Efesus 2

1Gij mona ongga sis fob bera iwa inougif gu Allah rot efen oga jinaga guru. Noba yeyin iteij ah ongga ebera rot mar ongga oska ojgomuja. Jefeda ahah Allah eiteij bera iwa erek rusnok ongga ranggos fob ojgomu. 2Jeska gij mona insa koma bera iwa iroru mar ofogog ongga rusnok mebif rudou os rutunggom ojgomuja. Noba iwa yugif gu Bilis rot efen oga ojgomu. Ofa bera ongga ofoka ereij keingg efena ofogog nomnaga ongga angh gu mebaga. Noba efena ofogog koma nomnaga bera ongga ruftuftu rusnok mebif ongga runougif gu Allah guru rot Bilis efen oga. 3Ongga tenten bera, sis fob mimif nomnaga mita mar ongga oska erek rusnok insa koma rita mar ongga oska ojgomu. Mimif muroru mar ongga oska ongga angh gij mudou efesi ojgomuja. Noba mimif mita mar ongga mudou osos rot tein ojgomu. Memef muroru mar ongga oska ongga mudou osujohu rot ojgomuja. Noba gij mona insa koma bera mimif tein mimesma mar okum eteb jeska Allah, erek rusnok insa koma rimesma mar okum jeska Ofa ojgomu. 4- 5Erek koma tina, askesi mimif muroru mar ongga oska erek rusnok ongga ranggos fob ahah Allah eiteij, beda Ofa eita eiteij ah ongga efeinah gu mimif oisouska Yesus Kristus ongga esma eiteij ah ongga efeinah sons fob. Noba Ofa otunggom mar koma nou mimif jeska Ofa odou okora eteb rot mimif, noba jeska Ofa efen odou ongga eskeira rot mimif tein. Noba Ofa onskotu mimif jeska mifmin mar ongga oska insa koma oisouska efen odou ongga oufamofa skoita mimif ojgomu. 6Noba oisouska mudou ongga egens jera Yesus Kristus fob, bera Allah omfra mimif tein morototuma jera Yesus Kristus jeskaseda mimif tein mufoka ereij keingg mar nomnaga morototuma jera Ofa gij mebaga. 7Ofa otunggom mar insa koma jeskaseda gij mona kahma beda Ofa omocunc odou ongga okora eteb rot mimif noba ongga oufamofa eteb skoita mimif oisouska Yesus Kristus ojgomuja. 8Erek koma jeska Allah onskotu iwa ororu efen odou ongga oufamofa skoita iwa, noba oisouska mifmin mudou ongga ororu Ofa efen oga rot tenten fob tein. Noba mimif minesma eiteij ah ongga efeinah insa koma oisouska mar ongga mimif misinsa muntunggom jinaga guru. Tina gij mona ongga Yesus anggos tumu mega salib nou mimif, beda Ofa osuna rot mifmin mar ongga oska. Noba mar koma ongga Ofa ontunggom bera erek mar ongga Ofa oh rot oubji gu mimif ojgomu. 9Jefeda enadaij nou mimif misitit misinsa mifaga rot jinaga guru. 10Jeska Ofa esinsiyai bera ongga ontunggom mimif erek rusnok ongga efeinah oisouska mudou ongga egens jera Yesus Kristus fob. Noba Ofa ensejah nou otunggom mar insa koma gij mona ongga sis fob jeskaseda gij mona ongga ebeibeyaif bera mimif mutunggom mar ongga oufamofa nou Ofa. 11Erek koma jefeda iwa idou onofoj joug guru rot oida sis fob bera rusnok ongga Yahudi rinjeka iwa erek rusnok ongga oska efekeifa noba ongga runougif gu Allah guru. Erek koma jeska iwa ineris ifom mareij ofos jeska guru. Tina rua rinjeka risinsa erek rusnok ongga ebsi komowa ojgomu. (Jeska rua bera ruroru Hukum Musa). 