Lukas 13

1Gij mona insa koma bera rusnok rineya rifesij gu Yesus osok gij rot teinefa Gubernur Pilatus anggob rusnok jeska monuh Galilea askesi rua rugif gu Allah sis fob. 2Beda Yesus agot gu rua oida, "Jefeda iwa isujohu rot oida rusnok insa koma bera rerin mar ongga oska ekirsa jeska rusnok Galilea rineya jeska rua ranggos erek koma fob ei? 3Erek koma guru. Tina erek iwa tein inemeesa joug yeyin mar ongga oska guru, beda mar okum emedi iwa tein fogora iwa tein imagos si. 4Teinefa rot rusnok rufok setka noba cinja orfomu ongga ranggos gij kota Yerusalem gij mona ongga mod aksa eteb esiri keingg rua. Iwa isujohu koma bera orocunc rot oida rua rerin mar ongga oska ekirsa jeska rusnok rineya ongga ringker gij kota Yerusalem ei? 5Erek koma guru. Tina erek iwa tein inemeesa joug yeyin mar ongga oska guru, beda mar okum emedi iwa fogora iwa imagos tein si." 6Beda Yesus agot deika oida, "Osnok egens efen mega ara egens ongga ot gu efen mekeni anggur. Gij mona juens beda ofa ejek mega egens koma rot efen efek, tina enek efek egema tein guri. 7Jefeda ofa agot gu osnok egens ongga omfij gij efen mekeni oida, 'Didif dijek dedin mega egens kef rot efen efek gij tahun rara orgomu fob, tina dinek mega koma efen efek jinaga guru. Jefeda buf mega egens ojgomu, jeska mega koma ot rourou gij dedin mekeni ojgomu.' 8Tina osnok egens ongga omfij koma agot oida, 'Tuan, erek buitij rot beda mega koma ot gij tahun egens deika fog ojgomu. Beda didif dimeji mebi rejrej mega efaga egens koma noba dumogun maat gij mebi jeskaseda ofogu rara. 9Beda naker gij tahun egens deika ojgomu. Noba erek efen efek beda oufamofa eteb nou bua. Tina erek efen efek guru, beda dumof mega egens koma si.' " 10Gij mona ongga Sabat egens beda Yesus oftuftu rusnok gij mod egens ongga rua rum riteij gu Allah gij. 11Ojaga egens ongga efena ofogog engker gij odou efesi enofogu jah suma. Efena ofogog insa koma edi ofa fogora ofa maren gij tahun rara setka noba cinja orfomu fob. Ofa ejmeg ofora agab jefeda ofa onot rot iskusk guru. 12Nou ongga Yesus ek ojaga egens koma, beda Ofa ois gu ojaga egens koma oida, "Asoka, Didif dusuwa bua jeska mar ongga otunggom bua erek marenib fob!" 13Beda ofa aha efen etma esij ofa. Beda ainsa koma ojaga egens koma ot aharuka noba ofa esitit gu Allah. 14Jefeda ebirfaga mod ongga rusnok rum riteij gu Allah gij bera otkonu oska rot Yesus jeska Ofa eita eskeira gu osnok egens gij mona ongga Sabat. Jefeda ofa agot gu rusnok jah suma oida, "Gij mona cinja erfens bera rusnok rifarur gij mar. Jefeda erek iwa idou os isma eskeira beda iwa in gij mona ongga rimfarur insa koma ojgomu, tina inen rot mar insa koma gij mona ongga mimif mum miteij gu Allah guru!" 15Beda Yesus agot gu ofa oida, "Bua buhurmei mar ojgomu! Gij mona ongga Sabat beda iwa nomnaga isuwa yeyin lembu era keledai jeska yeyin mod fogora iroun mar koma jah mebah jeskaseda ita mei gu. 16Tina teinefa rot ojaga egens kefo! Ofa tein bera ongga onjuj jeska efen meimowa Abraham. Noba Bilis ontunggom ofa gij tahun rara setka noba cinja orfomu fob fogora ofa maren ojgomuja! Tina iwa isujohu rot oida enadaij nou ofa osuwa jeska mar okum insa kef gij mona ongga Sabat gurei!" 