Galatia 3

1Edohuji, teinefa fogora iwa idou osumsumu erek komo! Jeska iwa ita mar erek osnok egens ongga rusnok runtasa efen odou efesi fob. Erek koma, jeska sis fob bera didif duftuftu iwa rot mar ongga Yesus ontunggom nou mimif gij mona ongga Ofa anggos tumu mega salib. Tina ebeibeyaif iwa inororu mar ongga tenten insa koma deika guri. 2Didif dudou os disisi keingg idou efesi juens deika rot oida, iwa inesma Efena Ebsi Allah jeska iwa iroru jeni hukum Musa jinaga guru. Tina iwa insma Efena Ebsi jeska iwa iroru Allah efen oga ongga oufamofa osok gij Yesus Kristus ongga iwa ingg rot fob. 3Jeska sis fob bera iwa insma idou ongga ebsi komowa oisouska Efena Ebsi Allah ojgomu. Tina ebeibeyaif iwa isujohu rot oida imesma idou ongga ebsi komowa oisouska mar ongga iwa isinsa intunggom jeni hukum Musa ojgomu. Jefeda koma bera orocunc rot oida idou osumsumu ros. 4Rusnok rita efera okora gu iwa jeska iwa iroru Yesus Kristus oga noba iwa inororu hukum Musa deika guru. Tina yeyin ifera okora koma bera enerek rourou guru. Jeska Allah eita idou efesi ongga ebsi komowa oisouska Yesus Kristus fob. 5Noba Allah eneita Efena Ebsi gu iwa jera otunggom mar onswos jah gu iwa ifekesa tein jeska iwa iroru jeni hukum Musa guru. Tina Ofa eita mar insa koma jeska iwa iroru Ofa efen oga ongga oufamofa osok gij Yesus Kristus ongga iwa ingg rot sis fob ojgomu. 6Noba koma bera erek mar ongga Allah ontunggom nou Abraham tein. Jeska mar egens ongga rusnok runggu gij Mar Efeyi Ebsi sis fob bera agot erek kef oida, "Abraham odou ororu Allah efen oga rot tenten ojgomu, noba Allah oncunc Ofa erek osnok egens ongga mar ongga oska oskiyai tein enah gij odou efesi jinaga guru." 7Jefeda iwa ijginaga rot oida erek rusnok ruisum gij Allah oga erek Abraham, beda ahah Allah eiteij bera rua tein rerin mar ongga oska oskiyai enah gij rudou efesi morototuma erek Abraham tein guru. 8Sismeni fob bera Allah oncunc mar gu rusnok rudou efesi jeskaseda runggu rot mar insa koma gij Mar Efeyi Ebsi. Noba mar egens ongga rua runggu keingg rot bera oida gij mona kahma beda Allah emeita efen odou ongga eskeira rot rusnok ongga Yahudi guru oisouska rudou ongga ororu Ofa rot tenten ojgomu. Noba gij mona ongga Yesus enen enesi, bera Allah oncunc rot efen oga ongga oufamofa insa koma gu Abraham oisouska mar ongga Ofa anggot gu Abraham erek kef oida, "Oisouska mar ongga bua butunggom bera didif dumocunc dudou ongga eskeiramera skoita rusnok gij orofosutut monuh nomnaga tein." 9Jefeda Allah bera omocunc efen odou ongga oufamofa eteb skoita rusnok nomnaga ongga ruroru Ofa rot tenten fob morototuma erek Ofa ocunc efen odou ongga oufamofa eteb skoita Abraham sis fob. Jeska ofa bera osnok egens ongga ororu Allah rot tenten fob. 10Mar egens ongga runggu gij Mar Efeyi Ebsi sis fob bera agot erek kef oida, "Idu ongga onororu jeni mar nomnaga ongga Musa onggu gij buku hukum rot tentenmen ojgomu guru, beda Allah oga ojga rot oida ofa emagos rot ojgomu si." Jefeda mimif mijginaga rot oida rusnok nomnaga rimagos rot ojgomu. Jeska enadaij nou rusnok egema tein ruroru jeni hukum Musa nomnaga tein jinaga guru. 11Noba mar egema tein ongga runggu gij Mar Efeyi Ebsi sis fob bera anggot erek kef oida, "Allah ocunc efen odou ongga eskeiramera rot rusnok ongga rita mar rot rerin riteij ah ongga ongkoska ojgomu, jeska rua ruroru Ofa rot tenten fob." Erek koma jefeda oisouska mar insa koma ongga angh gij Mar Efeyi Ebsi bera mimif mijginaga rot tenten oida Allah eneita odou ongga