Markus 1

1Oga ongga oufamofa osok gij Yesus Kristus ongga Allah efen efesa bera onsokeij rot sismeni erek kef: 2Gij mona ongga sis eteb fob bera nabi egens ongga ofoka Yesaya anggot mar ongga Allah anggot rot gu efen efesa oida, "Didif dumobk osnok egens ongga emeja okag rot Bua. Ofa omoftuftu mar gu rusnok jeskaseda rua risejah nou rumoroun Bua. 3Osnok egens koma emeker gij monuh ongga owowa ojgomu. Noba ofa emagot gu rusnok oida, 'Ai juens bera Tuhan enesaga. Jefeda iwa isejah idou efesi jeskaseda iroun Ofa fogora imororu Ofa tein.' " 4Mar insa kef ongga nabi Yesaya anggot rot sis fob bera ah gij efera fob. Jeska osnok egens ongga ofoka Yohanes bera enjeker gij monuh egens ongga owowa fob. Noba ofa oftuftu rusnok rot oida, "Iwa imeesa joug rot yeyin mar ongga oska ojgomu fogora ita baptis tein ongga orocunc rot oida iwa imeesa joug yeyin mar ongga oska rot tenten fob. Iwa ita mar erek koma ojgomu beda Allah omosuna rot yeyin mar ongga oska jeska idou efesi si." 5Rusnok rufoukou doska jeska kota Yerusalem jera monuh Yudea rijeg rot mar ongga Yohanes oftuftu rot jah suma. Noba rua ongga ringg rot mar insa koma bera ragot moguma oida, "Tenten, mimif mita mar ongga oska fob." Erek koma beda Yohanes eita baptis gu rua. 6Yohanes ergi meisoufa ongga erek nabi Yesaya ergi sis fob. Koma bera, ofa ergi unta ofos erek efen meisoufa. Noba ofa era sapi ofos erakid okom ofoj. Noba efen maat bera erek mof jera mosusu efei. 7Ofa oftuftu mar erek kef oida, "Gij mona kahma beda osnok egens ongga omotoij didif bera efen ofoka ongga aksa ekirsa jeska didif. Noba didif disinsa dufoka aksa enadaij nou dugif gu mebi fogora dusuwa Ofa efen marfeb tumu sandal jeska okoda tein jinaga guru. Jeska Ofa bera efen ofoka ongga aksa ekirsa jeska Didif. 8Ebeibeyaif didif dita baptis gu iwa gij mei ojgomu. Tina Ofa emeita Efena Ebsi gu iwa si." 9Gij mona ongga Yohanes eita baptis gu rusnok ros, beda Yesus en jeska kota Nazaret ongga angh gij monuh Galilea. Beda Yohanes eita baptis gu Ofa tein gij mei Yordan. 10Nou ongga Yesus orogna jeska mei insa koma, beda ainsa koma tein Ofa ek mebaga ohoda, noba Efena Ebsi Allah ojuj en erek mem monggeta mos, beda eker esij Ofa. 11Beda Allah agot gu Ofa jeska mebaga oida, "Bua bera dedin edesa ongga dudou okora rot, noba ongga dudou eskeiramera eteb rot tein." 12Beda ainsa koma tein Efena Ebsi Allah obk Yesus jah monuh egens ongga owowa. 13Askesi Yesus engker jah suma ros, beda Bilis ereneni Ofa gij mona rara setka tohkuru. Noba mar ongga osuwotu ofoukou tein ringker gij monuh insa koma. Noba malaikat-malaikat jeska Allah ofij Ofa jah suma tein. 14Gij mona ongga raja Herodes angha Yohanes gij mod oskusk fob, beda Yesus eja jah monuh Galilea noba efesij mar rot Allah oga ongga oufamofa jah suma. 15Ofa agot oida, "Mona ongga Allah omofoka ereij keingg rusnok bera ensaga doida fob. Jefeda iwa imeesa joug rot yeyin mar ongga oska ojgomu, beda iroru Allah oga ongga oufamofa kef." 16Erek koma beda, askesi Yesus ecira gu meren Galilea efembra ros, beda Ofa ek gosnok gegeka jah suma. Goga koma bera Simon jera efen mokosa Andreas. Ainsa koma tein goga gera jala gorohca mos fogora gohoturu mos insa koma, jeska gegan gefarur bera mar erek koma ojgomu. 