12Gij mona insa koma bera yeyin idou enerek egens jera Yesus Kristus enesi. Noba iwa irek rusnok ongga rusodosa jeska rua ongga Allah oncunc fob. Noba Ofa enagot eimofoj rot oida Ofa omofij iwa tein si guru. Tina iwa ingker gu mebif erek rusnok ongga riseiseifa ojgomu. Noba iwa bera erek rusnok ongga runoisum gij Allah rot mar egema tein guru. 13Erek koma tina ebeibeyaif bera iwa ita idou ongga erek egens jera Yesus Kristus fob. Sis fob iwa iker erek yes jeska Allah ojgomuja. Tina ebeibeyaif bera iwa in skoita Ofa oisouska Yesus Kristus efen ogufu ongga eya tumu mega salib fob. 14Ofa bera ongga eita rusnok Yahudi rudou ongga eskeiramera moguma jera rusnok ongga erek Yahudi guru tein. Ofa oroun mimif nomnaga fogora minja erek Allah efen rusnok ebic egens. Sis fob rusnok rudou ongga oska morototuma insa koma bera erek mejga akseij egens ongga eragou joug rusnok ongga Yahudi jeska rusnok ongga Yahudi guru. Tina ebeibeyaif bera Allah onghoda rot mar insa koma ongga orotunggom mifmin mudou erek oska morototuma fob. 15Noba oisouska Yesus Kristus ongga anggos tumu mega salib, bera Ofa orohoda rot hukum Yahudi jera hukum ongga onjuj jeska Musa jera rerin mar nomnaga ongga riyahehir joug fob. Ofa ontunggom mar insa koma jeskaseda mimif ongga erek ebic egeka insa koma mija erek ebic egens ongga efeinah morototuma jera Ofa. Noba ebeibeyaif mimif mita miteij ah ongga eskeiramera moguma fob. 16Jeska oisouska Yesus ongga anggos tumu mega salib fob bera Ofa orohoda rot mar insa koma ongga orotunggom mimif fogora mudou oska morototuma. Beda Ofa oroun mimif nomnaga sons skoita Allah erek ebic egens. 17Noba Ofa tein en gu mebif jeskaseda efesij mar gu rusnok nomnaga rot oga ongga oufamofa ongga ereita rusnok rudou eskeiramera. Ofa efesij rot oga ongga oufamofa insa koma gu iwa ongga Yahudi guru ongga iker erek yes jeska Allah. Noba Ofa tein efesij rot oga ongga oufamofa koma gu rusnok Yahudi ongga rijginaga rot Allah fob tein. 18Jeska oisouska mar ongga Yesus Kristus ontunggom nou mimif nomnaga fob bera mimif ongga erek ebic egeka minja erek ebic egens jera Allah oisouska Efena Ebsi ongga ofij mimif ojgomuja. 19Erek koma jefeda ebeibeyaif bera iwa inerek rusnok ongga rusodosa jeska rusnok ongga Allah oncunc fob deika guru. Tina iwa bera inja erek ebic egens jera Ofa efen rusnok fob. Noba iwa inja erek Ofa efen efeser tein fob. 20Noba mimif nomnaga bera erek mod egens ongga Allah ei nou esinsa. Noba mar ongga rasul-rasul jera nabi-nabi rumftuftu rot gu rusnok sis fob bera erek orocunc rot teinefa rua tein rufij nou rii mod Allah egens insa koma. Noba Yesus Kristus bera erek mamu ofoj egens ongga mod insa koma angh esij rot ahais ojgomu. 21Beda oisouska Yesus Kristus bera mimif mimebiedima erek mod egens ongga ebsi komowa nou Tuhan Allah. 22Erek koma beda, oisouska idou ongga egens jera Yesus Kristus fob, bera iwa tein imebiedima erek egens jera Allah efen rusnok nomnaga jeskaseda ija erek mod egens ongga Efena Ebsi Allah engker gij ojgomuja.

will be added

X\