Lukas 10

1Gij mona egema deika beda Yesus ohoturu efen ruforoker rufok setka cinja erfeka deika. Beda Ofa obk rua rija gegeka gegeka rukag Ofa jah monuh ongga Ofa emeja gij. 2Ofa agot gu rua oida, "Rusnok ongga rudou os rig rot Allah oga bera erek rufoukou, tina rusnok ongga ruftuftu rusnok enjgineg osok gij Allah efen oga insa koma bera erek ruskiyai. Jefeda iwa yum iteij gu Tuhan Allah jeskaseda Ofa esa rusnok eneya deika jeskaseda rifesij rot efen oga. 3Iwa ija ojgomu. Erek domba-domba ongga eja skoita serigala, beda erek koma tein Didif dumobk iwa ongga idou eriaga skoita rusnok ongga rudou ofogog rifekesa. 4Iwa inorka fifi ni, mesina ni, sepatu ni, egema tein guru. Iwa inot gu moroju fogora ifesij mar ebireira jera rusnok jah suma guru. 5Gij mona ongga iwa yuira gij mod egens, beda iwa yuis gu rusnok ongga riker jah suma oida, 'Oufamofa ah gu iwa ojgomu.' 6Noba erek rua ruroun iwa rot rudou ongga oufamofa, beda Allah omocunc rot efen oufamofa gu rua si. Tina erek rusnok rudou oska rot iwa ojgomu, beda Allah onocunc rot efen oufamofa gu rua guru. 7Iwa ineja jeska mod egema jah mod egema tein guru, tina yah gu mod egens ojgomu. Noba maat ongga rua ricka, beda it ojgomu. Mojenen iwa rot mar koma guru, jeska adaij nou rusnok ongga rifarur nou Tuhan Allah oga jeskaseda risma maat insa koma erek rerin rufons ojgomu. 8Gij mona ongga iwa ijesaga gu monuh egens, noba rusnok jah suma ruroun iwa rot rudou ongga oufamofa, beda iwa it maat ongga rincka gu iwa ojgomu. 9Beda iwa ita eskeira gu rusnok ongga marenir tein. Noba yagot gu rua rot oida, 'Mona ongga Allah omofoka ereij keingg rusnok bera ensaga doida fob.' 10Tina gij mona ongga iwa injesaga monuh egens, noba rusnok runoroun iwa guru, beda iwa ija jah moroju noba yagot oida, 11'Memef moubsa mebi ofou jeska mokoda erek orocunc rot oida Allah omofra mar okum keingg iwa si. Jeska mona ongga Allah omofoka ereij keingg rusnok bera emen, tina iwa inoira jera Ofa efen rusnok insa koma jinaga guru.' " 12Beda Yesus agot oida, "Gij mona ongga enja ejgwaga, beda Allah omofra mar okum keingg rusnok gij kota Sodom. Tina rusnok ongga rukoja mar ongga iwa yuftuftu rot Allah oga bera rimesma mar okum eteb ekirsa jeska Allah si." 13Beda Yesus agot deika oida, "Mar okum eteb emah keingg iwa ongga ingker gij kota Korazim jera kota Betsaida si. Iwa idou ah keingg rot rusnok ongga ringker gij kota Tirus jera Sidon sis eteb fob. Rua bera erek rusnok ongga rufogog doska. Tina rusnok gij kota egeka koma rik mar onswos sis fob morototuma erek iwa ik Didif duntunggom gij mona ebeibeyaif tein, beda rua rimeesa joug rerin mar ongga oska si. Noba rua rimergi meisoufa ongga oska noba raha mongkoru esij ribirfaga efeji jeskaseda rurocunc rot rudou ongga okumkum rot rerin mar ongga oska si. 14Tina iwa ongga kota Korazim jera Betsaida bera ineita mar erek koma jinaga guri. Jefeda gij mona ongga Allah ofra mar okum eteb keingg rusnok ongga rita mar