Ibrani 8

1Mar insa koma nomnaga ongga didif dunggu gij surat kef bera efen mar ofoka egens. Koma bera oida, Yesus Kristus eja erek mifmin imam egens ongga ofoka aksa fob. Noba Ofa enja eker gu mebaga fogora ofoka ereij keingg mar nomnaga morototuma jera efen meka Allah fob. 2Jefeda Ofa ofij Allah erek efen imam ongga ofoka aksa gij monuh mebaga ongga erek ebsi komowa ojgomuja. Noba gij monuh insa koma bera rusnok rugif gu Allah rot tenten ojgomu, jeska Tuhan Allah bera ongga ontunggom monuh insa koma. Rusnok mebif runotunggom monuh insa koma guru. 3Allah bera ongga oncunc orofosut imam-imam ongga ofoka aksa egens egens jeskaseda rumorka mar fogora rurougif gu Ofa rot. Beda rua tein ris mah gij marska koma erek mar ongga rurougif gu Ofa rot. Erek koma jefeda Yesus Kristus tein ocosu rot otunggom mar erek insa koma, jeska Ofa tein bera erek imam egens ongga ofoka aksa. 4Tina erek Yesus eker gu mebif ojgomu ros, beda Ofa enerek imam guru. Jeska gu mebif bera mifmin imam-imam ongga rutunggom mar insa koma jeni hukum Musa. 5Noba mar ongga imam-imam rutunggom gu mebif gij Mod Allah efesi bera erek orocunc rot mar ongga Yesus otunggom gu mebaga. Gij mona ongga sismeni fob bera Allah ocunc gu Musa jeskaseda ofa ei Mod nou Ofa gu mebif jeskaseda Mod koma orocunc erek jeni rot monuh ongga angh gu mebaga. Jefeda Ofa eisisi joug Musa erek kef oida, "Bua bii dedin Mod jeni erek Didif duncunc gu bua fob gij mona ongga bua bineker gu memaga Sinai ros." 6Erek koma tina, ebeibeyaif Yesus ofij Allah gu monuh mebaga erek oufa ekirsa jeska imam-imam ongga Ofij Allah gu mebif ros. Noba ebeibeyaif Ofa ot deismos nou rusnok skoita Allah ojgomuja. Koma bera ongga Allah anggot eimofoj rot gij mona ongga sis fob. Noba koma tein bera erek oufa ekirsa jeska hukum Musa ongga Allah anggot eimofoj rot sismeni fob. Jeska mar ongga Allah anggot eimofoj rot oisouska Yesus bera omofij mimif ekirsa jeska hukum Musa insa koma tein. 7Noba erek hukum Musa ongga Allah anggot eimofoj rot sismeni fob bera adaij nou ofij mimif rot mar nomnaga tein, beda munocosu rot oida Allah agot eimofoj rot mar egema deika fog erek koma guru. 8Tina mimif mijginaga rot oida hukum Musa insa koma bera enadaij tein guru. Jeska mar egens gij Mar Efeyi Ebsi bera agot rot teinefa Allah odou okum rot rua ongga Israel. Gij mar egens insa koma Allah agot mar erek kef oida, "Didif Tuhan dagot oida, gij mona kahma bera Didif dimagen rot mar ongga erek efeinah deika rot rua ongga ebic Yehuda jera rua ongga ebic Israel. 9Noba mar ongga efeinah koma bera enerek mar ongga Didif danggot eimofoj rot jera rusnok ongga Israel rerin rimower gij mona ongga Didif dincira deci deci rot rua jeska monuh Mesir guru. Jeska rua runororu mar ongga Didif danggot eimofoj rot erek tenten sis fob guru. Jefeda Didif dumokoja rua ojgomu. 10Noba Didif Tuhan dagot oida, Didif danggot eimofoj rot mar ongga erek efeinah deika gu rua ongga Israel. Didif dumotunggom mar erek koma gij mona ongga mar ongga Didif danggot eimofoj rot gu rerin rimower sis fob bera omoisa fog. Beda gij mona insa koma bera Didif dumofij rua jeskaseda rua rudou ebriyi gij rot dedin duga. Noba Didif dumofij rua jeskaseda rua ruroru dedin duga rot tenten ojgomuja. Beda Didif dumofoka ereij keingg rua erek rerin Allah. Noba rua rumororu Didif erek dedin rusnok. 11Jefeda gij mona insa koma bera rusnok runoftuftu rerin ruhujir era rukoser rot Didif deika guru. Jeska rusnok nomnaga rimejginaga rot Didif fob. Rusnok ongga runok ofoka guru jera rusnok ongga rufoka aksa tein nomnaga rimejginaga rot Didif si. 12Jeska Didif dumosuna rot rerin mar ongga oska jeska rudou efesi oisouska dudou ongga eskeiramera eteb rot rua ojgomu. Beda Didif dumocunc rua erek rusnok ongga rerin mar ongga oska deika guru." 13Erek koma jefeda gij mar insa koma bera Allah oncunc rot oida Ofa emeferwei mar koma ongga Ofa anggen rot sismeni fob si. Jeska mar nomnaga ongga erek ensis bera emeseiseifa si.

will be added

X\