Lukas 16

1Erek koma beda Yesus agot gu efen ruforoker oida, "Osnok orna mei ahtah egens efen osnok egens ongga omfij fogora agei efen fifi. Beda gij mona egema deika ofa eg jeska rusnok enjgineg rot oida osnok egens koma ongga agei efen fifi bera era fifi koma erahaisomu gij mar rourou ojgomu. 2Jefeda ofa ois gu osnok egens koma jeskaseda en, beda ejeka gu ofa oida, 'Bagot gu didif rot mar ongga oska ongga didif dingg rot bua fobo? Jeska bua bira dedin fifi rourou erek koma jefeda ebeibeyaif enadaij nou bua bagei dedin fifi deika guru!' 3Beda osnok egens koma osujohu oida, 'Jeska tuan onsuna rot dedin dufoka fob, jefeda didif dutunggom meidu? Didif dunofora efek guru, jefeda dinef mar gij mekeni tein guru. Noba erek direjgei mar jeska rusnok enjgineg beda mojen didif eteb rot. 4Didif dutunggom mar meidu jeskaseda rusnok rumoroun didif sons erek rerin mohuj egens gij rerin mod?' Jefeda osnok egens koma otunggom mar erek kef: 5Ofa ois gu rusnok ongga orna mei ahtah efen mar okowu ongga angh gu rua. Beda ofa ejeka gu osnok egens jeska rua oida, 'Mar okowu ongga angh gu bua bera meidu?' 6Beda osnok egens koma agot oida, 'Mar okowu ongga angh gu didif bera erek miniyi zaitun debeji wuntin egens.' Beda osnok ongga ofij orna mei ahtah koma agot gu ofa oida, 'Erek koma beda bua buh miniyi zaitun debeji setka cinja gu didif ojgomu.' 7Beda ofa ejeka gu osnok egens egema deika oida, 'Mar okowu ongga angh gu bua bera erek meidu?' Beda osnok egens koma oroun oida, 'Mar okowu ongga angh gu didif bera erek gandum karon ribu egens.' Beda osnok egens ongga ofij orna mei ahtah koma agot oida, 'Erek koma beda bua buh gandum karon wuntin cinja orfomu gu didif ojgomu!' 8Erek koma jefeda nou ongga orna mei ahtah insa koma engg rot mar ongga osnok egens koma ontunggom nou ofa fob, beda ofa esitit efen osnok egens koma, jeska ofa eita mar rot odou ongga efesis eteb. Ongga tenten bera, rusnok mebif rerin rudou efesis ekirsa gij rerin rita mar moguma erek ekirsa jeska rusnok ongga riker gij Allah efen eisa ojgomu. 9Jefeda erek rusnok ongga rira mareibra ongga mebif efen jeskaseda rimeita rusnok rudou eskeira rot iwa ojgomu, beda Allah omoroun rusnok ongga rita mar erek koma nou Ofa tein. Fogora rua rimeker gu mebaga nou mona ongga ah aibin ojgomuja. 10Erek koma jeska osnok egens ongga odou ocosu efei ahtah gij mar ongga oskiyai bera odou ocosu efei ahtah gij mar ongga eteb tein. Tina osnok egens ongga odou onocosu efei ahtah gij mar ongga oskiyai guru, beda ofa odou onocosu efei ahtah gij mar ongga eteb tein guru. 11Jefeda erek iwa idou onocosu efei ahtah rot mar ongga mebif efen guru, beda teinefa rot mar ongga tenten ongga Allah efen. Jeska ofa onocunc iwa jeskaseda ragei mar insa koma jinaga guru. 12Noba erek iwa idou onocosu efei ahtah rot mareibra ongga rusnok rineya rerin guru, beda iwa inesma mareibra nou isinsa tein jinaga guru." 13Beda Yesus agot deika oida, "Enadaij nou osnok egens ofij efen ebirfaga gegeka tein guru. Jeska ofa odou okora eteb ekirsa rot efen ebirfaga egens, noba odou oska rot ebirfaga ongga egema ojgomu. Noba ofa esejah odou efesi jeskaseda ofij efen ebirfaga egens rot iskusk, tina ofa odou eskes rot egema. Erek koma tein, enadaij nou iwa yufij Allah noba yuhca mareibra ofoukou ongga mebif efen erek egeka tein morototuma jinaga guru." 14Nou ongga rusnok rineya jeska ebic Farisi ringg rot mar ongga Yesus anggot insa koma fob, beda rua rutkonu oska eteb rot Ofa. Jeska rua bera rirek rusnok ongga ruhca mareibra ofoukou nou risinsa ojgomuja. Jefeda rua rufc rusum gij mar ongga Ofa anggot insa koma ojgomu. 