eskeiramera rot rusnok jeska rua ruroru jeni hukum Musa guru. 12Jeska erek mimif mudou os mita mudou ongga ebsi komowa ahah Allah eiteij oisouska hukum Musa ongga mimif muroru jeni, beda koma bera erek mimif muisum gij mar ongga misinsa muntunggom ojgomu ros. Noba mimif munororu Allah rot tenten enesi. Mimif mijginaga rot erek koma jeska runggu gij Mar Efeyi Ebsi sis fob erek kef oida, "Idu ongga ororu jeni hukum nomnaga rot tentenmen ojgomu, beda ofa emesma eiteij ah ongga efeinah. Jeska ofa esinsa bera ongga ontunggom jeni mar insa koma nomnaga fob." 13Erek koma tina osnok egema tein jeska mimif ongga Yahudi bera runororu jeni hukum insa koma nomnaga jinaga guru. Jefeda Allah oga ojga rot oida mimif nomnaga mimagos rot ojgomu. Tina Yesus bera onsuwa mimif jeska mar insa koma ongga Allah oga ojga rot fob. Jeska mar ongga runggu gij Mar Efeyi Ebsi sis fob bera anggot erek kef oida, "Erek rusnok runtob osnok egens tumu mega salib, beda koma orocunc rot oida Allah oga ojga rot osnok egens insa koma oida ofa emagos ojgomu." Jefeda gij mona ongga Yesus anggos tumu mega salib, beda koma erek Ofa agos tumu mimif gu mega salib rot mar ongga Allah oga ojga rot nou mimif. 14Noba Ofa anggos tumu mega salib jeskaseda rusnok ongga erek Yahudi guru tein rimesma oufamofa eteb ongga Ofa anggen rot jah gu Abraham gij mona ongga sismeni fob. Beda ebeibeyaif mimif tein misma oufamofa eteb insa koma oisouska mudou ongga erek egens jera Yesus Kristus fob. Koma bera, erek mimif mudou ororu Yesus Kristus rot tenten, beda mimif mimesma Efena Ebsi ongga Allah anggen rot jah nou rusnok sis fob. 15Edohuji, didif dudou os dira mar egens ongga orocunc rot mar insa koma nomnaga efen ofou. Koma bera erek kef: erek rusnok ris mar joug morototuma rot mar ofoka egens fob, beda giskini rusnok enjgineg tein rineragou joug rot mar insa koma guru, era runogun mar dokun gij mona kahma deika tein guru. Jefeda erek koma tein rot mar ongga Allah anggen rot sis fob. 16Jeska Allah anggen rot mar ofoka egens gu Abraham jera efen osnok egens ongga onjuj jeska ofa rot oida Ofa emeita oufamofa eteb gu goga si. Tina iwa ik rot iskusk fog oida runogu gij Mar Efeyi Ebsi rot oida, Allah agen mar rot Abraham efen rusnok ongga runjuj jeska Ofa guru. Tina mar egens gij Mar Efeyi Ebsi agot oida, "Ofa anggen rot osnok egens ongga onjuj jeska Abraham ojgomu." 17Jefeda mar ongga didif duncunc rot ainsa kef bera osok gij mar ofoka egens ojgomu. Koma bera, mar ongga Allah anggen rot jera Abraham bera ah erek tenten ojgomu. Noba gij tahun rara wuntin tohkuru noba setka orgomu deika, beda Allah ocunc rot efen hukum-hukum gu Musa fogora ofa ogu keingg hukum koma gij buku-buku nou rusnok. Tina hukum Musa insa koma bera eneferwei rot mar ongga Allah anggen rot gu Abraham sismeni fog guru. Jefeda enadaij nou hukum Musa osuna rot mar ongga Ofa anggen rot gu Abraham tein guru. 18Noba erek rusnok ongga runjuj jeska Abraham bera ruroru jeni hukum Musa jeskaseda risma oufamofa jeska Allah, beda koma erek rua runoisum gij mar ongga Allah anggen rot gu Abraham sismeni fob deika guru. Tina mar ongga oufamofa insa koma ongga Allah anggen rot oida emeita gu Abraham bera Ofa eita rot odou ongga eskeiramera eteb fob. Ofa eneita mar insa koma jeska rusnok ruroru jeni hukum Musa guru. 19Erek koma tina, erek Allah eita oufamofa gu Abraham jeska ofa ororu Allah rot tenten ojgomu, jefeda Ofa eita hukum Musa insa koma gu rusnok rot meidu? Ofa eita hukum Musa insa koma gu