Lukas 2

1Gij mona ongga Elisabet onjuj rot efen efesa fob, beda raja Kaisar Agustus oga ojga rot oida rusnok nomnaga ruksons jah rerin rujga jeskaseda rugu keingg rufoka erek rufosuit rot rusnok egaho ongga ringker gij monuh insa koma nomnaga. 2(Rua rafosuit rusnok nomnaga rot sismeni gij mona ongga Kirenius erek Gubernur nou monuh Siria.) 3Jefeda rusnok nomnaga ruksons jah rujga ongga rerin rufou ebiedi jeskaseda rugu keingg rufoka jah suma. 4Jefeda Yusuf tein eja jeska kota Nazaret ongga angh gij monuh Galilea. Beda ofa eja jah kota Betlehem ongga angh gij monuh Yudea. Ofa eja jah kota Betlehem jeska efen meimowa raja Daud ongga mosu onjuj rot ofa jah suma sis eteb fob. 5Yusuf eja jah suma noba ogu keingg efen ofoka morototuma jera efen osroj Maria ongga gomoskotuma gij mona kahma. Tina Maria efaga okum rot efesa fob. 6Gij mona ongga goga genjesaga jah monuh Betlehem fob, beda Maria otkonu okora rot efesa. 7Beda ofa ojuj rot efen efesa osumbohka egens ongga orna. Beda goga gera mahkowu gorond eferatefa egens koma, noba aha ofa gij burwa egens ongga sapi rint mofombra jeska gij. Rua riker jah suma jeska mod enjgineg nomnaga bera ebera joug fob. 8Gij motu insa koma bera gembala-gembala rut joug rerin domba-domba gu mektah egens ongga angh rejrej kota Betlehem insa koma. 9Beda ainsa koma tein malaikat egens jeska Tuhan Allah orogna keingg rua jah suma. Noba Tuhan efen efesa eisa eteb gij riteij, jefeda rua rimeesa eteb rot. 10Tina malaikat egens koma agot gu rua oida, "Iwa inemeesa guru. Didif din jeskaseda dagot rot oga ongga oufamofa nou iwa. Beda iwa jera rusnok enjgineg rufoukou tein idou emefaga ouka eteb rot si. 11Gij mona deisef gu monuh ongga imowa raja Daud efen sis fob bera, ojaga egens onjuj rot efesa orna egens. Ofa bera omoskotu iwa jeska yeyin mar ongga okum si. Ofa bera yeyin Tuhan Kristus ongga en skoita iwa fob. 12Mar egens ongga imorocunc rot Ofa gu iwa bera erek kef: Iwa ija noba imek eferatefa egens ongga rusnok rira mahkowu rurond ofa. Noba ofa ahca gij burwa egens ongga sapi rint mofombra jeska gij." 13Beda ainsa koma tein malaikat-malaikat riskembemba rurogna jah suma tein. Beda rua nomnaga risitit gu Allah oida, 14"Mimif nomnaga muis oufamofa eteb gu Allah ongga engker gu mebaga rot efen ofoka ongga aksa eteb! Noba mimif muis eskeiramera eteb nou rusnok nomnaga ongga ringker gu mebif, jeska Ofa oncunc efen odou ongga oufamofa rot rua fob!" 15Nou ongga malaikat-malaikat insa koma ruksons jah mebaga fob, beda gembala-gembala insa koma ragot moguma oida, "Mimif mija jah kota Betlehem jeskaseda miajga mar ongga encira jah suma erek malaikat egens koma anggot gu mimif fob ojgomu." 16Jefeda rua rija ebeirens jah suma noba rijesaga keingg Maria gonu Yusuf jera gegan eferatefa egens koma ongga ahca gij burwa efesi egens. 17Nou ongga rua ringk eferatefa egens koma fob, beda rua rifesij gu rusnok enjgineg rot mar insa koma ongga malaikat egens anggot gu rua osok gij eferatefa egens koma fob. 18Rusnok ongga rig rot mar insa koma bera rudou oubsaha eteb rot. 19Tina nou ongga Maria engg rot mar insa koma fob, beda ofa edemi mar koma gij efen odou efesi fogora osujohu rot ojgomu. 