Yakobus 5

1Iwa ongga yurna mei ahta, iwa ig mar ongga didif dimagot kef rot iskusk ojgomu fog. Iwa ibisa noba irahahuma, jeska mar okum ongga emen gij mona kahma bera emah keingg iwa si. 2Yeyin mareibra ofoukou emejeseiseifa, noba yeyin meisoufa ongga ebahetkit koma nomnaga eja oska efekeifa tein fob. 3Noba yeyin fifi ongga eirirbi koma nomnaga motetesi et fob. Koma erek orocunc rot mar ongga emecirej iwa si. Jeska gij mona kahma tein Allah emeij iwa gij mahmei meren fogora ifora emeribseb nomnaga. Iwa idou eyet rot yeyin mareibra ofoukou gij mona ongga doida enja ejgwaga kef tein ojgomuja. Jefeda erek mar ongga mah ent fogora eribseb, beda yeyin mareibra ofoukou tein emejeseiseifa noba iwa tein imeita ifera okora eteb. 4Idou eyet rot yeyin rot fifi ojgomuja, noba inoh rufons gu rusnok ongga rimfarur nou iwa tein guri. Jefeda ebeibeyaif rusnok insa koma nomnaga ongga rimfarur nou iwa ragerir gu Tuhan ongga efen owesa efek eteb. Noba Ofa engg mar ongga rangerir rot insa koma fob. 5Yeyin iteij ah kef bera ongkoska eteb gij mareibra ofoukou ongga iwa yagei rot isinsa ojgomu. Noba mar ongga iwa intunggom koma bera erek sapi ongga ent mofombra efej fogora efaga oskumom. Tina sapi koma enejginaga rot oida ai juens beda efen tuan emeris ofa guru. Erek koma rot iwa tein. Iwa idou eftirir keingg rot mareibra ofoukou gij mebif ojgomuja, tina iwa inejginaga rot oida mona ensaga doida nou iwa fob gurei. Jefeda iwa imeita ifera okora eteb gij mona ongga ah aibin ojgomuja. 6Iwa ikris rusnok ongga runotunggom mar ongga oska guru skoita hakim egens jeskaseda hakim egens koma omofra okum keingg rua. Rusnok insa koma runotunggom mar ongga oska skoita iwa guru, tina iwa yagob rua insa koma ojgomu. 7Edohuji, iwa ita idou ahais gij mar insa koma ongga runa mei ahta runtunggom skoita iwa ojgomu. Noba iwa iroru Allah rot idou ongkasmos ojgomuja onjoros mona ongga Tuhan Yesus ongksons en fob. Iwa isujohu rot osnok egens ongga efarur gij efen mekeni. Nou mona ongga mosua beda ofa ebij mekeni. Nou ongga koma oisa fob beda ofa erefa marsi gij onjoros mona ongga mos ens. Beda ofa eker rot odou ahais ojgomuja onjoros maat ongga enrefa insa koma enjefema beda ofa et. 8Erek koma tein, iwa ita idou ahais ojgomuja, jeska mona ongga Tuhan Yesus emen ensaga doida fob. 9Beda isum onoskusk noba inoga omosokuma guru, beda Allah onofra okum keingg iwa rot guru. Jeska mona ongga Allah omoga ojga rot rusnok nomnaga rerin rita mar bera ensaga doida fob. 10Edohuji, iwa ijginaga rot oida sis fob nabi-nabi ranggot mar nou Allah gu efen rusnok. Gij mona insa koma bera rua rita rudou ahais gij mar ongga oska ofoukou ongga ereneni rua ojgomuja. Jefeda iwa ita mar erek koma tein. 11Mimif musujohu rot oida nabi-nabi insa koma rinsma rufoka ongga aksa fob jeska rua rita rudou ahais gij mar koma ongga ereneni rua sis fob. Erek koma tein, iwa ingg rot osnok egens ongga ofoka Ayub ongga engker gij mona ongga sis eteb fob. Noba iwa ijginaga rot teinefa Allah eita oufamofa eteb gu Ofa fob. Ofa eita efera okora eteb, tina odou ororu rot tenten oida Allah omofij ofa si. Ofa eita odou ahais gij mar koma ojgomuja. Noba gij mona ongga mar okum koma oisa fob, beda Allah eita oufamofa eteb gu ofa. Erek koma jefeda mimif mijginaga rot oida Allah odou okora rot mimif tein, noba efen odou oufamofa skoita mimif tein. Jeska mimif mita mudou ahais gij mar ongga ereneni mimif ojgomuja. 12Mar ofoka egens ongga ofoufemfem bera erek kef: Iwa inagen mar moguma oisouska Allah ofoka erek rourou guru. Noba iwa inagen mar moguma oisouska mebaga ofoka era mebi ofoka erek rourou tein guru. Tina erek iwa yuitij moguma rot mar, beda yagot oida, "Tenten, memeita si." Iwa yagot mar erek koma ojgomu. Noba erek inoitij moguma rot mar guru, beda yagot oida, "Monoitij rot guru," ojgomu. Koma bera adaij nou. Iwa itunggom mar erek koma jeskaseda Allah onofra okum keingg iwa rot mar ongga iwa yanggen rot erek rourou guru. 13Erek mar ongga okum ah gu yeyin ihuj egens fob, beda ofa om eiteij gu Allah rot ojgomu. Noba erek eneya ongga odou erirei, beda ofa ois oufamofa noba esitit gu Allah rot odou ongga efaga ouka eteb ojgomu. 14Erek eneya ongga maren, beda ofa ois gu ebirfager Mod Ari jeskaseda rua rira miniyi ruros eitofu. Beda rua rum riteij oisouska Tuhan Yesus ofoka nou osnok egens koma. 15Noba erek rua ongga rum riteij insa koma rumois rot rudou ongga ororu Allah rot tenten ojgomu, beda Tuhan Allah emeita eskeira gu osnok egens koma ongga maren si. Noba erek osnok egens koma tein ontunggom mar ongga oska sis fob, beda Allah omosuna rot efen mar ongga oska insa koma jeska odou efesi tein si. 16Jefeda iwa imeesa joug rot yeyin mar ongga oska ongga iwa intunggom moguma ojgomu. Beda iwa yum iteij moguma jeskaseda Allah eita eskeira gu iwa ongga marenir. Rusnok ongga rum riteij rot rudou ongga efen mar ongga oska egema tein guru bera rerin owesa efek eteb rot mar ongga rumois insa koma. Noba Allah emeita mar koma ongga rua rum riteij rot insa koma si. 17Koma erek nabi Elia ongga agot mar jeska Allah gu rusnok sis fob. Ofa osnok egens giskini erek mimif tein. Tina gij mona juens beda ofa om eiteij gu Allah jeskaseda mos enes guru. Beda ainsa koma tein Allah enaha mos enes gij tahun orgomu noba ofod guru. 18Gij mona egema deika beda ofa om eiteij gu Allah, beda Allah aha mos es deika onjoros mebi tein omforu eriagamaga noba mega efej nomnaga enjefek. 19- 20Edohuji, erek rineya jeska iwa rikikif jeska Allah oga ongga tenten, noba osnok egens enjgineg oftuftu ofa fogora ofa oksons skoita Allah, beda koma erek oufamofa eteb. Jeska osnok egens insa koma oskotu ofa jeska efen mar ongga oska ongga omorka ofa gu mahmei meren. Beda Allah omosuna rot efen mar ongga oska jeska odou efesi. Ainsoma.

will be added

X\