Lukas 23

1Erek koma beda ebirfager agama insa koma nomnaga ridebecki noba ruroun Yesus skoita Gubernur Pilatus. 2Nou ongga rua rinsaga jah Pilatus efen mod beda rua rucuwei mar gij Yesus oida, "Osnok egens kef agot mar ongga ekirsa rot mefmen hukum agama! Noba Ofa oftuftu rusnok oida rua runoh pajak skoita raja Kaisar tein guru. Noba Ofa ofra esinsa ofoka erek raja egens ongga ofoka Kristus ongga emen tein!" 3Jefeda Pilatus ejeka gu Yesus oida, "Tenten ei? Bua bera raja jeska rusnok ongga Yahudi ei?" Beda Yesus oroun oida, "Mar ongga bua banggot koma bera tenten ojgomu." 4Beda Pilatus agot gu ebirfager imam-imam insa koma jera rusnok rufoukou jah suma koma oida, "Didif dinek rot mar ongga oska ongga Ofa ontunggom fob egema tein guru. Jefeda enadaij nou didif duga ojga rot Ofa guru." 5Tina rua ruis rot ruga eteb ekirsa oida, "Ofa oftuftu mar gu rusnok fogora rudou oska rot memefo. Ofa oftuftu rot mar erek koma rejrej monuh Yudea nomnaga. Sismeni Ofa oftuftu mar erek koma gij monuh Galilea ojgomuja onjoros jah kota Yerusalem kef tein." 6Nou ongga Pilatus engg mar ongga ebirfager Yahudi ranggot insa koma rot Yesus, beda ofa ejeka gu rua oida, "Yesus bera ojga monuh Galilea ei?" 7Nou ongga rua ruroun gu Pilatus oida Yesus efen ojga monuh Galilea, beda Pilatus ejginaga rot oida Herodes bera raja ongga ofoka ereij keingg rusnok Yahudi gij monuh insa koma. Jefeda ofa obk Yesus skoita raja Herodes ongga engker gij kota Yerusalem gij mona insa koma tein. 8Gij mona ongga Herodes ek Yesus, beda ofa odou eskeira eteb rot, jeska sis fob bera ofa odou os orodosu Yesus tein. Jeska ofa engg mar ofoukou osok gij Yesus fob, noba ofa odou os ek Yesus otunggom mar ongga onswos tein. 9Erek koma jefeda Herodes ejeka mar ofoukou gu Ofa. Tina Yesus onoroun mar sons gu ofa jinaga guru. 10Ebirfager imam-imam jera Guru-Guru agama rut jah suma tein, noba rucuwei mar ofoukou gij Ofa jah Herodes odou. 11Beda Herodes jera efen tentarer rita meifeti ongga erek raja efen noba raha koma tumu Ofa. Beda rua rahaisomu rot Ofa noba ruga oruh Ofa tein. Noba rua rubk Ofa sons skoita Pilatus. 12Sis fob bera Herodes jera Pilatus gomotkonu oska moguma, tina gij mona insa koma beda goga godou eskeira moguma sons. 13Pilatus jera ebirfager imam-imam jera ebirfager Yahudi rineya tein rumohoturuma. 14Beda ofa agot gu rua oida, "Iwa iroun osnok egens kef skoita didif, noba iwa yagot oida mar ongga Ofa oftuftu bera orotunggom rusnok rudou oska rot iwa. Didif dijeka joug Ofa jah idou fob, tina didif dik rot oida Ofa onotunggom mar ongga oska egema tein guru. 15Noba raja Herodes tein enek rot efen mar ongga oska egema tein guru. Jefeda ofa obk Ofa sons skoita mimif. Ofa koma bera onotunggom mar oska egema tein guru, jefeda enadaij nou didif duga ojga rot oida Ofa agos guru. 16Erek koma jefeda didif dumobk tentarer jeskaseda rangha Ofa doska, beda didif dumosuwa Ofa jeska ojgomu." 17((Gij orofosut mona ongga Paskah bera Pilatus osuwa osnok Yahudi egens jeska mod oskusk jeskaseda rusnok Yahudi rudou oufa rot ofa)). 18Rusnok nomnaga ongga runt jah suma ruis rot ruga eteb gu Pilatus oida, "Burka Ofa jeska ojgomu, noba busuwa Barabas jeska mod oskusk ojgomu." 