Lukas 20

1Gij mona juens bera Yesus oftuftu mar jera efesij mar rot Allah oga ongga oufamofa gu rusnok rufoukou gij momas ongga angh rejrej Mod Allah. Beda ebirfager imam-imam jera Guru-Guru agama jera ebirfager Yahudi rineya rin skoita Ofa. 2Beda rua ragot gu Ofa oida, "Bebin owesa efek erek meidu fogora bunotunggom mar erek komo. Noba idu bera ongga eita owesa efek koma gu Bua fobo?" 3Beda Yesus agot oida, "Didif dudou os dijeka gu iwa rot mar sismeni fog. Iwa yagot gu Didif rot mar kef oida, 4idu ongga eita owesa efek gu Yohanes jeskaseda ofa eita baptis gu rusnok, Allah bera eita ei, era rusnok ei?" 5Beda rusnok insa koma ragot moguma oida, "Erek mimif magot oida Yohanes eita owesa efek jeska Allah, beda Ofa emagot oida, 'Erek koma jefeda teinefo fogora iwa inororu ofa efen oga guri?' 6Tina erek mimif magot oida ofa eita owesa efek jeska rusnok ojgomu, beda rusnok rufoukou koma rimera mamu rimeredi mimif rot, jeska rua rudou rusujohu rot oida Yohanes bera erek nabi egens ongga Allah ombk fob." 7Jefeda rua ruroun gu Yesus oida, "Memef menejginaga rot idu ongga eita owesa efek gu Yohanes guru." 8Beda Yesus agot gu rua oida, "Erek koma jefeda, Didif tein dinagot gu iwa rot idu bera eita owesa efek gu Didif erek koma guru." 9Erek koma beda Yesus efesij gu rusnok rot mar orocunc egens kef oida, "Osnok egens erefa anggur gij efen mekeni. Nou ongga ofa eja jah monuh yes, beda ofa aha mekeni anggur koma gu rusnok rineya jeskaseda riker joug mekeni anggur koma. 10Gij mona kahma deika beda anggur efek insa koma ofom fob. Jefeda osnok egens ongga efen mekeni koma obk osnok egens ongga omfij ofa skoita rusnok ongga ringker joug mekeni insa koma jeskaseda rua rita anggur efek egema nou ofa. Tina rusnok ongga ringker joug mekeni koma rubu osnok egens ongga ofij ebirfaga koma. Beda rua rubk ofa oksons skoita osnok egens ongga efen mekeni koma rot etma efesijg. 11Beda ofa ongga efen mekeni koma obk osnok egens ongga omfij eneya deika, tina rusnok insa koma rubu ofa tein, noba ruga oruh ofa, beda rua rubk ofa tein oksons rot etma efesijg. 12Beda ofa ongga efen mekeni koma obk efen osnok egens ongga omfij egema dokun deika. Tina rusnok koma rubu ofa rot ahais tein noba rij ofa jeska mekeni koma. 13Erek koma jefeda osnok egens ongga efen mekeni koma agot oida, 'Didif dutunggom mar egema deika erek meidu? Didif dumobk dedin edesa egens ongga dudou okora eteb rot, fogora rua rumougif gu ofa si.' 14Tina gij mona ongga rusnok ongga ringker joug mekeni koma rik ofa efen efesa, beda rua ragot moguma oida, 'Ofa kef bera emesma mekeni kef gij mona ongga meka anggos jeska, jefeda mimif magob ofa jeskaseda mumok mekeni kef gu misinsa ojgomu.' 15Jefeda rua rikris ofa jeska mekeni fogora ragob ofa beda agos." Beda Yesus ejeka gu rua oida, "Osnok egens ongga efen mekeni insa koma omotunggom mar meidu skoita rua ongga ringker joug mekeni? 