Efesus 5

1Iwa bera erek Allah efen efeser ongga Ofa odou okora rot. Jefeda iwa ireneni rot ahais jeskaseda ita mar erek Ofa ojgomu. 2Noba iwa ita mar nomnaga rot idou ongga omokorema moguma tein. Iwa idou omokorema erek Yesus Kristus odou okora rot mimif fogora agos tumu mega salib nou mimif. Jeska mar ongga Ofa ontunggom koma bera erek mar ongga Ofa orougif gu Allah rot. Noba koma erek efen mar ensesa ongga ongkoska eteb. Jefeda Allah odou eskeira eteb rot tein. 3Iwa bera erek Allah efen rusnok. Jefeda enadaij nou iwa idou eftirir mekeinggma guru. Noba enadaij nou iwa yuckahtah fogora isiri morototuma erek oskiyai tein jinaga guru. Noba idou tein enekeben keingg yeyin mareibra erek oskiyai tein jinaga guru. Jeska mar insa koma bera enadaij nou rusnok ongga Kristen guru. 4Noba iwa tein inagot mar rot yuga ongga imahaisentima era inoubder mar ojgomuja tein jinaga guru. Tina iwa yagot mar erek ongkoska ongga ereita Allah odou eskeira rot iwa ojgomu. Koma bera erek iwa yuis oufamofa gu Ofa gij. 5Jeska ongga tentenmen bera, rusnok ongga rudou eftirir mekeinggma ni, rusnok ongga risiri morototuma ni, rusnok ongga rudou ekeben keingg rerin mareibra ofoukou ni, (koma erek rua rudou os mareibra koma ekirsa jeska Allah), rua koma nomnaga bera runoira morototuma jera rusnok ongga Allah jera Yesus Kristus ofoka ereij keingg tein jinaga guru. 6Noba iwa inesiri gu rusnok ongga rudou os rurokrusa iwa rot ruga efei jeskaseda iroru rua rot rerin mar ongga oska insa koma tein guru. Jeska Allah omofra mar okum eteb keingg rusnok nomnaga ongga runororu Ofa efen oga guru si. 7Erek koma jefeda iwa ibes ifaga jeska rusnok nomnaga ongga rutunggom mar erek insa koma ojgomu. 8Jeska sis fob bera iwa iker gij motkobah ros. Koma erek yeyin iteij ah ongga oska. Tina ebeibeyaif bera iwa injerek Allah efen rusnok ongga ringker gij eisa fob. Jefeda iwa ita mar ongga oufamofa ojgomu, erek rusnok ongga ringker gij eisa fob. 9Jeska rusnok ongga erek koma bera rita mar ongga ongkoska ni, rua rita mar ongga erek rusnok enjgineg runocunc oida erek oska guru ni, rua rita mar ongga erek tentenmen ojgomu ni. Rua koma bera erek mega egens ongga er fogora efen efek ofoukou noba ongkoska eteb tein. 10Iwa ireni rot ahais jeskaseda yeyin idou ebriyi gij mar ongga ereita Allah odou eskeira rot ojgomu. 11Noba iwa ibes ifaga jeska mar ongga rusnok ongga ringker gij motkobah rutunggom ojgomuja tein ojgomu. Jeska mar koma bera onofij rua tein jinaga guru. Tina ongga oufa bera iwa iroun rua skoita Allah efen eisa ojgomu. 12Mojen en Didif rot danggot mar osok gij rua ongga ringker gij motkobah ros. Jeska mar ongga rua rutunggom erek wuswus bera oska efekeifa eteb. 13Tina rusnok ongga ringker gij eisa bera rutunggom mar ongga oufamofa ojgomu. Noba mar ongga oufamofa koma bera ongga orocunc rot tomnomna gu rusnok ongga ringker gij motkobah rot oida rua rerin mar ongga oska ros. 14Jeska Allah efen eisa koma bera orocunc rot mar ongga rusnok rutunggom gij motkobah fogora ah tomnomna gu rusnok nomnaga. Erek koma jeska mar egens gij Mar Efeyi Ebsi bera agot erek kef oida, "Iwa ongga yahca ahaingkongka, iwa isba iteij noba idebecki jeska yanggos ojgomu. Beda Kristus omocunc efen eisa gu iwa." 15Erek koma jefeda iwa yut joug idou efesi rot yeyin iteij ah ojgomuja. Iwa ineita mar erek rusnok enjgineg ongga rudou osumsumu eteb rot ojgomu guru. Tina iwa ita mar rot idou ongga ebriyi eteb gij mar ojgomu. 16Noba gij yeyin mona efekesa insa kef bera iwa isejah idou efesi rot iskusk jeskaseda itunggom mar ongga oufamofa ojgomu. Jeska gij mona ebeibeyaif bera rusnok rutunggom mar ongga ofogog eteb ojgomuja. 