Yakobus 2

1Edohuji, mimif nomnaga bera muroru Tuhan Yesus Kristus ongga mimif mufra efen ofoka erek aksa eteb fob. Jefeda enadaij nou mudou ekeba rusnok oisouska mar ongga mimif mingk jeska rua guru. 2Erek osnok egens ergi meisoufa ongga ebahetkitk noba aha emas tumu otub ofou, noba osnok egens enjgineg ongga ergi meisoufa ongga ebgebga tumu efaga gen jah mod ongga iwa imohoturuma gij, 3beda giskini iwa yugif gu ofa ongga ergi meisoufa ongga ebahetkitk insa koma ojgomu. Beda iwa iroun ofa noba yagot gu ofa oida, "Akeina, bijeker gij kursi ongga oufamofa koma." Tina iwa yagot gu osnok egens insa koma ongga ergi meisoufa ebgebga rot oida, "Bua but yes jah sunj ojgomu," era "Bijeker jah mersa degini koma ojgomu." 4Erek iwa itunggom mar insa koma, beda koma erek idou ekebkeba rusnok oisouska mar ongga iwa ingk jeska rua ojgomu. Beda koma erek iwa yuga ojga rot rua noba yufra rineya erek eteb ekirsa jeska rigema. Jefeda mar ongga iwa intunggom insa koma bera oska eteb fob. 5Edohuji ongga dudou okora rot, idou ah keingg rot kef ojgomu: Rusnok ongga runok rufoka gij guru nou mona insa kef, rua bera ongga Allah oncunc fob jeskaseda rija erek efen rusnok ongga ruroru efen oga rot rudou ongkasmos. Rua bera ongga rimesma eiteij ah ongga efeinah jeska Ofa gij mona ongga Ofa ofoka ereij keingg rusnok nomnaga. Jeska koma bera ongga Ofa anggen rot sis fob gu rusnok nomnaga ongga rudou okora rot Ofa. 6Tina ebeibeyaif iwa bera yuga oruh rua insa koma ongga runok rufoka gij guru. Iwa itunggom mar erek koma gu rua, tina rusnok ongga runa mei ahta bera ongga rut keingg iwa tein ojgomu. Noba rua bera ongga rikris iwa skoita hakim tein. 7Erek koma tein, Yesus bera ongga iwa iroru erek yeyin ebirfaga ongga ofoka aksa eteb. Tina runa mei ahta insa koma bera ruga oruh rot Yesus Kristus ofoka tein. 8Mar egens ongga Allah anggot gij Mar Efeyi Ebsi sis fob bera erek kef oida, "Idou okora rot rusnok enjgineg erek iwa idou okora rot isinsa." Jefeda erek iwa ita mar jeni hukum Allah egens insa kef ojgomu, beda koma erek iwa itunggom mar ongga oufamofa eteb. 9Tina erek iwa idou ekebkeba rusnok oisouska mar ongga iwa ingk jeska rua, beda koma erek iwa ikirsa rot hukum Allah egens insa koma ojgomu ros. Noba koma erek iwa intunggom mar ongga oska fob. 10Jeska erek osnok egens ororu jeni hukum Allah nomnaga, tina ofa ekirsa rot hukum Allah egens ai ojgomu, beda koma erek ofa ekirsa jeska hukum insa koma nomnaga tein fob. 11Koma tenten, jeska Allah anggot rot mar erek kef oida, "Iwa inesiri morototuma jera egema efen mohona guru." Noba Ofa tein anggot rot oida, "Iwa inagob rusnok enjgineg guru." Jefeda erek iwa inesiri morototuma jera egema efen mohona guru, tina iwa yagob rusnok enjgineg ojgomu, beda koma erek iwa ingkirsa rot hukum Allah nomnaga fob ojgomu. 12Allah oga ongga oufamofa bera ongga onsuwa mimif jeska mifmin mar ongga oska fob. Jefeda ebeibeyaif Ofa omoga ojga rot mimif nomnaga oisouska jeni erek mar ongga muntunggom rot efen oga insa koma. Erek koma jefeda mimif mut joug misinsa mudou efesi rot ahais osok gij mar ongga mimif mutunggom noba magot rot ojgomu. 13Jeska erek rusnok rudou onokora rot rusnok enjgineg guru, beda gij mona ongga Yesus Kristus ongksons en fob, beda Allah odou onokora rot rua tein guru. Tina rusnok ongga rudou okora rot rusnok enjgineg fob bera rinemeesa rot mona ongga Tuhan emen jeskaseda ofra okum keingg rusnok guru. 14Edohuji, erek iwa yagot oida iwa iroru Allah oga rot tenten fob, tina mar ongga iwa itunggom bera onocunc jeni rot koma guru, beda mar ongga iwa yanggot insa koma bera eneita eiteij ah ongga efeinah gu iwa jinaga guru. 15Erek yeyin ihuj orna egens era ojaga egens ongga efen meisoufa era maat enadaij nou ofa guru, 16noba iwa yuis gu ofa oida, "Biker rot ongkoska ojgomu," tina iwa inofij ofa