Ibrani 2

1Erek koma jefeda mimif muh mudou efesi rot ahais ojgomu osok gij mar insa koma ongga rusnok runggu gij Mar Efeyi Ebsi sis fob ojgomuja. Beda mimif mita mar erek koma jeskaseda minekikif deci deci jeska mar insa koma ongga tenten fogora minaha mar koma jah jinaga guru. 2Mimif mijginaga rot oida Allah efen oga ongga Ofa eita gu rusnok oisouska malaikat-malaikat sis fob bera erek tenten ojgomu. Noba mimif tein mijginaga rot oida Allah omofra mar okum eteb keingg rusnok nomnaga ongga ringkirsa rot efen oga insa koma era ongga runororu rot tenten tein guru. 3Allah oga insa koma bera efen owesa efek eteb noba efesij rot teinefa rusnok risma eiteij ah ongga efeinah. Tina erek mifmin mudou eskes rot, beda mimif munosuwa jeska mar okum koma guru. Noba Tuhan Yesus bera ongga emfesij rot oga insa koma skoita rusnok rot sismeni fob. Beda rusnok koma rimfesij rot gu mimif oida oga insa koma bera erek tenten ojgomu. 4Noba Allah tein oncunc rot oida oga insa koma bera erek tenten ojgomu. Ofa otunggom mar koma oisouska owesa efek ongga Ofa eita gu rusnok jeskaseda rutunggom mar onswos gu rusnok rufoukou rifekesa. Noba rua rutunggom mar enjgineg tein rot owesa efek jeska Allah. Beda rua tein rutunggom mar oisouska owesa efek ongga Efena Ebsi oncunc gu rua orofosut osnok egens egens gij rudou efesi fob. Noba mar koma bera ororu Allah odou ejginaga rot tein. 5Mimif mijginaga rot oida Allah onocunc malaikat-malaikat jeskaseda rufoka ereij keingg rusnok gij mona efeinah ongga emen guru. Tina Ofa ocunc rusnok jeskaseda rufoka ereij keingg mar nomnaga gij mona insa koma. Ainsa kef bera didif difesij rot mona egens koma ongga emen ojgomu. 6Jeska sis fob bera osnok egens onggu mar gij Mar Efeyi Ebsi ongga eragot rot tenten osok gij mar insa koma. Ofa onggu rot oida, "Rusnok mebif bera erek mar ongga onofoufem guru. Rua nomnaga bera erek Adam efen efeser ongga runjuj jeska ofa ojgomu. Erek koma tina Bua Allah bera budou efeneinei rot bebin rusnok ros. Jefeda Bua budou os bufij rua ojgomuja. 7Noba ebeibeyaif bera malaikat-malaikat rerin owesa efek ongga ekirsa oskiyai jeska rusnok, tina Bua bumfra rusnok rufoka aksa erek raja ongga rineya rugif gu. 8Noba Bua buncunc rusnok fob jeskaseda rufoka ereij keingg mar nomnaga tein." Mar egens insa koma agot rot oida, "Bua buncunc rusnok fob jeskaseda rufoka ereij keingg mar nomnaga." Noba koma bera erek tenten ojgomu. Erek koma tein, gij mona ebeibeyaif bera mimif minek rusnok egema ongga rufoka ereij keingg mar erek koma enesi. 9Tina mimif mijginaga rot oida gij mona ongga sismeni fob bera Allah eita owesa efek gu malaikat-malaikat ongga ekirsa oskiyai jeska owesa efek ongga Ofa eita gu Yesus gu mebif. Allah ontunggom mar erek koma oisouska odou ongga eskeira rot mimif jeskaseda Yesus Kristus agos tumu mega salib nou rusnok nomnaga. Noba ebeibeyaif Yesus bera esma ofoka ongga aksa eteb noba ongga rusnok rugif gu. Jeska Ofa bera eita efera okora fogora agos nou mifmin mar ongga oska fob. 10Allah bera ongga ontunggom mar nomnaga, noba mar nomnaga ah oisouska Ofa ojgomu. Noba Ofa bera oitij rot oida Yesus Kristus eita efera okora tein. Jeska sis fob bera Allah ensejah mar insa koma nou Yesus jeskaseda Ofa eja okag rot efen rusnok nomnaga rot rerin eiteij ah ongga efeinah. Noba mar koma ongga Allah ontunggom bera erek oufamofa eteb. 11Yesus bera eja erek egens jera rusnok ongga risma rudou ongga ebsi komowa fob. Noba Ofa bera ongga eita rudou ongga ebsi komowa gu rua tein. Jefeda mojenen Ofa rot rusnok insa koma tein guru, tina Ofa ejeka rua erek Ofa efen mokoser jera meiyeser. 12Noba mar ongga runggu gij Mar Efeyi Ebsi osok gij mar insa koma bera oida, "Didif dimagot rot bebin bufoka gu dedin edkoser jera edieser. Noba Didif dimesitit rot bebin bufoka gu rusnok rifekesa gij mona ongga rua rumohoturuma ojgomu." 13Noba mar egens enjgineg tein gij Mar Efeyi Ebsi bera agot rot Yesus erek kef oida, "Didif dudou emeredi Ofa ojgomuja." Noba gij Mar Efeyi Ebsi bera Yesus agot oida, "Didif diker jah sif morototuma jera dedin edeser jera edieser ongga Allah eita gu Didif fob." 14Erek koma noba, Allah efen efeser nomnaga ongga rirek rusnok giskini ojgomu, jefeda Yesus Kristus tein en gu mebif erek osnok egens ongga giskini tein. Ofa eita mar erek koma jeskaseda oisouska Ofa ongga anggos tumu mega salib bera Ofa orohoda rot Bilis efen owesa efek nomnaga. Jeska Bilis bera ongga eita mar ongga oska skoita rusnok fogora riseiseifa ojgomuja. 15Noba Yesus ontunggom mar insa koma jeskaseda rusnok nomnaga rinemeesa rot mona ongga rua ranggos deika guru. 16Yesus onotunggom mar insa koma jeskaseda ofij malaikat-malaikat rot guru. Tina Ofa otunggom mar insa koma jeskaseda ofij rusnok ongga runjuj jeska Abraham jera rusnok enjgineg tein ongga runojuj jeska Abraham guru tein. 17Erek koma noba, jeska Ofa odou os ofij rusnok nomnaga, jefeda Ofa en erek osnok egens ongga giskini tein. Beda Ofa ejeka rusnok erek efen mokoser jera meiyeser tein. Ofa otunggom mar insa koma jeskaseda Ofa eja erek rusnok rerin ebirfaga imam egens ongga ocunc rot efen odou ongga oufamofa skoita rua. Noba Ofa bera ongga ofij Allah rot tenten gij mar insa koma ojgomuja. Ofa otunggom mar insa koma jeskaseda rusnok rerin mar ongga oska bera enah gu rua deika guru. 18Noba Ofa bera efen owesa efek adaij nou ofij rusnok ongga rita efera okora gij mona ongga rusnok enjgineg rireneni rua tein. Jeska Ofa tein bera eita odou efera okora gij mona ongga rusnok rireneni Ofa sis fob.

will be added

X\