1 Gij rahah tentena beda ebirfager imam-imam Yahudi ni, ebirfager rusnok Yahudi ni, Guru-Guru agama ni, jera imam-imam enjgineg tein ongga rufoka aksa ni rumohoturuma jeskaseda ruga ojga rot mar meidu ongga rua rumotunggom skoita Yesus. Jefeda rua rirakid Yesus etma, beda ruroun Ofa skoita Pilatus ongga erek Gubernur nou monuh Yudea koma. 2 Beda Pilatus ejeka gu Yesus oida, "Bua bera erek raja ongga ofoka ereij keingg rusnok Yahudi ei era gurei?" Beda Yesus agot gu ofa oida, "Didif bera raja erek bua banggot rot." 3 Beda ebirfager imam-imam Yahudi ragot oida Yesus bera otunggom mar ongga oska ofoukou. 4 Jefeda Pilatus ejeka gu Ofa deika oida, "Bua binagot mar rot bisinsa gurei? Bua big rot mar ongga oska ofoukou ongga imam-imam kef ranggot osok gij bua fob." 5 Tina Yesus onoroun mar sons rot guru. Jefeda Gubernur Pilatus odou oubsaha rot koma ojgomu. 6 Gij orofosut mona ongga rusnok Yahudi ruina maat nou mona ongga Paskah bera Pilatus osuwa osnok egens ongga rusnok Yahudi rirejgei ofa rot jeska mod oskusk. 7 Sis fob tentarer raha osnok egens ongga ofoka Barsabas jera rusnok enjgineg gij mod oskusk. Rua rutunggom mar erek koma jeska Barsabas jera efen rusnok ruis mosuruk ofoka skoita raja Kaisar ongga rufoka ereij keingg monuh Yudea. Noba rua tein ragob rusnok enjgineg. 8 Erek koma jefeda rusnok Yahudi rufoukou rin skoita Pilatus noba rirejgei ofa jeskaseda ofa osuwa osnok egens jeska mod oskusk erek giskini. 9 Jefeda Pilatus agot gu rua oida, "Didif dumosuwa osnok egens insa koma ongga agot oida Ofa bera raja Yahudi skoita iwa." 10 Pilatus agot erek koma jeska ofa ejginaga rot oida ebirfager imam-imam Yahudi ongga ranggei Yesus bera rudou ejisei rot Ofa. 11 Tina ebirfager imam-imam insa koma rusos rusnok rufoukou jah suma jeskaseda rua ruis gu Pilatus rot oida ofa osuwa Barsabas ojgomu. 12 Beda Pilatus agot oida, "Erek didif dusuwa Barsabas beda didif dutunggom mar meidu rot osnok egens kef ongga iwa injeka erek raja ongga ofoka ereij keingg rusnok Yahudi?" 13 Tina rua ruis gu ofa oida, "Butob Ofa tumu mega salib ojgomu!" 14 Beda Pilatus agot gu rua oida, "Memef motob Ofa tumu mega salib rot meidu? Ofa eita mar ongga oska erek meidu?" Tina rua ruis rot ruga eteb ekirsa oida, "Butob Ofa tumu mega salib ojgomu!" 15 Pilatus odou os otunggom mar ongga eita rusnok rufoukou insa koma rudou eskeira rot, jefeda ofa osuwa Barsabas jeska mod oskusk gu rua. Beda ofa aha Yesus gu efen tentarer jeskaseda rangha Ofa fogora rutob Ofa tumu mega salib. 