Efesus 6

1- 2Iwa ongga erek iforoker bera yugif gu yeyin iker jera isir ojgomu erek rusnok ongga ruroru Tuhan rot tenten fob tein. Koma bera erek mar ongga tenten ojgomu. Jeska mar ofoka egens ongga Allah anggot gu Musa rot sismeni bera erek kef oida, "Iwa yugif gu yeyin iker jera isir ojgomu." 3Noba oisouska mar egens insa koma bera Ofa anggen rot mar ofoka egema deika oida, "Yugif gu yeyin iker jera isir jeskaseda yeyin iteij ah erek dektek ojgomu noba ebera rot mar nomnaga erek adaij nou iwa tein." 4Iwa ongga yeyin iser bera ineyahehir joug iser insa koma rot ahais ojgomuja onjoros rudou oska rot iwa guru. Tina ongga oufamofa bera iwa isisi joug rua noba yuftuftu mar gu rua rot idou ongga ebriyi gij mar erek Kristen ongga ruroru Tuhan rot tenten fob ojgomu. 5Didif duis gu iwa ongga irek rusnok ongga rumfij rerin ebirfager ojgomuja jeskaseda iwa yufij rua rot idou ongga emeesa noba ongga efeneinei rot rua ojgomu. Noba iwa ita mar erek koma jera idou ongga oitij rot noba ongga onokoja rot guru. Iwa ita mar erek koma nou rua morototuma erek iwa ita mar nou Yesus Kristus tein ojgomu. 6Noba iwa ineita mar erek koma askesi rua riajga joug iwa jeskaseda rudou eskeira rot iwa ojgomu guru. Tina iwa ita mar insa koma erek rusnok ongga rumfij Yesus Kristus jera rudou ongga oitij rot jeskaseda iwa ita mar ongga jeni erek Allah odou ejginaga rot ojgomu. 7Jefeda iwa ita mar nou yeyin ebirfager insa koma rot idou ongga eskeiramera ojgomu. Noba iwa ineita mar koma erek rusnok ongga rumfij rusnok enjgineg ojgomu guru. Tina iwa ita mar erek rusnok ongga rumfij Tuhan tein ojgomuja. 8Jeska iwa idou ah keingg rot oida Allah emeita ofons gu orofosut osnok egens ongga otunggom mar ongga oufamofa ojgomu. Koma bera rot rusnok ongga rumfij rerin ebirfager jera rusnok ongga rut gu risinsa tein. 9Didif duis gu iwa tein ongga irek ebirfager nou yeyin rusnok ongga rumfij iwa tein jeskaseda iwa ita mar ongga ongkoska skoita rua tein ojgomu. Beda iwa inaha yuga ongga ofogog keingg rua guru. Jeska iwa ijginaga rot oida Allah, ongga engker gu mebaga, bera erek iwa jera rua rerin ebirfaga tein. Noba Ofa onofra osnok egens erek ekirsa jeska rusnok egema tein guru. 10Jefeda didif dudou os duftuftu iwa rot mar ofoka egens dokun deika ongga omoisa rot gij surat kef. Didif duis gu iwa jeskaseda iwa ita idou egens jera Tuhan Allah rot ahais oisouska Ofa efen owesa efek ongga eteb ojgomu. 11Beda iwa ira mar nomnaga ongga Allah eita gu iwa fob ongga orot joug iwa tein ojgomu. Iwa ira mar koma nomnaga jeskaseda gij mona ongga Bilis ereneni iwa rot mar ongga ofa ensejah gij odou efesi nou iwa fob, beda iwa inesiri gu ofa guru. 12Jeska mimif mineremeteima jera rusnok guru. Tina mimif miremeteima jera efena ofogog ofoukou doska ongga rerin owesa efek eteb, noba ongga ringker gij motkobah ojgomuja. Rua rufoka ereij keingg mar gij mebaga jera mebif tein. Noba rua ruftuftu mar ongga oska gu rusnok rerin ebirfager mebif ongga runougif gu Allah guru. 13Jefeda iwa ira mar nomnaga ongga Allah eita gu iwa fob ongga erek orot joug iwa ojgomu. Iwa ira mar koma nomnaga jeskaseda gij mona ongga Bilis ereneni iwa, beda iwa imot rot ahais ojgomuja onjoros omoisa. Beda iwa inesiri gu ofa jinaga guru. 14Erek koma noba erek tentara egens ongga era mekmei ofos erakid okom