Markus 14

1Gij mona egeka deika beda mona ongga Paskah jera mona ongga rusnok rit roti ongga enefifij guru bera emesaga. Gij mona insa koma bera ebirfager imam-imam Yahudi jera Guru-Guru agama ruhca moroju erek wuswus jeskaseda ragei Yesus fogora ragob Ofa. 2Tina rua ragot moguma oida, "Minagei Ofa askesi mona ongga Paskah enesi. Jeska erek magei Ofa gij mona insa koma, beda rusnok rumotkonu oska eteb skoita mimif rot." 3Erek koma beda, askesi Yesus engker gu kota Betania ros, beda Ofa eja gu mod egens ongga osnok egens ongga ofoka Simon efen. Simon koma bera ongga maira et ofos sis fob. Askesi Yesus et maat gij mod insa koma ros, beda ojaga egens en skoita Ofa. Ofa orka fanin egens ongga ebera rot miniyi ongga efen ensesa. Miniyi koma bera efen efera osok eteb. Ofa ohoda fanin insa koma beda otkinaja miniyi koma nomnaga esij Yesus ebirfaga. 4Rusnok egema ongga ringker jah suma rik mar koma ongga ofa ontunggom, jefeda rua ragot rot rusum oskusk oida, "Teinefa fogora ofa otkinaja miniyi ongga efen efera osok eteb rourou erek komo. 5Jeska miniyi insa koma bera efen efera osok ojgomu morototuma erek osnok egens efen ofons nou tahun egens. Ongga oufamofa bera ofa ohu miniyi koma noba fifi ongga ofa emesma rot bera ekeba gu rusnok ongga rufojingki ojgomu. Tina ofa eneita erek koma guri." Jefeda rua ritaha joug ofa rot mar ongga ofa ontunggom insa koma. 6Beda Yesus agot gu rua oida, "Teinefa fogora iwa inagot mar gu ofa erek komo. Iwa ineita erek koma guru. Mar ongga ofa ontunggom insa koma gu Didif bera erek ongkoska eteb. 7Rusnok ongga rufojingki bera riker jera iwa ojgomuja. Noba erek idou os, beda yufij rua rot mar ongga rua rucosu rot ojgomu. Tina Didif dineker morototuma jera iwa ojgomuja guru. 8Jefeda ofa otunggom mar ongga ofa efen owesa efek adaij rot ojgomu. Noba mar koma bera erek oufamofa tein ojgomu. Jeska ororu mifmin erebent bera ofa otkinaja miniyi insa koma jeskaseda esejah difaga nou mona ongga danggos fogora rusnok rimesah difaga gij moksu. 9Ongga tenten bera, gij mona ongga rusnok rifesij osok gij Allah oga ongga oufamofa rejrej mebif, beda rua rimefesij rot mar ongga ojaga egens kef ontunggom gu Didif tein. Jefeda rusnok rufoukou rimejginaga rot ofa tein." 10Koma oisa fob beda osnok egens jeska Yesus efen ruforoker rufok setka kungkob erfeka ongga ofoka Yudas Iskariot orogna wuswus noba eja skoita ebirfager imam-imam Yahudi. Ofa eja skoita rua jeskaseda efesij gu rua rot teinefa ofa emekikif jeska Yesus fogora emaha Ofa gu rua. 11Nou ongga rua ringg mar insa koma fob beda rudou eskeiramera eteb rot. Jefeda rua ragen gu Yudas oida erek ofa eita mar insa koma, beda rua rumoh fifi eteb gu ofa rot si. Jefeda Yudas osujohu gij odou efesi rot teinefa ofa emaha Yesus gu ebirfager insa koma. 12Mona eteb ongga rusnok Yahudi rit roti ongga enefifij guru jera riris domba efer egens jeskaseda eisisi keingg risinsa rot mona ongga Allah oskotu rerin rimower jeska mar ongga ofogog bera ensaga fob. Jefeda Yesus efen ruforoker ragot gu Ofa oida, "Memef meja jah guaidu jeskaseda mesejah maat koma ongga mimif mint morototuma gij mona ongga Paskah?" 13Jefeda nou ongga Yesus omobk efen goforoka gegeka beda Ofa agot gu goga oida, "Goga goira gij kota Yerusalem. Jah suma bera goga gomorodosu osnok egens ongga orka meic rot mei. Beda goga gororu Ofa ojgomu. 