rusnok gij mona kahma deika jeskaseda hukum insa koma bera omocunc gu rua rot rerin mar ongga oska. Noba hukum koma bera efen owesa efek ecira ojgomuja onjoros mona ongga osnok egens koma ongga onjuj jeska Abraham ensaga fob. Ofa bera ongga Allah anggen rot gu Abraham sis fob. Noba Allah ocunc rot hukum-hukum insa koma gu Musa oisouska malaikat-malaikat ongga Ofa obk skoita Musa. Beda Allah ocunc rot hukum insa koma gu rusnok oisouska Musa tein. 20Noba erek gosnok gegeka ongga gegan mar okowu ah moguma, beda erek giskini osnok egens ongga ont deimos bera agot mar rot goga. Erek koma tina gij mona ongga Allah anggen rot mar gu Abraham, beda Ofa agot mar teisis gu Abraham ojgomu. Noba Abraham esma mar koma teisis jeska Allah ojgomu. 21Tina jeska Allah anggen rot mar insa koma teisis gu Abraham sismeni fob, jefeda mimif mijginaga rot oida hukum Musa bera enerek moroju enjgineg ongga rusnok ruroru jeskaseda rita rudou ongga ebsi komowa ahah Allah eiteij guru. Jeska erek Allah eita hukum koma gu rusnok jeskaseda rita mar erek insa koma, beda koma erek rua ruroru hukum Musa ojgomu, noba runoisum gij mar ongga Allah anggen rot insa koma gu Abraham guru. 22Noba runggu mar egens gij Mar Efeyi Ebsi ongga anggot erek kef oida, "Ahah Allah eiteij bera rusnok nomnaga rutunggom mar ongga oska fob. Noba enadaij nou rua rusuwa risinsa jeska rerin mar ongga oska insa koma jinaga guru." Allah otunggom mar erek koma jeskaseda rusnok risma rudou ongga ebsi komowa ahah Ofa eiteij oisouska rudou ongga ororu Yesus Kristus rot tenten fob. Mar ongga oufamofa eteb ongga Ofa anggen rot sis fob bera Ofa emeita gu rusnok nomnaga ongga ruroru Ofa efen oga si. 23Noba gij mona ongga Yesus enen enesi, beda mimif bera erek rusnok ongga ringker gij mod oskusk, jeska mimif muroru hukum Musa ros. Noba hukum koma ocunc rot oida mifmin mar ongga oska enahuma, jefeda mimif mimagos rot ojgomu si. Noba enadaij nou mimif musuwa misinsa jeska hukum insa koma jinaga guru. Noba mimif miker erek koma onjoros mona ongga Allah oncunc rot oida mimif musuwa jeska hukum insa koma oisouska mudou ongga ororu Yesus Kristus ojgomu. 24Jefeda hukum Musa koma bera erek osnok egens ongga omfij oforoka egens fogora ecira rot ofa erek deci deci. Beda erek koma tein, hukum Musa insa koma bera ecira rot mimif deci deci tein ojgomuja onjoros mona ongga Yesus Kristus en fob. Beda gij mona insa koma bera mimif mita mudou ongga ebsi komowa ahah Allah eiteij oisouska mudou ongga ororu Yesus Kristus fob. 25Noba jeska Yesus Kristus, ongga mimif muroru, bera en fob jefeda hukum Musa insa koma efen owesa efek onoin keingg mimif deika guru. 26Jefeda ebeibeyaif iwa nomnaga ongga Yahudi jera iwa ongga erek Yahudi guru tein bera ija erek Allah efen efeser fob. Erek koma jeska iwa iroru Yesus Kristus rot tenten fob. 27Jeska gij mona ongga mimif nomnaga mita baptis, beda koma orocunc rot oida mimif nomnaga mija erek egens jera Yesus Kristus fob. Beda mimif tein mita mar erek Ofa eita ojgomuja. 28Koma bera, rua ongga Yahudi ni, rua ongga Yahudi guru ni, rua ongga rumfij rerin ebirfager ni, rua ongga runt gu risinsa fob ni, runer ni, rujager ni, rua koma nomnaga bera onofoufem skoita Allah guru. Jeska ahah Allah eiteij bera mimif nomnaga mirek egens oisouska Yesus Kristus ojgomu. 29Iwa iroru mar ongga Allah anggen rot gu Abraham, jefeda iwa tein bera erek Allah efen efeser. Beda Ofa emeita oufamofa gu iwa morototuma erek Ofa anggen rot gu Abraham sis fob.

will be added

X\