Galatia 1

1- 3Didif Paulus, bera ongga dunogu surat egens kef skoita iwa ongga iroru Yesus Kristus gij monuh Galatia. Noba didif dudou os disisi keingg iwa rot oida didif bera erek Yesus Kristus efen rasul egens. Noba rusnok enjgineg runocunc didif erek rasul guru. Noba rusnok rineya runofra didif erek koma tein guru. Tina Yesus Kristus jera mifmin mika Allah, ongga omfra Yesus jeska anggos fob, bera ongga oncunc didif erek Ofa efen rasul egens fob ojgomu. Didif jera mifmin muhuj Kristen ongga ringker jah sif bera mom meiteij gu mifmin mika Allah jera mifmin Tuhan Yesus Kristus tein jeskaseda Ofa omocunc oufamofa eteb skoita iwa. Beda iwa imesma eiteij ah ongga eskeiramera ojgomuja. 4Yesus Kristus bera aha esinsa jeskaseda agos tumu mega salib nou mifmin mar ongga oska. Noba mar ongga Ofa ontunggom insa koma bera erek mar ongga ongkoska eteb noba ongga Ofa orougif gu Allah rot. Ofa otunggom mar koma jeskaseda oskotu mimif jeska mar ofogog ongga rusnok rutunggom gij mona ebeibeyaif ojgomuja. Noba koma bera ongga mifmin mika Allah odou ejginaga rot ojgomu. 5Jefeda mimif mudou os oida Ofa esma ofoka ongga aksa eteb rot mona ongga ah aibin ojgomuja. 6Wah, didif dudou oubsaha eteb rot iwa! Jeska iwa inroru Yesus oga ongga oufamofa gij mona ongga erek estir ros, tina ebeibeyaif bera iwa ingkikif jeska Allah oga ongga oufamofa insa koma rot ebeirens fob. Ofa bera ongga enjeka iwa oisouska Yesus Kristus efen odou ongga oufamofa rot iwa. Noba ongga oska ekirsa bera ebeibeyaif iwa iroru oga ongga toga jeska oga ongga oufamofa insa koma fob. 7Noba oga ongga toga insa koma bera erek mar ongga tenten guru. Didif dagot erek koma jeska oga ongga rusnok enjgineg ruftuftu gu iwa jah suma bera orotunggom idou efesi eineina gij rot. Noba rua rireni rot jeskaseda riferwei oga ongga oufamofa osok gij Yesus Kristus ojgomu. 8Tina erek rusnok enjgineg, era malaikat-malaikat, era memef ongga Allah ombk tein moftuftu rot mar ongga toga jeska oga ongga oufamofa insa koma, beda didif duis gu Allah jeskaseda Ofa ofra mar okum eteb keingg memef rot ojgomu. 9Oga insa koma bera ongga memef magot gu iwa sis fob, noba iwa tein inroru oga insa koma rot tenten fob. Noba ebeibeyaif didif dudou os dagot gu iwa juens deika oida, erek rusnok enjgineg ruftuftu mar gu iwa ongga erek toga jeska oga ongga oufamofa ongga memef moftuftu gu iwa sis fob, beda didif duis gu Allah jeskaseda Ofa ofra mar okum eteb keingg rua noba eij rua gij mahmei meren rot ah aibin ojgomuja. 10Jefeda mar ongga didif danggot ainsa kef bera orocunc rot oida didif dunotunggom mar jeskaseda rusnok rudou efesi eskeiramera rot didif guru. Tina didif dutunggom mar jeskaseda Allah odou eskeiramera rot didif ojgomu. Jeska iwa isujohu rot oida didif dita mar jeskaseda dutunggom rusnok rudou eskeira rot didif ojgomu. Tina koma bera tenten guru. Jeska didif dudou os dufij Yesus Kristus ojgomu. 11Edohujia, iwa ijginaga rot kef fog oida, oga ongga oufamofa ongga didif dumftuftu rot gu iwa sis fob bera enen jeska mar ongga rusnok rudou osujohu rot guru. 12Jeska oga insa koma enen jeska rusnok enjgineg jinaga tein guru. Noba rusnok enjgineg runoftuftu didif rot tein guru. Tina Yesus Kristus esinsiyai ojgomu bera oncunc rot oga insa koma gu didif sis fob. 13- 14Erek koma jeska iwa ingg rot teinefa didif duroru Yahudi rerin agama erebent nomnaga rot ahais sis fob. Noba gij mona insa koma bera didif duku dufos ekirsa jeska edohujir ongga morototuma jera didif, fogora dija dukag rot rua deika. Noba iwa ingg rot teinefa didif dita mar ongga okum eteb skoita Allah efen rusnok ongga ruroru Yesus Kristus gij mona insa koma. Noba didif tein direneni rot ahais jeskaseda durohoda rot rusnok insa koma nomnaga fogora runororu Yesus Kristus deika guru. Didif dita mar erek koma jeska duku dufos ahais rot erebent ongga onjuj jeska dedin indimowa ongga Yahudi. 15Erek koma tina, gij mona ongga dedin ameina eneker rot didif enesi, beda Allah ocunc didif oisouska efen odou ongga oufamofa jeskaseda dija erek efen osnok egens ongga omfij Ofa gij mona kahma. 16Noba gij mona ongga Ofa odou eskeira rot, beda Ofa ocunc efen efesa Yesus Kristus gu didif. Ofa otunggom mar insa koma jeskaseda didif dujoftuftu rot oga ongga oufamofa osok gij Yesus Kristus skoita rusnok ongga Yahudi guru. Jefeda gij mona ongga Ofa ocunc Yesus Kristus skoita didif, beda didif dinejeka rusnok enjgineg rot mar insa koma efen ofou guru. 17Erek koma tein, didif dineja jah kota Yerusalem jeskaseda dijeka mar joug rua ongga rungkag rot didif erek rasul fob rot mar insa koma tein guru. Tina didif dija diker gu monuh owowa egens ongga angh gij monuh Arab. Beda didif duksons jah kota Damsyik. 18Noba gij tahun orgomu oisa fob, beda didif dija jah kota Yerusalem jeskaseda durodosu Petrus. Beda didif diker jera ofa jah suma rot mona setka noba cinja ojgomu. 19Beda gij mona insa koma bera didif durodosu jera Yakobus ongga Yesus efen mokosa tein. Tina didif dunorodosu jera rasul enjgineg guru. 20Noba mar ongga didif dunogu rot insa kef bera erek tenten ojgomu. Didif dunocuwei mar gu iwa rot guru. 21Beda didif dija jah monuh Siria jera monuh Kilikia. 22Noba gij mona insa koma rusnok ongga ruroru Yesus Kristus gij monuh Yudea bera rinejginaga rot didif enesi. 23Tina rua ringg mar jeska rusnok enjgineg ongga ragot oida, "Paulus, ongga ofra mar okum eteb keingg mimif ongga Kristen sis fob, ebeibeyaif bera ofa oftuftu mar gu rusnok jeskaseda rua ruroru Yesus Kristus ojgomu. Tina sis fob bera ofa ereneni rot ahais jeskaseda orohoda rot mimif nomnaga fogora munororu Yesus deika guru." 24Erek koma noba ebeibeyaif rusnok insa koma nomnaga risitit gu Allah jeska didif duroru Yesus Kristus fob.

will be added

X\