1 Gij mona ongga Sabat egens bera Yesus jera efen ruforoker ruira gij mekeni gandum egens. Yesus efen ruforoker rigib gandum efej noba rahsus gu ritma beda rit. 2 Erek koma beda rineya ongga ebic Farisi ragot oida, "Teinefa fogora iwa ikirsa rot mifmin hukum agama fogora iwa itunggom mar ongga hukum koma eyahehir joug gij mona ongga Sabat erek komo?" 3 Beda Yesus oroun oida, "Erek iwa inek gij Mar Efeyi Ebsi rot mar ongga Daud ontunggom gij mona ongga mosona ongk ofa jera efen mohujir enesei? 4 Jeska gij mona insa koma ofa oira gij Mod Allah efesi fogora eita roti ongga rusnok rinta erek mar ongga rurougif gu Allah rot. Beda ofa jera efen mohujir rint roti insa koma ojgomu. Tina ororu jeni mifmin agama erebent bera imam-imam rimet roti koma ojgomu." 5 Beda Yesus agot deika oida, "Didif, Rusnok Efesa, bera dedin owesa efek jeskaseda dagot rot mar ongga rusnok rutunggom gij mona ongga Sabat." 6 Gij mona ongga Sabat egema deika, beda Yesus oira gij mod egens ongga rusnok rum riteij gu Allah gij jeskaseda oftuftu rusnok jah suma. Osnok egens ongga etma jah enama ongga ofumbohah bera onofoguma. 7 Rineya ongga ebic Farisi jera Guru-Guru agama rineya ruhobut Yesus jeskaseda rik oida Ofa emeita eskeira gu osnok egens koma gij mona ongga Sabat, era gurei. 8 Tina Yesus ejginaga rot mar ongga rua runsujohu gij rudou efesi fob. Jefeda Ofa agot gu osnok egens ongga etma jah enama ofumbohah insa koma oida, "Bua bin noba but jah sif." Beda osnok egens koma edebecki noba ojot desi Yesus. 9 Beda Yesus ejeka gu rusnok ongga ringker jah suma oida, "Ororu mifmin hukum agama bera adaij nou mimif mutunggom mar erek meidu gij mona ongga Sabat? Mimif mutunggom mar ongga oska ei, era mimif mutunggom mar ongga oufamofa ei? Adaij nou mimif mita eskeira gu rusnok ei, era mimif mita mar ongga oska gu rusnok ei?" 10 Beda Yesus eyajga rusnok insa koma nomnaga, noba Ofa agot gu osnok egens insa koma oida, "Bua busk bitma koma." Beda osnok egens koma osk efen etma, noba ainsa koma tein efen etma eskeira fob. 11 Tina rua ongga ebic Farisi jera Guru-Guru agama insa koma rutkonu oska eteb rot Yesus. Jefeda rua rumohoturuma jeskaseda rifesij rot mar okum ongga rimeita gu Ofa ojgomu. 12 Gij mona juens, beda Yesus osok jah memaga ofos jeskaseda om eiteij gu Allah jah suma. Ofa om eiteij gu Allah rara gij motu insa koma. 13 Nou ongga mona ebriyi fob, beda Yesus ohoturu efen rusnok ongga ruroru Ofa fob. Beda Ofa ocunc rusnok rufok setka kungkob erfeka jeska rua jeskaseda rufij Ofa jeni erek efen ruforoker setka kungkob erfeka. Rua insa koma bera erek 14 Simon (ongga Yesus ejeka Petrus tein) ni, Andreas ongga Simon mokosa ni, Yakobus ni, Yohanes ni, Filipus ni, Bartolomeus ni, 15 Matius ni, Tomas ni, Yakobus ongga Alfeus efesa ni, Simon (ongga ruis Patriot) ni, 16 Yudas ongga Yakobus efesa ni, Yudas Iskariot ongga odou emekikif jeska Yesus gij mona kahma ni, rua insa koma nomnaga. 17 Erek koma beda Yesus ojuj jeska memaga ofos insa koma morototuma jera efen ruforoker. Beda Ofa ojot gu mebi ongga edeider. Rusnok rufoukou ongga ruroru Yesus fob bera runofoguma jah suma morototuma jera rusnok enjgineg tein jeska kota-kota ongga angh rejrej monuh Yudea ni, jeska kota Yerusalem ni, jeska kota Tirus jera kota Sidon ongga angh gu mei mojumu efei efembra ni. 18 Rua nomnaga rin jeskaseda rig mar ongga Yesus oftuftu noba jeskaseda risma eskeira rot rerin marenir. Noba rusnok ongga efena ofogog oira gij rudou efesi tein rin skoita Yesus jeskaseda Ofa eita eskeira gu rua tein. 19 Rusnok riskemba rimeradgoduma jeskaseda rahtec Yesus fogora rita eskeira. Jeska gij mona insa koma bera owesa efek eteb ah gu Yesus, jefeda Ofa eita eskeira gu rusnok insa koma nomnaga. 