Yakobus 1

1Didif Yakobus bera dunogu surat egens kef gu iwa ongga Yahudi jeska ebic setka kungkob erfeka ongga enjerek Allah efen rusnok fob. Iwa tein bera ongga iroru Yesus Kristus fob. Noba ebeibeyaif iwa injeker sinefa sinefa rejrej monuh ofoukou fob. Didif bera erek osnok egens ongga dumfij Allah jera mifmin Tuhan Yesus Kristus ojgomuja. Noba didif duis oufamofa eteb gu iwa nomnaga! 2Edohuji, gij mona ongga mar okum ofoukou ereneni iwa, beda iwa idou efaga ouka rot mar koma ojgomu. 3Jeska iwa ijginaga rot oida, erek iwa iroru Tuhan Yesus rot ahais gij mona insa koma, beda iwa imot rot ahais ojgomuja askesi mar insa koma ah keingg iwa si. 4Iwa ita idou ongga ahais erek koma ojgomuja onjoros iwa injerek Kristen ongga rinsma riteij ah ongga ongkoska gij mar nomnaga. 5Erek osnok egens jeska iwa ongga odou enebriyi eteb gij mar enesi, beda ofa ois gu Allah rot ojgomu. Jeska Allah bera ongga eita mar ongga oufamofa erek ofoukou gu rusnok. Beda osnok egens koma emesma odou ongga ebriyi gij mar rot tenten si. Jeska Allah emeita mar erek koma rot efen odou ongga eriagamaga eteb ojgomu. Ofa enagei mar koma jeska iwa guru. 6Tina idu ongga omois rot mar erek insa koma gu Allah, beda odou ororu rot tenten oida Allah emeita mar ongga ofa ois rot insa koma gu ofa si. Enadaij nou ofa osujohu rot oida Allah eneita mar koma gu ofa guru. Jeska idu ongga ejekjeka gij odou efesi erek koma, beda ofa erek mega rawom efek ongga eibibi gij mei mojumu efei ojgomuja. Noba mei mojumu efei omorkorka rawom efek insa koma jah sinefa sinefa. 7- 8Idu ongga osujohu rot mar erek insa koma bera erek rusnok ongga rudou egekeka rot mar ongga rumois rot gu Allah ojgomu. Jeska ofa osujohu rot oida, "Tuhan Allah emeita mar koma gu didif ei, era gurei." Koma bera orocunc rot oida efen odou ongga eineina gij mar nomnaga ongga ofa otunggom ojgomuja. Erek koma jefeda enadaij nou rusnok ongga rudou egekeka erek insa koma rusujohu rot oida rua rimeita mar egema tein jeska Allah jinaga guru. 9Erek rusnok enjgineg rusujohu rot oida mifmin muhujir rineya rerin rufoka guru, beda muhujir insa koma rudou onokum rot koma guru. Ongga tenten bera, rua ongga runofoka guru rita rudou efaga ouka rot ojgomu. Jeska rua ruroru Yesus Kristus fob, jefeda Allah omfra rua jeska rerin mar ongga okum tein fob. 10Erek koma tein rot rua ongga runa mei ahta. Gij mona ongga rua rerin mareibra nomnaga enseiseifa jeska rua fob, beda rudou onokum rot koma ojgomu guru. Jeska runa mei ahta koma bera erek marfok ongga er reirei ojgomu. 11Ai juens beda mowa endi marfok koma fogora osra, noba efen ofok ongga ongkoska koma ejba toumou. Erek koma tein rot runa mei ahta ongga ribirfaga erebibei tumu rerin mareibra ojgomuja. Jeska gij mona ongga rua ranggos fob, beda rua rija jeska rerin mareibra ongga ofoukou koma nomnaga fob. 12Oufamofa eteb nou rua ongga rita rudou ahais gij mona ongga mar okum eteb ereneni rua. Jeska erek rua rut rot ahais askesi mar ongga okum koma angh gu rua ros, beda gij mona kahma bera rua rimesma rufons ongga Allah anggen rot gu rusnok nomnaga ongga rudou okora rot Ofa. Rufons insa koma bera erek rua rijeker morototuma jera Allah jah mebaga nou mona ongga ah aibin ojgomuja. 13Erek koma tein, gij mona ongga mar egema ereita rusnok rudou efesi fogora risiri gij mar ongga oska fob, beda enadaij nou rua rusujohu rot oida Allah bera ongga ombk mar koma gu rua guru. Jeska Allah esinsa enesiri gij mar ongga oska ongga ereita odou efesi jinaga guru. Noba Ofa onobk mar ongga ereita rusnok rudou efesi tein guru. 14Tina erek mar egema ongga ereita rusnok rudou efesi fogora risiri gij mar ongga oska, beda mar koma en jeska risinsa rudou ongga eftirir keingg mar ongga oska insa koma sis fob ojgomu. 