14Nou ongga ofa oira gij mod egens beda gagot gu osnok egens ongga efen mod insa koma oida, 'Guru ejeka oida morongsu ongga Ofa jera efen ruforoker rimet maat gij nou mona ongga Paskah bera sinefo.' 15Beda osnok egens insa koma omocunc morongsu eteb egens ongga angh skida gu goga. Morongsu insa koma bera ofa ensejah nou mingker gij. Jefeda goga goina maat jah suma jeskaseda mimif mint ojgomu." 16Erek koma jefeda goforoka gegeka insa koma geja jah kota Yerusalem. Nou ongga goga gensaga jah suma fob, beda goga gek mar nomnaga jeni erek Yesus anggot gu goga. Beda goga gesejah maat rot mona ongga Paskah jah suma. 17Gij motu insa koma beda Yesus jera efen ruforoker rufok setka kungkob erfeka rinsaga gu mod egens insa koma fob. Beda rua rusok gu morongsu ongga angh skida. 18Askesi rua rint maat jah suma ros, beda Yesus agot oida, "Didif dagot rot tenten gu iwa oida osnok egens jeska iwa bera odou emekikif jeska Didif. Ofa bera osnok egens jeska iwa ongga et maat morototuma jera Didif jah sif." 19Rua rudou okora rot mar ongga Yesus anggot insa koma, noba rua orofosutut egens egens ragot gu Ofa oida, "Akeina, didif dineita mar erek koma rot Bua guru!" 20Beda Yesus agot oida, "Osnok egens koma ongga emekikif jeska Didif bera osnok egens jeska iwa ifok setka kungkob erfeka ifekesa ongga ec roti gij mok osku kef jera Didif. 21Ongga tenten bera Didif, Rusnok Efesa, dimagos jeni erek mar ongga nabi-nabi runggu rot gij Mar Efeyi Ebsi sis fob. Tina mar okum eteb emah keingg osnok egens koma ongga odou ekikif jeska Didif ongga Rusnok Efesa. Ongga tenten bera, oufamofa ekirsa erek ofa efen mosu onojuj rot ofa sis fob guru. Jeska ebeibeyaif ofa emesma mar okum eteb rot mar ongga ofa omotunggom si." 22Askesi rua rint maat ros, beda Yesus eita roti ofog egens noba oisa oufamofa gu Allah rot. Beda Ofa etka roti insa koma noba ekeba dogdog gu efen ruforoker. Beda Ofa agot gu rua oida, "Iwa ita roti kef. Jeska roti kef bera erek dedin difaga ongga dimaha gu rusnok ongga rufogog nou iwa." 23Beda Ofa eita mok osku rot anggur efei noba ois oufamofa gu Allah rot. Beda Ofa eita mok osku egens koma gu rua jeskaseda orofosutut osnok egens egens ej anggur efei morototuma jera Ofa. 24Beda Ofa agot gu rua oida, "Anggur efei ongga angh gij mok osku kef bera erek dedin dugufu ongga emeya nou rusnok rufoukou. Noba koma orocunc rot mona efeinah ongga Allah anggen eimofoj rot sis fob jeskaseda omoskotu rusnok jeska rerin mar ongga oska. 25Ongga tenten bera, Didif dinej anggur efei deika guru onjoros mona ongga efeinah insa koma. Gij mona insa koma bera Allah omofoka ereij keingg rusnok rot owesa efek. Noba gij mona insa koma bera dimej anggur efei ongga erek efeinah deika." 26Nou ongga rua ruf medemer morototuma oisa fob, beda rua rija jah memaga ofos egens ongga ofoka Zaitun Efeda. 27Beda Yesus agot gu efen ruforoker oida, "Didif dijginaga rot oida gij mona ongga rusnok ongga rufogog rutunggom mar ongga oska skoita Didif, beda iwa nomnaga imaha Didif jah fogora imoku jeska. Jeska nabi-nabi runggu gij Mar Efeyi Ebsi rot mar ongga Allah anggot rot sis fob osok gij mona insa koma. Rua runggu oida, 'Didif duitij rot oida rusnok ragob gembala egens ongga ont joug efen domba-domba. Beda efen domba-domba insa koma riberbera suma suma.' 28Tina gij mona ongga Didif didebecki jeska danggos fob, beda Didif dumokag rot iwa noba dumorodosu iwa gij monuh Galilea." 