Lukas 8

1Erek koma beda Yesus eja jah kota-kota ongga angh gij monuh insa koma jeskaseda efesij oga ongga oufamofa osok gij rot teinefa Allah ofoka ereij keingg rusnok. Noba Ofa efen ruforoker rufok setka kungkob erfeka 2jera rujager rineya ongga Yesus ekemeji efena oska jeska, noba rineya ongga Ofa eita eskeira gu sis fob bera ricira morototuma jera Ofa. Ojaga egens bera Maria ongga rijeka Magdalena tein. Sis fob Yesus ekemeji efena ofogog cinja erfeka jeska efen odou efesi fob, 3jera Yohana ongga Khuza efen mohona (Khuza bera osnok egens ongga ofij raja Herodes), jera Susana jera rujager enjgineg tein. Rujager insa koma rira rerin mareibra rurofij Yesus jera efen ruforoker. 4Erek koma beda rusnok rufoukou rin skoita Yesus jeska monuh ofoukou. Gij mona ongga rusnok rufoukou insa koma rumohoturuma rejrej Yesus fob, beda Ofa efesij mar gu rua rot orocunc egens erek kef oida, 5"Osnok egens eja jeskaseda era maat efej erebirma gij efen mekeni. Askesi ofa era maat efej insa koma enerebirma ros, beda eneya ongga ensiri gu moroju. Beda mem rin noba rit maat efej insa koma. 6Beda eneya ongga ensiri jah mebi ongga mamu tuturu. Beda maat efej insa koma er ebeirens jeska mebi erek oskiyai orohoh mamu. Tina nou ongga mowa orogna beda edi maat efej insa koma jefeda efej nomnaga, jeska maat efej insa koma ener gij mebi ongga erek eteb guru. 7Beda maat efej eneya tein ongga ensiri gij moworug ofogog. Noba moworug ofogog insa koma er morototuma jera maat efej insa koma, tina moworug eij keingg maat efej koma jefeda enefek guru. 8Beda maat efej eneya tein ongga ensiri gij mebi ongga ofogu rara. Beda maat efej insa koma er erek ongkoska ojgomu noba enjefek erek ofoukou doska tein." Nou ongga Yesus emfesij mar ongga orocunc insa koma gu rua oisa fob, beda Ofa agot oida, "Idu ongga odou ongga ebriyi gij mar kef efen ofou rot iskusk, beda ofa oj osu nou noba eg rot iskusk ojgomu tein." 9Erek koma beda Yesus efen ruforoker rijeka gu Ofa rot mar ongga orocunc insa koma efen ofou. 10Beda Ofa agot gu rua oida, "Didif dimfesij gu iwa rot teinefa Allah ofoka ereij keingg rusnok. Ebeibeyaif iwa ijginaga rot mar insa koma fob. Tina Didif dira mar ongga orocunc fogora direfesij rot mar insa koma gu rusnok enjgineg ojgomu. Didif dutunggom erek koma jeska runggu gij Mar Efeyi Ebsi sis fob oida, 'Rusnok rimek mar, tina rudou enejginaga rot mar koma efen ofou jinaga guru. Rua rimeg mar, tina rudou enebriyi gij mar koma erek teinefa guru.' " 11Beda Yesus efesij mar orocunc osok gij maat efej ongga osnok egens erebirma efen ofou. 12Ofa agot oida, "Maat efej esiri bera erek Allah efen oga. Noba maat efej ongga ensiri gu moroju bera erek rusnok ongga ringg rot Allah oga. Tina Bilis en noba esma oga ongga oufamofa insa koma jeska rudou efesi jeskaseda rudou onororu Allah oga insa koma deika guru. Jefeda rua rinesma riteij ah ongga efeinah guru. 13Maat efej ongga ensiri gij mebi ongga mamu tuturu bera erek rusnok ongga ringg rot Allah oga, noba rudou efaga ouka rot. Tina rua