15Rua risah mar ongga oska insa koma gij rudou efesi sis fob ojgomu. Noba gij mona egema deika bera rua rutunggom mar ongga oska insa koma jeni rudou os rot ojgomu. Rua runtunggom mar ongga oska erek koma fob, jefeda rua rimeja jah mahmei meren rot ah aibin ojgomuja si. 16Edohuji ongga dudou okora rot, erek iwa isujohu rot mar ongga oska insa koma ojgomuja, beda koma erek iwa yucuwei mar jeska isinsa ojgomu. Jeska Allah onobk mifmin mudou efesi jeskaseda mita mar ongga oska guru. 17Mar ongga ongkoska bera en jeska Allah ongga angh gu mebaga ojgomu. Ofa bera ongga ontunggom mowa ni, mesta ni, motur ni. Ofa eneferwei mar egema tein ongga Ofa anggot rot era ontunggom sis fob jinaga guru. 18Noba sis fob Ofa esinsa onsujohu rot oida Ofa omoroun mimif erek efen rusnok. Jefeda oisouska efen oga ongga oufamofa insa koma bera mimif minjerek mar ongga ofoufem ekirsa jeska mar nomnaga ongga Ofa otunggom fob. 19Edohuji ongga dudou okora rot, didif duis gu iwa jeskaseda idou ororu mar erek kef ojgomu: Orofosut osnok egens eg Allah oga rot iskusk ojgomu. Beda rua runojoftuftu rot oga insa koma ebeirens gu rusnok enjgineg guru. Tina rua riker noba rusujohu rot oga insa koma sismeni fog. Noba rua tein rudou onotkonu oska rot ebeirens skoita rusnok enjgineg guru. 20Jeska rusnok ongga rutkonu oska bera rerin rudou efesi ongga oska. Tina Allah odou os oida mimif mita mudou efesi ongga efen mar ongga oska oskiyai tein guru. 21Jefeda iwa ija jeska yeyin mar ongga oska nomnaga ongga oroku idou efesi rot ojgomuja. Beda iwa ita idou ongga eriagamaga fogora iroru Allah oga ongga ofa ensah gij idou efesi fob. Allah oga ongga oufamofa bera efen owesa efek nou osuwa iwa jeska yeyin mar ongga oska. 22Gij mona ongga iwa ingg rot Allah oga ongga oufamofa fob, beda iwa ita mar jeni Allah oga insa koma ojgomu. Jeska erek iwa ingg rot Allah oga insa koma fob, tina iwa ineita mar jeni oga insa koma guru, beda koma erek yucuwei mar jeska isinsa fob. 23Jeska rusnok ongga ringg rot Allah oga fob, tina rineita mar jeni guru, beda rua koma bera erek rusnok ongga ringk rusum gij kansinam. 24Rua rik rifena rot iskusk gij kansinam insa koma, tina nou ongga rua rinja jeska, beda ainsa koma tein rudou ofoj joug rot rerin rusum insa koma deika. Koma bera erek rusnok ongga ringg rot Allah oga tein, tina rudou ofoj joug rot ebeirens ojgomu. 25Erek koma, tina hukum Allah bera ongkoska eteb noba efen owesa efek nou osuwa rusnok jeska rerin mar ongga oska. Noba rusnok ongga rig Allah oga rot iskusk noba rudou onofoj joug rot guru, tina rua rita mar koma jeni ojgomu, beda Allah omofij rua rot mar nomnaga ongga rua risinsa rutunggom. Jeska rua bera erek rusnok ongga ruroru hukum Allah rot tentenmen fob. 26Erek koma tein, idu ongga osujohu rot oida ofa esinsa bera ororu Allah oga rot tenten fob, tina onof joug awesi jeska mar ongga oska guru, beda koma erek ofa ocuwei mar jeska esinsa ojgomu. Mar insa koma ongga ofa esitit esinsa efaga rot bera onofij ofa jinaga guru, jeska Allah odou eneskeira rot ofa guru. 27Noba, rusnok ongga Allah osujohu oida ruroru Ofa rot rudou ongga ebsi komowa bera rutunggom mar erek kef: Rua rufij ruforoker ongga rusir jera riker ragos jeska fob. Noba rua rufij rujager rija mesina ongga rinesma mar rot risinsa rifaga guru. Noba rua rut joug rudou efesi jeska mar ongga oska tein ojgomuja.

will be added

X\