17Nou ongga Yesus ek goga geita mar erek koma ros, beda Ofa agot gu goga oida, "Oisouska mona deisef bera goga gororu Didif ojgomuja. Noba Didif dumoftuftu goga rot teinefa goga gohoturu rusnok jeskaseda rumororu Didif." 18Beda ainsa koma tein goga gaha gegan jala jah fogora gororu Yesus ojgomuja. 19Beda Yesus ecira gu meren efembra koma deika onjoros Ofa ek gosnok gegeka deika. Goga koma bera Yakobus jera efen mokosa Yohanes ongga Zebedeus efen efeserga. Goga insa koma gengker gij meg efesi noba geb jala ongga ebgebga. 20Ainsa koma tein Yesus ejeka gu goga tein jeskaseda gororu Ofa. Erek koma jefeda goga geja jeska gegan meka Zebedeus jera rusnok enjgineg tein ongga rumfij ofa gij meg jah suma, noba goga gororu Yesus ojgomu. 21Gij mona egema deika beda Yesus jera efen ruforoker rijesaga jah gu kota Kapernaum. Noba gij mona ongga Sabat beda rua ongga rusnok Yahudi rugif gu Allah. Erek koma beda Yesus oira gij mod egens ongga rua rum riteij gij tein. Beda Ofa oftuftu rusnok jah suma. 22Rusnok nomnaga jah suma rudou oubsaha eteb rot mar ongga Yesus omftuftu insa koma, jeska Ofa onoftuftu mar erek Guru-Guru agama enjgineg rumftuftu gu rusnok guru, tina Ofa oftuftu mar rot owesa efek eteb ojgomu. 23Gij mona insa koma tein, osnok egens ongga efena ofogog engker gij efen odou efesi bera eker gij mod egens koma tein. Beda ofa agerir rot oida, 24"Ei, Yesus ongga ojga jeska kota Nazaret! Bineita mar okum skoita memef ongga erek rifena ofogog guru. Bua bin jeskaseda bagob memef ei? Didif dijginaga rot Bua fob. Bua bera osnok egens koma ongga ebsi komowa ongga Allah omobk!" 25Beda Yesus etaha joug efena ofogog insa koma oida, "Ei, biker toumou ojgomu! Bua burogna jeska osnok egens kef ojgomu!" 26Beda efena ofogog insa koma era osnok egens koma ededima doska, noba orogna rot oga ongga agerir mar jeska osnok egens insa koma. 27Rusnok jah suma nomnaga rik noba rudou oubsaha eteb rot, jefeda rua ragot moguma oida, "Wah, meidu bera kefo! Kef erek mar onswos eteb! Yesus koma bera oftuftu mar ongga efeinah rot owesa efek eteb. Noba Ofa tein ekemeji efena ofogog jeska osnok egens kef, beda efena ofogog insa koma ororu efen oga ojgomu tein!" 28Erek koma jefeda rusnok jah suma rifesij rot mar insa koma rejrej monuh Galilea nomnaga. 29Nou ongga Yesus eita mar insa koma oisa fob, beda Ofa jera Simon ni, Andreas ni, Yakobus ni, Yohanes ni, rua nomnaga rurogna jeska mod egens insa koma noba rija jah mod egens ongga Simon jera Andreas gegan. 