Ibrani 10

1Didif dudou os difesij deika rot hukum Musa insa koma. Allah eita hukum-hukum insa koma gu Musa erek mar ongga orocunc rot mar enjgineg ongga erek oufamofa ekirsa. Noba mar ongga oufamofa ekirsa koma bera emen gij mona kahma si. Jeska hukum-hukum insa koma enerek mar ongga oufamofa eteb ongga Allah anggen rot sis fob guru. Jefeda mar ongga imam-imam rutunggom gij Mod Allah efesi ojgomuja bera enadaij nou orotunggom Allah efen rusnok rudou efesi erek ebsi komowa guru. 2Jeska erek mar ofoukou ongga rua runtunggom insa koma bera adaij nou, beda rusnok insa koma ongga rugif gu Allah bera rimeja jera rudou ongga eskeiramera rot ojgomu. Jeska rua rusujohu rot oida rerin mar ongga oska egema enah gu rua deika guru. Beda rua rineita mar gij Mod Allah efesi deika guru. 3Tina rua rinesma rudou efesi ongga ebsi komowa oisouska mar insa koma guru. Ongga tenten bera, mar ongga imam-imam insa koma rutunggom gij Mod Allah efesi gij orofosut tahun egens bera erek mar ongga eisisi keingg rua rot oida rudou enebsi komowa rot tenten enesi. 4Jeska enadaij nou sapi orna efen ogufu era kambing efen ogufu orosuna rot rusnok rerin mar ongga oska jinaga guru. 5Jefeda nou ongga Yesus emen gu mebif, beda runggu gij Mar Efeyi Ebsi rot mar ongga Ofa agot gu efen meka Allah. Ofa agot mar erek kef oida, "Bua bunodou os rot sapi jera kambing efaga ongga rusnok riris erek mar ongga rurougif gu Bua gij orofosut tahun egens guru. 6Noba marska ongga rusnok ris mah gij erek mar ongga rurougif gu Bua bera enereita budou efesi eskeira rot tein guru. Noba mar enjgineg tein ongga rua rutunggom erek mar ongga rurougif gu Bua bera enereita budou efesi eskeira rot guru. Tina Bua bubk Didif erek osnok egens jeskaseda dagos erek mar ongga orougif gu Bua. 7Beda Didif dagot gu Bua rot oida, Didif dimeja gu mebif jeskaseda dutunggom mar ongga Bua budou os rot ojgomu nou rusnok ongga rerin mar ongga oska. Koma bera ororu jeni mar ongga rusnok runggu gij Mar Efeyi Ebsi rot Didif." 8Iwa ik rot mar insa koma juens deika. Jeska gij mar egens insa koma bera Yesus agot oida, "Bua bunodou os rot sapi jera kambing efaga ongga rusnok riris erek mar ongga rurougif gu Bua orofosut tahun egens jera marska ongga rusnok ris mah gij guru. Jeska mar insa koma enereita Budou eskeira rot guru." Noba erek hukum Musa agot rot oida imam-imam rutunggom mar koma ojgomu, tina enadaij nou mar koma ereita Allah odou eskeira rot rusnok jinaga guru. 9Gij Mar Efeyi Ebsi insa koma Yesus agot oida, "Didif dimeja gu mebif jeskaseda durosuna rot rusnok rerin mar ongga oska. Noba koma bera oisouska Budou ejginaga rot." Erek koma noba hukum Musa bera erek moroju ongga sismeni nou rusnok jeskaseda Allah osuna rot rerin mar ongga oska. Tina gij Mar Efeyi Ebsi insa koma bera Yesus agot oida Ofa of joug rot moroju insa koma. Beda Ofa ohoda moroju ongga efeinah deika jeskaseda Allah osuna rot rusnok rerin mar ongga oska. 10Jefeda ororu Allah odou ejginaga rot ojgomu bera mimif misma mudou ongga ebsi komowa fob. Noba koma bera oisouska Yesus Kristus ongga aha esinsa jeskaseda anggos tumu mega salib nou mimif rot ofosma juens ojgomu. 11Gij orofosut mona bera imam-imam Yahudi rut gu meja ofoj egens ongga angh gij Mod Allah efesi. Beda rua rutunggom mar nomnaga ongga hukum Musa anggot rot ojgomu. Noba rua riris marska erek giskini ojgomuja tein. Noba mar ongga imam-imam runtunggom insa koma bera onorosuna rot rusnok rerin mar ongga oska guru. 12Tina Yesus bera aha esinsa efaga erek mar ongga orougif gu Allah rot mifmin mar ongga oska nomnaga. Noba Ofa otunggom mar erek koma rot ofosma juens ojgomu. Beda Ofa eja gu mebaga jeskaseda ofoka ereij keingg mar nomnaga morototuma jera efen meka Allah. 