Galatia 4

1Iwa isujohu rot mar egens ongga orocunc rot hukum Musa erek kef oida, oforoka egens efen meka ongga orna mei ahta, tina oforoka egens koma bera efen owesa efek enekirsa jeska rusnok ongga rufij efen meka guru. 2Jeska rua ongga rumfij meka bera ruftuftu meka efen oforoka egens insa koma noba rincira rot ofa ojgomuja onjoros ofa orna fob. Beda ofa ougif gu rerin ruga tein ojgomu. Noba gij mona ongga ofa orna eteb fob, beda ofa esma meka efen mareibra nomnaga. Jefeda ofa onororu rusnok ongga rumfij insa koma ruga deika guru. 3Mimif bera erek oforoka egens insa koma tein. Jeska gij mona ongga Allah onobk Yesus enesi, beda mimif mugif gu mifmin erebent jera hukum-hukum ongga mebif efen erek oforoka egens insa koma ororu rusnok enjgineg ruga ojgomuja. 4Tina gij mona ongga Allah anggen eimofoj rot oisa fob, beda Ofa obk efen efesa skoita rusnok mebif. Beda Ofa efen efesa koma bera onjuj jeska efen mosu jah gu mebif. Noba efen efesa insa koma tein efen eiteij ah bera erek rusnok ongga Yahudi tein, jefeda Ofa tein ororu jeni hukum Musa ojgomuja. 5Noba Allah obk Ofa jeskaseda osuwa mimif jeska hukum Musa ongga oin keingg mimif ojgomuja. Beda Ofa ocunc mimif erek Ofa efen efeser. Jefeda mimif misma mar nomnaga ongga Ofa anggen rot erek oforoka egens insa koma esma mareibra nomnaga ongga efen Meka anggen rot. 6Noba jeska mimif mija erek Allah efen efeser, jefeda Ofa obk Efena Ebsi ongga engker gij Yesus, jeskaseda Ofa engker gij mifmin mudou efesi tein. Noba oisouska Efena Ebsi insa koma ongga engker gij mudou efesi bera mimif muis rot mudou ongga erirei eteb gu Allah oida, "Bua bera dedin akeina!" 7Erek koma jefeda iwa bera inerek rusnok ongga rumfij rerin ebirfager fogora ruroru jeni rerin ruga deika guru. Tina ebeibeyaif bera iwa ija erek Allah efen efeser fob. Noba, jeska iwa irek Ofa efen efeser fob, jefeda iwa tein imesma mar ongga oufamofa eteb ongga Ofa ensejah nou efen efeser tein ojgomu si. 8Sis fob, gij mona ongga iwa inejginaga rot Allah enesi, beda iwa yugif gu yeyin mar ongga erek tenten guru ojgomuja morototuma erek rusnok ongga rugif gu rerin ebirfager ojgomuja. 9- 10Tina ebeibeyaif bera iwa ijginaga rot Allah fob. Era, ongga tenten bera, Ofa ejginaga rot iwa fob. Erek koma, jefeda teinefa fogora iwa idou os ikikif sons skoita Yahudi rerin erebent jera rerin hukum-hukum erek komo. Jeska ebeibeyaif bera iwa iroru erebent ongga mebif efen rot rerin mona egens ongga eteb ni, jera mesta egens ongga eteb ni, jera tahun egens ongga eteb ni ojgomuja. Tina mar insa koma bera onofij iwa oskiyai tein jinaga guru. Noba mar koma bera eneita idou efesi erek ebsi komowa ahah Allah eiteij tein jinaga guru. 11Noba didif dudou efeneinei rot iwa, jeska didif dimeesa rot oida mar ongga dimfarur rot Allah efen oga jah gu ifekesa bera onofij iwa guri. 12Jefeda didif duis gu iwa rot ahais jeskaseda iwa ibes ifaga jeska Yahudi rerin erebent jera hukum-hukum insa koma ojgomu, erek didif tein dibes disinsa difaga jeska mar insa koma sis fob. Didif dita mar erek koma tein gij mona ongga dingker jera iwa jeskaseda dija erek egens jera iwa. Noba iwa icunc idou efesi ongga oufamofa skoita didif gij mona insa koma. 13Noba iwa idou ah keingg fob rot oida, gij mona ongga didif dinja jah yeyin kota jeskaseda duftuftu iwa rot Allah efen oga bera maren didif gij mona insa koma. 14Beda iwa inebes ifaga jeska didif era inokockereta didif rot osok gij mar insa koma guru. Tina iwa iroun didif rot idou ongga ongkoskamoka ojgomu erek imoroun malaikat egens ongga Allah ombk skoita iwa era erek iwa imoroun Yesus Kristus esinsa skoita iwa ojgomu. 