Galatia 6

1Edohuji, gij mona ongga iwa ik yeyin ihuj ongga Kristen egens eita mar ongga oska beda iwa, ongga ita mar rot tenten oisouska Efena Ebsi Allah, bera yuftuftu osnok egens koma rot idou ongga eriagamaga osok gij mar ongga ofa ontunggom koma ojgomu. Tina iwa tein yut joug isinsa idou efesi jeskaseda mar ongga oska koma onoroku idou efesi fogora isiri gij mar ongga oska koma tein guru. 2Noba iwa imofijma rot yeyin mar ongga okum. Beda oisouska mar koma bera iwa imotunggom mar ongga Yesus Kristus anggot rot ojgomu. 3Noba erek osnok egens ocunc esinsa rot oida ofa bera efen ofoka ongga aksa ekirsa jeska rusnok enjgineg nomnaga, beda koma bera erek ofa ocuwei mar gu esinsa ojgomu. 4Tina ongga oufamofa bera, orofosutut osnok egens eyajga joug esinsa fog rot mar ongga ofa ontunggom jeskaseda ek rot oida erek oufa ei era gurei. Noba erek ofa otunggom mar ongga oufamofa, beda ofa eita odou ongga erirei eteb rot ojgomu. Tina ofa tein eneramenima jeni mar ongga ofa ontunggom jera mar ongga rusnok enjgineg runtunggom tein guru. 5Jeska adaij nou orofosutut osnok egens ot joug esinsa rot mar ongga ofa ontunggom ongga erek oufa era ongga erek oska. 6Noba gij mona ongga rusnok enjgineg ruftuftu iwa rot Allah efen oga, beda iwa yufij rua rot yeyin mar erek maat, era mar ongga enjgineg tein ojgomu. 7Erek iwa isujohu rot oida iwa inororu mar ongga oska insa koma deika guru, beda koma erek iwa yucuwei mar gu isinsa ojgomu. Jeska enadaij nou rusnok rurokrusa Allah jinaga guru. Mar ongga oska ongga rusnok rutunggom gij riteij ah kef bera omoksons skoita rua si. 8Jeska erek osnok egens ongga odou os ororu mar ongga oska gij efen eiteij ah kef jeskaseda ereita esinsa odou erirei rot, beda Allah omofra mar okum eteb keingg ofa rot si. Koma tein bera erek efen ofons. Noba erek osnok egens odou os otunggom mar ongga oufamofa jeskaseda ereita Efena Ebsi Allah odou eskeira rot, beda ofa emesma efen eiteij ah ongga ah aibin ojgomuja. Koma tein bera erek efen ofons. 9Noba enadaij nou mudou eskes rot mar ongga ereita Allah odou eskeira rot guru. Jeska erek mimif mug mijmeg gij rot ahais ojgomuja, beda mona ongga Allah ensejah nou mimesma mufons rot bera emen si. 10Erek koma jefeda, gij mona ongga efekesa ah nou mimif, beda mimif mita mar ongga oufamofa skoita rusnok nomnaga. Noba ongga ofoufem ekirsa bera mimif mita mar ongga oufamofa skoita mifmin muhujir ongga Kristen ojgomuja. 11Iwa ik rot teinefa didif disinsa dunogu huruf eteb rot disinsa ditma gij surat egens kef. 12Erek koma noba rua ongga riradgodu iwa jeskaseda iris ifom mareij ofos jeska bera rutunggom mar erek koma jeskaseda rerin ruhujir rudou eskeira rot rua noba rufra rerin rufoka aksa rot tein. Tina ongga tenten bera, rua rutunggom mar erek koma jeska rua rimeesa rot ebirfager Yahudi. Jeska erek rua rusujohu rot oida rusnok risma rudou ongga ebsi komowa oisouska Yesus Kristus ongga anggos tumu mega salib ojgomu, noba runororu erebent Yahudi deika guru, beda Yahudi koma rumofra mar okum keingg rua rot ojgomu. 13Erek koma tina rusnok ongga ruroru rerin erebent fogora riris rufom mareij ofos jeska bera runororu jeni hukum Musa nomnaga guru. Tina rua rudou os oida iwa iroru rerin erebent insa koma ojgomu. Rua rudou os erek koma jeskaseda rua rufra risinsa rufoka erek aksa rot jeska iwa bera yugif gu mar ongga rua risinsa ranggot rot insa koma ojgomu. 14Tina didif bera dunofra disinsa dufoka erek aksa rot mar egema tein guru. Jeska didif dudou os duftuftu rot mar ongga Yesus Kristus ontunggom tumu mega salib nou rusnok nomnaga ojgomu. Noba oisouska mar ongga Ofa ontunggom insa koma bera dudou onosos rot mar ongga mebif efen deika guru. Noba ahah rusnok mebif riteij bera didif direk mar ongga onofoufem skoita rua deika guru. 15Jeska erek rusnok riris rufom mareij ofos jeska era gurei, beda koma bera onofoufem skoita Allah guru. Tina ongga ofoufem skoita Allah bera rusnok riker rot rerin eiteij ah ongga efeinah ojgomu. 16Noba rot rusnok ongga ruroru mar insa koma rot tenten bera didif duis gu Allah jeskaseda Ofa eita riteij ah ongga eskeiramera gu rua noba ocunc efen odou ongga oufamofa gu rua ojgomuja. Noba didif dudou os rot oida Ofa eita mar insa koma gu efen rusnok Israel nomnaga tein. 17Jefeda ebeibeyaif bera enadaij nou rusnok rita mar okum skoita didif deika guru. Jeska dedin difera ofamosma ongga rusnok rita gu didif sis fob bera ongga orocunc rot oida didif direk osnok egens ongga Yesus Kristus efen fob. 18Edohuji, didif dum diteij gu mifmin Tuhan Yesus Kristus jeskaseda Ofa ocunc odou ongga oufamofa eteb skoita iwa nomnaga. Ainsoma.

will be added

X\