Kolose 4

1Erek koma tein, iwa ongga irek ebirfager ongga yeyin rusnok ongga rumfij iwa, iwa tein ita mar ongga erek ongkoska gu rua ojgomu, noba iwa inorokrusa rua guru. Jeska iwa tein yeyin ebirfaga ongga engker gu mebaga. Noba Ofa eyajga joug iwa rot mar insa koma tein ojgomuja. 2Beda iwa tein yum iteij gu Allah ojgomuja. Noba iwa yut joug idou efesi rot ahais noba yuis oufamofa gu Ofa tein askesi iwa yum iteij gu Ofa. 3Beda iwa yum iteij nou didif tein jeskaseda didif disma efekesa nou duftuftu mar rot Yesus Kristus efen oga ongga angh jejema jeska rusnok enjgineg ros. Didif dingker gij mod oskusk insa kef jeska didif duftuftu rot Yesus Kristus efen oga insa koma fob. 4Jefeda iwa yum iteij nou didif erek insa koma jeskaseda duku dufos ojgomu fogora duftuftu mar insa koma gu rusnok rot koisoisa. Jeska mar ongga didif dimfarur gij bera erek koma. 5Noba iwa tein ita mar nomnaga rot idou ongga efesis eteb gij jeskaseda rusnok ongga runororu Yesus Kristus enesi bera rimek yeyin iteij ah ongga ongkoska ojgomu. 6Erek koma beda iwa tein yagot mar rot yuga ongga erek eriaga skoita rusnok enjgineg ojgomu. Noba iwa isejah idou efesi nou mar ongga rua rinjeka iwa rot jeskaseda iwa iroun mar sons gu rua rot iskusk. 7Mifmin muhuj Tikhikus bera emefesij rot mar nomnaga osok gij didif gu iwa gij mona ongga ofa ensaga keingg iwa jah suma. Ofa tein bera osnok egens ongga ofij Tuhan Yesus Kristus rot ahais ojgomuja. 8Didif dumobk ofa skoita iwa jeskaseda iwa ijginaga rot memef erek teinefa, fogora idou efaga ouka rot tein. 9Ofa emen morototuma jera Onesimus. Onesimus koma bera mefmen mohuj egens tein ongga ororu Yesus Kristus rot tenten fob, noba ongga modou okora rot tein. Beda gegeka tein bera gemagot rot mar nomnaga gu iwa si. 10Beda Aristarkus ongga eker morototuma jera didif gij mod oskusk kef tein bera oisu iwa. Noba Markus ongga Barnabas efen mokosa tein oisu iwa. (Didif direjgei iwa sis fob, jeskaseda erek ofa en skoita iwa, beda imoroun ofa rot idou ongga oufamofa ojgomu tein). 11Erek koma tein Yesus, ongga efen ofoka Yustus tein, bera oisu iwa. Rusnok Yahudi ongga rufij didif jeskaseda ruftuftu rot teinefa Allah ofoka ereij keingg rusnok bera rua insa kef ojgomu. Noba rua tein rifarur rot Allah oga insa koma erek iskusk ojgomu. 12Noba Epafras, ongga ororu Yesus Kristus tein, noba ongga en jeska iwa, ofa tein oisu iwa. Ofa om eiteij gu Allah nou iwa rot ahais ojgomuja. Ofa om eiteij jeskaseda iwa yut joug idou efesi rot ahais ni, jeskaseda idou ebriyi gij Yesus Kristus efen oga ni, noba jeskaseda iroru mar ongga Allah odou ejginaga rot ojgomuja ni. 13Noba didif dagot rot tenten oida ofa efarur rot ahais nou iwa jera nou Yesus efen rusnok gij kota Laodikia jera kota Hierapolis tein. 14Erek koma tein, mifmin muhuj Lukas ongga erek dokter, noba ongga mudou okora rot, ofa jera Demas tein goisu iwa. 15Erek koma beda didif tein duisu mifmin muhujir ongga ruroru Yesus Kristus gij kota Laodikia jera mifmin mohuj Nimfa jera rusnok nomnaga ongga rumohoturuma gij ofa efen mod. 16Beda nou ongga rusnok rik surat kef fogora rimfesij gu iwa ongga Kolose nomnaga fob, beda iwa isa surat kef skoita Yesus efen rusnok ongga ringker gij kota Laodikia jeskaseda rua rik fogora rifesij rot gu rusnok jah suma tein. Erek koma tein, gij mona ongga rusnok Laodikia risa surat ongga didif dunggu gu rua skoita iwa fob, beda iwa tein ik fogora ifesij rot gu yeyin rusnok jah Kolose tein. 17Noba iwa isisi keingg Arkhipus jeskaseda ofa efarur rot mar ongga Tuhan oncunc gu ofa onjoros omoisa fob. 18Didif Paulus bera dira disinsa ditma durogu keingg mar ongga duisu iwa rot insa kef. Noba iwa inodou ofoj joug rot oida didif dingker gij mod oskusk kef ros guru, tina yum iteij gu Allah nou didif. Noba Didif tein dum diteij gu Allah jeskaseda Ofa eita oufamofa eteb gu iwa. Ainsoma.

will be added

X\