Yakobus 4

1Mar ongga idou eftirir keingg rot, noba mar ongga oroku idou efesi bera ongga orotunggom idou ongga erek ofogog moguma. Jefeda iwa yuga omosokuma ojgomuja. 2Idou eftirir keingg mar, tina inesma mar koma guru. Jefeda iwa isujohu gij idou efesi oida yagob rusnok jeskaseda ita mar insa koma ojgomu. Noba iwa idou eftirir keingg rot mar ongga rusnok enjgineg rerin. Tina iwa inesma mar koma guru, jefeda iwa yuga omosokuma onjoros imagobuma. Noba iwa inerejgei gu Allah rot mar koma sismeni fog guru. 3Tina gij mona ongga iwa yuis gu Allah rot mar, beda iwa inesma mar koma jeska Ofa guru. Jeska iwa yuis rot mar insa koma oisouska idou ongga onosujohu rot mar ongga tenten enesi. Idou eyet rot yeyin mar ojgomuja, jefeda inekeba gu rusnok enjgineg tein guri. 4Iwa bera irek ojaga egens ongga eja jeska efen mahina noba ejeker jera orna egens egema deika. Ofa otunggom mar erek koma jeska odou otot nou mareibra ongga angh gu mebif ojgomuja ros. Yeyin idou eftirir keingg mar erek insa koma ojgomu, noba koma erek iwa ingkirsa rot Allah oga fob. Jefeda Ofa onocunc iwa jeskaseda ijerek efen rusnok deika guru. 5Mar egens ongga angh gij Mar Efeyi Ebsi agot oida, "Allah eita eiteij ah gu mimif jeska Ofa odou okora rot mimif, noba jeskaseda mimif tein mudou okora rot Ofa ojgomu." Efena Ebsi Allah ongga engker gij mudou efesi bera odou os jeskaseda mimif muroru Allah rot ahais ojgomu. Tina iwa isujohu rot oida mar ongga angh gij Mar Efeyi Ebsi insa koma bera enerek tenten gurei? 6Tina Allah oncunc efen odou ongga oufamofa eteb gu mimif ojgomuja. Jeska mar egens ongga angh gij Mar Efeyi Ebsi agot rot mar erek koma oida, "Allah odou onoufa skoita rusnok ongga rumfra risinsa rufoka guru. Tina Ofa eita oufamofa eteb gu rusnok ongga rudou eriagamaga ojgomu." 7Erek koma jefeda iwa yugif gu Allah ojgomu. Noba ita idou ahais gij mona ongga Bilis ereni iwa ojgomu, beda ofa emesiri gu iwa si. 8Noba yuh idou rot ongkasmos gu Allah, beda Ofa omoroun iwa desi Ofa erek efen rusnok si. Erek osnok egens ongga ot efen etma ongga ahtaboku, beda iwa tein ikikif jeska yeyin mar ongga oska ongga angh gij idou efesi erek mar ongga ahtaboku. Beda idou efesi emejerek ebsi komowa. Noba inororu Allah oga erek rusnok ongga rudou egeka rot mar ongga tenten guru. 9Ita idou okumkum rot mar oska ongga iwa intunggom sis fob ojgomu. Noba ibisa rot isinsa osok gij mar insa koma ojgomu. Iwa inotut rot mar ongga oska ongga iwa intunggom sis fob guru. Tina ita idou okum rot ojgomu. Jeska mar koma bera ongga orocunc rot oida iwa imeesa joug yeyin mar ongga oska rot tentenmen fob. 10Yuin keingg isinsa ifoka jah Allah odou, beda Ofa omofra iwa fogora emeita yeyin ifoka ongga aksa gu iwa tein si. 11Edohuji, iwa inoga omoruhuma guru, jeska idu ongga oga oruh efen mohuj egens noba agot rot oida ofa bera erek mar ongga oska, beda koma erek ofa oga oruh hukum Allah noba agot rot oida hukum koma bera oska tein. Erek ofa agot mar insa koma, beda koma orocunc rot oida ofa onororu hukum koma rot tenten enesi, tina ofa ofra esinsa erek ekirsa jeska hukum Allah insa koma ojgomu. 12Allah esinsiyai bera ongga eita hukum gu rusnok. Ofa bera ongga oga ojga rot rusnok oisouska efen hukum insa koma. Ofa bera ongga efen owesa efek eteb jeskaseda osuwa rusnok jeska rerin mar ongga oska jera eij rusnok ongga runtunggom mar ongga oska gij mahmei meren tein. Tina erek iwa yuga ojga rot mar ongga oska ongga yeyin ihujir rutunggom fob, beda koma bera erek oska tein. 13Rineya jeska iwa ragot oida, "Deisef era monog, beda memef memeja jah kota enjgineg noba meker jah suma erek Tahun egens jeskaseda mefarur rot fifi eteb doska fob." 14Rua ragot mar erek koma, tina rua rinejginaga rot meidu ongga emecirej rua gij mona kahma jinaga guru. Erek mah efeb ongga mof ongk noba ainsa koma tein eseiseifa toumou ojgomu, beda yeyin iteij ah tein emeseiseifa toumou erek koma si. 15Erek koma jefeda iwa yagot mar erek kef ojgomu, "Erek Tuhan odou os rot noba memef mefena ebah ros, beda momotunggom mar koma, era mar kef ojgomu." 16Tina ebeibeyaif iwa isitit isinsa ifaga noba yawesi efei rourou rot mar ongga yanggot. Noba mar ongga iwa yanggot rot insa koma bera erek oska ojgomu. 17Ebeibeyaif iwa ijginaga rot mar ongga tenten fob. Jefeda idu ongga ejginaga rot meidu ongga tenten fob, tina ofa onotunggom mar koma guru, beda ahah Allah eiteij koma bera erek ofa ontunggom mar ongga oska skoita Allah ojgomu.

will be added

X\