Yudas 1

1Didif Yudas bera ongga dunogu surat egens kef. Didif bera erek osnok egens ongga ofij Yesus Kristus ojgomuja. Noba didif tein bera Yakobus efen mokosa. Didif dunogu surat egens kef skoita iwa ongga Allah enjeka erek efen rusnok fob. Noba iwa bera ongga mifmin mika Allah odou okora eteb rot. Noba iwa yut rot ahais oisouska Yesus Kristus efen owesa efek. 2Didif dum diteij gu Allah jeskaseda Ofa ocunc efen odou ongga eskeiramera eteb gu iwa ni, jera eita eiteij ah ongga eskeiramera gu iwa ni, jera ocunc efen odou ongga okora eteb rot iwa odudu deika ni erek koma. 3Edohuji ongga dudou okora rot, sis fob bera didif dinsejah gij dudou efesi jeskaseda dugu surat egens skoita iwa osok gij rot teinefa Allah onskotu mimif jeska mifmin mar ongga oska fob, tina didif dineita erek koma guru. Jeska ebeibeyaif, ongga ofoufem ekirsa bera, didif dugu surat egens kef skoita iwa sismeni fog jeskaseda disisi joug iwa rot mar egens ongga ofoufem eteb ojgomu. Koma bera, didif dudou os duis gu iwa jeskaseda iwa yut joug idou efesi rot ahais ojgomu. Jeska rusnok ongga rudou os riferwei Allah efen oga ongga tenten bera rumorogna keingg iwa is. Jeska Allah eita efen oga insa koma rot ongkasmos juens mes gu rusnok nomnaga fob. Noba enadaij nou rusnok enjgineg rireni jeskaseda riferwei efen oga insa koma jinaga guru. 4Jeska rusnok rineya ongga runougif gu Allah rot tenten guru bera ruira wuswus jah gu iwa ifekesa fob ojgomu. Noba rua ruftuftu gu rusnok rot oida adaij nou mimif ongga erek Kristen mita mar meidu ongga mudou eftirir keingg rot ojgomu, jeska Allah onofra okum keingg mimif rot mar koma guru. Beda rua tein rikikif jeska Yesus Kristus noba rukoja Ofa ongga erek mifmin Tuhan noba ongga erek mifmin ebirfaga egens ongga mimif mufij. Sis fob bera rusnok runggu gij Mar Efeyi Ebsi osok gij mar okum ongga Allah omofra keingg rua insa koma rot mar ongga rua runtunggom ebeibeyaif si. 5Noba mar ongga ai juens dimagot rot gu iwa bera idou ejginaga rot fob. Tina didif dudou os disisi keingg iwa rot juens deika. Koma bera erek kef: Gij mona ongga sis eteb fob Allah onsuwa efen rusnok Israel ongga Ofa oncunc fob jeska monuh Mesir. Tina gij mona kahma deika beda Ofa ofra mar okum keingg rua ongga rudou eneredi Ofa rot tenten guru, fogora rua ragos ojgomu. 6Noba iwa tein idou ah keingg rot malaikat-malaikat ongga ringker gu mebaga sis fob. Rineya jeska rua bera rikikif jeska owesa efek ongga Allah eita gu rua jeskaseda rufij Ofa rot. Beda rua rija jeska rerin monuh ongga Allah ocunc nou rua fob. Jefeda Allah aha rua gij monuh motkobah egens ongga rua runorogna jeska jinaga guru. Ebeibeyaif rua riker jah suma ojgomuja onjoros mona ongga Ofa ofra mar okum eteb keingg rusnok nomnaga ongga rerin mar ongga oska ros. 7Noba iwa tein isujohu rot rusnok ongga ringker gij kota Sodom jera kota Gomora jera kota-kota enjgineg tein ongga angh rejrej kota insa koma sis fob. Rusnok gij kota-kota insa koma tein bera rutunggom mar ongga ofogog. Jeska rua rutunggom mar meidu ongga rudou eftirir keingg rot rifaga tein ojgomuja. Noba rua rudou eftirir keingg jeskaseda risiri jera rujager ebireira ojgomuja. Noba runer tein ruckahtah mekeinggma jeskaseda risiri morototuma. Jefeda Allah omfra mar okum eteb keingg rua erek mah ongga et kota-kota insa koma rot rua nomnaga fogora riribseb ojgomu fob. Jefeda koma bera erek orocunc nou rusnok nomnaga rot oida gij mona kahma beda Allah emeij rusnok ongga rutunggom mar erek insa koma nomnaga gij mahmei meren ongga eisa egigir tumu rufos rot ah aibin ojgomuja. 