29Beda Petrus agot gu Yesus oida, "Erek bebin ruforoker kef nomnaga ruku, tina didif bera dunoku jeska Bua erek koma jinaga guru." 30Beda Yesus agot gu ofa oida, "Petrus, gij motu insa kef bera nou ongga mongkukar orna onoga rot ofosma jueka enesi, beda bua bisinsa bumorot keingging gu rusnok rot ofosma juomu oida bua binejginaga rot Didif guru." 31Tina Petrus oroun gu Yesus rot ahais oida, "Akeina, erek rusnok ragob didif morototuma jera Bua, beda didif dunorot keingging oida dinejginaga rot Bua erek koma jinaga guru." Noba ruforoker ongga enjgineg nomnaga bera ragot mar erek koma tein. 32Erek koma beda, Yesus jera efen ruforoker rija jah mekeni egens ongga ofoka Getsemani. Mekeni insa koma bera angh degini memaga Ofos Zaitun Efeda. Beda Ofa agot gu efen ruforoker oida, "Askesi Didif dum diteij gu Allah ros beda iwa iker jah sif." 33Beda Ofa oroun Petrus ni, Yakobus ni, jera Yohanes morototuma jera Ofa. Gij mona insa koma bera Ofa odou efeneinei noba odou okum eteb tein rot mar ongga emeita efera okora eteb gu Ofa. 34Beda Ofa agot gu ruforoka rugomu insa koma oida, "Dudou okum eteb doska onjoros erek dimagos rot ojgomu. Jefeda iwa iker jera Didif jah sif noba inohnoha jeska Didif guru." 35Ofa ecira oskiyai deika beda odou orohu mebi. Beda Ofa om eiteij gu Allah jeskaseda erek Allah oitij rot beda mar okum koma bera enah keingg Ofa guru. 36Ofa om eiteij oida, "Akeina, Bua bebin owesa efek jeskaseda butunggom mar meidu ongga Bua budou os rot ojgomu. Jefeda bita mar okum kef ongga dimeita difera okora rot jeska Didif ojgomu. Noba Bua bunotunggom mar ongga Didif disinsa dudou os rot guru. Tina Bua butunggom mar jeni Akeina bisinsa budou ejginaga rot ojgomu." 37Beda Yesus oksons skoita efen ruforoker rugomu insa koma, tina rua rah ahaingkongka ojgomu fob. Beda Ofa agot gu Petrus ongga ofoka Simon tein oida, "Simon, bua binahca erek koma guru. Erek bineker jera Didif rot ai juens ojgomu tein gurei." 38Beda Ofa agot gu ruforoker rugomu insa koma oida, "Iwa inahca guru, tina yum iteij gu Allah ojgomu jeskaseda inesiri gu mar ongga ereneni iwa guru. Erek iwa idou os ita mar ongga Didif danggot ainsa kef, tina yeyin owesa efek bera enadaij rot guru." 39Beda Yesus ejeker gu esinsa noba om eiteij gu Allah juens deika osok gij mar ongga Ofa om eiteij rot insa koma. 40Nou ongga Ofa ongksons skoita efen ruforoker insa koma deika beda Ofa ek, tina rua rahca ahaingkongka deika jeska rufonskos eteb. Rua rusowu deika tina rua riker toumou ojgomu jeska mojen rua rot. 41Beda Yesus eja noba om eiteij gu Allah juens deika. Tina nou ongga Ofa ongksons skoita rua deika, beda Ofa ek, tina rua rahca ahaingkongka deika. Beda Ofa agot gu rua oida, "Teinefa fogora iwa inahca erek koma ros. Iwa idebecki ojgomu. Jeska mona ongga Allah oncunc nou Didif bera enesaga fob jeskaseda Didif dita difera okora. Iwa ik, jeska ai juens beda osnok egens ongga odou ekikif jeska Didif, Rusnok Efesa, bera emaha Didif gu rusnok ongga rufogog. 