16Ongga tenten bera ofa ekemeji rua jeska mekeni koma fogora emagobir beda rua nomnaga ranggos! Beda ofa emaha mekeni koma gu rusnok rineya deika." Tina nou ongga ebirfager rusnok Yahudi insa koma ringg Yesus efesij mar erek koma, beda rua rua ragot oida, "Erek koma guru!" 17Jefeda Yesus ohobut rua noba agot oida, "Jefeda mar kef efen ofou erek teinefa: 'Rusnok ongga rii mod bera rukoja Mamu ahais egens koma fogora rij jeska fob. Tina mamu egens koma ejerek mamu ongga ofoufem ekirsa nou mod koma nomnaga.' 18Noba rusnok ongga rukockoreta rot mamu egens insa koma bera rimesiri fogora riseiseifa. Tina rusnok ongga mamu egens insa koma encirej rua, beda rua rumohoda nomnaga si." 19Guru-Guru agama jera ebirfager imam-imam rutkonu oska rot Ofa jeska rua rijginaga rot oida mar ongga Ofa omftuftu rot insa koma bera osok gij rua. Jefeda rua rudou os ragei Ofa ainsa koma tein ojgomu. Tina rua rimeesa rot rusnok rufoukou ongga riker rejrej Ofa. 20Ebirfager imam-imam jera Guru-Guru agama insa koma ruhca mona egens jeskaseda ragob Yesus. Jefeda rua rubk rerin rusnok rineya skoita Yesus jeskaseda rejeka gu Ofa erek reirei ojgomu. Noba erek Ofa oroun mar gu rua ongga ekirsa rot rerin agama erebent, beda rua rimagei Ofa fogora raha Ofa gu Gubernur ongga ofoka ereij keingg rusnok nomnaga. 21Jefeda rusnok insa koma rijeka gu Yesus reirei oida, "Akeina Guru, memef mejginaga rot oida mar nomnaga ongga Bua banggot noba buftuftu rot bera erek tenten ojgomu. Noba Akeina bunofra osnok egens erek ekirsa jeska egema tein guru, tina Bua buftuftu rot Allah oga ongga tenten ojgomu. 22Jefeda Akeina, bagot gu memef oida mimif ongga Yahudi bera muh pajak skoita raja Kaisar tein ei, era gurei?" 23Tina Yesus ejginaga rot oida rua rijeka gu Ofa erek reirei ojgomu. Jefeda Ofa agot oida, 24"Bucunc fifi perak egens gu Didif." Beda Ofa agot oida, "Efena jera ofoka idu bera enah tumu fifi kef?" Beda rua ruroun gu Yesus oida, "Koma raja Kaisar efena jera ofoka." 25Beda Yesus agot gu rua oida, "Jefeda iwa ita mar ongga Kaisar efen gu ofa ojgomu, noba ita mar ongga Allah efen gu Ofa ojgomu." 26Jefeda enadaij nou rua rig Ofa agot mar ongga ekirsa rot rerin agama erebent jah rusnok rufoukou rudou jinaga guru. Rua rudou oubsaha eteb rot mar ongga Ofa oroun rot insa koma, jefeda rua riker toumou noba rinejeka gu Ofa rot mar deika guru. 27Rusnok Yahudi rineya jeska ebic Saduki rin skoita Yesus. Rusnok ongga ebic Saduki rusujohu rot oida rusnok ongga ranggos bera rinedebecki sons guru. Rua rijeka gu Yesus oida, 28"Akeina Guru, sis fob Musa onggu keingg rot hukum egens ongga agot oida erek orna egens anggos fob noba ofa onok efesa guru, beda ofa efen mokosa era mokora egema omois moisa koma jeskaseda goga gok egesa egema nou orna egens ongga anggos fog. 29Sis fob runer rufok cinja erfeka ongga rumokosema bera riker jah sif. Orna egens ongga osumbohka oskotu arja. Tina gij mona ongga ofa anggos bera ofa onok efesa guru. 30Beda mokosa