20 Yesus eyajga rusnok insa koma ongga ruroru Ofa fob, beda Ofa agot oida, "Oufamofa eteb nou iwa ongga ifojingki, jeska iwa imoira jera rusnok ongga Allah ofoka ereij keingg si. 21 Oufamofa eteb nou iwa ongga mosona ongk iwa ebeibeyaif, jeska gij mona kahma beda mosona onok iwa deika jinaga guru. Oufamofa eteb nou iwa ongga idou okum noba ibisa gij mona ebeibeyaif, jeska gij mona kahma beda idou emefaga ouka si. 22 Oufamofa eteb nou iwa ongga iroru Didif, Rusnok Efesa. Jeska gij mona ongga rusnok enjgineg rucunc rudou ongga oska rot iwa ni, rimekeba jeska iwa ni, ruga oruh iwa ni, rucunc ifoka erek ofogog ni. 23 Tina idou onoubsaha rot koma guru. Jeska rusnok insa koma rerin rimower ongga rita mar erek koma skoita Allah efen nabi-nabi sis fob tein. Tina iwa ita idou ongga erirei eteb rot mar okum insa koma ongga ah keingg iwa ojgomu. Jeska Allah ensejah yeyin ifons ongga ongkoska eteb gu mebaga fob. 24 Tina mar okum eteb emah keingg iwa ongga yurna mei ahtah, jeska idou agei yeyin mareibra ofoukou eteb eteb fob, jefeda inesma ifons gu mebaga deika guru. 25 Mar okum eteb emah keingg iwa ongga int maat ofoukou ojgomuja fob, jeska mosona omongk iwa si. Mar okum eteb emah keingg iwa ongga idou efaga ouka rot isinsa ojgomu, jeska gij mona kahma bera imebisa noba idou okum rot isinsa si. 26 Mar okum emah keingg iwa jeska iwa idou os jeskaseda rusnok nomnaga risitit iwa ojgomu. Jeska iwa yeyin imower rinsitit nabi-nabi ongga ebireira erek koma sis fob tein." 27 Erek koma tina Didif dagot gu iwa ongga yuj yusu rot mar ongga dimfesij insa kef oida icunc idou ongga okora rot rusnok ongga rudou oska rot iwa ojgomu. Noba itunggom mar ongga ongkoska skoita rusnok ongga rita mar ongga oska skoita iwa ojgomu. 28 Yum iteij gu Allah rot rusnok ongga ruga oruh iwa noba ongga rufra mar okum keingg iwa tein. 29 Erek osnok egens eseda yumnu jah enama, beda iwa inotkonu oska rot ofa guru. Noba erek osnok egens agei yeyin meisoufa jeska iwa, beda iwa inotkonu oska rot ofa guru. 30 Erek osnok egens erejgei mar jeska iwa, beda iwa ita mar koma gu ofa ojgomu. Noba erek osnok egens agei yeyin mareibra jeska iwa, beda inois rot mar insa koma sons guru. 31 Iwa itunggom mar ongga oufamofa skoita rusnok morototuma erek iwa idou os rua rutunggom mar ongga oufamofa skoita iwa tein ojgomu. 32 Erek iwa idou okora rot rusnok ongga rudou okora rot iwa tein, beda koma onocunc rot oida iwa ita mar ongga oufamofa rot tenten enesi. Jeska rusnok ongga rita mar ongga oska bera rudou omokorema tein ojgomu. 33 Noba erek iwa itunggom mar ongga ongkoska skoita rusnok ongga rutunggom mar ongga ongkoska skoita iwa tein, beda koma onorocunc rot oida iwa ita mar ongga oufamofa rot tenten enesi. Jeska rusnok ongga rita mar ongga oska bera rumofijma tein. 34 Noba erek iwa ikeba yeyin mareibra gu rusnok enjgineg, tina iwa idou os isma mar jeska rua sons gij mona kahma deika ojgomu, beda koma onocunc rot oida iwa ita mar ongga oufamofa rot tenten guru. Jeska rusnok ongga rita mar ongga oska bera rita mar erek insa koma rot rerin ruhujir tein ojgomu. 