Markus 12

1Erek koma beda Yesus efesij mar gu ebirfager insa koma nomnaga ongga erek orocunc rot teinefa rusnok Yahudi rita mar ongga oska skoita nabi-nabi ongga ensis. Ofa agot oida, "Osnok egens erefa anggur efej gij efen mekeni egens. Beda ofa otunggom mejga mamu rejrej efen mekeni koma. Beda ofa eji mebi efesi jeskaseda esin keingg anggur efek insa koma gij mebi efesi fogora eita efei jeska. Beda ofa tein ei mod egens ongga aksa jeskaseda ot joug efen mekeni insa koma. Nou ongga mar koma oisa fob, beda ofa aha mekeni koma gu rusnok enjgineg jeskaseda riker joug ofa efen mekeni koma. Beda ofa ecira jah monuh egens ongga angh yes jeska. 2Gij mona ongga anggur efek insa koma ofom fob, beda ofa obk efen osnok egens ongga omfij ofa skoita rusnok ongga ringker joug mekeni insa koma jeskaseda eita anggur efek eneya jeska rua. 3Tina rua ongga ringker joug mekeni koma bera ragei ofa ojgomu. Beda rua rubu ofa noba obk ofa sons rot etma efesijg skoita ebirfaga egens insa koma. 4Erek koma noba gij mona ongga egema deika beda osnok egens ongga efen mekeni koma obk osnok egens egema deika skoita rua. Tina rua rubu ofa tein noba ruga oruh ofa. 5Erek koma beda ebirfaga egens insa koma obk osnok egens egema deika, tina rua ragob ofa ojgomu. Beda ebirfaga egens koma obk rusnok ongga rumfij ofa erek rufoukou deika, tina rusnok insa koma ranggob rineya noba rua rubu rineya. 6Beda ebirfaga egens insa koma efen efesa orna egens ongga ofa odou okora rot eteb. Ofa osujohu rot oida, 'Rusnok ongga ringker joug dedin mekeni bera rumougif gu dedin edesa orna egens kef si.' Jefeda ofa obk efen efesa egens koma tein skoita rua. 7Tina gij mona ongga efesa orna egens insa koma enjesaga gu mekeni koma, beda rusnok jah suma ragot moguma oida, 'Ofa bera ongga emesma mekeni kef gij mona ongga efen meka anggos jeska si. Jefeda mimif magob ofa jeskaseda mumok mekeni kef gu misinsa ojgomu.' 8Erek koma jefeda rua ragei ofa beda ragob ofa fogora rij efen efaga jeska mekeni anggur. 9Jefeda Didif dimagot gu iwa rot mar ongga osnok egens ongga efen mekeni koma emeita gu rua insa koma. Ofa omoksons jah efen mekeni koma, beda ofa emagob rusnok insa koma nomnaga ongga ringker joug efen mekeni. Beda ofa emaha mekeni insa koma gu rusnok enjgineg deika." 10Beda Yesus agot deika gu ebirfager Yahudi insa koma oida, "Iwa idou ah keingg rot mar ongga runggu gij Mar Efeyi Ebsi rot Didif sis fob. Mar koma agot oida, 'Rusnok ongga rii mod bera rukoja Mamu ahais egens koma fogora rij jeska fob. Tina mamu koma bera enjerek mamu ongga ofoufem ekirsa nou mod koma nomnaga. 11Tuhan bera ontunggom mar insa koma, noba koma bera ongkoska ahah miteij tein.' " 12Erek koma beda ebirfager Yahudi ongga ringg mar insa koma ongga Yesus emfesij gu rua fob bera ruhca moroju jeskaseda ragei Ofa. Jeska rua rijginaga rot oida mar ongga Yesus emfesij osok gij rusnok insa koma ongga riker joug mekeni bera erek orocunc rot mar ongga rua risinsa rerin rita mar ongga oska. Tina rua rinagei Ofa enesi jeska rua rimeesa rot meidu ongga rusnok rufoukou jah suma rumotunggom skoita rua rot. Jefeda rua rija jeska Ofa ojgomu. 13Gij mona egema deika beda ebirfager Yahudi rubk rineya ongga Yahudi ebic egens ongga ofoka Farisi jera rineya ongga ruroru raja Herodes skoita Yesus. Rua rudou os rijeka joug Ofa reirei jeskaseda erek Ofa agot mar ongga rua rusujohu rot bera erek oska, beda rua rimagei Ofa rot. 14- 15Rua rin skoita Ofa noba ragot oida, "Akeina Guru, memef mejginaga rot oida Bua bera bagot rot mar ongga tenten ojgomu, noba bua bunororu rusnok ongga rufoka aksa ongga rusos budou efesi rot mar egema tein guru. Tina Bua buftuftu mar ongga Allah ondou os rot tenten ojgomuja. Jefeda Akeina bagot gu memef oida, erek memef moh pajak gu