15Noba didif dijginaga rot oida iwa idou erirei ojgomu noba iwa incunc idou ongga okora rot didif erek ahais tein. Jeska gij mona insa koma bera iwa insejah idou efesi jeskaseda yufij didif rot mar meidu ongga ducosu rot ojgomu. Noba erek iwa yeyin owesa efek rot, beda iwa yuku yeyin iteij efej jeskaseda ita gu didif. Tina ebeibeyaif bera idou eneskeira deika guru. 16Jefeda ebeibeyaif didif dusujohu rot oida yeyin idou erek oska rot didif fob, jeska didif duftuftu iwa rot Allah efen oga ongga tenten sis fob. 17Rusnok enjgineg koma ongga ruroru Yahudi rerin erebent ros bera rudou os eteb jeskaseda iwa iroru rerin mar ongga rua ruftuftu ojgomu. Tina rua runoroun iwa skoita rerin erebent koma jeskaseda mar koma omofij iwa guru. Ongga tenten bera, rua rudou os rurokrusa iwa ojgomu jeskaseda iwa inororu mar ongga didif dumftuftu gu iwa sis fob deika guru. Beda iwa imororu rua rot idou ongga ongkasmos ojgomu. 18Tina erek rusnok rudou os eteb jeskaseda rufij iwa rot mar ongga ongkoska ojgomu, beda mar ongga rua runtunggom insa koma bera erek oufamofa ojgomu. Noba erek rua rita mar ongga ongkoska koma gij mona ongga didif dineker jah suma jera iwa guru, beda koma erek oufamofa ekirsa tein. Tina rua rineita mar erek koma guru. 19Iwa bera erek dedin edeser ongga dudou okora eteb rot. Jefeda dudou efeneinei eteb rot iwa ojgomuja onjoros mona ongga Yesus Kristus efen oga angh gij idou efesi rot tenten fob. Koma erek ojaga egens ongga otkonu okora eteb onjoros mona ongga ofa engker rot efen efesa jeska fob. 20Erek koma, noba didif dudou os diker morototuma jera iwa ebeibeyaif jeskaseda dagot rot mar insa kef nomnaga rot duga ongga eriagamaga skoita iwa ojgomu. Jeska ainsa kef bera didif dijekjeka dudou efesi rot iwa ojgomuja ros. 21Iwa ongga idou os iroru hukum Musa ojgomuja ros isujohu rot iskusk osok gij mar enjgineg tein ongga Musa onggu gij efen buku hukum sis fob ojgomu. 22Jeska Ofa onggu gij buku insa koma rot oida, Abraham efen efesa gegeka. Efen efesa egema ongga onjuj jeska ofa efen mohona Hagar ongga erek rusnok ongga rumfij ojgomu. Noba efen efesa egema bera onjuj jeska ofa efen mohona Sara ongga erek rusnok ongga runt gu risinsa ojgomu. 23Noba efen efesa ongga sismeni koma bera onjuj jeska Hagar jeska ofa jera Abraham gesinsa godou os ojgomu. Tina efen efesa ongga egema koma bera onjuj jeska Sara jeska koma bera ongga Allah anggen rot skoita Abraham sis fob. 24Noba gojaga gegeka insa koma bera erek orocunc rot mar egeka ongga Allah anggot eimofoj rot sis fob. Mar egens koma bera hukum Musa ongga rusnok ruroru jeni. Noba mar ongga egeka bera rusnok ruisum gij Allah rot mar ongga Ofa anggen rot skoita Abraham sis fob. Erek koma, beda Hagar bera erek orocunc rot rusnok koma ongga ruroru jeni hukum Musa ojgomuja jeska rua rusujohu rot oida rimeita rudou ongga ebsi komowa rot si. Noba rusnok ongga ruroru hukum Musa erek koma bera erek rusnok ongga rumfij rerin ebirfager ojgomu. Jeska rua rugif gu hukum Musa ojgomuja erek osnok egens ongga ougif gu efen ebirfaga ojgomuja. 