19(Tentarer raha Barabas gij mod oskusk jeska sis fob ofa oh mosoruk gij kota Yerusalem, noba ofa agob rusnok tein.) 20Tina Pilatus odou os osuwa Yesus ojgomu, jefeda ofa agot rot mar insa koma juens deika. 21Tina rua ruis rot ruga eteb deika oida, "Butob Ofa tumu mega salib ojgomu! Butob Ofa tumu mega salib ojgomu!" 22Beda Pilatus ois rot mar insa koma erek ofosma juomu deika oida, "Iwa idou os jeskaseda didif dutob Ofa tumu mega salib rot meidu? Ofa ontunggom mar ongga oska erek meidu? Jeska didif dinek efen mar ongga oska ongga Ofa ontunggom fogora ejagos rot jinaga guru. Jefeda didif dumobk tentarer jeskaseda rangha Ofa, beda didif dumosuwa Ofa ojgomu." 23Tina rusnok riskemba insa koma ruis rot ruga eteb ojgomuja oida rutob Ofa tumu mega salib ojgomu. Jefeda Pilatus esiri gu rua fogora oitij rot ojgomu. 24Beda ofa oga ojga rot oida Yesus ejagos jeni rusnok insa koma rudou os rot. 25Noba ofa osuwa Barabas insa koma ongga ois mosuruk ofoka noba anggob rusnok sis fob gu rua. Beda ofa aha Yesus gu rua jeskaseda rua rutunggom mar ongga rudou os rot ojgomu. 26Nou ongga rua ruroun Yesus jeskaseda rutob Ofa tumu mega salib, beda rua rurodosu osnok egens ongga ofoka Simon. Ofa ojga Kirene. Gij mona insa koma ofa oksons jeska monuh enjgineg noba ofa omoira gij kota koma. Beda rua ruskotu ofa noba riradgodu ofa jeskaseda orka mega salib ongga rumotub Yesus tumu. 27Rusnok rufoukou rutoij Yesus. Rineya jeska rua bera rujager ongga ribisa noba rudou oubsaha rot Ofa. 28Beda Yesus ekikif noba agot gu rujager koma, "Yujager ongga kota Yerusalem, iwa inebisa rot Didif guru. Tina iwa ibisa rot isinsa jera yeyin iser tein. 29Jeska gij mona ongga okum ongga emen beda iwa imagot oida, 'Oufa ekirsa rot rujager ongga rifaga onokum rot riser guru, jera rujager ongga runok riser guru, jera rujager ongga erek runoh mengk gu riser tein guru.' 30Jeska gij mona insa koma ongga emen beda rusnok rumois gu memaga oida, 'Ijba keingg memef ojgomo!' Noba rua rumois gu memaga ofog oduma oida, 'Icohun memef ojgomo!' 31Jeska erek rusnok rita mar ongga oska erek kef gu Didif, ongga erek mega efeyi ongga ebah ros, beda rua rimeita mar ongga okum ekirsa gu iwa si." 32Gij mona insa koma rua ruroun gosnok gegeka ongga gofogog jeskaseda rutob goga tein tumu mega salib morototuma jera Yesus. 33Nou ongga rusnok insa koma ruroun Yesus jah monuh ongga ofoka 'Ebirfaga Oboha,' beda rua runtob Ofa jera gosnok gegeka ongga gofogog insa koma tumu mega salib. Rua runtob gegema tumu mega salib jah Yesus ognosk noba gegema tumu mega salib jah Yesus egris. 34Beda Yesus agot oida, "Akeina, busuna mar ongga oska insa kef jeska rusnok koma rudou efesi. Jeska rua rudou enebriyi gij mar kef ongga rua runtunggom gu Didif enesi." 35Rusnok rut jah suma noba ruhobut rot Yesus ojgomuja. Noba ebirfager Yahudi ruga oruh rot Ofa tein. Rua ragot oida, "Ofa osuwa rusnok enjgineg jeska rerin mar okum fob. Jefeda erek Ofa bera Kristus koma ongga Allah ocunc jeskaseda emen skoita mimif ongga Yahudi rot tenten ei, beda adaij nou Ofa osuwa esinsa jeska mar okum insa kef ojgomu!" 