Ibrani 13

1Iwa ita idou ongga omokorema erek imokosama morototuma. 2Beda iwa icunc idou ongga oufamofa skoita rusnok ongga iwa inejginaga rot enesi tein. Noba yufij rua rot maat era mar enjgineg tein. Jeska sis fob mifmin muhujir ruroun rusnok ongga rua rinejginaga rot enesi gij rerin mod jeskaseda rufij rua. Tina rua rinejginaga rot oida rusnok insa koma ongga rua rumfij bera malaikat-malaikat ongga Allah ombk guru. Rua rusujohu rot oida rusnok insa koma bera erek rusnok giskini ojgomu. 3Noba iwa idou ah keingg rot mar okum ongga ah keingg yeyin ihujir Kristen ongga ringker gij mod oskusk ros, fogora rufij rua ojgomuja. Noba yufij yeyin ihujir ongga risma rifera okora jeska rusnok enjgineg tein. 4Beda iwa iroru Allah efen moroju ongga tenten nou runer jera rujager ongga rumoskotuma fob rot koisoisa ojgomu tein. Noba iwa inesiri jera egema efen mohona guru. Jeska Allah omofra mar okum eteb keingg rusnok ongga rutunggom mar ongga erek koma si. Ofa omofra mar okum keingg rusnok nomnaga ongga risiri morototuma si. 5Noba yut joug idou efesi jeskaseda idou enesma keingg rot fifi eteb ojgomuja guru. Tina ita idou ongga eskeira rot mar ongga iwa yeyin ebeibeyaif ojgomu. Noba iwa inemeesa rot yeyin iteij ah kef ojgomuja guru. Jeska gij Mar Efeyi Ebsi bera Allah agot oida, "Didif dumofij iwa si. Didif dinaha iwa igef jah jinaga guru." 6Jefeda mimif tein magot erek mar egens gij Mazmur agot oida, "Allah bera ongga ofij didif, jefeda didif dinemeesa rot mar egema tein guru. Jeska enadaij nou rusnok rutunggom mar ongga oska skoita didif jinaga guru." 7Beda iwa tein idou onofoj joug rot rusnok ongga ruftuftu iwa osok gij Allah oga rot sismeni fob guru. Tina isujohu osok gij mar ongga rua rutunggom rot rudou ongga ororu Allah gij mona ongga rua rifena ebah ros. Beda iwa ita mar morototuma erek rua ojgomu. 8Jeska Yesus efen eita mar eneja erek toga guru. Mar ongga Ofa eita sis fob, jera deisef, jera gij mona kahma tein bera erek morototuma ojgomuja. 9Jefeda iwa ibes ifaga jeska rusnok ongga ruftuftu mar ongga erek toga jeska Allah efen oga ojgomu. Jeska mar koma omoroku idou efesi fogora imesiri gij tein. Noba mimif munororu rerin erebent osok gij maat ongga rinet guru, jeska koma eneita owesa efek gu mimif era gu rua tein jinaga guru. Tina ongga oufa bera mimif misma owesa efek oisouska Allah odou ongga oufamofa rot mimif ojgomu. 10Jeska mifmin Tuhan Yesus Kristus bera anggos tumu mega salib erek mar ongga orougif gu Allah nou mimif fob. Noba koma bera onofij rusnok ongga ruroru erebent ongga hukum Musa anggot rot jeskaseda rusuna rot rerin mar ongga oska ros guru. 11Ororu jeni erebent hukum Musa bera imam ongga ofoka aksa orka mar ogufu gij Mod Allah efesi jeskaseda eita mar koma erek orougif gu Allah nou rusnok rerin mar ongga oska. Tina rua rurka marska insa koma efen efaga jeska kota jah mebah. Beda rua ris mah gij marska insa koma jah suma. 12Erek koma tein, rusnok ruroun Yesus Kristus jeska kota jah mebah fogora Ofa agos tumu mega salib jah suma jeskaseda orosuna rot rusnok rerin mar ongga oska. 13Jefeda ongga oufa bera mimif maha mifmin erebent jeska hukum Musa insa koma nomnaga jah ojgomu. Beda mimif muroru Yesus Kristus jeskaseda misma eiteij ah ongga efeinah deika. Noba mimif tein mita mudou ahais askesi rusnok rutunggom mar ongga oska skoita mimif rot. Koma morototuma erek rusnok rita mar ongga oska skoita Yesus tein sis fob. 14Jeska gu mebif bera mimif mifmin kota egens ongga enah aibin guru. Noba mimif miker rot mifmin monuh ongga ah gu mebaga ojgomu. Monuh insa koma bera ah aibin ojgomuja. 