Yakobus 3

1Edohuji, rusnok rufoukou rudou os ruftuftu rot Allah oga erek didif. Tina ongga oufamofa bera rua rusujohu decideci rot mar ongga rudou os insa koma fog. Jeska gij mona ongga Yesus Kristus ongksons en fob, beda Ofa emejeka joug memef ongga moftuftu rot efen oga erek ahais ekirsa jeska rusnok ongga runoftuftu rot efen oga guru. 2Mimif nomnaga bera muntunggom era manggot mar ongga oska onjoros mona deisef fob. Tina idu ongga ot joug awesi rot mar ongga oska, beda koma erek ofa ot joug esinsa efaga nomnaga rot ahais ojgomu. Jefeda koma erek ofa onotunggom mar ongga oska egema tein deika guru. 3Didif dimagot mar egens ongga orocunc rot marni ofou ongga erek mar ongga ofokai ojgomu. Giskini bera mimif mira mar ongga ofokai erek marfeb jeskaseda mirakid kuda awesi. Kuda egens koma bera erek eteb doska, tina mimif muku marfeb rot kuda egens insa koma, beda kuda egens koma ororu meidu ongga mimif mudou os rot ojgomu. 4Noba mifmin marni ofou insa koma bera erek kabar mei tein. Kabar mei erek mar ongga eteb doska. Tina efen mansinya ongga ofokai ojgomu. Noba rusnok ragei mansinya koma fogora rifin kabar mei ongga eteb jah monuh ongga rudou os rinja gij, beda kabar mei ororu ojgomu. 5Erek koma tein rot mifmin marni ofou. Marni ofou kef erek ofokai tein, tina mimif mira marni ofou koma fogora misitit misinsa erek eteb tein. Mimif mijginaga fob rot oida mah efesi erek ojgomai tein, tina gij mona ongga mah ofokai ensiri gij mekta, beda koma adaij nou et mekta ongga eteb doska koma nomnaga tein. 6Mifmin marni ofou koma erek mah ongga ent mar. Marni ofou koma bera erek mar ongga ofokai, tina koma omorka mimif gij mar ongga oska eteb onjoros mifmin mifaga nomnaga enjeseiseifa rot. Bilis bera onokub mah gij mifmin marni ofou insa koma. Jefeda mar ongga mimif manggot bera orka mar okum skoita mimif sis mona ongga muforokai onjoros mona ongga munokona rot tein fob. 7Mar nomnaga ongga osuwotu gu mebif erek rusa ni, mem ni, jera mar enjgineg ongga angh gu mei mojumu efei bera rusnok rifa onjoros egma. Beda mar koma ororu meidu ongga rusnok koma rundou os rot ojgomu. 8Tina marni ofou egens koma bera erek mar ofogog ongga otunggom mar ongga oska ojgomuja. Enadaij nou mimif mut joug marni ofou koma rot ahais jinaga guru. Jeska mar ongga rusnok ranggot rot bera ongga orka mar ongga oska ofoukou tein. 9Mimif mira mifmin marni murois oufamofa eteb gu Allah. Tina mimif mira marni insa koma miragot mar ongga oska eteb skoita rusnok enjgineg tein. Tina koma enadaij guru, jeska Allah esinsa era etma orotunggom rusnok insa koma jeskaseda rerin rifena tein morototuma erek Ofa efen efena. 10Gij mona juens bera mimif mira marni ofou egens murois oufamofa gu Ofa. Beda gij mona egema deika bera mimif mira marni ofou egens insa koma tein fogora miragot mar ongga oska skoita rusnok enjgineg. Noba mar koma bera onoufa jinaga guru. 11Mei ongga oska efekeifa jera mei ongga eyejkita bera enen jeska mei eiteij egensmes guru. 12Noba mega meibetnek enejefek erek jodi tein guru. Noba mega ongga efen efek bera enejefek morug tein guru. Erek koma tein, mimif minej mei ongga eyejkita jeska mei efej ongga efen mei osusuwu ojgomu guru. Jefeda edohuji, mimif mira marni ofou jeskaseda miragot mar ongga oufamofa ojgomu, noba minera marni ofou jeskaseda magot mar ongga oska skoita rusnok enjgineg tein guru. 13Idu jeska iwa ifekesa ongga odou ebriyi gij mar rot tenten, beda ofa efen eiteij ah ongga orocunc jeni rot mar insa koma ojgomu. Ofa otunggom mar ongga oufamofa skoita rusnok enjgineg rot odou ongga eriagamaga jera odou ongga ebriyi gij mar rot tenten ojgomu. 14Tina idu ongga odou ejisei noba odou os ofra esinsa ofoka erek eteb ojgomu, beda enadaij nou ofa efesij rourou gu rusnok oida ofa efen odou ongga ebriyi gij mar rot tenten guru. Jeska koma erek ofa ocuwei mar ojgomu. 15Mar ongga rusnok mebif ranggot oisouska rudou ongga risinsa rusujohu rot oida ebriyi eteb gij fob bera enen jeska Allah guru. Mar koma en jeska rusnok rudou efesi ongga oska ojgomu. Noba Bilis bera ongga eita rudou efesi ongga oska erek koma ojgomu. 16Jeska gij mona ongga mimif mik rusnok ongga rudou enjisei noba rufra risinsa rufoka erek eteb, beda mimif tein mimek mar erek rusnok ongga ruga omosokuma jera rusnok ongga rutunggom mar ongga oska ofoukou tein. 17Tina idu ongga odou ebriyi gij mar ongga en jeska Allah rot tenten ojgomu, beda mimif mik mar erek kef: Ofa efen odou ongga ebsi komowa ni, ofa ocunc odou ongga eskeiramera skoita rusnok enjgineg ni, ofa odou eriagamaga skoita rusnok enjgineg tein ni, efen ebirfaga ombrera guru n, odou okora rot rusnok enjgineg ni, ofa tein eita mar ongga ongkoska ojgomu ni, ofa enekeba rot rusnok ebic enjgineg guru ni, tina ofa efen odou ongga aharukamoka rot rusnok nomnaga ni, 18Erek osnok egens erefa marsi, beda gij mona kahma ofa emek efen efek si. Erek koma tein rot rusnok ongga rucunc rudou ongga eriagamaga skoita rusnok enjgineg. Jeska gij mona kahma beda rua rimek oida rua nomnaga riker morototuma rot rudou ongga eskeiramera eteb. Noba Allah odou eskeira rot rerin riteij ah tein si.

will be added

X\