runororu oga insa koma rot ahais guru. Jefeda gij mona ongga mar okum ereneni rua, beda rudou esiri fogora runororu Allah oga deika guru. 14Maat efej ongga ensiri gij moworug ofogog bera erek rusnok ongga ringg rot Allah oga fob. Tina rua rudou efeneinei rot mar ongga ongkoskamoka ongga rimeita gij rerin riteij ah insa kef ojgomuja, noba rua runororu Allah oga rot ahais guru. 15Noba maat efej ongga ensiri gij mebi ongga ofogu rara bera erek rusnok ongga ringg rot Allah oga fob. Noba rua risah efen oga insa koma gij rudou efesi rot ahais ojgomuja. Rua bera erek rusnok ongga rita mar ongga oufamofa oisouska rudou ongga aharukamoka ojgomu. Noba jeska rua rug rijmeg gij Allah oga ojgomu, jefeda rua rerin efek ongga erek ofoukou doska tein." 16Beda Yesus agot rot mar orocunc erek kef oida, "Giskini rusnok ongga ris mah gij lampu nou rerin mod efesi bera runocohun lampu ongga eisa insa koma guru. Noba rua tein rinaha lampu ongga eisa insa koma jah mebera obohoh tein guru. Ongga tenten bera rua raha lampu insa koma tomnomna jah skidameda gij mod efesi insa koma jeskaseda rusnok nomnaga ongga ruira gij mod egens koma bera rimek eisa insa koma. 17Erek koma tein, mar nomnaga ongga angh jejema jeska rusnok ebeibeyaif bera rua rimejginaga rot gij mona kahma si. 18Jefeda iwa isujohu rot koisoisa osok gij mar ongga iwa ingg insa kef ojgomu. Jeska rua ongga rudou ebriyi gij mar insa kef bera rimesma mar ongga erek ekirsa deika si. Noba rua ongga rudou enebriyi gij mar kef guru, beda mar oskiyai ongga rua rita fob bera emeseiseifa jeska rua tein si." 19Yesus efen mosu jera mokoser rin skoita Ofa. Tina nou ongga rua rinsaga jah suma fob beda enadaij nou rua rik Ofa guru, jeska rusnok rufoukou riker rejrej Ofa. 20Beda osnok egens agot gu Yesus oida, "Akeina, mosib jera obkoser runot jah mebah. Noba rua rudou os rik Bua." 21Beda Yesus agot gu rusnok jah suma oida, "Rusnok ongga ringg rot Allah oga noba rincira rot efen oga insa koma, rua rirek dedin ameina jera edkoser bera insa koma." 22Gij mona egens beda Yesus agot gu efen ruforoker oida, "Mimif mija jah meren enama." Jefeda rua rifef meg meifeni egens beda rija. 23Nou ongga rua runjowa jah gu meren deis ros, beda Yesus ahca. Erek dektek deika guru, beda mof eteb edi meren rot rua. Mei oira gij rerin meg efesi noba rua rimeesa eteb oida meg omojuj gu mei rotir. 24Beda Yesus efen ruforoker rijebs Ofa noba ragot oida, "Akeina, jeska meg omojuj gu mei rotimi!" Erek koma jefeda Yesus osowu noba agot joug mof jera mei mojumu ofog insa koma, beda mof eteb jera mei mojumu ofog koma aha toumou noba meren edeider sons. 25Beda Yesus agot gu efen ruforoker oida, "Teinefa fogora iwa idou onororu Didif rot tenten guri?" Beda rua rudou oubsaha noba rimeesa, beda rua rijeka moguma oida, "Ofa kef bera erek idu? Jeska Ofa agot joug mof jera mei mojumu ofog noba mar koma ororu efen oga ojgomu!" 26Yesus jera efen ruforoker rifef meg meifeni egens insa koma onjoros rinsaga gu monuh Gerasa ongga angh gu meren Galilea enama. 