1 Gij mona juens erek rahah tentena, beda rujager insa koma rurka miniyi ongga efen ensesa jah Yesus moksu jeskaseda ruros efen efaga. 2 Nou ongga rua rinsaga gu Yesus odog, beda rua rik, tina mamu eteb ongga rurof joug mamu efesi neeka bera eskiski jeska fob. 3 Beda rua ruira gij mamu efesi, tina rua rinek Yesus efaga jah suma guru. 4 Rua runot jah suma noba rusujohu osok gij mar insa koma, tina rudou eineina gij ojgomu. Beda ainsa koma tein, gosnok gegeka ongga gergi meisoufa ongga efesa eisa eteb got desi rua. 5 Rujager insa koma rimeesa eteb noba ruug ribirfaga jeska. Beda gosnok gegeka insa koma gagot gu rua oida, "Iwa yuhca osnok egens ongga efena ebah gu rusnok ongga ranggos rifekesa rot meidu? 6 Jeska Ofa enah jah sif guru. Ofa endebecki jeska agos fob! Iwa idou ah keingg rot mar ongga Ofa anggot gu iwa gij monuh Galilea sis fob ei? 7 Gij mona insa koma Ofa agot oida, 'Rusnok rufogog rimagei Didif, Rusnok efesa, fogora runtob Didif tumu mega salib. Beda gij mona ongga juomu deika bera dimedebecki jeska dagos si.' " 8 Beda rujager insa koma rudou ah keingg rot mar ongga Yesus anggot erek insa koma gu rua sis fob. 9 Nou ongga rua ruksons jeska Yesus odog fob, beda rua rifesij rot mar insa koma nomnaga gu Yesus efen ruforoker rufok setka kungkob erfens jera rusnok enjgineg tein. 10 Rujager ongga rimfesij rot mar insa koma nomnaga bera erek Maria ongga rijeka Magdalena ni, Yohana ni, Maria ongga Yakobus efen mosu ni, jera rujager enjgineg tein. 11 Tina Yesus efen ruforoker ragot oida, "Iwa yucuwei mar rot ojgomu!" Noba rua rudou onororu rujager insa koma ruga guru. 12 Tina Petrus edebecki noba ofof jah Yesus odog. Nou ongga ofa ensaga jah suma, beda ofa ougif noba ogog gij mamu efesi, tina ofa ek meifeti ojgomu. Beda ofa odou oubsaha rot, noba ofa oksons rot odou ongga eineina gij tein. 13 Gij mona insa koma tein bera Yesus efen goforoka gegeka ongga gecira jah kota egens ongga ofoka Emaus. Kota egens koma ah kilometer setka kungkob erfeka yes jeska kota Yerusalem. 14 Goga gecira noba gefesij mar moguma osok gij mar ongga encirej Yesus fob. 15 Askesi Goga genefesij mar ros, beda ainsa koma tein Yesus orogna keingg goga noba ecira morototuma jera goga. 16 Goga gek Ofa, tina godou enebriyi gij oida Ofa koma bera Yesus enesi. Mar egens ocohun keingg rudou efesi rot. 17 Beda Ofa ejeka gu goga oida, "Goga gefesij rot mar meidu gu moroju kef?" Beda goga got rot gebirfaga ongga esiri jeska godou okum rot. 18 Beda gegema jeska goga ongga ofoka Kleopas ejeka gu Yesus oida, "Bua bisinsiyai ongga binja jah kota Yerusalem bera binejginaga rot mar okum ongga encirej osnok egens jah suma fob gurei?" 19 Beda Yesus ejeka goga oida, "Mar meidu bera koma?" Beda goga goroun oida, "Mar ongga encirej Yesus, ongga ojga jeska kota Nazaret. Ofa erek nabi egens ongga Allah ombk fob. Noba Ofa agot mar rot owesa efek noba otunggom mar rot owesa efek ahah Allah eiteij jera rusnok riteij tein. 20 Mefmen Guru-Guru agama jera ebirfager tein raha Ofa gu rusnok ongga rufogog tein. Noba rua runtob Ofa tumu mega salib fogora Ofa agos fob. 21 Tina sis fob memef modou oisum gij Ofa rot oida Ofa bera Kristus egens koma ongga emen jeskaseda osuwa mimif ongga Israel jeska mifmin mar okum. Rua ranggob Ofa erek mona orgomu fob. 22 Erek koma noba rujager rineya jeska memef bera ranggot rot mar ongga orotunggom modou oubsaha eteb rot. Gij raha tentena, beda rua rija jah Yesus odog. 23 Tina rua rinek efen efaga jah suma guru. Beda rua ruksons noba ragot oida rua ringk malaikat gegeka fob. Noba malaikat gegeka koma ganggot oida Yesus efena ebah sons fob. 24 Beda rineya jeska memef rija jah Yesus odog. Noba rua rik oida mar ongga rujager ranggot insa koma bera tenten ojgomu. Tina rua rinek Yesus guru." 25 Beda Yesus agot gu goga oida, "Goga godou osumu ojgomu. Goga godou onororu mar nomnaga ongga nabi-nabi ranggot rot mar insa koma sis fob enesi. 