raja Kaisar, beda koma bera erek tenten ei? Memef moh pajak insa koma gu Ofa ei era gurei?" Tina Yesus ejginaga rot oida mar ongga rua rinjeka gu Ofa rot insa koma bera onororu meidu ongga rindemdemi gij rudou efesi fob guru. Jefeda Ofa agot gu rua oida, "Teinefa fogora iwa ireneni Didif jeskaseda dagot mar ongga oska fogora yagei Didif rot erek komo." Beda Ofa agot deika oida, "Iwa ita fifi gu Didif jeskaseda dik ai juens fog." 16Jefeda rua rita fifi gu Ofa. Beda Ofa ejeka gu rua oida, "Idu efena jera ofoka bera enah gij fifi kef?" Beda rua ruroun oida, "Koma bera raja Kaisar efen efena jera ofoka." 17Beda Yesus agot gu rua oida, "Jefeda iwa ita mar ongga raja Kaisar efen gu ofa ojgomu, noba ita mar ongga Allah efen gu Ofa tein ojgomu." Erek koma beda rua rudou oubsaha eteb rot mar ongga Yesus oroun gu rua, jeska enadaij nou rua ragei Ofa rot mar ongga Ofa anggot insa koma jinaga guru. 18Rusnok Yahudi jeska ebic egens ongga ofoka Saduki rin skoita Yesus. Rua ongga ebic Saduki koma bera rusujohu rot oida rusnok rinedebecki jeska ranggos guru. 19Rua rireni Yesus fogora rijeka gu Ofa reirei oida, "Akeina Guru, sis fob Musa onggu mar egens ongga agot rot oida erek orna egens agos tina onok efesa guru, beda efen mokosa era mokora egema ois moisa koma jeskaseda goga gok egesa egema nou orna ongga anggos fob." 20Beda rua rifesij deika oida, "Sis fob runer rufok cinja erfeka ongga rumokosama bera runofoguma. 21Orna egens ongga osumbohka oskotu arja. Tina gij mona ongga ofa anggos fob bera ofa onok efesa guru. Beda mokosa ongga egeka ois moisa koma, tina ofa tein agos noba onok efesa guru. Erek koma tein rot mokosa ongga orgomu. 22Mokosa nomnaga ois moisa insa koma, tina rua nomnaga ragos jeska, noba runok riser tein guru. Beda moisa egens insa koma tein agos otoij rua. 23Jefeda erek rusnok ridebecki jeska ranggos rot tenten, beda gij mona insa koma bera kenefo jeska mokoser insa koma bera omois ojaga koma erek mohona rot tenten? Jeska gij mona ongga rua nomnaga rifena ebah ros bera rua nomnaga ruis ojaga egens koma erek rerin ruhona fob." 24Beda Yesus oroun gu rua oida, "Mar insa koma ongga iwa insujohu rot bera erek tenten guru. Jeska iwa idou enebriyi gij rot meidu ongga Mar Efeyi Ebsi anggot rot osok gij mar insa koma enesi. Noba iwa idou enebriyi gij rot Allah efen owesa efek jeskaseda ofra rusnok jeska ranggos tein guru. 25Jeska gij mona ongga rusnok ridebecki jeska ranggos, beda rua runoskotu arja era rinahi igers deika guru. Rua rita mar erek malaikat-malaikat ongga runoskotuma guru. 26Erek koma tein, iwa idou ah keingg rot buku hukum ongga Musa onggu jeni erek mar ongga Allah oncunc gu ofa sis fob ojgomu. Gij buku insa koma bera ofa onggu mar osok gij mona ongga ofa engk tumu maksaksa ongga mah ent. Gij mona insa koma bera ofa eg Allah oga ongga agot oida, 'Didif bera Abraham, Isak, jera Yakob efen Allah.' 27Jefeda Allah bera enerek Allah nou rusnok ongga ranggos fob ojgomu guru. Tina Ofa bera erek Allah nou rusnok ongga rifena ebah sons erek Abraham, Isak jera Yakob ongga rifaga ranggos sis fob. Jefeda mar ongga iwa ongga ebic Saduki rusujohu rot bera erek tenten guru." 28Guru agama egens ongga en jah suma bera engg rot mar ongga Saduki insa koma ruga emesedema rot jera Yesus. Noba ofa engg rot oida mar ongga Yesus oroun gu Saduki insa koma bera erek oufamofa eteb. Jefeda ofa ejeka gu Yesus oida, "Akeina, rot mifmin hukum Yahudi nomnaga, hukum kenefo bera erek ofoufem ekirsa jeska nomnaga?" 