16 Erek koma beda tentarer insa koma ruroun Yesus gu momas ongga angh gu mod ongga Gubernur Pilatus engker gij. Beda rua ruhoturu tentarer rineya jah suma tein. 17 Beda rua raha meifeti ongga erek raja efen tumu Yesus. Beda rua rira marfeb egens ongga efen ofogog doska fogora rirajgej Yesus ebirfaga erek rirahaisomu rot Ofa. 18 Rua rirahaisomu rot Ofa erek koma fogora ruis oida, "Oufamofa eteb gu Bua ongga bufoka ereij keingg rusnok Yahudi erek raja." 19 Noba rua rira moskur rurobu Ofa gu ebirfaga noba ruskurfi keingg Ofa tein. Beda rua ris rukeibi gu mebi noba rugif gu Ofa erek rirahaisomu rot oida Ofa erek raja. 20 Nou ongga rua rutunggom mar erek insa koma oisa fob, beda rua rikris meifeti ongga ongkoska insa koma jeska Ofa. Beda rua rita Ofa efen meifeti sons noba rurohrus Ofa jeska kota koma jeskaseda rutob Ofa tumu mega salib. 21 Askesi rua ruroun Yesus jeskaseda rutob Ofa tumu mega salib, beda rua rurodosu osnok egens ongga ofoka Simon gu moroju. Ofa bera Alexandar jera Rufus gegan meka ongga ojga jeska kota Kirene. Gij mona insa koma bera ofa oksons en jah kota Yerusalem jeska monuh enjgineg. Nou ongga tentarer rik ofa beda rua riradgodu ofa jeskaseda ofa orka mega salib ongga ai juens runtob Yesus tumu. 22 Tentarer insa koma ruroun Yesus gu monuh egens ongga ofoka, "Golgota." 23 Beda rua rita anggur efei ongga rugun ariawun ongga ofoka mur gij gu Ofa, tina Ofa enej guru. 24 Beda rua rutob Ofa tumu mega salib. Nou ongga koma oisa fob beda rua ruku mofka jeskaseda orocunc rot idu ongga emesma Yesus efen meisoufa. Beda rua rikeba Yesus efen meisoufa erek insa koma dogdog moguma. 25 Rua runtob Ofa tumu mega salib gij rahah erek aras cinja tohkuru. 26 Beda rua rugu mar tumu mega salib insa koma jah skida Yesus ebirfaga. Mar ongga rua runggu bera osok gij mar ongga runtob Ofa rot erek kef: "" 27 Noba rua tein runtob gosnok gegeka ongga goukoreka mar morototuma jera Yesus jah suma. Rua runtob gegema jah Ofa ognosk noba gegema jah Ofa egris. 28 ((Jefeda oisouska mar koma bera mar ongga runggu gij Mar Efeyi Ebsi sis fob angh gij efera fob. Jeska sis eteb fob nabi-nabi runggu mar rot Yesus oida rusnok rusujohu rot oida Ofa tein bera erek rua ongga rufogog.)) 29 Rusnok ongga rirabj jah suma rik Yesus noba ruga oruh Ofa oida, "Sis fob bera Bua bagot rot oida Bua bumohoda Mod Allah ongga eteb doska, noba gij mona orgomu deika beda bimei mod insa koma deika sons si! 30 Erek Bua busujohu rot oida bebin owesa efek eteb erek koma, jefeda bucunc rot erek koma ojgomu fogora busuwa bisinsa jeska mega salib kef ojgomu!" 31 Erek koma tein ebirfager imam-imam Yahudi ragot mar ongga oska rot Ofa moguma oida, "Sis fob bera rusnok ragot oida Ofa onskotu rusnok rufoukou jeska rerin mar okum, tina Ofa onoskotu esinsa jeska efen mar okum kef guri." 32 Beda rua ragot gu Ofa oida, "Bua bagot oida bua bera Kristus ongga Allah omobk erek raja jeskaseda ofoka ereij keingg mimif ongga Yahudi. Jefeda busuwa bisinsa jeska mega salib kef jeskaseda orocunc rot mar insa koma ojgomu. Beda memef modou omororu Bua si." Noba gosnok gegeka insa koma ongga runtob tumu mega salib desi Ofa tein goga oruh Ofa. 33 Gij mona insa koma erek mowa ot deis onjoros moworu beda mebaga eja erek motkobah. 