Ibrani 12

1Erek koma jefeda ongga oufamofa bera mimif mudou ah keingg rot mar ongga rusnok insa koma nomnaga runtunggom rot rudou ongga ororu Allah rot tenten fob ojgomu. Jeska mar insa koma nomnaga bera erek mar ongga ereisisi joug mimif rot mar okum ongga ah keingg mimif tein ojgomuja. Jefeda erek rusnok ongga raha rerin meisoufa ongga okum jah jeskaseda rufof riremeteima, beda mimif tein maha mar nomnaga ongga orotunggom mudou efesi okum rot jah. Noba erek rusnok rufof riremeteima jeni mar ongga rusnok runcunc gu rua fob, beda mimif tein muroru jeni mar nomnaga ongga Yesus Kristus oncunc rot sis fob. 2Beda mimif tein musujohu rot Yesus efen oga insa koma ojgomuja. Jeska Ofa eita odou ahais gij mona ongga rusnok runtob Ofa tumu mega salib. Beda mojenen Ofa rot mar ongga rua runtunggom skoita Ofa gij mona insa koma guru. Jeska ofa osujohu rot mar ongga emereita efen odou erirei eteb rot gij mona kahma ojgomu. Noba ebeibeyaif bera Ofa enja jah mebaga fob jeskaseda ofoka ereij keingg rusnok nomnaga morototuma jera efen meka Allah. 3Erek koma jefeda gij mona ongga mar okum ah keingg iwa, beda iwa idou ah keingg rot teinefa Yesus eita odou ahais gij mona ongga rusnok ongga rufogog rutunggom mar insa koma gu Ofa ojgomu. Beda koma omorofij iwa tein jeskaseda idou ahais fogora imororu Allah rot tenten ojgomuja. 4Onjoros mona deisef bera iwa iroru Allah rot idou ongga ahais jeskaseda inesiri gu Bilis guru. Tina askesi mar okum ereneni iwa bera yeyin yugufu eneya jeska ifaga erek Yesus ogufu eya jeska Ofa sis fob guru. 5Iwa bera Allah efen efeser. Jefeda iwa inodou ofoj joug rot mar ongga Allah anggot gij Mar Efeyi Ebsi guru. Jeska koma bera ongga ereisisi joug iwa. Ofa agot oida, "Edesa, gij mona ongga Didif dira mar okum jeskaseda duroftuftu bua, beda bineita budou ongga eskes rot guru. Noba gij mona ongga Didif ducunc gu bua rot bebin mar ongga oska, beda budou enesiri rot guru. 6Jeska Didif dutunggom mar insa koma gu rusnok nomnaga ongga Didif dudou okora rot erek dedin edeser." 7Jefeda iwa yuin keingg idou efesi rot ahais ojgomu askesi Allah era mar okum jeskaseda oroftuftu iwa. Ofa otunggom mar koma nou iwa jeska Ofa bera erek yeyin ika, noba iwa bera erek Ofa efen efeser. 8Noba Ofa oftuftu efen efeser nomnaga rot mar erek koma ojgomu. Jefeda erek Ofa onoftuftu iwa rot yeyin mar ongga oska guru, beda iwa inerek Ofa efen efeser rot tenten guru. 9Erek koma tein, sis fob bera mimif nomnaga mifmin miker giskini ongga rira mar okum ruroftuftu mimif. Beda mimif mugif gu rua rot ojgomu. Jefeda gij mona ongga mifmin mika Allah era mar okum oroftuftu mimif erek insa koma, beda koma erek oufa ekirsa nou mimif ojgomu. Jeska oisouska Efena Ebsi Allah bera mimif mita eiteij ah ongga efeinah noba ongga ah aibin. 