29Beda Yesus oroun gu ofa oida, "Hukum egens ongga ofoufem ekirsa jeska hukum nomnaga bera erek kef: 'Iwa ongga Israel ig rot iskusk fog. Mifmin Tuhan ongga minjeka erek Allah, Ofa esinsiyai bera erek Tuhan. Tuhan egema bera enofogu guru. 30Iwa idou okora rot yeyin Tuhan jera idou efesi ongkasmos ni, gij mar nomnaga ongga isujohu rot ni, noba gij mar nomnaga ongga itunggom tein.' 31Noba hukum ongga egeka ongga erek ofoufem ekirsa jeska hukum nomnaga bera erek kef: 'Iwa idou okora rot rusnok enjgineg erek idou okora rot isinsa tein.' Hukum eneya bera onofoufem ekirsa jeska hukum egeka insa kef guru." 32Beda Guru agama egens insa koma agot gu Yesus oida, "Akeina Guru, mar ongga Bua banggot rot insa koma bera erek ongkoska eteb. Jeska Bua banggot rot tenten oida Allah bera ongga erek Tuhan ojgomu, noba Tuhan egema tein enofogu guru. 33Noba Bua tein banggot rot tenten oida mimif mudou okora rot Ofa jera mudou ongkasmos ni, gij mar nomnaga ongga musujohu rot ni, gij mar nomnaga ongga mutunggom ni, noba mudou okora rot rusnok enjgineg erek mudou okora rot misinsa tein ojgomu. Mar koma nomnaga bera ofoufem ekirsa jeska mar nomnaga ongga mimeita nou murougif gu Allah." 34Nou ongga Yesus engg mar koma, beda Ofa agot gu Guru agama egens koma oida, "Mar ongga bua buroun rot insa koma bera orocunc rot oida bua tein bumoira jera rusnok ongga Allah ofoka ereij keingg." Beda gij mona insa koma ebirfager Yahudi rinejeka gu Yesus reirei rot mar egema deika guru, jeska Ofa oroun mar gu rua rot odou ongga ebriyi gij eteb. 35Nou ongga Yesus emfesij mar jera Guru-Guru insa koma oisa fob, beda Ofa agot gu rusnok jah suma oida, "Guru-Guru agama ruftuftu oida Kristus koma ongga Allah omobk bera ojuj jeska ebic raja Daud ojgomu noba enen jeska Allah guru. Tina koma tenten guru 36Jeska raja Daud esinsa agot oisouska Efena Ebsi Allah oida, 'Tuhan Allah agot gu dedin Tuhan oida: "Biker jah dugnosk rot bufoka aksa, noba Didif dumoin keingg bebin mesa nomnaga fogora rumougif gu Bua." ' 37Jefeda erek raja Daud esinsa ejeka Kristus ongga emen erek ofa efen Tuhan, beda koma orocunc rot oida Kristus ongga ojuj jeska raja Daud bera en jeska Tuhan Allah tein. Jeska Daud tein ougif gu Ofa." Erek koma beda, rusnok rufoukou jah suma ongga rig mar ongga Yesus omftuftu rot bera rudou erirei eteb rot. 38Askesi Yesus oftuftu mar gu rusnok insa koma ros, beda Ofa agot oida, "Iwa isisi joug isinsa idou efesi rot ahais osok gij rua ongga Guru-Guru agama. Jeska rua rudou os rincira rot meisoufa ongga ongkoskamoka jeskaseda rurocunc rot rerin rufoka ongga aksa eteb. Noba rua rudou os rusnok riskemba rugif gu rua gu pasar tein ojgomu. 39Noba, nou ongga rua ruira gij mod ongga rusnok Yahudi rum riteij gij, era rua ruira gij mod ongga rusnok ruina maat keingg rusnok gij, beda rua rudou os riker esij kursi eteb jah rusnok nomnaga rudou ojgomu. 40Noba rua rucuwei mar gu rujona rija mesina fogora rita rerin mareibra nomnaga jeska rua koma ojgomuja. Noba rua rum riteij erek aksa eteb jeskaseda rusnok enjgineg rusujohu rot oida rua bera erek rusnok ongga rineita mar ongga oska guru. Jefeda gij mona kahma bera Allah omofra mar okum eteb keingg rua rot si!" 41Gij mona juens bera Yesus eker gu momas ongga angh rejrej Mod Allah. Noba askesi Ofa eker doida meifeti ongga rusnok rikeba rerin fifi gij erek rurougif gu Allah jah suma, beda Ofa eyajga rot teinefa rusnok rufoukou rikeba rerin fifi gij meifeti koma. Ofa ek runa mei ahta ofoukou rij fifi eteb gij meifeti insa koma. 42Tina Ofa tein ek ojaga eja mesina egens ongga ofojingki eij fifi egeka ongga erek ai oskiyai gij meifeti insa koma. 43Beda Ofa ois gu efen ruforoker noba agot gu rua oida, "Ahah Allah eiteij bera eja mesina egens koma ongga ofojingki eij fifi eteb ekirsa jeska runa mei ahta insa koma nomnaga ojgomu. 44Jeska rua rij fifi jeska rerin mareibra ongga ofod eskemba. Tina ojaga eja mesina egens insa koma ongga ofojingki bera eita fifi nomnaga ongga ofa efen tein. Egema enah deika guru."

will be added

X\