15Jefeda oisouska Yesus Kristus bera mimif mira muga miresitit rot Allah erek mar ongga murougif gu Ofa rot ojgomu. Noba Ofa odou bera eskeira rot tein. Beda gij mar insa koma bera mimif tein magot rot oida mudou ororu Ofa rot tenten ojgomuja. 16Noba iwa icunc idou ongga oufamofa skoita rusnok enjgineg tein, noba yufij rua tein rot mar ongga rua rucosu rot. Jeska koma tein bera erek mar ongga iwa irougif gu Allah rot. Noba Ofa odou bera eskeira rot mar erek koma tein. 17Beda iwa yugif gu yeyin ebirfager ongga ruftuftu iwa rot Allah efen oga tein. Noba iwa iroru rerin ruga rot mar insa koma tein. Jeska rua bera ongga rufij iwa jeskaseda iwa iroru mar ongga tenten ojgomu. Noba rua rijginaga rot oida gij mona kahma, beda Allah emejeka joug rua rot mar ongga rua rumftuftu gu iwa fob. Jefeda iwa iroru rerin ruga rot tenten ojgomu jeskaseda rudou onokum rot iwa guru. Jeska erek iwa yufij rua, beda koma erek iwa yufij isinsa rot tein. 18Noba iwa yum iteij gu Allah nou memef tein jeskaseda Ofa omofij memef ojgomuja. Jeska memef mosujohu rot oida monotunggom mar ongga ereita Allah odou okum skoita memef rot guru. Noba memef modou os meita mar ongga erek oufamofa skoita iwa ojgomu. 19Noba didif disinsa duis gu iwa erek koma jeskaseda Allah omohoda moroju nou didif fogora dumoksons skoita iwa. 20Didif dum diteij gu Allah nou iwa fob. Noba Ofa bera ongga eita eiteij ah ongga eskeira gu mimif. Noba Ofa bera ongga omfra Yesus sons jeska anggos fob. Noba ebeibeyaif bera Yesus Kristus ot joug mimif ojgomuja erek gembala egens ongga ont joug efen domba-domba. Allah omotunggom mar erek koma jeskaseda orocunc gu rusnok nomnaga rot oida mar ongga Ofa anggot eimofoj rot sis fob bera ah gij efera fob. Noba koma bera oisouska Yesus Kristus ogufu ongga eya jeska efen efaga tumu mega salib. Noba mar koma bera ah rot aibin ojgomuja. Mimif mudou os erek koma (Ainsoma). 21Noba didif dum diteij gu Allah jeskaseda Ofa emeita owesa efek gu iwa fogora iwa imotunggom mar nomnaga ongga Ofa odou ejginaga rot tein. Askesi iwa itunggom mar insa koma nou Ofa ojgomuja, beda Ofa omotunggom mar gij idou efesi ongga ereita Ofa odou eskeira rot iwa si. Ofa otunggom mar koma oisouska Yesus Kristus. Jefeda mimif mudou os oida rusnok nomnaga risitit gu Yesus Kristus rot efen ofoka ongga aksa eteb ojgomuja. 22Edohuji, didif duis gu iwa jeskaseda iwa isujohu rot iskusk osok gij mar nomnaga ongga didif dinsisi joug gu iwa gij surat egens kef fob. Jeska surat egens kef bera erek estir ojgomu. 23Noba didif dudou os dagot gu iwa rot oida mifmin muhuj Timotius bera orogna jeska mod oskusk fob. Noba erek ofa en skoita didif ebeirens, beda dimeja skoita iwa morototuma jera ofa si. 24Didif duisu yeyin ebirfager nomnaga ongga ruftuftu iwa rot Allah efen oga, jera Allah efen rusnok nomnaga jah suma. Allah efen rusnok gij monuh Italia insa kef bera ruisu iwa tein. 25Didif duis gu Allah jeskaseda Ofa ocunc odou ongga eskeiramera eteb rot iwa nomnaga. Ainsoma.

will be added

X\