Ibrani 11

1Ebeibeyaif didif dudou os difesij mar osok gij rusnok ongga rudou os ruroru Allah rot tenten ojgomuja. Jeska oisouska mudou ongga ororu Allah rot tenten, bera mimif mijginaga rot oida mimesma mar ongga oufamofa eteb jeska Ofa si. Noba mimif tein mijginaga rot oida erek minek mar ongga oufamofa koma gu miteij enesi, tina gij mona kahma bera mimif mimek mar insa koma si. 2Koma erek tenten, jeska mifmin mimower tein bera ruroru Allah rot tenten ojgomuja. Jefeda Ofa odou eskeira eteb rot rua tein. 3Noba oisouska mudou ongga ororu Allah bera mimif mijginaga rot oida Ofa ontunggom mar nomnaga gu mebif jera mebaga. Noba Ofa otunggom mar insa koma oisouska esinsa efen oga ojga rot ojgomu. 4Erek koma tein, Adam efen efesa Habel bera anggos sismeni eteb fob. Tina mar ongga ofa otunggom bera erek orocunc nou mimif ongga deisef tein. Jeska oisouska efen odou ongga ororu Allah rot tenten fob bera ofa eita mar erek orougif gu Allah. Noba Allah odou eskeira eteb ekirsa rot mar ongga ofa eita jeska mar ongga ofa efen mokora Kain eita. Beda Allah ocunc ofa erek osnok egens ongga efen mar ongga oska guru. 5Noba oisouska Henokh efen odou ongga ororu Allah rot tenten fob bera ofa efen eiteij ah ongga ongkoska fogora ereita Allah odou eskeira rot ofa. Jefeda Allah ofra ofa rot efen efaga jah mebaga. Beda rusnok ruhca ofa, tina rua rinek ofa deika guru. Ofa enagos guru, tina Allah omfra ofa erek koma, jeska sis fob Ofa ocunc Henokh erek osnok egens ongga ereita Ofa efen odou erek eskeiramera. 6Jeska erek rusnok runororu Allah rot tenten guru, beda enadaij nou rua rita Ofa efen odou erek eskeira rot rua jinaga guru. Jeska osnok egens ongga odou os ougif gu Allah, beda ofa odou ororu rot tenten oida Allah bera ongga efena ebah rot ah aibin, noba Ofa bera ongga eita ofons skoita rusnok nomnaga ongga rugif gu Ofa si. 7Noba oisouska Noak efen odou ongga ororu Allah rot tenten fob bera ofa otunggom meg eteb egens jeskaseda oskotu esinsa jera efen mohona jera efen efeser tein. Jeska Allah agot gu ofa rot oida gij mona kahma beda Ofa omotunggom mei ofot eteb fogora rusnok ongga runororu efen oga guru nomnaga rimageben si. Jefeda Noak ougif gu Allah jera odou ongga emeesa rot fogora ofa otunggom meg eteb egens insa koma. Beda mar ongga ofa ontunggom koma bera erek orocunc rot oida rusnok enjgineg gij mona insa koma rimagos si. Jefeda oisouska mar ongga ofa ontunggom insa koma bera Allah ocunc ofa erek osnok egens ongga efen mar ongga oska oskiyai tein guru. 8Noba oisouska Abraham efen odou ongga ororu Allah rot tenten fob bera ofa ougif gu mar ongga Allah anggot rot gu ofa, fogora ofa eja eker gij monuh efeinah ongga ofa enejginaga rot enesi. Jeska Allah agot gu ofa rot oida Ofa emeita monuh ongga efeinah insa koma gu ofa si. 9Noba oisouska odou ongga ororu Allah rot tenten fob bera ofa engker gij monuh insa koma erek osnok egens ongga osodosa. Koma bera, ofa engker gij modwok frak efeyi ojgomuja. Noba ofa efen efeser Ishak jera efen medebesa Yakub tein geker erek koma jah suma. Jeska rua nomnaga bera ongga rimesma mebi gij monuh insa koma ongga Allah anggen rot gu rua sis fob. 10Abraham eker gij modwok frak efeyi ongga orohuhur erek koma, jeska ofa ejginaga rot oida gij mona kahma beda ofa emeker gij monuh egens ongga Allah esinsa ontunggom fob. Noba monuh egens koma bera angh rot ahais ojgomuja, jeska monuh insa koma bera angh gu mebaga. 