13Noba ebeibeyaif Ofa eker jah suma ojgomuja onjoros mona ongga mesa nomnaga rinsiri gu Ofa fob. 14Yesus aha esinsa efaga jeskaseda agos tumu mega salib rot ofosma juens ojgomu. Noba oisouska koma bera Allah ocunc efen rusnok rudou efesi erek ebsi komowa nou mona ongga ah aibin ojgomuja. 15Efena Ebsi tein ocunc rot oida mar insa koma bera erek tenten ojgomu. Jeska sis fob bera runggu gij Mar Efeyi Ebsi rot mar ongga Efena Ebsi agot erek kef oida, 16"Tuhan agot oida, 'Gij mona kahma, beda Didif dimagen rot mar ongga erek efeinah deika nou rua. Beda Didif dumofij rua jeskaseda rudou ebriyi gij rot dedin hukum-hukum. Noba Didif dumofij rua jeskaseda rua ruroru hukum-hukum koma rot tenten ojgomu.' " 17Erek koma noba Efena Ebsi agot tein oida, "Didif dumosuna rot rua rerin mar ongga oska fogora Didif dunosujohu rot mar insa koma deika guru." 18Noba gij mona ongga Allah ocunc oida rusnok rerin mar ongga oska deika guru fob, beda imam-imam onocosu rot rutunggom mar erek rurougif gu Ofa nou rusnok insa koma rerin mar ongga oska deika guru. 19Erek koma jefeda oisouska Yesus Kristus ogufu ongga eya jeska efen efaga tumu mega salib, bera mimif nomnaga minemeesa nou mija teisis skoita Allah jeskaseda mugif gu Ofa guru. Koma erek imam-imam insa koma ongga rija teisis skoita Allah gij efen Mod efesi tein. 20Tina oisouska Yesus efaga ongga anggos tumu mega salib fob bera Ofa ohoda moroju ongga efeinah. Noba moroju ongga efeinah koma bera efen owesa efek ongga ofij mimif jeskaseda mija teisis skoita Allah tein. Noba koma erek Ofa ohoda rot meifeti insa koma ongga orof joug rusnok jeska Mod Allah efesi fob. 21Noba Yesus Kristus bera erek mifmin imam egens ongga ofoka aksa tein. Ofa bera ongga ofij mimif ongga erek Allah efen rusnok. 22Jefeda ongga oufa bera mimif mija erek egens jera Allah rot mudou ongga erirei noba rot mudou ongga ororu rot tenten oida mifmin mar ongga oska enah gij mudou efesi deika guru. Jeska erek imam-imam rires mar ogufu nou rusnok rerin mar ongga oska, beda erek koma tein Yesus ogufu ongga eya jeska efen efaga tumu mega salib bera ongga orosuna rot mifmin mar ongga oska fob. Noba erek imam-imam rut risinsa rifaga jeni jeskaseda rija skoita Allah gij efen Mod efesi, beda erek koma tein mar ongga Yesus ontunggom bera orot mimif rot mifmin mar ongga oska fob. Jefeda mimif tein mija teisis skoita Allah ojgomu. 23Beda ongga oufamofa bera mimif muroru Allah efen oga ongga erek tenten ojgomuja. Noba mudou eneineina gij mar ongga Ofa anggen rot guru. Tina mimif muisum gij mar insa koma ojgomuja. Jeska Ofa emeita mar nomnaga ongga Ofa agen rot gu mimif si. 24Noba mimif muh mudou efesi erek ahais rot mar insa koma fogora mimif mita mudou ongga omokorema jera mudou ongga omofijma ojgomuja. 25Beda mimif miremecinma jeskaseda mugif gu Allah erek egens ojgomuja. Noba mimif minaha mar koma jah erek rusnok Kristen enjgineg runtunggom fob guru. Tina ongga oufa bera mimif misisi joug moguma rot mar ongga oufamofa ojgomuja. Noba mimif mita mar insa koma erek odudu deika askesi mimif mug moroju rot mona ongga Tuhan Yesus Kristus ongksons en fob. 26Mimif mita mar erek insa koma ojgomu, jeska ebeibeyaif bera mimif mijginaga rot mar meidu ongga erek tenten ojgomu. Noba mifmin mudou bera ororu mar koma rot tenten fob. Tina erek mimif mikikif jeska mar insa koma nomnaga fogora misiri sons gij mifmin mar ongga oska, beda koma bera erek mimif mukoja rot mar ongga Yesus ontunggom nou mimif fob. Jefeda enadaij nou mar egema tein ofij mimif rot mifmin mar ongga oska deika guru. 27Beda mimif mijginaga rot mudou ongga emeesa oida Allah emeij mimif gij mahmei meren ongga eisa egigir rot ahais ojgomuja. Jeska Allah ensejah mahmei meren koma nou rusnok nomnaga ongga rufogog rot Ofa fob. 28Sis fob hukum Musa agot rot oida, erek rusnok egeka era rugomu ragot gu ebirfager Yahudi oida osnok egens bera okoja rot efen hukum fob, beda rua rudou eneskeira rot osnok egens insa koma jinaga guru. Jefeda rua ragob ofa rot ojgomu. 