10Erek koma noba sis mona ongga mimif erek muforoka ros, beda mifmin miker rira mar okum ruroftuftu mimif gij mona ongga estir ororu risinsa rudou ejginaga rot ojgomu. Tina Allah bera era mar okum oroftuftu mimif jeskaseda orofij mimif rot ojgomu. Ofa otunggom mar insa koma nou mimif jeskaseda mimif tein mita mudou ongga ebsi komowa morototuma erek Ofa. 11Noba gij mona ongga Allah era mar okum jeskaseda oroftuftu mimif, beda giskini mudou enerirei rot guru. Jeska mimif mita mifera okora rot mar insa koma tein. Tina mar koma bera orofij mimif jeskaseda miker gij miteij ah kef rot mudou ongga eskeiramera jera mudou ongga efen mar ongga oska oskiyai tein guru. 12- 13Erek koma jefeda, iwa ita idou efesi ongga erek ahais rot mar insa koma ojgomu fogora iroru Allah oga rot tenten ojgomuja. Iwa ita mar erek koma jeskaseda rua ongga Kristen enjgineg ongga rudou eriaga rot bera rinesiri guru. Beda mar insa koma omorofij rua jeskaseda rua tein rita rudou ongga ororu Allah rot tenten deika. 14Erek koma beda iwa ireneni rot ahais jeskaseda ita idou ongga eskeira morototuma. Noba ita mar rot idou ongga ebsi komowa ojgomu tein. Jeska rusnok ongga ruroru mar ongga oska ros bera rineker morototuma jera Allah gij mona kahma guru. 15Beda iwa tein yut joug idou efesi rot ahais ojgomu jeskaseda rineya rinekikif jeska Allah guru. Jeska rusnok koma rinesma eiteij ah efeinah ongga Allah eita rot odou ongga oufamofa guru. Beda iwa tein yut joug idou efesi rot ahais jeskaseda ineita idou ongga oska skoita rusnok enjgineg fogora rudou oska rot iwa tein guru. Jeska mar insa koma bera orok mokcin rusnok nomnaga onjoros rua tein rudou oska morototuma fob. Beda rusnok rufoukou rimeita mar ongga oska rot tein ojgomu. 16Beda iwa isisi joug moguma jeskaseda rineya rinesiri morototuma jera egema efen mohona guru. Noba iwa tein ineita mar erek Esau eita sis fob rot odou ongga osumsumu eteb guru. Jeska ofa erek osnok egens ongga onougif gu Allah rot tenten guru. Ofa erek Ishak efen efesa ongga osumbohka. Jefeda gij mona kahma ofa bera ongga emesma oufamofa jeska Allah morototuma erek efen meka ensma jeska Allah sis fob. Tina ofa eferwei mar insa koma rot maat ongga mokosa efen. 17Noba gij mona ongga efen meka ai juens anggos, beda ofa odou os esma oufamofa insa koma jeska Allah ojgomu. Tina efen meka okoja ofa rot ojgomu, jeska ebeibeyaif mokosa emesma oufamofa jeska Allah ojgomu. Beda ofa erejgejgei efen meka noba ebisa rot tein, tina guru. 18Gij mona ongga iwa in skoita Allah beda koma enerek mona ongga rusnok Israel rin skoita Allah gu memaga ofos Sinai sis fob guru. Jeska gij mona insa koma bera rua rik mah eteb. Noba mebaga eja erek motkobah rot mocgoj ofog ongga orocohun rua. Beda mof eteb tein edi rot rua. 19Beda rua rig Allah oga ongga erek manghi mei ongga oga eteb tein. Jefeda rua rimeesa eteb noba ruis gu Allah jeskaseda Ofa enagot mar teisis skoita rua erek koma guru. 20Jeska rua rimeesa eteb rot mar ongga Ofa anggot erek kef oida, "Erek rineya jeska iwa era yeyin kambing tein rusok memaga kef, beda Didif dagot rot oida rusnok rira mamu riredi rua era kambing insa koma onjoros ranggos fob." 21Noba mar insa koma ongga rua rik noba rig bera orotunggom rua fogora rimeesa eteb