ongga egeka ois moisa koma deika tina ofa tein agos noba gonok efesa guru. 31Beda mokosa ongga orgomu ois moisa koma tina ofa tein agos. Beda mokoser nomnaga ongga runtoij bera ruis moisa insa koma, tina rua nomnaga tein ragos jeska noba ojaga egens koma onok efesa guru. 32Beda ojaga egens insa koma tein agos jeska noba onok efesa guru. 33Jefeda gij mona ongga rusnok ridebecki jeska ranggos, beda idu bera eita ojaga egens koma erek mohona gu mebaga? Jeska rua insa koma nomnaga ruis ojaga insa koma erek ruhona fob." 34Beda Yesus oroun gu rua oida, "Rusnok ongga rifena ebah gij mona ebeibeyaif bera rumoskotuma. 35Tina gij mona ongga rusnok, ongga Allah odou eskeira rot, ridebecki jeska ranggos fob beda runomoskotuma deika guru. 36Rusnok insa koma rija erek malaikat-malaikat ojgomu. Jefeda rua rinagos tein guru. Noba rua rijerek Allah efen efeser jeska rua rindebecki jeska ranggos fob. 37Tina rot mar ongga Musa onggu keingg sis fob bera, ofa esinsa agot rot tenten oida rusnok ongga ranggos rimedebecki sons si. Jeska sis fob, gij mona ongga ofa ek mah ongga ent, beda ofa agot oida Tuhan Allah bera erek Abraham, Isak jera Yakub ongga ranggos sis fob rerin Allah ojgomu. 38Jefeda Tuhan Allah enerek Allah ongga rusnok ongga ranggos rerin guru. Tina Ofa bera erek Allah nou rusnok ongga rifena ebah ojgomu. Jeska Allah eita eiteij ah ongga efeinah gu efen rusnok gu mebaga." 39Beda Guru-Guru agama rineya ragot oida, "Akeina Guru, Bua buroun mar rot koisoisa fob!" 40Erek koma beda rusnok insa koma runofos efek deika guru. Jefeda rua rinejeka gu Yesus rot mar deika guru. 41Beda Yesus ejeka gu ebirfager Yahudi agama insa koma oida, "Rusnok Yahudi ruftuftu oida Kristus egens koma ongga emen bera omojuj jeska ofou ebiedi raja Daud. 42Tina Daud esinsa onggu keingg gij Mar Efeyi Ebsi sis fob oida, 'Tuhan Allah agot gu dedin Tuhan oida, "Biker jah dugnosk rot bufoka aksa 43noba Didif dumoin keingg mesa nomnaga fogora rumougif gu Bua si." ' 44Jefeda erek Daud ois Kristus koma ongga emen erek 'Tuhan,' beda teinefa fogora iwa isujohu oida Ofa omojuj en jeska ebic raja Daud ojgomu, noba jeska Allah guri." 45Askesi rusnok rig mar ongga Yesus enefesij ros, beda Ofa agot gu efen ruforoker oida, 46"Yut joug idou efesi rot rua ongga Guru-Guru agama. Rua rudou os rincira rot meisoufa ongkoska ongga orocunc rot rerin rufoka aksa. Noba rua rudou os jeskaseda rusnok rugif gu rua gij mona ongga rincira gij pasar. Noba gij mona ongga rua ruira gij mod ongga rusnok rum riteij gu Allah gij, era gij mod ongga rusnok ruina maat keingg eteb, beda rua rudou os riker gij kursi eteb jah rusnok nomnaga rudou ojgomu. 47Tina rua rurokrusa rujona rija mesina jeskaseda rita rerin mareibra jeska rua. Noba rua rum riteij erek dektek jeskaseda rusnok rusujohu oida rerin rudou ongga ebsi komowa eteb ojgomu. Tina gij mona kahma bera Allah omofra mar okum eteb keingg rua rot si."

will be added

X\