42Jefeda iwa idebecki ebeirens! Jeska osnok egens insa koma bera enesaga fob." 43- 44Sis fob Yudas Iskariot bera erek oforoka egens jeska Yesus efen ruforoker rufok setka kungkob erfeka insa koma. Ofa agot gu rusnok ongga rimagei Yesus rot oida, "Osnok egens ongga didif dunsa, ofa bera ongga iwa yagei. Noba iwa yurka yeyin meiteb tein fogora irohrus Ofa skoita ebirfager imam-imam." Jefeda askesi Yesus agot mar insa koma gu efen ruforoker ros, beda Yudas enesaga jah suma fob. Noba rusnok rufoukou ongga rurka rerin meiteb jera moskur bera rin jah suma morototuma jera ofa. Ebirfager imam-imam Yahudi jera Guru-Guru agama jera ebirfager rusnok Yahudi bera ongga rubk rusnok insa koma morototuma jera Yudas. 45Nou ongga Yudas ensaga jah suma fob, beda ofa ecira aharuka skoita Yesus noba agot gu Ofa oida, "Akeina Guru." Beda ofa onsa Yesus omnu. 46Jefeda rusnok rufoukou insa koma ragei Yesus rot ahais ojgomu. 47Beda Yesus efen oforoka egens ongga ont desi Ofa bera eita efen meiteb noba agob osnok egens ongga omfij ebirfager imam-imam Yahudi fogora eris efen osu enama jeska. 48Beda Yesus agot gu rusnok insa koma oida, "Teinefa fogora iwa yurka yeyin meiteb jera moskur jeskaseda iragei Didif erek komo! Jeska Didif bera dinerek osnok egens ongga ofogog guru. 49Gij mona ofoukou bera Didif duftuftu mar gu rusnok gij momas ongga angh rejrej Mod Allah, tina iwa inagei Didif jah suma guri. Tina mar ongga iwa intunggom ainsa kef bera jeskaseda mar ongga nabi-nabi runggu gij Mar Efeyi Ebsi osok gij Didif sis fob bera emah gij efera ojgomu." 50Beda Yesus efen ruforoker nomnaga rimaha Ofa jah fogora ruku jeska. 51- 52Gij mona insa koma tein bera oforoka efes egens ororu Yesus gu ejmeg. Ofa ergi meifeti ongga erek efen meisoufa ojgomu. Beda rusnok insa koma ragei ofa rot meifeti tein, tina meifeti insa koma esiri jah fogora ofa esa etma rotir noba oku jeska rua rot ojgubaga ojgomu. 53Erek koma beda rusnok insa koma ruroun Yesus gu mod ongga ebirfaga imam-imam Yahudi egens ongga ofoka aksa eteb engker gij. Noba ebirfager imam-imam Yahudi ni, ebirfager rusnok Yahudi ni, jera Guru-Guru agama ni, rumohoturuma gij mod egens insa koma. 54Petrus tein otoij Yesus erek ai yes. Beda ofa oira gij momas ongga angh rejrej mod insa koma. Beda ofa ot doida mah morototuma jera tentarer ongga runt joug mod insa koma jeskaseda efa etma nou mah. 55Ebirfager imam-imam Yahudi jera ebirfager Yahudi rineya tein ruhca rusnok ongga rimagot rot oida rua rik Yesus otunggom mar ongga oska sis fob fogora ebirfager koma rimagob Yesus rot. Tina rua rinek osnok egens egema tein ongga agot mar insa koma rot koisoisa jinaga guru. 56Jeska rusnok rufoukou ragot rourou oida rua rik Yesus otunggom mar ongga oska sis fob. Tina mar ongga rua ranggot rot insa koma bera erek toga jeska mar ongga rusnok enjgineg ranggot rot Yesus. Jefeda koma bera orocunc rot oida rua nomnaga rucuwei mar ojgomu. 57- 58Rusnok rineya ongga rucuwei mar ragot oida, "Sis fob memef meg Yesus agot oida, 'Gij mona orgomu beda Didif dumohoda Mod Allah kef ongga rusnok ri fob. Beda gij mona orgomu deika bera Didif dimei Mod Allah egens koma deika ongga rusnok rinei jinaga guru.' " 59Tina mar ongga rusnok insa koma ranggot bera erek toga jeska mar ongga rusnok enjgineg ranggot rot osok gij mar insa koma. 60Beda ebirfaga imam-imam Yahudi egens ongga ofoka aksa eteb ojot jah rusnok rudou noba agot gu Yesus rot odou oubsaha oida, "Teinefa fogora Bua bunoroun mar rot bisinsa gurei? Jeska rusnok insa kef bera ranggot rot mar ongga okum osok gij Bua ojgomuja." 