36Beda tentarer tein rin noba ruga oruh Ofa. Rua rita anggur efei ongga ekemba gu Ofa jeskaseda ej. 37Beda rua ragot oida, "Erek Bua bera raja ongga rusnok Yahudi rerin, beda busuwa bisinsa jeska mega salib kef ojgomu!" 38Beda runggu tumu mega salib jah skida Yesus ebirfaga rot mar erek kef: "." 39Gegema jeska goga ongga gofogog ongga runtob tumu mega salib jah suma oga oruh Yesus tein. Ofa agot oida, "Erek Bua bera Kristus egens koma ongga emen, beda busuwa bisinsa jera magef tein ojgomu!" 40Tina gegema jeska goga etaha joug ofa oida, "Erek bua binemeesa rot Allah tein gurei? Rusnok insa koma ruga ojga rot oida bua bagos morototuma erek ruga ojga rot Ofa tein. 41Nagef natunggom mar ongga oska fob, jefeda nagef nasma mar okum kef rot ojgomu. Tina Yesus kef bera eneita mar ongga oska egema tein guru." 42Beda osnok egens koma agot gu Yesus oida, "Yesus, gij mona ongga Bua bufoka ereij keingg rusnok fob, beda bucunc budou ongga eriagamaga rot didif ojgomu." 43Beda Yesus agot gu ofa oida, "Ongga tenten bera, gij mona deisef tein bua bumoira gu mebaga morototuma jera Didif si." 44Erek mowa ot deis fob, beda mebaga gij monuh insa koma eja erek motkobah noba ah erek koma gij aras orgomu deika. 45Beda meifeti aksa ongga rusnok rif joug montoj gij Mod Allah ebga erek egeka. 46Beda Yesus ois rot oga eteb oida, "Akeina, Didif daha difeni gij bebin bitma!" Nou ongga Ofa anggot mar koma, beda Ofa agos fob. 47Nou ongga ebirfaga tentarer egens engk rot mar insa koma, beda ofa esitit Allah noba agot rot Yesus oida, "Osnok egens kef bera efen odou ongga ebsi komowa rot tenten ojgomu!" 48Nou ongga rusnok rufoukou ongga rut jah suma ringk rot mar insa koma tein, beda rua ruksons jah rerin mod rot rudou ongga okum eteb. 49Tina rusnok egema tein ongga erek Yesus efen mohujir rut ai yes noba riajga rot mar insa koma nomnaga. Rineya jeska rua bera rujager ongga runroru Yesus jeska monuh Galilea. 50- 51Osnok egens ongga ofoka Yusuf ongga ojga jeska kota Arimatea gij monuh Yudea enofogu jah suma. Ofa osnok egens ongga odou oufamofa, noba ofa ororu Allah oga rot Tenten. Ofa tein odou ot nou mona ongga Allah omofoka ereij keingg rusnok. Ofa tein bera erek rusnok Yahudi rerin ebirfaga egens. Tina ofa onoitij rot mar ongga ebirfager agama insa koma ruga ojga rot osok gij Yesus guru. 52Ofa eja skoita Pilatus noba erejgei ofa jeskaseda erek Pilatus oitij rot, beda ofa emedaga Yesus efaga jeska mega salib. 53Pilatus oitij rot, jefeda ofa ejedaga Yesus efaga jeska mega salib, noba ofa era meifeti orond efen efaga. Beda ofa aha Yesus efaga gij mamu efesi ongga rusnok rutunggom fob. Rusnok rinaha mar agos egema tein gij mamu efesi insa koma enesi. 54Gij mona insa koma rusnok Yahudi risejah mar nou mona ongga Sabat, jeska ai juens beda mona ongga Sabat emesaga. 55Rujager insa koma ongga ruroru Yesus jeska monuh Galilea bera ruroru Yusuf jah mamu efesi jeskaseda rik ofa esah Yesus efaga gij mamu efesi insa koma. 56Beda rua ruksons noba risejah mar ongga efen ensesa jera miniyi ongga efen ensesa jeskaseda oroh Yesus efaga. Tina jeska mona ongga Sabat ensaga fob, jefeda rua riker mona juens jeni rerin agama erebent anggot rot.

will be added

X\