ofoj sismeni fogora esejah nou mona ongga rusnok rimagobuma, beda erek koma tein iwa isejah idou efesi ongga ebriyi gij Allah oga rot tenten sismeni ojgomu. Noba erek tentara egens ergi meisoufa erek kermom joug ofos jeskaseda mar ongga ofog enecirej ofa guru, beda erek koma tein iwa ita idou ongga efen mar ongga oska oskiyai tein guru. Koma bera ongga orot joug iwa jeskaseda inesiri gij mar ongga oska deika guru. 15Noba erek tentara egens ergi sepatu kermom joug okoda jeskaseda ot joug efen okoda, beda erek koma tein iwa isejah idou efesi jeskaseda ijoftuftu gu rusnok rot Allah efen oga. Jeska Allah efen oga insa koma bera ongga eita rusnok riteij ah ongga eskeiramera ojgomuja. 16Noba erek tentara egens orka efen monska ofos ongga ontumba joug esinsa jeskaseda mar ongga ofog enecirej ofa guru, beda erek koma tein iwa ita yeyin idou ongga ororu Allah rot tenten fob. Koma bera orot joug iwa jeska mar ongga Bilis otunggom skoita iwa. 17Noba erek tentara egens aha efen topi kermom joug ebirfaga jeskaseda erek rusnok rubu ofa tina enagos guru, beda erek koma tein yeyin iteij ah ongga efeinah bera oskotu iwa jeskaseda ineja gu mahmei meren guru. Beda erek tentara egens era meiteb kelawan jeskaseda eragob mesa, beda erek koma tein iwa ira Allah efen oga oisouska Efena Ebsi jeskaseda ireseda rot rusnok rerin ruga ongga riretei rot iwa. 18Beda iwa tein yum iteij rot ahais ojgomuja oisouska mar ongga Efena Ebsi oncunc gij idou efesi fob. Iwa yum iteij gu Allah ojgomuja jeskaseda Ofa ofij iwa ojgomuja. Noba iwa ita idou ongga ensejah nou yum iteij rot mar erek koma ojgomuja. Beda iwa yum iteij nou Allah efen rusnok nomnaga tein ojgomuja. 19Noba iwa yum iteij nou didif tein jeskaseda gij mona ongga didif disejah nou difesij mar rot Allah oga, beda Ofa omocunc mar gu didif gij dudou efesi osok gij mar ongga didif dimefesij rot gij mona insa koma. Noba iwa yum iteij gu Ofa jeskaseda didif duku dufos rot mar ongga didif dimefesij gu rusnok osok gij Allah efen oga ongga oufamofa tein. Oga ongga oufamofa koma bera ah jejema jeska rusnok sis fob. 20Erek koma jeska didif bera osnok egens ongga Allah oncunc jeskaseda difesij mar rot Ofa efen oga ongga oufamofa. Noba rusnok raha didif gij mod oskusk, jeska didif dimfesij rot efen oga insa koma fob. Jefeda iwa yum iteij gu Allah nou didif tein jeskaseda didif duku dufos noba difesij rot Ofa efen oga ongga oufamofa insa koma ojgomu. Jeska koma bera erek ofoufem eteb nou didif. 21Mifmin muhuj Tikhikus ongga mudou okora rot, bera erek osnok egens ongga emfarur nou Tuhan efen oga rot odou ongga ocosu efei ahtah. Ofa emefesij rot mar nomnaga ongga encirej didif jah sif gu iwa si. Beda iwa imejginaga rot teinefa didif diker jah sif. 22Didif dumobk ofa skoita iwa jeskaseda ofa efesij rot mar insa koma gu iwa. Beda iwa tein idou emerirei rot ojgomu. 23Didif dum diteij gu mifmin mika Allah jera Tuhan Yesus Kristus jeskaseda Ofa eita eiteij ah ongga eskeiramera gu iwa jera mifmin muhujir ongga Kristen nomnaga. Beda Ofa omofij iwa nomnaga jeskaseda iwa iroru Ofa rot tenten ojgomuja fogora idou omokorema moguma ojgomuja. 24Noba didif dum diteij gu Allah jeskaseda Ofa eita oufamofa eteb gu rusnok nomnaga ongga rudou okora rot mifmin Tuhan Yesus Kristus rot tenten ojgomuja. Ainsoma.

will be added

X\