Markus 16

1Gij mona cinja erfens erek moworu beda mona ongga Yahudi rugif gu Allah oisa fob. Jefeda Maria jeska kota Magdalena ni, Maria ongga Yakobus efen mosu ni, jera Salome rijengk ariawun ongga efen ensesa jeskaseda ruros Yesus efaga jeni Yahudi erebent. 2Noba gij mona rahah tentena deika, beda rujager insa koma rurka ariawun ongga efen ensesa insa koma jah mamu efesi ongga Yusuf ensah Yesus efaga gij. 3Askesi rua rincira jah suma, beda rua rifesij moguma oida, "Idu bera omofij mimif jeskaseda mukora mamu ongga eteb koma ongga orof joug moksu rot Yesus?" 4Nou ongga rua rinjesaga jah suma fob, beda rua rik, tina mamu eteb koma bera onof joug mamu efesi deika guru fob. Noba rua rudou oubsaha rot jeska mamu koma bera okum eteb doska. 5Beda rua ruira gij moksu insa koma noba rua rik orna egens ongga eker jah ognosk. Ofa ergi meisoufa ongga ebsi komowa. Jefeda rua rudou oubsaha rot ofa. 6Beda orna egens insa koma agot gu rua oida, "Iwa idou onoubsaha rot guru. Iwa yuhca Yesus ongga ojga jeska kota Nazaret, tina Ofa onofogu jah sif deika guru. Jeska rusnok runtob Ofa tumu mega salib fogora agos fob, tina ebeibeyaif bera Ofa efena ebah sons deika fob. Iwa ik, jeska neeka rua raha efen efaga jah sif. 7Tina iwa ija skoita Petrus jera Yesus efen ruforoker enjgineg tein, noba yagot gu rua oida Yesus eja okag rot rua gu monuh Galilea fob. Beda rua rimek Ofa jah suma jeni erek Ofa anggot gu rua sis fob tein. 8Jefeda rujager insa koma rufof jeska Yesus odog rot rudou ongga eineina gij noba rimeesa eteb rot tein. Askesi rua rufof jeska, beda rua rinagot mar gu rusnok enjgineg enesi, jeska rua rimeesa rot mar ongga rua ringk insa koma." 9Nou mona ongga Sabat oisa fob, beda Yesus efena ebah sons jeska agos. Beda gij mona insa koma Ofa ojocunc esinsa gu Maria ongga ojga jeska kota Magdalena. Sis fob Yesus ekemeji efena ofogog erek rufok cinja erfeka jeska ofa odou efesi. 10Nou ongga Maria engk Yesus, beda ofa eja skoita Yesus efen mohujir ongga rudou oubsaha noba ribisa ros. Noba ofa efesij gu rua rot teinefa ofa engk Yesus gij mona insa koma. 11Tina rua rudou onororu rot oida Yesus bera efena ebah sons deika guru. Noba rua ragot sons gu Maria oida, "Ah! Bua binek Ofa rot tenten guru." 12Beda Yesus, ongga ebeibeyaif osum eja erek toga fob, bera orogna keingg efen mohuj gegeka askesi goga gecira jah monuh enjgineg ros. Beda Ofa ecira morototuma jera goga. 13Noba gij mona ongga goga goksons jah kota Yerusalem, beda goga gefesij gu Yesus efen mohujir rot oida goga gek Ofa jah gu semfag fob. Tina rudou onororu mar ongga goga ganggot rot insa koma tein guru. 14Dektek deika guru, beda Yesus orogna keingg efen ruforoker rufok setka kungkob erfens askesi rua rit maat morototuma ros. Beda Ofa etaha joug rua jeska rudou ombrera ojgomu noba runororu oida Ofa efena ebah sons guru. Yesus etaha joug rua erek koma jeska rua runororu mar ongga rusnok insa koma ongga rik Ofa ranggot rot gu rua guru. 15Beda Ofa agot gu rua oida, "Iwa ija gu monuh nomnaga, noba ifesij rot Allah oga ongga oufamofa gu rusnok ebic nomnaga. 16Noba erek rusnok ruroru oga ongga oufamofa insa koma noba rita baptis tein, beda Allah omoskotu rua jeska rerin mar ongga oska. Tina erek rusnok runororu oga ongga oufamofa insa koma guru, beda Allah omofra mar okum eteb keingg rua ojgomu. 17Beda rusnok ongga rudou ororu oga ongga oufamofa insa koma bera rumotunggom mar ongga onswos eteb. Koma erek, oisouska dufoka bera rua rimekemeji efena ofogog jeska rusnok rudou efesi ni, rua rimefesij mar gij oga ongga risinsa rinejginaga rot efen ofou tein guru ni, 18erek magosu womfieda eska rua, era erek rua rij memnei efei, beda maren rua guru noba rua rinagos rot jinaga guru ni, rua rimaha rerin ritma esij rusnok ongga marenir jeskaseda Allah eita eskeira gu rua, beda rusnok insa koma rimeskeira ni." 19Nou ongga Yesus anggot mar insa koma gu efen ruforoker oisa fob, beda Allah ofra Ofa jah mebaga. Beda Ofa eker desi Allah fogora esma ofoka ongga aksa eteb tein. 20Beda Yesus efen ruforoker rija jeska Yerusalem noba rifesij rot oga ongga oufamofa insa koma gu monuh suma suma. Noba askesi rua rifesij rot oga ongga oufamofa insa koma, beda Tuhan ofij rua fogora rua rutunggom mar ongga onswos jah gu rusnok rifekesa jeskaseda orocunc rot gu rusnok insa koma oida mar ongga rua rimfesij rot bera erek tenten ojgomu. Ainsoma.

will be added

X\