Efesus 3

1Sis fob bera Allah ensejah gij odou efesi jeskaseda oroun iwa ongga erek Yahudi guru skoita esinsa tein. Jefeda rusnok ongga rufogog raha didif gij mod oskusk jeska didif dimfesij rot mar insa koma ongga Allah ensejah rot sis fob. Tina Allah oitij rot mar koma ojgomu jeskaseda iwa tein isma oufamofa eteb jeska Ofa. 2Noba iwa ingg fob rot oida Allah oncunc didif, rot efen odou ongga eskeiramera, jeskaseda duftuftu iwa ongga erek Yahudi guru tein rot Ofa efen oga fogora durofij iwa tein. 3Erek koma jeska iwa ingk gij surat egens jeska didif rot teinefa Allah oncunc mar gu didif jeskaseda dufij Ofa rot mar insa koma ongga Ofa ensejah rot sis fob. Noba mar koma bera angh jejema jeska rusnok enjgineg. 4- 5Sis fob Allah enagot rot mar insa koma gu efen rusnok guru. Tina ebeibeyaif bera Ofa oncunc rot mar insa koma gu efen rasul-rasul jera nabi-nabi oisouska Efena Ebsi ongga engker gij rudou efesi fob. Noba didif dimfesij oskiyai rot mar ongga angh jejema insa koma gu iwa gij surat kef tein. Jefeda erek iwa ik rot iskusk beda idou emebriyi gij mar koma osok gij Yesus Kristus si. 6Noba mar ongga ah jejema insa koma bera erek kef oida, oisouska Allah oga ongga oufamofa osok gij Yesus Kristus bera rusnok ongga Yahudi guru tein rimesma mar ongga Allah ensejah morototuma jera rusnok ongga Yahudi tein. Rusnok ongga erek Yahudi guru jera rusnok ongga Yahudi tein rinja erek Allah efen rusnok ongga ebic egensmes ojgomu. Noba rusnok insa koma nomnaga tein bera rimesma mar ongga oufamofa ongga Allah anggen rot oisouska Yesus Kristus jera efen oga ongga oufamofa osok gij Ofa. 7Oisouska Allah odou ongga eskeiramera rot didif bera Ofa oncunc odou ongga oufamofa skoita didif. Beda Ofa obk didif erek efen osnok egens ongga emfesij rot mar insa koma gu rusnok enjgineg tein. Noba oisouska Ofa efen owesa efek eteb bera didif difarur gij mar koma ojgomuja. 8Noba gu Allah efen rusnok nomnaga rifekesa bera didif direk osnok egens ongga onok ofoka gij guru. Erek koma tina Allah oncunc odou ongga oufamofa skoita didif jeskaseda dujoftuftu rot efen oga ongga oufamofa gu rusnok ongga erek Yahudi guru. Oga ongga oufamofa koma bera osok gij rot teinefa mimif misma mar ongga ongkoska eteb oisouska Yesus Kristus. Mar koma bera oufamofa eteb ekirsa jeska mudou ebriyi gij rot tein. 9Jeska Allah bera ongga ontunggom mar nomnaga oisouska Yesus Kristus sis fob. Noba Ofa bera oncunc didif jeskaseda difesij rot mar insa koma ongga Allah endemi jeska rusnok nomnaga sis fob. Mar koma ongga Ofa endemi bera erek kef oida, "Ofa omoskotu rusnok ongga Yahudi guru tein jeska rerin mar ongga oska." 10Ofa omotunggom mar koma jeskaseda malaikat-malaikat jera mar enjgineg tein ongga efen owesa efek gij mebaga bera rimek rot Ofa efen rusnok Mod Ari ongga erek rusnok Yahudi morototuma jera rusnok ongga Yahudi guru tein. Beda oisouska rusnok insa koma rerin rudou ongga egens jera Allah fob bera malaikat-malaikat insa koma rimek rot teinefa Allah ontunggom mar nomnaga rot odou ongga efesis eteb ekirsa jeska mar enjgineg. 11Allah otunggom mar insa koma oisouska mifmin Tuhan Yesus Kristus ororu jeni efen odou ejginaga rot sis mona ongga dojunmeni fob. 12Erek koma noba oisouska mudou ongga egens jera Yesus Kristus, noba oisouska mudou ongga ororu Ofa, bera mimif minemeesa rot ongga mirejgei mar teisis skoita Allah guru. 13Erek koma jefeda didif duis gu iwa jeskaseda idou enebisa rot didif ongga disma difera okora gij mod oskusk kef guru. Jeska didif disma difera okora insa koma jeskaseda iwa ongga erek Yahudi guru imesma oufamofa eteb jeska Allah tein. 14Allah bera oncunc mar insa koma nomnaga ongga ah jejema gu rusnok ebeibeyaif, jefeda didif dugif gu Ofa fogora dum diteij rot ahais gu Ofa nou iwa ojgomuja. 15Jeska Ofa bera ongga ontunggom efen rusnok ongga ruroru Ofa gu mebif jera efen rusnok ongga ruroru Ofa gu mebaga tein. Jefeda Ofa bera erek ebic egeka insa koma tein efen meka. 16Noba didif dum diteij gu Ofa jeskaseda Ofa ocunc efen ofoka ongga aksa jera odou ongga ongkoska eteb skoita iwa fogora imeita yeyin idou efesi ongga ahais oisouska Efena Ebsi. 17Noba didif dum diteij jeskaseda oisouska idou ongga ororu Yesus Kristus fob, bera Ofa ejerek egens jera iwa odudu dokun deika. Noba erek mod egens ongga ot rot ahais fob, era erek mega egens ongga eij ofom gij mebi efesi fogora ot rot ahais, beda iwa tein ita idou ongga omokorema moguma rot ahais ojgomuja. 18Noba erek enadaij nou rusnok rireni jeni mod egens ongga eteb doska efen efefi jera efen aksa jera efen osok eteb jinaga guru, beda erek koma tein enadaij nou mimif mireni jeni rot teinefa Yesus Kristus odou okora eteb doska nou mimif jinaga guru. Tina didif dum diteij jeskaseda iwa, jera Allah efen rusnok nomnaga, imesma owesa efek jeska Ofa fogora idou emebriyi gij rot teinefa Ofa odou okora rot mimif erek insa koma. 19Noba didif dum diteij jeskaseda yeyin iteij ah bera ebera rot mar ongga Allah odou os eita gu iwa ongga erek ongkoska eteb. Mar ongga ongkoska eteb insa koma bera oufamofa ekirsa eteb doska jefeda okum nou mudou ebriyi gij ojgomu. 20Allah bera ongga efen ofoka ongga aksa ekirsa jeska mar nomnaga. Noba oisouska mudou ongga egens jera Ofa bera Ofa efen owesa efek ongga adaij nou otunggom mar ongga eteb ekirsa jeska meidu ongga mimif mirejgei Ofa rot, era ekirsa jeska meidu ongga mimif musujohu rot gij mudou efesi tein. 21Erek koma jefeda didif dum diteij jeskaseda rusnok nomnaga gij mona deisef noba gij mona kahma tein rimesitit Ofa rot efen ofoka ongga aksa eteb ojgomuja. Noba mar ongga oufamofa insa koma nomnaga en oisouska Yesus Kristus Efena Ebsi ongga engker gij mudou efesi tein (Ainsoma).

will be added

X\