11Noba oisouska Abraham efen odou ongga ororu Allah rot tenten fob bera ofa esma efen efesa orna egens. Sis fob Abraham eja erek onokona fob. Noba efen mohona Sara tein bera erek ebsei fob. Erek koma tina ofa ororu Allah rot tenten ojgomu. Jeska sis fob Allah agen gu ofa rot oida ofa emesma efen efesa orna egens si. Noba ofa ororu rot tenten oida Allah emeita mar ongga Ofa anggen rot gu ofa si. 12Erek koma jefeda oisouska Abraham, ongga erek onokona eteb fob, bera rusnok rufoukou doska ongga runjuj jeska ofa. Noba enadaij nou mimif mufosuit orofosut osnok egens egens ongga runjuj jeska ofa insa koma jinaga guru. Jeska rua nomnaga bera erek motur ofoukou doska ongga angh gu mebaga, era erek mebsta ofoukou ongga angh gu mei mojumu efembra nomnaga. 13Noba askesi rusnok insa koma nomnaga riker rot mar ongga Allah anggen rot, beda rua ragos fob. Noba erek rua risinsa rinesma mar koma askesi rifena ebah ros guru, tina rua ragos jera rudou ongga eskeiramera rot ojgomu. Jeska rudou ororu rot tenten oida mar insa koma emen gij mona kahma si. Noba rua tein rusujohu rot oida rua riker gu mebif erek rusnok ongga rusodosa ojgomu. Jeska rua rijginaga rot oida rerin monuh ongga tenten bera angh gu mebaga ros. 14Rusnok ongga ragot mar erek koma bera erek rua ongga ruhca rot rerin monuh ongga tenten ojgomu. 15Jeska erek rua rusujohu rot rerin monuh giskini ongga rua rin jeska sis fob, beda adaij nou rua ruksons gu rerin monuh insa koma ojgomu. 16Tina rua ruhca rot monuh egens ongga ongkoska eteb ekirsa ojgomu. Noba monuh insa koma bera angh gu mebaga. Jefeda gij mona ongga rua ragot oida rua bera ongga ruroru Allah rot tenten fob, beda mojenen Ofa rot rua guru. Jeska Ofa ontunggom monuh egens gu mebaga nou rua fob. 17- 18Noba oisouska Abraham efen odou ongga ororu Allah rot tenten fob, bera ofa esejah odou efesi jeskaseda agob efen efesa Ishak ororu mar ongga Allah anggot rot gu Ofa. Koma bera, sis fob Allah anggen rot oida ofa emesma efen efesa ongga onjuj jeska efen mohona Sara si. Noba Allah anggot rot tein oida rusnok rufoukou rumojuj jeska ofa oisouska efen efesa Ishak ojgomu. Beda gij mona kahma deika Allah obk ofa jeskaseda eris efen efesa Ishak ojgomu. Allah ereneni ofa odou efesi jeskaseda ek oida erek ofa ororu efen oga rot tenten ei era gurei. 19Beda Abraham ensejah odou efesi jeskaseda eris efen efesa, jeska ofa osujohu rot oida Allah efen owesa efek ongga adaij nou ofra efen efesa sons jeska anggos. Beda gij mona ongga ofa ensejah nou eris efen efesa, beda Allah agot joug rot oida, "Bua bineris ebesa kef guru." Jefeda koma bera erek Abraham ensma efen efesa sons jeska anggos fob. 20Noba oisouska Ishak efen odou ongga ororu Allah rot tenten fob, bera ofa om eiteij gu Allah jeskaseda Ofa eita oufamofa eteb gu efen efeserga Yakub jera Esau gij mona ongga ofa anggos fob. 21Noba oisouska Yakub efen odou ongga ororu Allah rot tenten fob, bera ofa om eiteij gu Allah jeskaseda Ofa eita oufamofa eteb gu efen medebeserga ongga Yusuf efen efeserga. Ofa tein ois oufamofa eteb gu Allah erek koma askesi ofa era moskur oroisif ojgomu fob. Jeska gij mona insa koma ofa erek onokona eteb ojgomu fob. Noba erek dektek deika guru beda ofa nou ongga anggos. 