30Gij mona insa koma bera Simon efen morois ah gij mer efesi ojgomuja jeska ofa maren erek ofos ofoufem eteb. Nou ongga rusnok rik Yesus en jah suma, beda rua rifesij gu Ofa rot Simon efen mefina insa koma. 31Erek koma jefeda Ofa eja skoita Simon efen mefina noba agei efen etma, beda ofij ofa jeskaseda ot. Ainsa koma tein efen ofos ongga ofoufem esiri noba ofa eita eskeira fob. Jefeda ofa oina maat nou Yesus jera efen ruforoker ojgomu. 32Nou ongga moworu fob beda rusnok rurka rua ongga marenir rufoukou jera rua ongga efena ofogog engker gij rudou efesi tein skoita Yesus. 33Jefeda rusnok rufoukou jeska kota insa koma ruisa keingg mod ongga Yesus engker gij noba rimeradgoduma gu montoj. 34Beda Yesus eita eskeira gu rusnok rufoukou ongga marenir, noba Ofa tein ekemeji efena ofogog ofoukou ongga ringker gij rusnok rudou efesi tein. Ofa eyahehir joug rifena ofogog insa koma jeskaseda rinagot mar guru, jeska rua rijginaga rot oida Ofa bera Kristus ongga Allah omobk. 35Gij monog erek rahah tentena, beda Yesus osoyu noba eja jeska kota insa koma jah monuh egens ongga owowa jeskaseda om eiteij gu Allah jah suma. 36Nou ongga Simon jera efen mohujir runsowu fob beda rua rik, tina Yesus eneker guru, jefeda rua rujohca Ofa. 37Nou ongga rua ringk Yesus fob, beda rua ragot gu Ofa oida, "Akeina, rusnok rufoukou bera ruhca Bua!" 38Tina Ofa agot gu rua oida, "Mimif mija jah kota-kota enjgineg tein jeskaseda duftuftu mar rot Allah oga jah suma. Jeska Didif din gu mebif jeskaseda duftuftu mar rot Allah oga gu rusnok rufoukou." 39Jefeda Ofa eja rejrej monuh Galilea insa koma noba oftuftu mar rot Allah oga gij mod ongga rusnok Yahudi rum riteij gij. Noba Ofa tein ekemeji efena ofogog jeska rusnok rudou efesi. 40Gij mona egens bera osnok egens ongga maira et ofos en skoita Yesus. Ofa ougif gu Yesus noba erejgei gu Ofa oida, "Akeina, erek Bua bundou os rot, beda bita eskeira gu didif. Jeska bebin owesa efek bera adaij nou jeskaseda bufij didif. Beda rusnok enjgineg rumocunc rudou ongga oufamofa rot didif deika ojgomu." 41Yesus odou okora rot osnok egens insa koma, jefeda Ofa aha efen etma esij ofa noba agot oida, "Didif dudou os dita eskeira gu bua." 42Beda ainsa koma tein ofa efen ofos nomnaga eskeira ojgomu fob. 43- 44Nou ongga Yesus omobk ofa sons, beda Ofa eyahehir joug ofa rot oida, "Bua binefesij rot mar insa kef gu rusnok enjgineg guru. Tina bua bija skoita imam egens noba bucunc bisinsa gu ofa jeskaseda ofa ek bufos beda agot rot oida bua bera biskeira rot tenten fob. Noba bua tein burka mar ongga Musa anggot rot sis fob skoita imam insa koma. Beda ofa emes mah gij mar insa koma gu Allah erek bebin mar ongga burougif gu Allah. Bua eita mar erek koma jeskaseda imam egens koma ejginaga rot oida bua bera bita eskeira rot tenten fob." 45Tina osnok egens insa koma ejefesij gu rusnok rufoukou rot teinefa Yesus eita eskeira gu ofa ojgomu. Erek koma jefeda Yesus onoira gij kota-kota koma rot tomnomna deika guru, jeska rusnok rufoukou runoisa keingg Ofa ojgomuja. Ofa ejeker jah monuh ongga owowa ojgomu. Erek koma tina rusnok rufoukou rin skoita Ofa jah suma tein ojgomuja.

will be added

X\