Lukas 4

1Gij mona ongga Yesus eja jeska mei Yordan, beda Efena Ebsi eker desi Ofa rot owesa efek eteb. Beda Efena Ebsi Allah oroun Ofa jah monuh ongga owowa ongga rusnok rineker gij guru. 2Nou ongga Yesus ensaga jah suma, beda Bilis ereni Ofa gij mona setka tohkuru ojgomuja. Gij mona insa koma bera Yesus enet maat egema tein guru. Jefeda mosona ongk Ofa erek eteb ojgomu fob. 3Beda Bilis agot gu Ofa oida, "Bua bera Allah efen efesa, jefeda butunggom mamu egens kef erek maat nou bua." 4Beda Yesus agot gu ofa oida, "Runggu gij Mar Efeyi Ebsi rot oida, 'Rusnok rineita riteij ah oisouska maat ojgomu guru.' " 5Beda Bilis oroun Yesus jah monuh egens ongga aksa eteb. Beda ofa ocunc rusnok gij monuh ofoukou jera rerin ebirfager nomnaga gu Yesus. 6Beda ofa agot oida, "Rusnok gij monuh nomnaga jera rerin ebirfager kef nomnaga bera ongga didif dedin. Noba didif dedin owesa efek jeskaseda daha mar insa koma nomnaga skoita osnok egens ongga didif ducunc rot ojgomu. 7Jefeda erek Bua bugif gu didif ojgomu, beda dimeita mar insa kef nomnaga gu Bua si." 8Beda Yesus agot deika oida, "Runggu gij Mar Efeyi Ebsi oida, 'Bugif gu Allah noba bufij Ofa ojgomu.' " 9Beda Bilis oroun Yesus jah kota Yerusalem noba aha Ofa skida mod ongga rusnok rum riteij gu Allah gij ofos ongga aksa eteb. Beda ofa agot gu Yesus oida, "Bua bera Allah efen efesa, jefeda Bua bij bisinsa jeska mod aksa kef ojgomu. 10Jeska runggu gij Mar Efeyi Ebsi oida, 'Allah omobk efen malaikat-malaikat jeskaseda rut joug Bua rot iskusk si. 11Erek koma beda malaikat-malaikat koma rumoskotu Bua fogora baki onojot gij mamu egens tein guru.' " 12Beda Yesus agot gu Bilis oida, "Runggu gij Mar Efeyi Ebsi oida, 'Binereni bebin Allah jinaga guru.' " 13Nou ongga Bilis ereni Yesus jera mar egema tein oisa fob, beda ofa eja jeska Yesus noba eker nou mona ongga ongkoska deika jeskaseda ereneni Ofa deika ojgomu. 14Erek koma beda Yesus oksons jah monuh Galilea. Noba owesa efek eteb jeska Efena Ebsi Allah ah gu Ofa ojgomuja. Erek koma beda rusnok rufoukou rifesij mar moguma rot Ofa rejrej monuh Galilea insa koma. 15Ofa oftuftu rusnok gij mod ongga rua rum riteij gu Allah gij, noba rusnok nomnaga koma risitit Ofa. 16Erek koma beda Yesus eja jah kota Nazaret tein. Ofa omorna eteb gij kota egens koma. Noba gij mona ongga Sabat beda Ofa eja gu mod ongga rusnok rum riteij gu Allah gij erek giskini. Beda Ofa ot jeskaseda efesij mar jeska Mar Efeyi Ebsi. 17Beda rua rita buku nabi Yesaya gu Ofa. Ofa ohoda buku egens koma beda ohca rot mar egens ongga nabi Yesaya onggu rot sis fob erek kef oida, 18" 'Efena Ebsi Allah eker desi Didif jeskaseda dagot rot efen oga ongga oufamofa gu rusnok ongga rufojingki. Ofa obk Didif jeskaseda difesij mar gu rusnok ongga ringker gij mod oskusk oida ebeibeyaif rua runsuwa fob. Noba rua ongga riteij ofou bera rik mar fob. Noba rusnok ongga mar okum ah keingg rua bera runsuwa jeska mar insa koma fob. 19Noba Ofa obk Didif jeskaseda dagot gu rua oida mona ongga Allah emeita eiteij ah ongga efeinah gu rusnok bera ensaga fob.' " 20Beda Yesus of joug buku egens insa koma, noba eita buku koma gu osnok egens jah suma. Beda Ofa eker sons gij efen kursi. Rusnok nomnaga gij mod insa koma bera ruhobut Ofa. 21Beda Ofa agot gu rua oida, "Mar insa kef ongga iwa ingg Didif dimfesij gu iwa fob, deisef bera mar koma ah gij efen efera fob." 22Rua nomnaga rudou oufamofa rot Ofa noba rua rudou oubsaha eteb rot teinefa Ofa efesij mar ongga erek ongkoskamoka tein. Beda rua ragot moguma oida, "Tina Ofa kef bera Yusuf efen efesa ojgomu." 23Beda Yesus agot gu rua oida, "Didif dijginaga rot fob oida iwa idou os yagot rot mar orocunc egens gu Didif erek kef oida, 'Bua bera erek Dokter, jefeda bita eskeira gu bisinsa ojgomu.' Jeska iwa idou os rot oida Didif ducunc mar onswos jah sif tein morototuma erek mar onswos ongga Didif duncunc rot gij kota Kapernaum fob ojgomu. Jeska iwa idou onororu Didif rot tenten enesi. 