61Yesus onotunggom mar ongga oska egema tein guru, tina Ofa onoroun mar sons gu rua insa koma guru. Ofa eker toumou ojgomu. Beda ebirfaga egens koma ejeka gu Yesus juens deika oida, "Bua bera Kristus ongga Allah, ongga ofoka aksa eteb, ejeka erek efen efesa ei era gurei?" 62Beda Yesus agot gu Ofa oida, "Didif bera Kristus. Noba bua bimek Didif, Rusnok Efesa, diker rot owesa efek desi Allah ongga efen owesa efek nomnaga. Noba bua bimek Didif dumojuj en jeska mebaga gij mocgoj ofog tein si." 63- 64Nou ongga ebirfaga egens koma eg Yesus agot mar erek koma fob, beda ofa ekris efen meifeti ongga ergi jeni rerin erebent agama Yahudi. Beda ebirfaga imam imam egens insa koma agot gu ebirfager rineya jah suma oida, "Minejeka gu rusnok enjgineg rot Ofa deika guru, jeska iwa ig Ofa agot oida Ofa bera erek egens jera Allah. Noba ororu mifmin hukum agama koma bera oska eteb! Jefeda iwa isujohu erek teinefa rot mar insa koma?" Jefeda ebirfager koma ruga ojga rot oida Ofa agos rot mar ongga Ofa anggot insa koma ojgomu. 65Beda rineya jah suma ruskurfi keingg Yesus. Noba rua rira meifeti rirajgej joug Yesus eiteij jeskaseda Ofa enek mar guru. Beda rua rubu Ofa fogora rirahaisomu rot Ofa oida, "Bua bera erek nabi egens ei, jefeda bagot gu memef rot oida idu bera ongga onobu Bua ainsa kef!" Beda rua ongga runt joug Mod Allah rikris Ofa jeska noba rubu Ofa rot ahais. 66Erek koma beda askesi Petrus engker gu momas ongga angh rejrej mod egens insa koma, beda ojaga egens ongga omfij ebirfaga imam-imam Yahudi ojot doida Petrus. 67Nou ongga ofa ek Petrus ot doida mah beda ofa orumba gij ofa osum noba agot oida, "Bua tein bera erek osnok egens ongga ororu Yesus insa koma ongga ojga jeska kota Nazaret!" 68Beda Petrus oroun oida, "Didif dinejginaga rot Ofa guru, noba dudou enebriyi gij rot mar ongga bua banggot insa kef tein guru." Beda ofa eja gu montoj momas koma. (Ainsa koma tein mongkukar orna egens oga fob.) 69Nou ongga ojaga egens insa koma ek Petrus ot doida montoj momas, beda ofa agot gu rusnok jah suma oida, "Isok egens kef bera erek osnok egens jeska rua ongga ruroru Yesus ongga ojga jeska kota Nazaret!" 70Beda Petrus agot juens deika oida, "Koma bera tenten guru!" Dektek deika guru, beda rusnok ongga rut doida Petrus jah suma ragot gu ofa oida, "Tenten, bua bera erek osnok egens ongga ororu Yesus insa koma, jeska bebin buga bera erek rusnok ongga ringker gij Yesus efen monuh Galilea." 71Beda Petrus agot rot ahais gu rua oida, "Didif dinejginaga rot Yesus koma guru! Noba erek didif ducuwei mar gu iwa rot mar insa koma, beda didif duis gu Allah jeskaseda Ofa ofra mar okum eteb keingg didif rot ojgomu!" 72Ainsa koma tein mongkukar orna oga ofosma juens deika. Beda Petrus odou ah keingg rot mar ongga Yesus anggot gu ofa rot sis fob oida, "Erek mongkukar onoga rot ofosma egeka enesi, beda bua bumorot keingging rot ofosma orgomu oida bua binejginaga rot Didif guru." Nou ongga Petrus ofos eciyi oida ofa eita mar koma jeni erek Yesus anggot rot sis fob, beda ofa ebisa eteb rot ojgomu.

will be added

X\