17Jefeda iwa ineita mar jera idou ongga osumsumu rot tein guru. Tina iwa ireni rot ahais ojgomu jeskaseda idou ebriyi gij mar meidu ongga Allah ondou os rot ojgomu. 18Noba ibirfaga enerebibei rot mofut efei ojgomuja tein guru. Jeska koma bera ongga oroku rusnok rudou efesi fogora risiri gij mar ongga oska ojgomuja. Tina iwa ita idou ongga ebera rot Efena Ebsi Allah ojgomu. 19Beda iwa ifesij mar moguma rot yuga ongga oufamofa tein ojgomu. Noba mar ongga oufamofa koma bera erek mar ongga iwa yuf medemer moguma rot jera imfesij moguma rot jeska buku Mazmur tein. Iwa ifesij mar ongga ongkoska noba yuf medemer erek koma rot idou ongga esitit gu Tuhan. 20Noba iwa tein yuis oufamofa gu mifmin mika Allah oisouska mifmin Tuhan Yesus Kristus ofoka rot mar nomnaga. 21Didif duis gu iwa nomnaga jeskaseda iwa yugif moguma ojgomu. Jeska iwa bera ongga yugif gu Yesus Kristus rot tenten tein fob. 22Iwa ongga yahi igers fob bera yugif gu yeyin yahiner ojgomu erek iwa yugif gu Tuhan tein. 23Jeska rahiner bera erek ebirfaga nou rerin ruhoner. Koma erek Yesus Kristus ongga erek ebirfaga nou efen rusnok Mod Ari nomnaga. Noba Ofa bera ongga onskotu efen rusnok Mod Ari nomnaga ongga erek esinsa efen efaga tein fob. 24Jefeda iwa ongga yahi igers fob bera yugif gu yeyin yahiner gij mar nomnaga ojgomu. Koma bera morototuma erek rusnok Mod Ari ongga rugif gu Yesus Kristus ongga erek mifmin ebirfaga rot mar nomnaga. 25Erek koma tein, iwa ongga yuskotu arja fob bera idou okora rot yeyin ihoner ojgomu morototuma erek Yesus Kristus odou okora rot efen rusnok Mod Ari nomnaga fogora agos tumu mega salib nou rua. 26Ofa otunggom mar koma jeskaseda efen rusnok Mod Ari nomnaga risma rudou efesi ongga ebsi komowa. Noba mei ongga mimif mita baptis gij orocunc rot oida mudou efesi bera ebsi komowa fob. Noba mar insa koma en oisouska Allah oga ongga oufamofa. 27Ofa otunggom mar erek koma jeskaseda oroun efen rusnok Mod Ari skoita esinsa rot rerin rudou ongga ebsi komowa ojgomu. Jeska mar ongga erek ahtaboku bera enah gij rudou efesi erek oskiyai tein jinaga guru. 28Jefeda iwa ongga yuskotu arja fob bera ita idou ongga okora rot yeyin ihoner erek koma. Ita idou ongga okora rot rua erek idou okora rot isinsa ifaga tein ojgomu. Jeska erek osnok egens odou okora rot efen mohona, beda ofa ot joug efen mohona koma erek ofa ot joug efen esinsa efaga. 29Erek koma jeska giskini bera rusnok rineita mar ongga oska skoita risinsa rifaga guru, tina rua rut joug rerin risinsa rifaga rot iskusk ojgomu. Noba rua rita mar ongga erek ongkoska rot risinsa rifaga ojgomu. Beda koma tein bera erek Yesus Kristus ongga eita mar ongga ongkoska ojgomu gu efen rusnok Mod Ari. 30Noba mimif ongga rusnok Mod Ari bera erek Ofa efen efaga ongga Ofa ot joug rot iskusk tein. 31Jeska mar egens gij Mar Efeyi Ebsi bera agot erek kef oida, "Orna egens eja jeska efen meka jera mosu, beda ofa jera efen mohona gegan godou geja erek egens." 32Noba mar egens koma bera agot rot mar ongga tentenmen ojgomu. Tina mar ongga didif danggot rot insa koma bera orocunc rot Yesus Kristus jera efen rusnok Mod Ari. 33Erek koma tina mar insa koma tein bera erek orocunc rot iwa ongga yuskotu arja fob. Jefeda orofosutut runer ongga runskotu arja fob bera rudou okora rot rerin ruhoner insa koma noba rut joug rua erek rua rut joug risinsa rifaga tein ojgomuja. Noba orofosutut rujager ongga ranghi igers fob tein bera rugif gu rerin rahiner rot tenten ojgomu.

will be added

X\