24Tina Didif dimagot rot mar insa kef ojgomu oida, 'Giskini gij mona ongga nabi egens oksons jah efen monuh beda rusnok runoroun ofa deika guru.' 25Tina, iwa ig rot kef fog, jeska gij mona ongga nabi Elia engker gij Israel ros, beda mos enes gij tahun rara orgomu, noba mosona eteb ongk rusnok. Gij mona insa koma tein rujaga ongga rija mesina rufoukou bera ringker gij monuh Israel tein. 26Tina Allah onobk nabi Elia skoita rua jeskaseda ofij rua guru. Ofa obk Elia skoita ojaga eja mesina egens ongga eker gij kota Sarfat ongga angh doida Sidon jeskaseda ofij ofa ojgomu. 27Noba gij mona ongga nabi Elia engker gij Israel bera rusnok rufoukou ongga rufos efera okora eteb runofoguma tein. Tina rua nomnaga rineita eskeira guru. Osnok egens ojgomu ongga ofoka Naaman bera eita eskeira. Noba ofa bera osnok egens jeska rua ongga Siria." 28Erek koma jefeda rusnok nomnaga ongga ringker gu mod ongga rusnok rum riteij gij insa koma rutkonu oska eteb rot mar ongga Yesus anggot gu rua. 29Beda rua ridebecki noba rukoja Ofa jah mebah onjoros rinsaga jah gu memaga efebari. Rua rudou os rij Ofa jeska mamu efaga koma. 30Tina Yesus eretka rusnok riskemba insa koma beda eja jeska fob. 31Erek koma beda Yesus eja jah kota Kapernaum ongga angh gij monuh Galilea. Beda Ofa oftuftu rusnok jah suma gij mona ongga Sabat. 32Rua nomnaga rudou oubsaha rot Ofa, jeska Ofa oftuftu rua rot owesa efek eteb. 33Osnok egens ongga efena ofogog engker gij odou efesi bera eker gij mod egens insa koma. Ofa ois rot oga eteb oida, 34"Ei, Yesus ongga jeska kota Nazaret! Bua budou os meidu rot memef? Bua bin jeskaseda bufra mar okum keingg memef ei? Didif dijginaga rot Bua fob. Bua bera Ofa ongga ebsi komowa noba ongga Allah ombk jeskaseda agot rot efen oga gu rusnok!" 35Beda Yesus etaha joug efena ofogog egens koma oida, "Biker toumou ojgomu! Bua burogna jeska osnok egens kef ojgomu!" Beda efena ofogog koma edi osnok egens koma fogora esiri beda orogna jeska osnok egens koma jah rusnok nomnaga rudou. Tina osnok egens koma eneita efera okora guru. 36Beda rusnok ongga ringg rot mar insa koma rudou oubsaha eteb rot. Jefeda rua ragot moguma oida, "Ofa era oga ongga owesa efek fogora eretaha joug efena ofogog insa koma, noba efena ofogog koma ororu efen oga ojgomu!" 37Erek koma jefeda rusnok rifesij mar moguma osok gij Yesus rejrej monuh insa koma. 38Erek koma beda Yesus eja jeska mod egens insa koma noba eja jah Simon efen mod. Beda rusnok ragot gu Yesus oida Simon efen meifina ojaga bera maren ofoufem eteb. 39Jefeda Yesus ejek Simon meifina ojaga ongga maren insa koma. Beda oisouska efen oga bera maren ofoufem insa koma eja jeska ojgomu, beda ainsa koma tein ojaga egens koma eskeira fob. Beda ofa edebecki noba ofij Yesus jera rusnok enjgineg jah suma tein. 40Nou ongga mowa ensiri gij fob, beda rusnok ongga rerin rua ongga marenir rufoukou bera ruroun rua skoita Yesus. Beda Yesus aha efen etma esij rua fogora eita eskeira gu rua nomnaga. 41Rifena ofogog tein rurogna jeska rusnok rufoukou rudou efesi noba ruis oida, "Bua bera Allah efen efesa!" Tina Yesus etaha joug rua noba obk rua jeskaseda riker toumou ojgomu. Jeska rifena ofogog insa koma rijginaga oida Yesus bera Kristus egens koma ongga emen jeskaseda eita eiteij ah ongga efeinah gu rusnok. 42Nou rahah tentena beda Yesus eja jeska kota koma noba ejeker gij monuh egens ongga owowa gu esinsa. Rusnok rufoukou ruhca Yesus ojgomuja. Nou ongga rua ringk Ofa, beda rua rirejgei Ofa jeskaseda Ofa eneja jeska rua guru. 43Tina Ofa agot gu rua oida, "Didif ducosu rot dijefesij rot Allah oga ongga oufamofa noba osok gij rot teinefa Ofa ofoka ereij keingg rusnok gij monuh enjgineg tein. Jeska Allah bera ombk Didif jah mebi jeskaseda difesij rot mar insa koma ojgomu." 44Erek koma jefeda Yesus ejefesij rot Allah oga gij mod rejrej monuh Yudea ojgomu.

will be added

X\