15Beda Yesus agot gu rua oida, "Iwa ita mar jah rusnok rudou jeskaseda rua rusujohu rot oida iwa bera rirek rusnok ongga rudou ebsi komowa ojgomu. Tina Allah ejginaga rot mar ongga oska ongga angh gij idou efesi fob. Jeska mar ongga rusnok mebif rufra erek ofoufem bera erek mar ongga oska efekeifa ahah Allah eiteij ojgomu. 16Sis fob nabi-nabi ruftuftu rot hukum Musa ojgomuja onjoros mona ongga Yohanes en noba eita baptis gu rusnok. Noba ebeibeyaif rusnok rig rot Allah oga ongga oufamofa osok gij rot teinefa Ofa ofoka ereij keingg rusnok. Jefeda rusnok rufoukou rireni rot ahais jeskaseda ruira jera rusnok ongga Allah ofoka ereij keingg insa koma. 17Noba mebi jera mebaga emejeseiseifa si, tina mar ofoka egens tein eneseiseifa jeska Allah efen hukum jinaga guru. 18Erek koma noba idou ah keingg rot kef oida, idu ongga ens efen mohona noba onjoskotu mohona ongga efeinah deika, beda ahah Allah eiteij bera goga gesiri morototuma ojgomu fob. Noba erek osnok egens oskotu ojaga egens ongga eja jeska efen mahina tein, beda koma erek goga gesiri morototuma ojgomu tein." 19Beda Yesus efesij rot mar orocunc erek kef oida, "Osnok egens ongga orna mei ahtah eteb enofoguma. Ofa ergi meisoufa ongga ongkoskamoka, noba orofosut mona bera ofa ek efen eiteij ah ongga ebera rot mareibra ofoukou ojgomuja. 20Erek koma noba orofosut mona bera osnok egens ongga ofojingki ongga ofoka Lazarus eker gu montoj ongga orna mei ahtah insa koma efen jeskaseda erejgei mar jeska ofa. Lazarus maren ofos jefeda ofa efera okora eteb ojgomuja. 21Noba mosona ongk ofa eteb tein jefeda ofa odou os et maat ofora ejeres ongga esiri jeska meja ongga orna mei ahtah egens koma et maat esij. Erek koma beda mes en noba omna efen efera okora insa koma tein. 22Beda Lazarus koma agos noba malaikat-malaikat ofra ofa jah mebaga fogora eker desi Abraham. Beda orna mei ahtah koma tein agos noba rusnok rijesah ofa efen efaga gij moksu. 23Beda orna mei ahtah koma eita efera okora eteb gij mahmei meren ojgomuja. Nou ongga ofa eyajga jah skida, beda ofa ek Abraham eker gij monuh ongga ah yes, noba ofa ek Lazarus tein eker desi ofa. 24Beda ofa ois gu Abraham oida, 'Akeina Abrahamo, bucunc budou ongga okora rot didif fogora bubk Lazarus jeskaseda ofa ec etma otufou gij mei, beda en noba ered darni ofou. Jeska didif dut gij mah ongga eisa egigir eteb noba difera okora eteb!' 25Tina Abraham agot gu ofa oida, 'Edesa, bua budou ah keingg rot gij mona ongga goga gefena ebah gu mebi imbeja ros. Jeska gij mona insa koma bua bera bebin biteij ah ongga ongkoska noba ebera rot mareibra ofoukou ojgomuja. Tina Lazarus bera enek mar erek koma guru. Ofa maren jefeda efera okora ojgomu. Tina ebeibeyaif bera ofa eker gu mebaga rot ongkoska fob. Noba bua bah jah suma fogora bifera okora ojgomuja. 26Erek koma noba mogenamena ah joug mimif. Jefeda enadaij nou rusnok jeska memef men jah suma guru, noba enadaij nou rusnok jah suma tein rin jah sif tein jinaga guru.' 27Beda orna mei ahtah egens koma agot oida, 'Erek koma beda, Akeina Abraham, bua bubk Lazarus skoita dedin akeina efen mod ojgomu. 28Jeska dedin edkoser rufok cinja ongga riker gu jah suma ros. Bubk ofa oftuftu rua jeskaseda rua tein rinen jah mahmei meren fogora rita rifera okora eteb erek didif guru.' 29Beda Abraham oroun oida, 'Mar Efeyi Ebsi ongga Musa jera nabi-nabi runggu rot bera enah jah suma fob. Adaij nou rua rik mar koma gu risinsa noba ruroru jeni rot ojgomu.' 30Tina orna mei ahtah egens koma oroun oida, 'Akeina Abraham, koma bera enadaij rot enesi. Tina erek osnok egens ongga anggos fob eja skoita rua, beda rua rimeesa joug rerin mar ongga oska si!' 31Beda Abraham agot gu ofa sons oida, 'Sis fob rua runororu mar ongga Musa jera nabi-nabi ranggot rot guru, jefeda rua runororu osnok egens ongga edebecki jeska anggos efen oga tein guru.' "

will be added

X\