35 Tina ongga tenten bera icunc idou ongga okora rot yeyin mesa ongga ofogog rot iwa ojgomu. Ita mar ongga oufamofa skoita rua insa koma ojgomu. Ikeba yeyin mareibra gu rua, noba inohca mona efekesa jeskaseda isma mareibra sons jeska rua deika guru. Erek koma beda iwa isma eskeira noba iwa imeita idou erek Allah efen odou. Erek iwa ita mar insa koma nomnaga rot tenten, beda iwa imesma ifons ongga oufamofa eteb jeska Allah si. Beda iwa imejerek Allah, ongga ofoka aksa eteb, efen efeser. Jeska Ofa tein bera oncunc odou ongga oufamofa skoita rusnok ongga rudou ofogog noba Ofa ofij rusnok ongga runofij rusnok enjgineg guru. 36 Iwa icunc idou ongga eriagamaga skoita rusnok enjgineg morototuma erek yeyin ika Allah oncunc odou ongga eriagamaga skoita iwa fob." 37 Beda Yesus agot deika oida, "Erek iwa inocunc rusnok enjgineg erek oska guru, beda Allah onocunc iwa erek oska tein guru. Erek iwa inofra mar okum keingg rusnok enjgineg guru, beda Allah onofra mar okum keingg iwa tein guru. Erek iwa isuna rot rusnok enjgineg rerin mar ongga oska, beda Allah omosuna rot iwa yeyin mar ongga oska tein si. 38 Iwa ita mar ongga oufamofa gu rusnok rot idou ongga eskeira, beda Allah emeita mar ongga oufamofa gu iwa tein si. Ofa emeita oufamofa eteb ekirsa gu iwa fogora mar ongga iwa icosu rot bera emah gu iwa rot eteb tein si. Jeska Allah emeita mar gu iwa morototuma erek iwa ita mar gu rusnok enjgineg tein." 39 Beda Yesus efesij rot mar ongga orocunc rot erek kef tein oida, "Enadaij nou osnok egens ongga eiteij ofou okag rot osnok egens egema ongga eiteij ofou tein guru. Jeska gegeka tein gemesiri gij momfaga si. 40 Oforoka egens ofoka enaksa ekirsa jeska Guru efen ofoka guru. Tina oforoka egens ongga omfokor rot tenten fob bera emejerek efen Guru si. 41 Enadaij nou iwa icunc rot mar ofosis ongga ah gij ihujir riteij, tina inek mega osu eteb ongga angh gij isinsa iteij guru. 42 Jefeda iwa inagot gu yeyin ihujir oida, 'Bua bin jah sif noba didif dimeita mar ofosis jeska biteij si,' erek koma guru. Jeska iwa isinsa inek rot mega osu ongga angh gij iteij ros enesi. Ongga tenten bera, iwa ita mega osu jeska isinsa iteij sismeni fog fogora iwa imek rot iskusk. Beda iwa ita mar ofosis jeska ihujir riteij tein ojgomu." 43 Beda Yesus agot rot mar orocunc erek kef oida, "Mega egens ongga ot gij mebi ofogu rara bera efen efek erek ongkoska. Noba mega egens ongga ot gij mebi oska bera efen efek ongga oska ojgomu. 44 Rusnok rijginaga rot mega egens oisouska mega egens koma efen efek. Moworug enefek ara guru. Noba mega ongga er ebireira enefek anggur guru. 45 Erek koma tein, rusnok ongga rita mar ongga oufamofa bera rita mar insa koma oisouska rudou efesi ongga oufamofa. Noba rusnok ongga rita mar ongga ofogog bera rita mar insa koma oisouska rudou efesi ongga ofogog. Jeska mar ongga rusnok ragot rot bera en jeska meidu ongga angh gij rudou efesi ojgomu." 46 Beda Yesus agot deika oida, "Iwa ijeka Didif erek yeyin ika, tina teinefa fogora iwa ineita mar ongga Didif danggot rot gu iwa guri? 47 Didif dimefesij rot mar orocunc egens osok gij rusnok ongga rin skoita Didif noba rig duga fogora rincira rot mar ongga danggot insa koma. 48 Rua insa koma bera rirek osnok egens ongga emei mod. Sismeni ofa eji mebi onjoros orodosu mamu. Beda ofa ei efen mod egens esij mamu ongga ahais insa koma. Noba gij mona ongga mei ofot noba edi efen mod, beda efen mod koma eneineina jinaga guru. Tina mod koma ot rot ahais ojgomuja. Jeska mod egens koma onot esij mamu ongga ahais ojgomu fob. 49 Tina rusnok ongga ringg duga fob, tina rineita jeni duga insa koma guru, beda rua rirek osnok egens ongga emei mod tein. Tina ofa enei efen mod esij mamu guru. Noba gij mona ongga mei ofot noba edi efen mod koma, beda efen mod insa koma esiri ebeirens noba eseiseifa ojgomu."