rot. Beda Musa tein agot oida, "Didif dimeesa eteb rot." 22Sis fob yeyin imower rija jah Memaga Ofos Sion jera kota Yerusalem jeskaseda rugif gu Allah jah suma. Jeska Allah, ongga efena ebah rot ah aibin, bera efen Mod ongga angh gij kota koma. Tina ebeibeyaif, oisouska Yesus Kristus, bera iwa inja teisis skoita Allah ongga engker jah gu mebaga ojgomu. Jah suma bera Allah efen malaikat-malaikat ofoukou doska ongga risitit gu Ofa rot rudou ongga erirei eteb ojgomuja. 23Noba iwa tein yuira jera Allah efen rusnok nomnaga ongga risma mar ongga ongkoska eteb jeska Ofa, erek orna osumbohka egens ongga esma mareibra ongga oufamofa jeska efen meka. Noba jah suma bera Allah onggu keingg yeyin ifoka gij efen buku eiteij ah fob. Noba rusnok ongga ranggos sis fob rot rudou ongga ebsi komowa tein bera rerin rifena ongga ringker jah suma tein. Noba iwa bera in skoita Ofa ongga oga ojga rot rusnok nomnaga rerin rita mar. 24Noba iwa bera in skoita Yesus Kristus ongga ot deismos nou mimif skoita Allah rot mar efeinah ongga Ofa anggot eimofoj rot sis fob. Jeska oisouska efen ogufu ongga eya jeska efen efaga tumu mega salib erek mar ongga orougif gu Allah, bera Allah onsuna rot mifmin mar ongga oska fob. Noba Yesus ogufu bera oufa ekirsa jeska Habel efen ogufu. Jeska Habel efen ogufu eya gij mona ongga efen mokora anggob ofa fob. Jefeda efen ofoj emah keingg ofa esinsa sons si. Tina Yesus ogufu bera eya, jeska Ofa aha esinsa gu rusnok ongga rufogog erek mar ongga orougif gu Allah jeskaseda Ofa osuna rot rusnok rerin mar ongga oska nomnaga. 25Erek koma jefeda iwa ig mar nomnaga rot iskusk ongga Allah agot gu iwa ojgomuja. Jeska sis fob bera rusnok ongga Israel runororu mar ongga Musa eisisi joug gu rua rot guru. Jefeda rua runosuwa jeska mar okum ongga Allah ofra keingg rua rot guru. Erek koma tein, erek mimif munororu mar ongga Allah esinsa eisisi keingg mimif rot guru, beda koma erek mimif munosuwa jeska mar okum insa koma tein guru. 26Noba gij mona ongga Allah efesij mar gu rua ongga Israel gu Memaga ofos Sinai sis fob, beda mebif nomnaga icusur rot ahais. Tina ebeibeyaif bera Allah agen rot oida, "Gij mona kahma bera Didif dumotunggom mebif jeskaseda icusur rot ahais juens deika. Tina gij mona insa koma tein Didif dumotunggom mebaga jeskaseda eineina erek ahais tein." 27Noba jeska Ofa agot oida, "Mebif icusur juens deika," beda koma orocunc rot mebif jera mebaga nomnaga ongga Ofa ontunggom fob. Beda Ofa omorohoda rot mar insa koma nomnaga jeskaseda mar ongga angh gu monuh mebaga bera emah rot ahais ojgomuja. 28Erek koma jefeda, ongga oufa bera mimif muis oufamofa eteb gu Allah noba mugif gu Ofa rot mudou ongga emeesa ojgomu. Jeska mimif minja erek efen rusnok ongga rumuira gij efen monuh mebaga si. Noba monuh koma bera eneineina jinaga guru, tina ah rot ahais gij mona ongga aibin ojgomuja. 29Jeska mifmin Allah bera omofra mar okum eteb keingg rusnok nomnaga ongga rerin mar ongga oska morototuma erek mah ongga et mar nomnaga.

will be added

X\