rot maat era meisoufa tein guri. Beda mar insa kef ongga iwa yuis gu ofa bera onofij ofa rot jinaga guru. 17Jefeda erek osnok egens agot oida ofa ororu Allah oga fob, tina ofa onocunc rot koma oisouska mar ongga ofa otunggom guru, beda mar ongga ofa esitit esinsa efaga rot insa koma bera erek rourou ojgomu. Jeska koma bera orocunc rot oida ofa onororu Allah oga rot tenten enesi. Jefeda mar ongga ofa anggot insa koma bera onofij ofa erek oskiyai tein jinaga guru. 18Beda rineya ongga ranggot oida, "Memef mororu Allah rot tenten fob." Tina teinefa fogora mimif mijginaga rot oida mar ongga rua ranggot koma bera erek tenten ei era gurei? Jeska mimif minek rua rutunggom mar ongga oufamofa jeni mar insa koma ongga rua ranggot jinaga guru. Erek koma, tina didif dagot oida mar ongga ongkoska ongga mimif muntunggom bera ongga orocunc rot oida mimif muroru Allah rot tenten fob ojgomu. Koma bera erek ofoufem. Jeska erek rusnok enjgineg rik mar koma ongga mimif mutunggom fob, beda rua rimejginaga rot oida mimif muroru Allah rot tenten fob. 19Iwa isitit isinsa ifaga fogora yagot oida, "Memef mougif gu Allah ongga tenten ojgomu. Noba mar ongga rusnok enjgineg rugif gu bera erek tenten guru." Mar ongga iwa yanggot insa koma bera ongkoska, tina koma onocunc rot oida iwa iroru Allah rot tenten enesi. Jeska rifena ofogog ragot oida Allah bera ongga tenten tein. Tina efena ofogog koma rimeesa eteb rot mar okum ongga Allah omofra keingg rua gij mona kahma si. 20Noba iwa ongga yagot mar erek insa koma bera yucuwei mar ros! Jefeda mar ongga yanggot insa koma bera onofij iwa oskiyai tein jinaga guru. Didif dumocunc gu iwa juens deika rot teinefa rusnok ongga ranggot mar erek insa koma bera runororu Allah rot tenten enesi. 21Mimif nomnaga mijginaga rot mifmin mimowa Abraham fob. Ofa ougif gu Allah noba ontunggom mar ongga Allah anggot rot fob, jefeda Allah odou eskeira eteb rot ofa. Koma erek sis fob gij mona ongga Allah obk Abraham jeskaseda eris efen efesa Isak erek mar ongga orougif gu Allah rot. 22Abraham odou ororu Allah oga rot tentenmen, jefeda ofa otunggom mar nomnaga ongga Allah ombk ofa rot fob. Noba mar egeka insa koma ongga Abraham ontunggom bera orocunc rot oida ofa ororu Allah rot tenten ojgomuja fob. 23Noba mar insa koma ongga ofa otunggom bera angh gij efera jeni Mar Efeyi Ebsi anggot rot sis fob oida, "Abraham ororu Allah oga rot tenten, jefeda Allah ocunc ofa erek osnok egens ongga efen mar ongga oska oskiyai tein guru." Noba Allah tein ejeka Abraham erek efen mohuj egens. 24Erek koma jefeda Allah odou eneskeira rot rusnok ongga ragot rot oida rua ruroru Ofa fob, tina rua runotunggom mar egema tein ongga orocunc jeni rot mar insa koma guru. Tina Allah odou eskeira eteb rot rusnok ongga rutunggom mar ongga orocunc rot koisoisa oida rua ruroru Ofa efen oga rot tenten ojgomuja. 25Mimif mijginaga rot Rahab tein fob. Ofa erek ojaga egens ongga rija motu nou fifi. Tina Allah odou eskeira rot ofa jeska mar egens ongga ofa ontunggom sis fob. Koma gij mona ongga ofa edemi Yosua efen gosnok ongga goira gij kota Yeriko jeska tentarer ongga ruhca goga. Beda Rahab ofij goga jeskaseda geja rot toumou jeska kota koma tein. Ofa otunggom mar insa koma jeska odou ororu rot tenten oida ai juens beda Allah omofra mar okum eteb keingg ofa efen rusnok ongga ringker gij kota koma. 26Koma erek mifmin mifaga kef tein. Gij mona ongga mifena eneker gij mifaga deika guru, beda koma orocunc rot oida manggos fob. Koma erek rusnok ongga ragot oida rua ruroru Allah fob, tina runotunggom mar egema tein ongga orocunc rot koma guri. Jefeda mimif mijginaga rot oida rua runororu Allah rot tenten enesi. Jeska rua rineita mar ongga orocunc rot jeni guru. Jefeda mar ongga rua ranggot insa koma bera onofij rua erek oskiyai tein guru.

will be added

X\