26 Jeska nabi-nabi koma ranggot oida, 'Kristus koma ongga emen jeska Allah bera emeita efera okora rot sismeni fog fogora Ofa emesma ofoka ongga aksa eteb.' " 27 Beda Yesus efesij gu goga rot mar nomnaga ongga Musa jera nabi-nabi nomnaga runggu gij Mar Efeyi Ebsi sis fob osok gij Ofa esinsa. 28 Erek koma noba nou ongga rua rinsaga doida kota Emaus fob, beda Yesus ocunc gu goga rot oida Ofa emeja jah monuh enjgineg. 29 Tina goga gois gu Ofa oida, "Bua bin noba biker jera magef ojgomu, jeska ai juens beda motu fob." Jefeda Ofa ororu goga jah gegan mod. 30 Nou ongga Ofa eker gu meja morototuma jera goga, beda Ofa agei roti ofog egens. Beda ofa ois oufamofa gu Allah rot, beda Ofa etka roti dougdoug fogora eita gu goga. 31 Beda ainsa koma tein goga gejginaga rot oida Ofa bera Yesus. Beda Yesus eseiseifa jeska geiteij fob. 32 Erek koma beda goga gagot moguma oida, "Tenten, askesi nagef nacira morototuma gu moroju jera Ofa ros, noba Ofa efesij mar insa koma jah Mar Efeyi Ebsi gu nagef, beda Ofa oga agob nadou efesi rot tenten." 33 Jefeda goga gedebecki noba goksons rot ebeirens jah kota Yerusalem. Nou ongga goga gensaga jah suma fob, beda goga gejek Yesus efen ruforoker rufok setka kungkob erfens jera rua enjgineg ongga rumohoturuma jera rua fogora gagot oida goga gek Yesus fob. 34 Beda rua insa koma ragot gu goga oida, "Tenten, Yesus endebecki sons jeska agos fob! Noba Ofa oncunc esinsa gu Simon fob!" 35 Beda goga gefesij rot teinefa Yesus ecira jera goga noba gefesij mar jera goga gu moroju. Noba goga gagot rot teinefa goga gejginaga rot oida Ofa koma bera Yesus gij mona ongga Ofa etka roti nou goga fob. 36 Askesi rua rimfesij rot mar insa koma ros, beda Yesus orogna gu rua rifekesa noba agot gu rua oida, "Iwa isma eskeiramera eteb fob!" 37 Rua nomnaga rufos graga rot noba rimeesa eteb, jeska rua rusujohu rot oida rifena bera koma. 38 Beda Yesus agot gu rua oida, "Iwa ijekjeka mar gij idou efesi erek koma rot meidu? 39 Iwa ik ofamosma ongga angh tumu dedin ditma jera daki. Didif bera Yesus ojgomu! Iwa yahtec Didif dufos ojgomu beda imek oida dedin dufos jera dufora tein. Efena bera efen mar erek koma guru." 40 Nou ongga Ofa anggot mar insa koma gu rua fob, beda Ofa ocunc efen etma jera aki gu rua. 41 Rua rijekjeka rudou efesi rot jeska rudou efaga ouka, tina rua rudou oubsaha eteb rot tein. Beda Yesus ejeka gu rua oida, "Maat egema enahuma ei?" 42 Beda rua rita mos ofogu ongga efej fob gu Ofa. 43 Beda Ofa eita mos koma noba et. 44 Erek koma beda Ofa agot gu rua oida, "Sis fob Didif dimfesij rot mar insa kef nomnaga gu iwa fob. Didif danggot rot oida mar nomnaga ongga Musa onggu gij Mar Efeyi Ebsi ni, mar nomnaga ongga nabi-nabi runggu rot ni, mar nomnaga ongga runggu gij Mazmur ni, osok gij Didif bera emah gij efera sismeni fog." 45 Beda Ofa oftuftu rua rot koisoisa deika jeskaseda rudou ebriyi gij mar ongga runggu gij Mar Efeyi Ebsi rot Ofa efen ofou. 46 Ofa agot gu rua oida, "Sis fob runggu gij Mar Efeyi Ebsi rot oida, 'Kristus egens koma ongga emen bera emeita efera okora rot sismeni fogora gij mona juomu deika beda Ofa emedebecki sons jeska agos si. 47 Beda rusnok rumoftuftu oisouska efen ofoka rot oida, erek rusnok rimeesa joug rerin mar ongga oska, beda Allah omosuna rot rerin mar ongga oska koma jeska rudou efesi. Rua rumoftuftu rot oga ongga oufamofa insa koma sismeni gij kota Yerusalem, beda oga insa koma emeja jah monuh nomnaga tein. Beda Allah onotkonu oska rot rua deika guru.' " 48 Beda Yesus agot deika oida, "Iwa isinsa bera ingk rot mar insa koma nomnaga gu iteij fob. 49 Didif dimesa mar ongga Akeina Allah anggen rot sis fob gu iwa si. Erek koma tina iwa iker gij kota Yerusalem onjoros iwa isma owesa efek eteb jeska mebaga." 50 Erek koma beda Yesus oroun rua jeska kota Yerusalem noba okag rot rua jah kota Betania. Beda Ofa ofra etma noba eita oufamofa gu rua. 51 Askesi Ofa eneita oufamofa gu rua ros, beda Ofa eja jeska rua noba osok jah mebaga. 52 Beda rua risitit mar gu Ofa noba ruksons jah kota Yerusalem rot rudou ongga efaga ouka eteb. 53 Beda rua rumohoturuma gij momas ongga ah rejrej Mod Allah noba risitit Allah ojgomuja. Ainsoma.