17Nou ongga Yesus anggot mar insa koma fob, beda ebirfaga mod insa koma mojen ofa eteb rot. Tina rusnok jah suma rudou efaga ouka eteb rot mar onswos ongga Yesus ontunggom jah gu rifekesa fob. 18Yesus agot gu rua oida, "Mona ongga Allah ofoka ereij keingg rusnok bera erek kef: 19Osnok egens erefa mega mos efej egens gij efen mekeni. Sismeni mega mos efej insa koma bera erek efej ai ojgomai. Tina mega mos efej insa koma er erek mega ongga akseij eteb fob. Beda mem ofoukou ojoka efefa gij mega esta insa koma." 20Beda Yesus agot mar orocunc juens deika gu rua. Ofa agot oida, "Mona ongga Allah ofoka ereij keingg rusnok bera erek kef: 21Ojaga egens eita roti efed ongga erek ai oskiyai. Beda ofa orohoh roti efed insa koma jera gandum fogora gandum koma ejefifij erek eteb doska deika fob." 22Erek koma noba askesi Yesus otoiru jah kota Yerusalem beda Ofa oira gij kota-kota ongga angh gij monuh insa koma tein. Beda Ofa oftuftu mar gu rusnok gij kota-kota insa koma. 23Beda osnok egens ejeka gu Yesus oida, "Tuhan, erek rusnok oskiyai bera rimesma eiteij ah ongga efeinah ei?" 24Beda Yesus oroun oida, "Iwa ireni rot iskusk jeskaseda imoira gij montoj ongga emeinma ojgomu. Jeska rusnok rufoukou bera rimereni rot tina rua nomnaga runoira gij montoj ongga emeinma insa koma guru. 25Gij mona ongga ebirfaga mod of joug montoj jeska iwa fob, beda iwa imot jah mebah noba ingkik montoj koma ojgomuja. Noba iwa imois gu ebirfaga mod egens koma oida, 'Tuan, buhoda montoj jeska memefo.' Tina tuan insa koma omoroun gu iwa oida, 'Didif dinejginaga rot iwa guru! Iwa in jeska guaidu?' 26Beda iwa imoroun gu ofa oida, 'Tuan, mimif mint maat morototuma jera bua sis fob! Noba bua buftuftu memef gij mefmen monuh sis fob.' 27Tina ofa omoroun gu iwa oida, 'Didif dinejginaga rot iwa guru. Noba didif dinejginaga rot monuh ongga iwa in jeska tein guru. Iwa ija jeska didif ojgomu. Iwa bera erek rusnok ongga rufogog ojgomu!' " 28Beda Yesus agot gu rusnok insa koma deika oida, "Gij mona ongga Allah ofoka ereij keingg rusnok, beda iwa imek yeyin imower Abraham ni, Ishak ni, Yakub ni, jera nabi-nabi nomnaga risitit Allah. Tina iwa imebisa noba imeita ifera okora eteb gij mona insa koma si. Jeska Allah omokoja iwa jeska ojgomu. 29Rusnok rimen jeska monuh ongga mowa orogna ni, monuh ongga mowa esiri gij ni, monuh ongga agosu ni, monuh ongga emaga ni. Beda rua nomnaga rimet maat morototuma noba rimefaga ouka eteb morototuma jera Allah si. 30Tina rusnok ongga ruhca rufoka ongga aksa gij mona ongga ebeibeyaif bera runofoka aksa gij mona ongga emen deika guru. Noba rusnok ongga runohca rufoka ongga aksa gij mona ebeibeyaif guru bera rimesma rufoka ongga aksa gij mona ongga emen si." 31Gij mona insa koma beda rusnok rineya ongga ebic Farisi rin skoita Yesus noba ragot gu Ofa oida, "Akeina, Bua bineker jah sif guru. Bua bija jah monuh enjgineg ojgomu, jeska raja Herodes odou os agob Bua." 32Beda Yesus oroun gu rua oida, "Raja Herodes bera odou efesis noba ofogog tein. Jefeda bua bagot gu ofa oida, 'Gij mona deisef jera monog tein bera dikemeji efena ofogog jeska rusnok rudou efesi noba dita eskeira gu rineya ongga marenir tein. Beda gij mona juomu bera dimeita mar nomnaga oisa fob.' 33Erek koma, tina deisef, monog, ckog tein bera Didif dumotoiru ojgomuja onjoros dinsaga gu kota Yerusalem fob. Jeska Didif ducosu rot danggos gij kota Yerusalem morototuma erek nabi-nabi ongga ranggos jah suma sis fob tein ojgomu! 34Didif dudou okora eteb rot iwa ongga kota Yerusalemo! Yeyin imower bera ongga ranggob rusnok ongga Allah ombk skoita iwa sis fobo. Noba rua bera ongga rira mamu riredi rusnok rineya ongga Allah ombk skoita rua fogora ranggos tein. Sis fob Didif dudou os ducohun iwa nomnaga erek mongkukar mosu ongga ocohun efer gij efembra efesi. Tina iwa idowu joug rot ojgomu. 35Jefeda Allah eneker gij yeyin Mod egens jah ifekesa deika guru. Mod koma emah erek rourou ojgomu. Noba iwa inek Didif deika guru onjoros mona ongga iwa yuis rot oida, 'Oufamofa eteb gu Bua ongga bin oisouska Tuhan ofoka!' "

will be added

X\