34 Beda gij aras insa koma tein Yesus ois rot oga eteb oida, "Eloi, Eloi, lama sabakhtani?" Koma efen ofou oida, "Akeina Allah, teinefo fogora Bua baha Didif igef jah erek kefo?" 35 Erek koma beda rusnok ongga runt doida Yesus rig Ofa agot mar erek insa koma. Jefeda rua ragot oida, "Ofa ois mar gu nabi Elia!" 36 Beda orna egens eja ebeirens jeskaseda ejeita anggur efei ongga ekemba. Ofa ec moskur gij anggur efei insa koma noba osk moskur koma rot gu Yesus awesi jeskaseda Ofa omna oskiyai. Beda osnok egens enjgineg deika agot oida, "Mimif miker ai juens jeskaseda mik oida nabi Elia emen fogora omosuwa Ofa jeska mega salib ei era gurei." 37 Erek koma beda Yesus ois mar rot oga eteb beda agos. 38 Ainsa koma tein meifeti aksa ongga rusnok rimf joug montoj gij Mod Allah efesi bera ebga jeska skida onjoros degini fob. 39 Tentarer efen ebirfaga egens onot jah Yesus odou. Nou ongga ofa eg Yesus ois mar rot oga eteb erek insa koma noba agos beda ofa agot oida, "Osnok egens kef bera Allah efen efesa rot tenten ojgomu." 40 Rujager rut ai yes jah suma noba rik mar insa koma. Rineya jeska rua bera Maria jeska kota Magdalena ni, Maria enjgineg ongga Yakobus jera Yoses gegan mosu ni, jera Salome ni. 41 Sis fob rujager rugomu insa koma ruroru Yesus rejrej monuh Galilea jeskaseda rufij Ofa rot mar. Noba rujager rufoukou enjgineg tein ongga ruroru Yesus jah kota Yerusalem rut ai yes jah suma noba rik mar insa koma tein. 42 Rusnok runtob Yesus tumu mega salib gij mona ongga cinja insa koma. Noba gij mona insa koma tein rusnok Yahudi risejah mar ororu rerin agama erebent jeskaseda rugif gu Allah nou mona ongga cinja erfens. 43 Jefeda nou moworu beda osnok egens ongga ofoka Yusuf ongga ojga jeska kota Aramatea en jah suma. Ofa jeska ebic rusnok Yahudi egens ongga rerin rufoka aksa, noba rusnok rufoukou rugif gu ofa tein. Ofa tein omom odou efesi rot mona ongga Allah omobk raja egens koma ongga omofoka ereij keingg rusnok Yahudi. Ofa oku ofos fogora eja skoita Gubernur Pilatus. Beda ofa erejgei Pilatus jeskaseda erek ofa oitij rot beda Yusuf edaga Yesus efaga jeska mega salib fogora esah gij moksu. 44 Erek koma beda Pilatus odou oubsaha rot oida Yesus agos fob. Jefeda ofa ois gu efen ebirfaga tentarer ongga runtob Yesus tumu mega salib jeskaseda en skoita ofa. Beda Pilatus ejeka gu ofa oida, "Yesus agos tenten fob ei era enesei." 45 Nou ongga ebirfaga tentarer egens insa koma agot gu Pilatus oida Yesus bera agos rot tenten fob, beda Pilatus oitij rot mar ongga Yusuf erejgei ofa rot. 46 Erek koma jefeda Yusuf orka meifeti jah monuh ongga rusnok runtob Yesus tumu mega salib gij. Beda ofa edaga Yesus efaga jeska mega salib noba era meifeti insa koma orond efen efaga. Beda ofa esah Yesus efaga gij moksu ongga erek mamu efesi ongga rusnok runtunggom sis fob. Beda ofa okoja mamu ongga eteb doska keingg jeskaseda orof joug mamu efesi insa koma. 47 Maria ongga ojga jeska kota Magdalena jera Maria ongga Yoses efen mosu gek Yusuf esah Yesus efaga gij mamu efesi insa koma tein.