ongga oska fob, beda Ofa omofra mar ongga okum eteb keingg iwa erek ekirsa jeska mar okum ongga emah keingg rua ongga kota Tirus jera Sidon si. 15Noba iwa ongga kota Kapernaum, iwa yufra isinsa ifoka erek akseij gu mebaga. Tina Allah omoin keingg iwa degini jah mahmei meren ojgomu si." 16Gij mona ongga rusnok rig mar jeska iwa, beda koma erek rua rig mar jeska Didif. Noba erek rusnok rukoja iwa, beda koma erek rua rukoja Didif tein. Noba erek rusnok rukoja Didif, beda koma erek rua rukoja Tuhan Allah ongga ombk Didif tein fob. 17Yesus efen ruforoker rufok setka cinja erfeka ruksons rot rudou efaga ouka eteb. Beda rua ragot gu Yesus oida, "Tuhan, gij mona ongga memef mekemeji efena ofogog ongga oira gij rusnok rudou efesi fob, beda efena ofogog koma ougif gu mefmen moga ojgomu." 18Beda Yesus oroun oida, "Didif dik Bilis esiri jeska mebaga erek moc efna. 19Ongga tenten bera Didif dita owesa efek gu iwa jeskaseda irot keingg magosu jera mouma, noba jeskaseda yut rot ahais gij mona ongga Bilis ereneni iwa fogora ofa emesiri gu iwa ojgomu. Jefeda enadaij nou mar egema tein ecirej iwa jinaga guru. 20Tina enadaij nou iwa idou efaga ouka jeska efena ofogog ougif gu iwa guru. Ongga tenten bera, ita idou ongga efaga ouka rot Tuhan Allah ojgomu, jeska Ofa eita eiteij ah ongga ah aibin gu iwa gu monuh mebaga." 21Erek koma beda Yesus odou efaga ouka oisouska Efena Ebsi noba Ofa agot oida, "Akeina, Bua bera Tuhan ongga ofoka ereij keingg mebaga jera mebif. Didif duis oufamofa eteb gu Bua jeska Bua bindemi mar insa koma jeska rusnok ongga risitit risinsa rufoka oida rudou efesis eteb gij mar nomnaga. Noba Bua buncunc rot mar insa koma gu rusnok ongga rerin rudou efesi ongga erek ruforokai rerin rudou efesi ojgomu. Bua buntunggom erek koma ororu jeni Bua bisinsa budou os rot ojgomu. 22Bua bita mar nomnaga gu Didif fob. Rusnok rineya rinejginaga rot Didif guru, tina Akeina bera ejginaga Didif rot tenten ojgomu fob. Erek koma tein rusnok rineya rinejginaga rot Bua guru. Tina Didif dijginaga Bua rot tenten fob. Noba rusnok ongga Didif duncunc fob bera rijginaga rot Bua tein fob." 23Beda Yesus oksef noba agot gu efen ruforoker oida, "Oufamofa eteb nou iwa jera rusnok enjgineg tein ongga ingk mar insa kef fob. 24Jeska sis eteb fob bera nabi-nabi jera raja-raja rudou os rik mar ongga iwa ingk gij mona ebeibeyaif fob, tina rinek guru. Noba rua rudou os rig mar ongga iwa ig gij mona ebeibeyaif tein, tina rua rineg guru." 25Erek koma beda osnok egens ongga erek Guru agama en jeskaseda ereni Yesus rourou. Ofa agot oida, "Akeina Guru, didif dutunggom mar meidu jeskaseda dita eiteij ah ongga efeinah noba ongga ah aibino?" 26Beda Yesus oroun gu ofa oida, "Runggu gij Mar Efeyi Ebsi rot mar insa koma erek meidu?" 