20Beda gembala-gembala insa koma ruksons noba rifesij rot oida Allah ontunggom mar ongga oufamofa eteb fob. Rua rifesij rot mar ongga rua ringg gu rusu jera mar ongga rua ringk gu riteij tein. Mar ongga rua rimfesij insa koma bera ah jeni erek malaikat egens anggot gu rua rot sismeni fob. 21Gij mona ongga Maria efesa efen mona cinja orfomu fob, beda osnok egens eris eferatefa egens koma efen ofom mareij ofos jeska jeni rerin agama erebent anggot rot. Beda rua rijeka Ofa efen ofoka Yesus jeni erek malaikat anggot rot gu Maria sis mona ongga Ofa efaga onokum rot efesa koma enesi. 22Gij mona ongga Maria efesa efen mona setka tohkuru fob, beda goga gontunggom mar nomnaga ongga hukum Musa anggot rot nou gegan egesa egens koma. Jefeda goga gorka Ofa jah kota Yerusalem jeskaseda gocunc Ofa gu Allah jeni agama erebent anggot rot tein. 23(Jeska runggu koisoisa gij Hukum Allah rot oida, "Orofosut eferatefa orna ongga osumbohka bera icunc ofa nou Allah erek osnok egens ongga omofij Allah si.") 24Beda rua ringk mem monggeta mos efaga eriska jeskaseda rita mar insa koma erek mar ongga rurougif gu Allah tein. Mar insa koma nomnaga jeni hukum Allah anggot rot sis fob. 25Gij mona insa koma bera osnok egens ongga ofoka Simeon eker gij kota Yerusalem. Ofa bera osnok egens ongga ororu Allah oga rot tenten ojgomuja. Noba ofa onotunggom mar ongga oska egema tein guru. Ofa tein omom odou nou mona ongga Kristus emen jeskaseda ofij efen rusnok Israel. Noba Efena Ebsi Allah bera eker desi ofa. 26Sis fob Efena Ebsi oncunc gu Ofa gij odou efesi fob oida ofa emek Kristus egens koma ongga Tuhan Allah omobk si, fogora ofa emagos ojgomu. 27Erek koma beda Efena Ebsi ocunc gu ofa gij odou efesi jeskaseda ofa oira gij momas ongga angh rejrej Mod Allah. Beda ainsa koma tein Yusuf jera Maria gorka gegan gesa egens koma skoita ofa jeskaseda ofa otunggom mar jeni agama erebent anggot rot. 28Beda Simeon ofra oforoka egens koma noba agei jera odou. Beda ofa esitit gu Tuhan Allah oida, 29"Tuhan ongga butunggom mar jeni budou ejginaga rot. Ebeibeyaif didif dik Ofa ongga Bua banggen rot oida didif dimek si fob. Jefeda didif dimagos jera dudou ongga eskeiramera eteb si tein. 30Jeska Didif dik Ofa koma ongga omosuwa mimif jeska mifmin mar okum gu disinsa diteij fob. 31Ofa bera ongga Bua binsejah jeskaseda osuwa rusnok nomnaga jeska rerin mar okum si. 32Ofa bera erek eisa ongga orocunc moroju ongga tenten nou rusnok ongga Yahudi guru. Noba bebin rusnok Israel nomnaga rumofra efen ofoka erek aksa eteb tein." 33Yesus meka jera mosu godou oubsaha eteb rot mar ongga Simeon anggot insa koma rot gegan gesa. 34Beda Simeon ois gu Allah jeskaseda Ofa eita oufamofa eteb gu goga tein. Beda ofa agot gu Maria oida, "Oisouska mar ongga oforoka egens kef omotunggom gij mona kahma bera rusnok rineya rimesiri rot rerin mar ongga oska, noba rineya bera rimesma oufamofa eteb jeska Allah tein si. Ofa omocunc rot mar ongga oufamofa eteb, tina rusnok rineya tein rimeretei rot Ofa si. 35Jefeda mar ongga rusnok nomnaga ridemdemi gij rudou efesi bera emah rot tomnomna si. Noba oisouska