22Noba oisouska Yusuf efen odou ongga ororu Allah rot tenten fob, bera gij mona ongga ofa nou ongga anggos, beda ofa efesij mar rot mona ongga rusnok Israel nomnaga rumorogna jeska monuh Mesir. Beda ofa tein agot gu efen rusnok jeskaseda rua rurka efen ofora jeska odog gij mona ongga rua rumorogna jeska monuh Mesir fob. Beda rua risah efen ofora insa koma gij monuh efeinah ongga rua rinja gij. 23Noba oisouska Musa efen meka jera mosu godou ongga gororu Allah rot tenten fob, bera goga gendemdemi gegan oforokai ongga ofoka Musa gij mesta orgomu. Gij mona insa koma raja monuh Mesir agot rot oida rua ongga Israel rerin riser ongga orna nomnaga ragos ojgomu. Tina goga godou enemeesa rot raja egens insa koma efen oga guru. Jefeda goga gejedemi gegan oforokai egens insa koma, jeska goga gosujohu rot oida ofa erek ongkoska eteb. 24Noba oisouska Musa efen odou ongga ororu Allah rot tenten fob bera ofa ekeba esinsa jeska raja Mesir jera efen rusnok nomnaga. Jeska sis fob raja koma efen efesa ojaga egens ongga ofra Musa erek esinsa efen efesa. 25Tina gij mona ongga Musa erek orna eteb fob, beda ofa onodou os ororu rua ongga Mesir gij rerin mar ongga oska erek oskiyai tein guru. Jefeda ofa eja sons erek egens jera Allah efen rusnok Israel jeskaseda eita efera okora morototuma jera rua ojgomu. 26Jeska ofa osujohu rot oida erek ofa eita efera okora nou Kristus, ongga Allah anggot eimofoj rot oida emen, beda koma bera erek oufamofa ekirsa jeska mareibra ofoukou ongga ofa emesma jeska raja Mesir. Ofa osujohu rot erek koma jeska ofa odou ororu rot tenten oida gij mona kahma bera Allah emeita efen ofons ongga erek ongkoska ekirsa jeska mar insa koma si. 27Beda oisouska Musa efen odou ongga ororu Allah rot tenten fob, bera ofa orogna jeska monuh Mesir insa koma. Noba ofa enemeesa rot raja Mesir ongga otkonu oska rot ofa guru. Jeska erek ofa enek Allah gu eiteij guru, tina ofa ororu mar ongga Allah ocunc gu ofa gij odou efesi rot ahais ojgomuja. 28Noba oisouska Musa efen odou ongga ororu Allah rot tenten fob bera ofa obk rua ongga Israel nomnaga jeskaseda ruina maat keingg mona ongga rua rires domba efer efen ogufu tumu mod montoj ojgomu. Jeska gij mona insa koma Allah obk efen malaikat jeskaseda agob rusnok nomnaga rerin riser ongga rusumbohka. Tina malaikat koma enagob rusnok ongga Israel rerin riser guru, jeska rua rires domba efer efen ogufu insa koma tumu rerin mod montoj. 29Noba oisouska rudou ongga ororu Allah rot tenten fob bera rua ongga Israel ruira gij Mei Mojumu Efei Ekeni. Tina rua rinageben gij mei koma guru jeska Allah esinsa orohoda mei koma jeska rua fogora ruira ojgomuja. Jefeda rua ricira gij mei oforga ongga erek ahahir ojgomu onjoros rinjesaga jah gu mei mojumu efei koma enama fob. Tina gij mona ongga raja Mesir efen tentarer rutoij rua ongga Israel gij mei insa koma, beda Allah aha mei mojumu efei insa koma moguma sons, jefeda tentarer insa koma nomnaga rageben gij mei ojgomu. 30Noba oisouska rusnok Israel ongga ruroru Allah rot tenten fob bera mamu ongga rusnok enjgineg rungk erek mejga aksa eteb joug kota Yerikho jeskaseda orof joug rusnok jah suma bera ohoda nomnaga fob. Erek koma jeska Allah ocunc gu efen rusnok rot oida rua rumotoijma rejrej kota insa koma gij mona cinja erfeka. Beda Ofa omotunggom mamu ongga rungk erek mejga insa koma jeskaseda ohoda nomnaga. 