27Beda Guru egens koma oroun gu Yesus oida, "Rua runggu rot oida, 'Iwa idou okora rot yeyin Tuhan Allah rot idou efesi ongkasmos ni, gij mar nomnaga ongga isujohu rot ni, noba gij mar nomnaga ongga itunggom ni. Noba idou okora rot rusnok enjgineg erek idou okora rot isinsa tein.' " 28Beda Yesus agot gu ofa oida, "Bua buroun mar rot tenten fob. Jefeda bua bita mar erek koma, beda bua bimeita eiteij ah ongga efeinah si." 29Tina Guru agama egens koma odou os ofra esinsa ofoka erek Guru ongga odou ebriyi eteb gij mar ojgomu, jefeda ofa ejeka gu Yesus deika oida, "Rusnok enjgineg ongga didif dudou okora rot bera erek idu?" 30Beda Yesus agot mar orocunc egens erek kef oida, "Osnok egens ongga Yahudi ecira jeska kota Yerusalem jah kota Yerikho. Beda ofa orodosu rusnok ongga rufogog gu moroju. Rua ruskotu ofa beda ragei efen mareibra jeska ofa, beda rubu ofa doska fogora rija jeska ofa. Osnok egens koma ahca rot ofogu okora eteb. 31Erek koma beda imam Yahudi egens ongga ecira gu moroju insa koma ensaga jah suma noba ek osnok egens koma. Beda ofa oira jah moroju efembra jeska osnok egens koma beda eja ojgomu. 32Erek koma tein osnok Yahudi egens ongga ebic Lewi oira jah suma noba ek osnok egens koma. Beda ofa tein erabj osnok egens koma noba eja ojgomu. 33Tina osnok egens jeska monuh Samaria, erek ongga erek Yahudi guru, ensaga jah suma. Nou ongga ofa engk osnok egens insa koma, beda ofa odou okora eteb rot ofa. 34Jefeda ofa ojot doida osnok egens koma beda ofa eita anggur efei oskiyai noba era miniyi oros efen ofogu okora. Beda ofa era meifeti orond osnok egens koma efen efera okora. Nou ongga koma oisa fob, beda ofa aha osnok egens koma esij efen keledai, noba orka ofa jah mod ebsi. Beda ofa ofij osnok egens koma jeskaseda eker keingg ofonskos fog gij mod insa koma. 35Erek koma beda ofa oh fifi gu osnok egens ongga efen mod ebsi koma. Beda ofa agot oida, 'Bita mar gu ofa jeskaseda efen efera okora emeskeira. Noba gij mona ongga Didif duksons beda dumoh bua deika rot si.' " 36Beda Yesus ejeka gu Guru egens insa koma oida, "Idu jeska rusnok rugomu insa koma ongga rik osnok egens koma ongga efen efera okora bera ocunc odou ongga okora rot ofa koma?" 37Beda Guru agama koma oroun oida, "Osnok egens koma ongga ofij ofa bera ongga ocunc odou ongga okora rot ofa." Beda Yesus agot oida, "Tenten! Jefeda bua butunggom mar erek koma rot rusnok enjgineg tein ojgomu." 38Yesus jera efen ruforoker ricira deika noba rijesaga gu monuh egens. Ojaga egens ongga eker jah suma ongga ofoka Marta bera oroun Yesus gij efen mod. 39Marta efen mokora egens ongga ofoka Maria. Ofa eker desi Yesus jeskaseda eg mar ongga Yesus oftuftu rot. 40Tina Marta oina mar ojgomuja. Beda ofa eja skoita Yesus noba agot gu Ofa oida, "Tuhan, dedin edkosa Maria onofij didif erek oskiyai tein guri. Jefeda Bua bubk ofa jeskaseda en noba ofij didif ojgomu." 41Tina Yesus agot gu ofa oida, "Marta, bua budou okumkum rot mar ofoukou ojgomuja. 42Tina mar egens bera ongga ofoufem ojgomu, noba Maria odou os rot mar insa koma. Jefeda rusnok egema tein rimeita mar egens koma jeska ofa jinaga guru."

will be added

X\