8Erek koma tein, Guru-Guru ongga ebireira insa koma bera erek rusnok ongga risih mar erek ebireira ojgomu fogora rutoiru gij rerin mar ongga oska efekeifa ongga rua rutunggom rot rifaga ojgomuja. Noba rua tein rukoja Allah efen owesa efek ojgomuja. Noba rua tein ruga oruh rot mar ongga angh gu mebaga rot eskeiramera eteb. 9Erek koma tein gij mona ongga malaikat Mikhael, ongga erek ebirfaga malaikat-malaikat nomnaga, oga osokuma jera Bilis rot Musa efen efaga, beda malaikat Mikhael insa koma enetaha joug Bilis rot guru. Tina ofa agot gu Bilis oida, "Tuhan bera ongga emetaha joug bua rot si." 10Erek koma tein, Guru-Guru insa koma ruga oruh mar nomnaga ongga risinsa rudou enebriyi gij jinaga guru. Rua bera erek mar ongga angh gu merenrah, jeska rua runosujohu rot mar ongga rua runtunggom ongga erek ebireira jinaga guru. Jefeda mar insa koma bera omorohoda rot risinsa ojgomu. 11Ayo, mar okum eteb emah keingg rua rot si! Jeska rua ruroru mar ebireira ongga rudou eftirir keingg rot ojgomu. Koma erek Adam efen efesa Kain otunggom sis fob. Jeska ofa agob efen mokosa jeskaseda eita mar ongga ofa odou os rot ojgomu. Noba Guru-Guru insa koma tein rusoka ebeirens gij mar ongga oska jeskaseda risma fifi ofoukou erek nabi Bileam ontunggom sis fob. Noba jeska rua rikirsa rot mar ongga Allah anggot rot, jefeda Allah oga ojga rot oida rua rimagos rot si. Koma erek Korah otunggom sis fob fogora agos rot tein. 12Noba gij mona ongga iwa int maat morototuma ongga irocunc rot oida idou omokorema, beda Guru-Guru ebireira insa koma rit mat morototuma jera iwa rot rerin rudou ongga erek rourou ojgomu. Noba mojen en rua rot mar ongga rua runtunggom gij mona insa koma jinaga guru. Noba rua rutunggom mar ongga oska ofoukou dokun deika gij mona insa koma tein. Rua bera erek mar ongga ahtaboku ongga eyet meisoufa ongga ebsi komowa ojgomu. Noba rua tein runofij Allah efen rusnok jinaga guru. Jefeda rua bera erek gembala egens ongga onot joug efen domba guru, tina ot joug esinsa ojgomu. Noba rua bera rirek mocgoj ofog ahta ongga mof orkorka ojgomuja. Rusnok rik mocgoj insa koma beda rusujohu rot oida ai juens nou mos ens, tina mos enes jeska jinaga guru. Erek koma tein rusnok rik oida rua bera erek Guru-Guru agama. Jefeda rua rusujohu rot oida Guru-Guru insa koma rumoftuftu rot mar ongga tenten. Tina rua runoftuftu rusnok rot mar ongga tenten egema tein guri. Rua tein bera erek mega egens ongga efen mona ongga emfebi, tina okora jeska mebi fob. Jefeda efen efek egema tein guru. Erek koma tein, mimif minek Guru-Guru insa koma rutunggom mar egema tein nou rusnok enjgineg ongga erek ongkoska jinaga guru. Rua bera erek rusnok ongga ranggos fob jefeda rineita mar ongga oufamofa deika guru. 13Noba erek mei mojumu ofog eteb ongga ot noba esma ojgomuja, beda erek koma tein enadaij nou rua ruin keingg risinsa rot rerin mar ongga oska jinaga guru. Noba erek mei mojumu ofog insa koma efen efeireira ahtahta ongga angh suma suma gij mebsta ojgomu, erek koma tein mar ongga rua ruftuftu bera erek mar ongga oska efekeifa ongga rija suma suma ojgomuja. Noba rua bera erek motur ongga ecira ebeirens jah mebaga, jeska rua ruftuftu rot mar ongga ebireira ojgomu. Jefeda Allah bera ensejah nou eij rua gij monuh ongga motkobah eteb fogora riker jah suma rot mona ongga ah aibin ojgomuja. 14Henokh bera erek ebic cinja erfens ongga onjuj jeska Adam. Noba sis eteb bera fob ofa emfesij rot mar ongga emecira gij mona kahma erek kef oida, "Gij mona kahma bera Tuhan emen rot efen malaikat-malaikat ongga ebsi komowa noba ongga erek rufoukou eteb doska. 