25Hagar bera erek osnok egens ongga ougif gu efen ebirfaga egens ojgomu. Jefeda ofa bera erek orocunc rot hukum Musa insa koma ongga Allah eita gu efen rusnok Yahudi jah gu memaga ofos Sinai ongga angh gij monuh Arab. Jeska rua rugif gu hukum Musa insa koma ojgomuja erek Hagar ougif gu efen ebirfaga egens ongga ofa omfij ojgomuja. Noba Hagar tein bera erek orocunc rot kota Yerusalem ongga angh gu mebif ebeibeyaif tein. Jeska rusnok ongga ringker gij Yerusalem bera rugif gu hukum Musa ojgomuja erek rusnok ongga rugif gu rerin ebirfaga ojgomuja. 26Tina Sara bera erek osnok egens ongga ot gu esinsa. Jefeda ofa bera erek orocunc rot Yerusalem ongga angh gu mebaga ojgomu. Noba ofa bera erek orocunc rot rusnok ongga ruisum gij mar ongga Allah anggen rot sis fob ojgomu. Noba ofa tein bera erek mifmin mabowa, jeska sis fob ofa onougif gu ebirfaga egens ojgomuja erek rua ongga rumfij guru. Erek koma tein mimif ongga deisef bera munougif gu hukum Musa ojgomuja deika guru. 27Sismeni fob Sara bera ebsei ojgomu jefeda onok efesa jinaga guru. Tina gij mona kahma deika, beda ofa eker rot efesa egens ongga Allah anggen rot sis fob. Jefeda nabi Yesaya onggu mar egens gij Mar Efeyi Ebsi erek kef oida, "Bua ongga bibsei bera budou erirei rot ojgomu! Noba bua ongga bineker rot bebin ebesa egema tein enesi, bua bifaga ouka rot ojgomu. Jeska erek bifaga onokum rot ebesa enesi, tina gij mona kahma beda bua bumok ebeser ekirsa jeska mohona egens ongga engker jera efen mahina ojgomuja si." 28Edohuji, Abraham esma efen efesa Ishak jeska ofa oisum gij Allah ongga anggen rot mar insa koma sis fob. Noba iwa tein bera erek Abraham efen medebeser ongga onjuj jeska Ofa. Jeska iwa tein yuisum gij Allah rot oida imesma oufamofa jeska Ofa oisouska mar ongga Ofa anggen rot sis fob. 29Noba gij mona ongga Abraham efena ebah ros, beda efen efesa orna Ismail ongga onjuj jeska Hagar ororu gesinsa godou os rot ojgomu. Beda Ismail eita odou ofogog skoita efen mokosa Ishak ongga onjuj jeska Sara ororu jeni erek Allah odou ejginaga rot ojgomuja. Noba mar koma ah ojgomuja onjoros mona deisef tein. Jeska rua ongga ruroru jeni hukum Musa ros bera rudou ofogog skoita mimif ongga muisum gij Allah oga ojgomuja. 30Tina iwa ik rot mar egens ongga rua runggu gij Mar Efeyi Ebsi ongga anggot rot erek kef oida, "Bua bikemeji ojaga egens koma ongga erek osnok egens ongga ofij jera ofa efen efesa jeska bua ojgomu. Jeska enadaij nou efen efesa koma esma mar ongga meka efen jinaga guru. Mar koma bera efesa egens, ongga onjuj jeska mosu ongga ont gu esinsa, efen ojgomu." 31Erek koma jefeda mimif ongga muisum gij Allah oga ojgomu bera erek Sara efen efeser. Jefeda mimif mimesma oufamofa eteb jeska Allah si. Tina rua ongga ruisum gij hukum Musa ojgomu bera erek Hagar efen efeser. Jefeda rua rinesma mar ongga oufamofa jeska Allah jinaga guru.

will be added

X\