31Noba oisouska Rahab odou ongga ororu rot mar ongga Allah anggot rot bera ofa enagos morototuma jera efen rusnok nomnaga ongga ringker gij kota Yerikho ongga runougif gu Allah guru. Ofa bera erek ojaga eja motu egens. Tina ofa ofij rua ongga Israel gij mona ongga rua rinsejah nou rimagob rusnok insa koma nomnaga, jefeda rua ongga Israel rinagob ofa guru. 32Erek koma noba, rusnok enjgineg tein ongga rutunggom mar rot rudou ongga ororu Allah rot tenten fob bera erek ofoukou doska. Tina enadaij nou didif difesij rot mar nomnaga ongga rua tein runtunggom gij surat kef guru. Rineya jeska rua bera erek Gideon ni, Barak ni, Simson ni, Yefta ni, Daud ni, Samuel ni, jera nabi-nabi enjgineg tein. 33Jeska oisouska rudou ongga ororu Allah rot tenten fob bera rineya ongga rimedima jera rusnok enjgineg ongga rufogog. Beda rusnok koma risiri gu rua ojgomu. Noba rineya ongga rucunc rot oida rua risma owesa efek jeska Allah gij mona ongga rua rufoka ereij keingg Israel rot tenten noba rufra okum keingg rusnok ongga runororu Allah oga rot tenten guru. Noba rineya ongga risma mar ongga Allah anggen rot gu rua askesi rua ruroru Ofa gij monuh ongga efeinah. Noba rineya ongga ruskotu jeska singa ongga ofogog doska. 34Noba rineya ongga ruskotu jeska mah eteb ongga et mar rot ebeirens. Noba rineya ongga ruskotu jeska rusnok enjgineg ongga rudou os ragob rua. Noba rineya ongga runofora efek guru bera rija erek rufora efek deika sons. Noba rineya ongga rimedima jera rusnok ongga rusodosa bera risma rufora efek fogora rikemeji rusnok insa koma. 35Noba rineya ongga erek rujager risma riser sons jeska ranggos. Noba oisouska rudou ongga ororu Allah rot tenten fob bera rineya ongga risma rifera okora eteb jeska rusnok enjgineg tein. Koma bera, rineya ongga runougif gu rusnok ongga rufogog guru. Jefeda rusnok koma ragob rua onjoros ranggos fob. Tina rua runokoja rot guru, jeska rua rijginaga rot oida rua rimesma eiteij ah ongga ah aibin jeska Allah si. 36Noba rineya bera rusnok ruga oruh rua noba rangha rua rot ahais tein. Noba rineya ongga rusnok rikris rua jah mod oskusk tein. Beda rusnok koma rira rantai rirakid rerin ritma jera raki tein. 37Noba rineya ongga ragos jeska rusnok enjgineg rira mamu riredi rua rot ahais ojgomu. Noba rineya bera rusnok enjgineg rira meiteb aksa rireris rifaga fogora ojga erek egeka. Noba rineya ongga rusnok enjgineg rira meiteb aksa riragob rua. Noba rineya ongga ricira rourou gij monuh ongga owowa. Rua rirgi meisoufa ongga erek domba jera kambing ofos ojgomu. Jeska rerin fifi era mareibra egema tein guru. Noba rusnok enjgineg rudou ofogog rot rua ojgomuja. 38Jeska mar ongga rusnok insa koma runtunggom gu rua fob, beda Allah efen rusnok ruku fogora ricira rourou gij monuh ongga owowa erek memaga jera modreni tein. Noba rua rahca gij mansu efesi ojgomuja. Rusnok ongga rufogog rutunggom mar ongga oska erek insa koma gu Allah efen rusnok ojgomuja. Jefeda enadaij nou rusnok koma risma mar ongga oufamofa egema tein jeska Allah efen rusnok insa koma jinaga guru. 39Mar ongga rusnok insa koma nomnaga runtunggom rot rudou ongga ororu Allah rot tenten fob bera erek oufa ojgomu. Noba Allah bera erek eskeira rot rua tein. Tina gij mona insa koma rua rinesma mar nomnaga ongga Allah anggen rot gu rua enesi. 40Jeska Ofa odou os rot oida rua riker nou rerin rufons onjoros mimif tein misma mufons insa koma morototuma jera rua. Noba mufons insa koma bera mifmin mudou ongga eja erek ebsi komowa oisouska Yesus Kristus fob.

will be added

X\