15Noba Ofa en jeskaseda oga ojga rot mar nomnaga ongga rusnok runtunggom ongga erek oufa jera oska. Beda Ofa omofra mar okum eteb keingg rusnok nomnaga ongga runougif gu Ofa guru, rot rerin mar ongga oska. Noba Allah omofra okum eteb keingg rua rot mar ongga oska eteb ongga rua ranggot rot efen ofoka tein si." 16Guru-Guru insa koma bera ruga erahah rot mar ojgomuja. Noba rua tein rucunc rusnok enjgineg oida rua bera ongga erek oska, noba risinsa bera guru. Noba rua ruroru mar ongga ofogog ongga rudou eftirir keingg rot ojgomuja. Noba rua risitit risinsa rufoka rot mar ojgomu. Noba rua tein rira ruga efei ruroku rusnok rudou efesi jeskaseda rita mar ongga rua risinsa rudou os rot ojgomu. 17- 18Edohuji ongga dudou okora rot, mimif mijginaga rot Guru-Guru ongga ebireira insa koma rerin rita mar fob, jeska sis fob Yesus Kristus efen rasul-rasul bera rumftuftu rot oida, "Gij mona ongga enja ejgwaga ensaga doida fob, beda rusnok ongga rudou oska rot iwa noba ongga ruga oruh iwa bera rimen si. Rua bera erek rusnok ongga runougif gu Allah guru, tina rua ruroru mar meidu meidu ongga rudou eftirir keingg ojgomu." Erek koma noba ebeibeyaif rusnok ongga rita mar erek koma bera rinjeker jah gu iwa ifekesa fob. 19Rusnok ongga erek insa koma bera ruftuftu rot mar ongga oska fogora rusnok nomnaga rimekebema rot rudou ongga oska moguma. Noba Efena Ebsi Allah bera eneker gij rudou efesi tein guru. Jefeda rua ruroru mar meidu meidu ongga angh gij rudou efesi ojgomuja. 20Tina edohuji, didif duis gu iwa jeskaseda iwa imofijma fogora yut rot ahais gij Allah efen oga ongga iwa iroru rot tenten fob, noba ongga erek ebsi komowa ojgomu. Beda iwa tein yum iteij oisouska owesa efek jeska Efena Ebsi Allah. 21Noba iwa iker gij yeyin iteij ah kef rot ongkoska oisouska Allah odou ongga okora rot iwa ojgomu. Iwa ita mar erek koma askesi iwa yug moroju nou mona ongga mifmin Tuhan Yesus Kristus ongksons en. Ofa emen jeskaseda eita eiteij ah ongga ah aibin gu iwa oisouska efen odou ongga eskeiramera rot iwa. 22Beda iwa tein ineita idou ongga okumkum rot rusnok ongga rijekjeka rudou efesi rot Allah oga ros guru, tina icunc idou ongga oufamofa skoita rua ojgomu. 23Noba iwa iroun rua skoita Yesus Kristus jeskaseda yuskotu rua jeska mahmei meren. Noba iwa tein inocunc idou ongga okumkum skoita rusnok enjgineg ongga ruroru mar ongga oska eteb ros guru. Tina iwa ibes ifaga jeska mar ongga oska insa koma ongga rua ruroru ojgomu jeskaseda iwa tein inesiri gij rerin mar ongga oska efekeifa insa koma guru. Jeska koma bera erek mar ahtaboku ongga oskotu meisoufa ongga ebsi komowa fogora orotunggom meisoufa insa koma nomnaga erek oska fob. 24Didif duis oufamofa eteb gu Allah, jeska Ofa bera ongga ont joug iwa jeskaseda inesiri gij mar ongga oska guru. Noba Ofa bera ongga omoroun iwa nomnaga jah efen monuh ongga ongkoska eteb gu mebaga. Jah suma bera rusnok runocunc iwa erek rusnok ongga rerin mar ongga oska egema tein deika guru. Noba jah suma bera idou efaga ouka eteb ojgomuja. 25Mimif mudou os jeskaseda mifmin Allah, ongga onskotu mimif jeska mifmin mar ongga oska oisouska mifmin Tuhan Yesus Kristus fob, esma ofoka ongga aksa eteb ni, noba ongga ongkoska eteb ni, noba esma owesa efek eteb ekirsa jeska mar nomnaga ni, noba ofoka ereij keingg rusnok nomnaga tein ojgomuja. Ofa bera ongga ofoka ereij keingg mar nomnaga gij mona ongga sis dojunmeni fob, jera deisef tein, noba gij mona ongga ah aibin tein ojgomuja. Ainsoma.

will be added

X\