1 Gij mona ongga Sabat egens, beda Yesus eja jah Farisi egens ongga ofoka aksa efen mod jeskaseda get maat morototuma. Rusnok nomnaga jah suma ruhobut Ofa ojgomuja. 2 Osnok egens ongga efen aki jera etma efifij noba emageima bera eker doida Yesus. 3 Beda Yesus ejeka gu rua ongga ebic Farisi insa koma jera Guru-Guru agama rineya jah suma oida, "Ororu mifmin agama erebent bera mimif mita eskeira gu rusnok gij mona ongga Sabat ei era gurei?" 4 Tina rusnok insa koma riker moubsaha ojgomu. Jefeda Yesus aha efen etma esij osnok egens koma beda eita eskeira gu ofa. Beda Ofa obk osnok egens koma jah efen mod. 5 Erek koma beda Ofa agot gu rua deika oida, "Erek iwa yeyin iser era yeyin sapi egens ongga ensiri gij mebi efesi gu mona ongga Sabat, beda iwa imofij rua fogora yuku rua jeska mebi efesi insa koma ei era gurei?" 6 Tina rusnok insa koma runoroun mar gu Yesus guru. Rua rudou oubsaha jefeda riker toumou ojgomu. 7 Yesus eyajga rusnok rineya ongga ruira gij mod ongga ebirfaga Farisi egens insa koma efen. Rineya jeska rua rijeker esij kursi eteb jah rusnok nomnaga rudou jeskaseda rusnok rugif gu rua ojgomu. Nou ongga Yesus ek mar insa koma beda Ofa efesij rot mar orocunc egens erek kef oida, 8 "Gij mona ongga rusnok ruis gu iwa jeskaseda in noba it maat morototuma jera gosnok ongga gomoskotuma, beda iwa inejeker esij kursi eteb egens jah rusnok nomnaga rudou guru. 9 Jeska erek rua ruis gu osnok egens ongga ofoka aksa ekirsa jeskaseda engker gij kursi eteb egens, beda rua rimekemeji iwa jeska kursi koma fogora mojen iwa eteb rot. 10 Ongga oufamofa bera, gij mona ongga rusnok ruis gu iwa jeskaseda in, beda iwa ijeker jah gu rusnok rijmeg ojgomu. Beda rua rimen skoita iwa noba ragot gu iwa oida, 'Edohuji, iwa in noba iker gij kursi eteb egens kef jah rusnok rudou ojgomu.' Erek koma beda rusnok insa koma rumougif gu iwa. 11 Jeska Allah omoin keingg rusnok nomnaga ongga rufra risinsa rufoka erek Aksa si. Noba erek rusnok ruin keingg risinsa rufoka erek enaksa guru, Beda Allah omofra rerin rufoka erek aksa si." 12 Erek koma beda Yesus agot gu ebirfaga Farisi egens koma oida, "Gij mona ongga bua buina maat nou mona era motu, beda bunois gu bebin obhujir ni, obkoser ni, bebin ebskir rineya ni, era runa mei ahtah ni jeskaseda rin noba rit maat morototuma jera bua guru. Jeska gij mona kahma beda rua rumois gu bua tein jeskaseda bin noba bit maat morototuma jera rua. Beda koma erek rua risesa maat insa koma sons gu bua rot ojgomu. 13 Tina ongga oufamofa bera, gij mona ongga bua buina maat eteb, beda bua buis gu rusnok ongga rufojingki ni, rusnok ongga raki emageima ni, rusnok ongga rufumbohah ni, rusok ongga riteij ofou ni. 14 Bua bufij rusnok erek koma beda Allah emeita oufamofa eteb gu bua rot si. Jeska enadaij nou rusnok insa koma risesa maat ofoukou sons gu bua guru. Tina gij mona ongga rusnok ongga rudou ebsi komowa rindebecki jeska ranggos fob, beda bua bimesma bebin bufons rot ongga erek ongkoska ekirsa si." 15 Nou ongga osnok egens koma engg rot mar insa koma ongga Yesus anggot fob beda ofa agot oida, "Oufamofa eteb rot rusnok ongga ruina maat eteb morototuma jera Allah gu mebaga!" 