29Jefeda Allah omofra mar okum eteb ekirsa keingg rusnok ongga rukoja Yesus ongga erek Ofa efen efesa si. Noba Ofa emeita mar koma skoita rusnok ongga ruga oruh Yesus rot efen ogufu ongga eya tumu mega salib tein. Jeska efen ogufu koma bera ongga ohoda moroju ongga efeinah nou mimif. Noba efen ogufu koma bera ongga oroskotu mimif jeska mifmin mar ongga oska nomnaga tein. Beda Allah omofra mar okum eteb keingg rusnok ongga ruga oruh Efena Ebsi Allah ongga ofij mimif rot odou ongga eskeiramera tein. 30Mimif mijginaga rot oida Allah omofra mar okum eteb keingg rusnok ongga rutunggom mar ongga oska erek insa koma si. Jeska runggu gij Mar Efeyi Ebsi rot mar ongga Ofa anggot rot erek kef oida, "Didif disinsa dimesesa mar okum sons keingg rusnok nomnaga rot mar ongga oska ongga rua rutunggom skoita iwa fob si." Noba mar enjgineg tein ongga runggu rot bera oida, "Didif duga omojga rot mar nomnaga ongga dedin rusnok runtunggom fob." 31Jefeda mar okum eteb emah keingg rusnok ongga Allah ocunc rot oida rerin mar ongga oska ros. Jeska mimif mijginaga rot oida Allah, ongga efen owesa efek eteb, bera omofra mar okum eteb keingg rua rot si. 32Iwa idou ah keingg rot mona ongga iwa inroru Yesus Kristus fogora yuira gij eisa fob. Gij mona insa koma bera mar ongga okum ofoukou ereneni iwa jeska iwa iroru Yesus Kristus rot tenten fob. Noba iwa yut rot ahais askesi mar koma ah keingg iwa sis fob. 33Gij mona insa koma bera rusnok ongga rudou oska rot iwa bera ruga oruh iwa rot tomnomna. Noba iwa yumfij rusnok enjgineg ongga rifera okora rot mar ofogog insa koma tein. 34Noba gij mona insa koma tein bera iwa yumfij rua ongga rusnok enjgineg rikris jah mod oskusk jeska rua ruroru Yesus Kristus efen oga fob. Beda gij mona insa koma bera rusnok ongga rufogog rikris yeyin mareibra jeska. Rua rita mar koma jeska iwa iroru Yesus Kristus fob. Tina iwa ineita idou ofogog sons skoita rua sis fob guru. Jeska iwa ijginaga rot oida yeyin ifons gu mebaga bera erek oufamofa ekirsa. 35Jefeda ebeibeyaif bera didif duis gu iwa jeskaseda iwa ita idou ahais deika morototuma erek iwa intunggom gij mona ongga sismeni fob ojgomu. Jeska erek iwa iroru Allah rot tenten ojgomuja, beda Ofa emeita yeyin ifons ongga oufamofa eteb si. 36Iwa iroru Allah efen oga rot ahais ojgomuja. Beda gij mona ongga iwa intunggom mar nomnaga ongga Allah odou ejginaga rot, beda iwa imesma mar nomnaga ongga Ofa anggen rot si. 37Iwa itunggom mar erek koma ojgomuja, jeska gij Mar Efeyi Ebsi bera runggu rot mar ongga Allah anggot erek kef oida, "Gij mona ongga dektek guru, beda Ofa ongga Didif danggen eimofoj rot oida emen bera emen si. 38Tina askesi Ofa enen enesi, beda rua ongga Didif duncunc erek rusnok ongga rerin mar ongga oska guru bera ruroru Didif rot tenten ojgomuja. Noba erek rua risiri fogora runororu Didif deika guru, beda Didif dudou omokum eteb rot rua si." 39Tina mimif bera enerek rusnok ongga rimeesa fogora runororu Yesus Kristus deika guru, erek koma guru. Rusnok ongga rita mar erek koma bera rimeja eseiseifa si. Ongga tenten bera, mimif mita mar erek rusnok ongga ruroru Allah rot ahais ojgomuja. Jefeda mimif mimesma eiteij ah ongga ah aibin ojgomuja tein si.

will be added

X\