes Pembaptis jera rua ongga ebic Farisi gij mona juens bera rinet maat guru, tina rua rum riteij gu Allah ojgomu. Teinefa fogora ruforoker ongga ruroru Akeina bera rineita mar erek koma tein guri?" 19 Beda Yesus agot mar ongga orocunc gu rua oida, "Gij mona ongga rusnok rumohoturuma rot osnok egens ongga oskotu arja, beda rua rit maat morototuma noba rifaga ouka rot ojgomu. 20 Tina gij mona ongga rusnok enjgineg ragei igers insa koma jeska rua fob, beda rusnok koma rudou okum noba rinet maat jera rinej mei erek insa koma deika guru, jeska rudou okumkum rot ojgomu. Erek koma tein, gij mona ebeibeyaif bera Didif dingker jera dedin ruforoker ros, jefeda rua rit maat jera rij mei tein jeska rudou efaga ouka ros." 21 Beda Yesus agot mar egens deika ongga erek orocunc gu rua oida, "Rusnok rineb meifeti ongga efeinah jera meifeti ongga efeyei guru. Jeska meifeti ongga efeinah koma emegrina meisoufa ongga efeyei insa koma fogora emebga eteb deika. 22 Erek koma tein anggur efei ongga efeinah bera runotkinaja gij mesina kambing ofos ongga efeyei guru. Jeska anggur efei ongga efeinah koma emefifij gij mesina kambing ofos ongga ekirsa insa koma. Beda mesina koma emecka rot, noba anggur insa koma omotkinaja jeska. Noba mesina ongga efeyei koma emeja erek oska efekeifa rot tein ojgomu. Jefeda anggur efei ongga efeinah bera rutkinaja gij mesina kambing ofos tein ongga efeinah ojgomu. Erek koma tein rot mar ongga efeinah ongga Didif duftuftu rot." 23 Gij mona ongga Sabat egens bera Yesus jera efen ruforoker rirabj mekeni gandum egens. Askesi rua rirabj mekeni egens insa koma beda Ofa efen ruforoker rigib gandum efej noba rit oskiyai. 24 Jefeda rusnok ongga ebic Farisi rineya ragot gu Yesus oida, "Teinefa fogora bebin ruforoker koma rikirsa rot mar ongga mifmin agama erebent eyahehir joug erek komo? Jeska erebent koma agot oida gij mona ongga Sabat bera minefarur gij mar egema tein guru. Noba mar ongga rua runtunggom koma bera erek rifarur ojgomu." 25 - 26 Beda Yesus agot gu rua oida, "Mar ongga iwa isujohu rot bera erek tenten guru. Iwa ik rot mar egens gij Mar Efeyi Ebsi ongga emfesij rot osok gij meidu ongga Daud ontunggom gij mona ongga ofa jera efen ruforoker mosona ongkir. Jeska gij mona ongga Abyatar erek imam ongga ofoka aksa, beda Daud oira gij mod ongga imam-imam rum riteij gu Allah gij. Beda ofa et roti ongga imam-imam sismeni rira nou rurougif gu Allah fob. Beda ofa eita roti insa koma gu efen ruforoker tein. Tina mifmin agama erebent agot oida imam-imam risinsiyai bera rit roti insa koma ojgomu. 27 Erek koma tina Daud jera efen ruforoker bera rineita mar ongga oska guru. Jeska Allah ontunggom mona ongga Sabat jeskaseda ofij rusnok rot ojgomu. Mona ongga Sabat koma bera onofoufem ekirsa jeska rusnok guru. 28 Jefeda Didif, Rusnok Efesa, disinsiyai dedin owesa efek jeskaseda dagot rot mar meidu ongga dedin rusnok runtunggom gij mona ongga Sabat ojgomu."