16 Beda Yesus efesij mar orocunc egens erek kef oida, "Gij mona juens beda osnok egens ongga oina maat eteb bera ois gu efen mohujir rufoukou jeskaseda rin noba rit maat morototuma jera ofa. 17 Nou ongga mar nomnaga ensejah fob, beda ofa obk osnok egens skoita rua jeskaseda agot gu rua oida, 'Iwa in jeska maat nomnaga ensejah fob.' 18 Tina rusnok insa koma nomnaga rinen guri. Osnok egens jeska rua ragot oida, 'Didif dineja enesi, jeska didif dingk mekeni egens fob, noba didif dudou os dijek dedin mekeni koma fog.' 19 Beda osnok egens eneya deika agot oida, 'Didif dineja deisef guru, jeska didif dingk sapi efaga setka fob, noba didif dudou os durohrus dedin sapi-sapi koma jah mektah sismeni fog.' 20 Beda osnok egens eneya deika agot oida, 'Didif ainsa kef bera duskotu arja deisef fob, jefeda didif dineja jah suma enesi.' 21 Erek koma jefeda osnok egens insa koma oksons noba agot rot mar insa koma nomnaga gu efen ebirfaga. Beda ebirfaga egens koma otkonu oska eteb rot. Jefeda ofa agot gu osnok oforoka egens insa koma ongga ofij ofa oida, 'Bua bija ebeirens jah moroju osubu deis, beda buroun rusnok ongga rufojingki ni, rusnok ongga raki emageima ni, rusnok ongga riteij ofou ni, rusnok ongga rufumbohah ni, rua koma rin jah sif ojgomu.' 22 Nou ongga osnok egens koma oroun rusnok insa koma fob, beda ofa agot gu efen ebirfaga oida, 'Tuan, didif duntunggom mar ongga bua bumbk didif rot fob, tina bebin mod efesi enebera rot rusnok enesi.' 23 Beda ebirfaga egens koma agot gu ofa oida, 'Jefeda bua bija jah moroju ongga angh rejrej monuh insa kef noba biradgodu rusnok jah suma jeskaseda rua tein rin noba rit maat fogora dedin mod emebera rot rusnok si. 24 Tina rusnok insa koma ongga didif duis gu rot sismeni bera rinen guri! Jefeda gij mona kahma bera rua rinet maat morototuma jera didif deika jinaga guru!' " 25 Gij mona insa koma bera rusnok rufoukou rincira morototuma jera Yesus. Beda Yesus ekikif noba agot gu rua oida, 26 "Erek osnok egens odou os ororu Didif, tina ofa odou okora rot efen rusnok erek mosu ni, meka ni, mohona ni, efesa ni, mokosa ni, meyera ni, era ofa esinsa tein erek ekirsa jeska Didif, beda enadaij nou ofa ororu Didif jinaga guru. 27 Noba erek osnok egens onoitij rot eita efera okora morototuma erek Didif dimeita difera okora guru, beda enadaij nou ofa ororu Didif guru. 28 Gij mona ongga osnok egens odou os ei mod ongga aksa, beda ofa ofosuit efen fifi egaho jeskaseda ek rot oida efen fifi ongga adaij nou ei mod egens rot oisa ebeirens fob ei, era gurei. 29 Jeska erek ofa aha mod egens koma efen efeb ojgomu ros, tina efen fifi oisa jeska, beda mod egens koma onoisa guru. Erek koma beda rusnok ongga rik mod egens koma bera rumotut rot ofa si. 30 Rua rimagot oida 'Wah! Osnok egens kefi ei mod eteb, tina onoisa ebeirens guri.' 31 Era raja egens emagobuma jera raja enjgineg. Tina sismeni bera ofa omosujohu rot oida efen tentarer rufok ribu setka bera adaij nou rimagobuma jera raja enjgineg koma efen tentarer rufok ribu setka egeka ei era gurei? 32 Ofa osujohu rot, tina efen tentarer enadaij guru. Jefeda gij mona ongga raja enjgineg koma efen tentarer ongga askesi gu moroju ros, beda ofa omobk efen ruforoker skoita raja enjgineg koma jeskaseda ragot gu ofa oida ofa onodou os rimagobuma jera ofa guru!" 33 Beda Yesus agot deika oida, "Erek koma rot iwa tein. Erek iwa inaha mar nomnaga jah jeskaseda iroru Didif guru, beda enadaij nou iwa iroru Didif jinaga guru." 34 - 35 Beda Yesus agot deika oida, "Maroforu mos bera oufa nou mar ofoukou ongga mimif mireska. Tina erek maroforu mos insa koma onotka deika guru, beda mimif maha maroforu mos koma jah ojgomuja noba minereska mar deika guru. Jefeda erek iwa isujohu rot mar insa koma ongga iwa ig rot iskusk ojgomu beda idou emebriyi gij efen ofou si."