mar insa koma tein bera budou omokora eteb fogora bua bimebisa eteb rot si." 36Gij mona insa koma tein bera nabi ojaga egens ongga ojonokona fob enofoguma. Ofa efen ofoka Hana ongga Fanuel efen efesa. Ofa onjuj jeska efen ofou ebiedi ebic Ayser. Sis fob ofa ah igers gij ari mega ofoj cinja erfeka fob, 37beda ofa erek ojona eja mesina gij ari mega ofoj setka cinja orfomu noba tohkuru. Ofa eker gu momas ongga angh rejrej Mod Allah ojgomuja. Erek rahah onjoros motu fob bera ofa om eiteij gu Allah jah suma ojgomuja. 38Gij mona insa koma tein ofa en skoita Yusuf jera Maria jeskaseda ek gegan gesa egens koma. Beda ofa ois oufamofa eteb gu Allah rot oforoka egens koma noba efesij gu rusnok jah suma osok gij rot teinefa Ofa omoskotu rusnok Yahudi ongga ringker gij kota Yerusalem insa koma jeska rerin mar okum. 39Gij mona ongga Yusuf jera Maria gontunggom mar nomnaga jeni Hukum Tuhan Allah anggot rot fob, beda goga goksons jah gegan kota Nazaret ongga angh gij monuh Galilea. 40Beda gegan oforoka egens koma ojorna eteb fob. Ofa efen owesa efek noba efen odou ongga ebriyi eteb gij mar tein. Noba Allah efen oufamofa eteb ah gu Ofa ojgomuja. 41Gij orofosut tahun egens bera Yesus efen meka jera mosu gecira jah kota Yerusalem nou mona eteb egens ongga ofoka Paskah. 42Gij mona ongga Yesus efen ari mega ofoj setka kungkob erfeka fob, beda rua nomnaga ricira jah kota Yerusalem nou mona eteb egens insa koma erek giskini. 43Nou ongga mona eteb egens insa koma oisa fob, beda rua nomnaga ruksons jah rerin monuh, tina Yesus eker gij kota Yerusalem ros. Ofa efen meka jera mosu genejginaga rot koma guru. 44Goga gosujohu rot oida Ofa ororu rerin rusnok rufoukou ongga rincira fob, jefeda goga gecira nou mona juens gu gesinsa ojgomu. Gij mona ongga efeinah deika beda goga gohca Ofa gij gohujir rifekesa, 45Tina genek Ofa guru. Jefeda goga goksons jah Yerusalem jeskaseda gohca Ofa jah suma. 46Goga gohca Ofa gij mona orgomu ojgomuja, beda goga gek Ofa gij mod ongga rusnok rum riteij gu Allah gij. Ofa eker gu Guru-Guru agama rifekesa. Ofa agosuit mar jeska rua noba ejeka joug gu rua rot mar ofoukou tein. 47Rua nomnaga ongga ragosuit mar ongga Yesus emfesij fob bera rudou oubsaha eteb rot, jeska Ofa oroun mar gu rua rot odou ongga efesis eteb. 48Gij mona ongga Ofa efen meka jera mosu gek Ofa beda godou oubsaha rot eteb tein. Ofa efen mosu agot gu Ofa oida, "Didif jera mekeb madou efeneinei eteb rot bua ojgomu. Magef mahca bua rot mona juomu fobo! Teinefo fogora bua buntunggom mar erek koma gu magefo?" 49Beda Yesus oroun gu goga oida, "Goga gohca Didif rot meidu? Erek goga genejginaga rot oida Didif ducosu rot diker gij Akeina efen mod efesi gurei?" 50Tina goga godou enebriyi gij mar ongga Yesus oroun gu goga insa koma guru. 51Beda Ofa eja morototuma jera goga sons jah kota Nazaret, noba Ofa ougif gu goga gegan goga ojgomuja. Tina Ofa efen mosu edemi mar insa koma gij odou efesi jeskaseda osujohu rot deika. 52Beda Yesus ojorna eteb deika fob noba ogun odou ongga efesis ekirsa deika. Noba Tuhan Allah odou eskeira eteb rot Ofa, beda rusnok tein rudou oufamofa rot Ofa.

will be added

X\