27Nou ongga Yesus onsoka jah mog fob, beda osnok egens ongga efena ofogog oira gij odou efesi ek Yesus. Osnok egens koma en jeska kota jah suma. Ofa energi meisoufa guru, noba ofa eneker gij mod egema tein guru. Ofa eker gu mamu mansu efekesa ongga erek rusnok rerin moksu ojgomu. 28Nou ongga ofa ek Yesus, beda ofa agerir mar noba eij esinsa gu mebi jah Yesus odou. Beda ofa ois rot oga eteb doska oida, "Yesus, bua bera Allah efesa ongga ofoka aksa eteb! Bua bineita mar ongga okum gu didif guru!" Beda Yesus obk efena ofogog jeskaseda eja jeska osnok egens koma. 29Beda ofa ois gu Yesus rot odou ongga emeesa eteb oida, "Bua bineita efera okora gu didif guru!" Sis fob efena ofogog insa koma osokeij osnok egens koma fogora merei ok ofa. Jefeda rusnok rira rantai rirakid efen etma jera aki noba rut joug ofa rot ahais tein. Tina ofa oku rantai beda ebga ojgomu. Noba efena ofogog koma oroun ofa jah monuh ongga owowa ojgomu. 30Beda Yesus ejeka ofa oida, "Bufoka idu?" Beda ofa oroun sons oida, "Didif dufoka Legiun." Ofa agot mar erek koma jeska efena ofogog riskemba bera oira gij osnok egens koma odou efesi fob. 31Beda efena ofogog insa koma ois gu Yesus jeskaseda Ofa onobk ofa jah monuh ongga emeita ofogu okora eteb gij guru. 32Gij mona insa koma tein mek ofoukou bera rit mebi gu memaga ofog oduma jah suma. Beda efena ofogog insa koma ois gu Yesus jeskaseda Yesus oitij rot oida efena ofogog insa koma nomnaga rujoira gij mek ofoukou insa koma rudou efesi. Beda Yesus oitij rot. 33Jefeda efena ofogog insa koma nomnaga rurogna jeska osnok egens koma noba rujoira gij mek ofoukou rudou efesi. Jefeda mek ofoukou insa koma ruku noba rujosoka gij momfaga jah meren efei fogora nomnaga ragos. 34Nou ongga rusnok ongga rut joug mek insa koma rik mar koma nomnaga fob, beda rua rufof jah kota jera rejrej monuh insa koma tein jeskaseda rifesij rot mar ongga rua ringk insa koma. 35Beda rusnok rufoukou rija jah suma jeskaseda riajga rot mar ongga rusnok insa koma rimfesij rot. Rua rija skoita Yesus, beda rua rik osnok egens ongga Yesus ekemeji efena ofogog jeska odou efesi fob. Ofa eker desi Yesus aki. Ofa ergi meisoufa noba odou efesi eskeira fob. Jefeda rusnok insa koma rimeesa rot mar onswos koma. 36Noba rua ongga ringk mar insa koma nomnaga rifesij deika rot teinefa Yesus ekemeji efena ofogog fogora osnok egens koma eskeira fob. 37Jefeda rusnok ongga ringker gij monuh Gerasa insa koma ruis gu Yesus jeskaseda Ofa eja jeska rerin monuh, jeska rua rimeesa eteb rot Ofa. Jefeda Yesus eifef meg egens noba oksons jah meren enama. 38Osnok egens insa koma ongga Yesus eita eskeira gu, ois gu Yesus jeskaseda ororu Ofa. Tina Yesus obk ofa jeskaseda eja ojgomu. Beda Yesus agot gu ofa oida, 39"Bua buksons noba bifesij gu rusnok rot teinefa Allah omfij bua fob." Jefeda osnok egens koma eja rejrej kota nomnaga ongga angh gij monuh insa koma noba efesij gu rusnok rufoukou rot teinefa Yesus ofij ofa fob. 40Gij mona ongga Yesus oksons jah meren enama fob, beda rusnok rufoukou ruroun Ofa rot rudou ongga erirei eteb, jeska rua rumom rudou nou mona ongga Ofa omoksons en jah suma. 41Gij mona insa koma tein, osnok egens ongga ebirfaga mod ongga rusnok rum riteij gu Allah gij ongga ofoka Yairus bera enofoguma. Ofa ojougif gu Yesus noba erejgejgei gu Yesus jeskaseda Yesus eja jah ofa efen mod. 42Jeska ofa efen efesa ojowu egens ojgomu ongga efen tahun setka kungkob erfeka ongga maren eteb noba konosa anggos. Askesi Yesus ecira jah Yairus efen mod beda rusnok riskemba rimeradgoduma rejrej Yesus. 43Erek koma beda ojaga egens ongga mesta ebah ojgomuja gij tahun ofoukou fob tein bera ont gu rusnok riskemba rifekesa. Ofa ejek dokter rufoukou tina ofa eneita eskeira rot mar insa koma jinaga guru. 44Ofa ojot doida Yesus ejmeg noba ahtec Yesus efen meisoufa tumu Yesus. Beda ainsa koma tein ofa esma eskeira fogora efen ogufu eneya deika guru. 45Erek koma beda Yesus agot oida, "Idu bera ahtec Didif ainsa koma?" Beda rusnok rufoukou ragot oida, "Akeina, memef bera guru." Beda Petrus agot gu Yesus oida, "Akeina, jeska rusnok riskemba rut rejrej Bua noba rimeradgoduma skoita Bua ojgomu." 46Tina Yesus agot oida, "Osnok egens bera ahtec Didif fob. Didif dijginaga rot koma jeska ainsa koma tein owesa efek bera orogna jeska Didif fob." 47Ojaga egens koma ofos eciyi rot oida Yesus ejginaga rot ofa fob. Jefeda ofa en skoita Yesus noba es okeibi gu mebi jah Ofa odou rot odou ongga emeesa. Beda ofa efesij gu rusnok jah suma rot teinefa ofa ahtec Yesus tumu efen meisoufa fogora eita eskeira rot mar insa koma. 48Beda Yesus agot gu ofa oida, "Edesa, jeska budou ororu Didif rot tenten fob, jefeda bua bita eskeira fob. Bua bija rot budou ongga eskeiramera ojgomu." 49Askesi Yesus efesij mar insa koma ros, beda osnok egens en jeska Yairus efen mod noba agot gu Yairus oida, "Tuan, bebin ebesa ojaga agos fob, jefeda bua binerejgei mar gu Akeina Guru deika guru." 50Nou ongga Yesus engg rot mar koma, beda Ofa agot gu Yairus oida, "Bua binemeesa guru. Bua budou ororu Didif rot tenten ojgomu beda bebin ebesa emeita eskeira si." 51Nou ongga Yesus ensaga gu Yairus efen mod, beda Ofa eyahehir joug rusnok jah suma oida runoira gij mod efesi jera Ofa guru. Tina Ofa oroun Petrus, Yohanes, Yakobus, Yairus jera Yairus efen mohona ojgomu. 52Rusnok nomnaga jah suma ribisa noba rudou oubsaha eteb rot ojowu egens koma ongga anggos fob. Tina Yesus agot oida, "Iwa inebisa guru. Jeska ojowu egens koma bera enagos guru. Ofa ahca ojgomu." 53Nou ongga rusnok insa koma rig Yesus agot mar erek koma beda rua rutut rot ojgomu, jeska rua rijginaga rot oida ojowu egens koma anggos rot tenten fob. 54Beda Yesus agei ojowu egens koma etma noba agot gu ofa oida, "Edesa, bua busowu ojgomu!" 55Beda ainsa koma tein ojowu egens koma efena ebah sons. Beda ofa osowu noba edebecki. Beda Yesus obk rusnok jeskaseda rita maat gu ofa. 56Noba Ofa efen meka jera mosu gofos graga eteb rot! Tina Yesus agot joug goga oida genefesij rot mar ongga goga gek insa koma gu rusnok enjgineg jinaga guru.

will be added

X\