Kolose 3

1Iwa insma eiteij ah ongga efeinah morototuma jera Yesus Kristus gij mona ongga Ofa endebecki jeska anggos fob. Jefeda iwa yuh idou efesi rot ongkas jah nou mar ongga angh gu mebaga ojgomu. Jeska jah suma bera Yesus Kristus engker desi Allah rot efen ofoka ongga aksa eteb fob. 2Erek koma tein, iwa isujohu rot mar ongga angh gu mebaga ojgomuja, noba idou enemeesa rot yeyin iteij ah gij mona ongga ebeibeyaif ojgomu guru. 3Jeska yeyin mar ongga oska enah gu iwa deika guru. Koma erek iwa yanggos jeska mar koma fob morototuma jera Yesus gij mona ongga Ofa anggos fob. Noba iwa insma eiteij ah ongga efeinah morototuma jera Yesus Kristus ongga engker desi Allah gu mebaga fob. 4Beda gij mona ongga Yesus Kristus, ongga eita eiteij ah gu mimif, omorogna keingg rusnok nomnaga, beda mimif tein mumorogna keingg rua morototuma jera Ofa. Noba mimif tein mimesma mufoka ongga aksa eteb morototuma erek Ofa efen ofoka ongga aksa. 5Iwa ineita mar ongga oska egema tein ongga angh gij idou efesi sis fob deika guru. Iwa inockahtah morototuma guru ni, inesiri morototuma jera mar enjgineg tein guru ni, inodou os itunggom mar ongga ofogog guru ni, idou eneftirir keingg mareibra ofoukou guru ni. Jeska koma bera erek iwa idou osos rot mar insa koma ekirsa jeska rot idou ongga osos rot Allah tein. 6Iwa ineita mar erek insa koma guru, jeska Allah omofra mar okum eteb keingg rusnok nomnaga ongga rutunggom mar erek koma si. 7Gij mona ongga iwa inororu Yesus Kristus efen oga enesi, bera iwa ita mar erek insa koma ojgomuja. 8Erek koma tina, ebeibeyaif iwa inororu mar ongga oska egema tein deika guru. Iwa idou onotkonu oska skoita rusnok enjgineg guru ni, idou onofogog rot rusnok enjgineg guru ni, inohurmei mar gij rusnok enjgineg guru ni, inahaisent gij rusnok enjgineg guru ni, 9inocuwei mar moguma guru ni. Iwa ineita mar insa koma nomnaga deika guru. Jeska iwa bera yaha yeyin mar ongga oska nomnaga jah fob. Mar koma bera ongga iwa intunggom gij mona ongga iwa inororu Yesus Kristus enesi. 10Ebeibeyaif bera iwa iker rot yeyin iteij ah ongga efeinah fob. Jefeda iwa ita mar ongga ongkoska odudu dokun deika erek Allah eita mar ongga ongkoska. Noba Allah bera ongga eita eiteij ah ongga efeinah koma gu iwa jeskaseda idou ebriyi gij Ofa erek odudu deika. 11Ofa otunggom mar koma nou iwa nomnaga tein. Jefeda rusnok Yahudi tein bera rinekirsa jeska rusnok ongga Yunani guru. Noba rusnok ongga riris rufom mareij ofos jeska bera rinekirsa jeska rusnok ongga rineris rufom mareij ofos jeska guru. Noba rusnok ongga rujga jeska rerin monuh bera rinekirsa jeska rusodosa ongga ringker gij rusnok koma rerin monuh guru. Noba rusnok ongga rut gu risinsa fob bera rinekirsa jeska rusnok ongga rumfij rerin ebirfaga ojgomuja ros guru. Tina Yesus Kristus bera ongga ofoufem eteb nou iwa nomnaga. Noba Ofa bera eja erek egens morototuma jera rusnok nomnaga ongga ruroru Ofa fob. 12Iwa bera erek Allah efen rusnok ongga ebsi komowa noba ongga Ofa oncunc fob. Noba Ofa odou okora eteb rot iwa. Jefeda iwa idou omokorema moguma ni, ita mar ongga erek ongkoska moguma ni, yuin keingg isinsa idou efesi moguma ni, noba ita mar deci deci moguma ni. 13Erek koma noba iwa imofijma ni, isuna rot mar ongga oska ongga rineya rutunggom skoita iwa rot idou ongga eskeiramera ojgomu ni. Iwa isuna rot mar ongga oska insa koma erek Tuhan onsuna rot isinsa yeyin mar ongga oska rot odou ongga eskeira fob. 14Noba mar egens ongga ofoufem ekirsa bera iwa idou omokorema ojgomuja. Jeska koma bera ongga ebiedi iwa rot ahais erek ebic egens ojgomuja. 15Noba oisouska Yesus Kristus bera iwa ita idou ongga eskeiramera moguma. Jefeda iwa ita idou ongga eskeiramera moguma erek koma ojgomuja. Jeska Allah oncunc iwa fob jeskaseda iwa nomnaga ita mar erek koma. Noba iwa tein yuis oufamofa gu Allah ojgomuja. 16Beda iwa ireni rot ahais jeskaseda idou ebriyi gij Yesus Kristus efen oga erek ekirsa deika ojgomuja. Noba iwa imoftuftuma jera icunc mar moguma rot idou ongga efesis nou ojgomu. Erek koma tein, iwa yuf medemer jeska buku Mazmur ni, noba yuf medemer ongga erek oroftuftu rusnok ni, noba ongga erek orois oufamofa gu Allah tein. 17Beda mar nomnaga ongga iwa itunggom jera mar nomnaga ongga iwa yanggot rot bera ita mar insa koma nomnaga erek rusnok ongga ruroru Yesus Kristus rot tenten ojgomu. Noba iwa ita mar erek koma askesi iwa yuis oufamofa oisouska Yesus Kristus. Noba ois oufamofa gu Allah oisouska idou ongga egens jera Tuhan Yesus Kristus fob. 18Iwa ongga yanghi igers fob, iwa yugif gu yeyin yahiner ojgomu. Jeska koma bera ongga Tuhan ondou os rot. 19Noba iwa ongga yuskotu arja fob, iwa tein idou okora rot yeyin ihoner, noba ita idou ongga eriaga skoita rua ojgomu. 20Noba iforoker, iwa tein yugif gu yeyin iker jera yuser tein ojgomu. Jeska koma bera ongga ereita Allah odou eskeira eteb rot iwa. 21Noba yuner ongga yeyin iser fob, iwa inoftuftu mar rot yuga ongga okumkum eteb skoita rua guru. Jeska koma bera ongga orotunggom rudou efesi okum eteb rot iwa. 22Erek koma tein, iwa ongga erek rusnok ongga rumfij rerin ebirfager, iwa yugif gu rua rot mar nomnaga ongga rua ranggot rot gu iwa ojgomu. Noba iwa ineita mar erek koma gij mona ongga rua riajga joug iwa jeskaseda rudou oufa rot iwa ojgomu guru. Tina yugif gu rua rot idou ongga erirei ojgomuja. Ita mar erek koma jeska iwa idou okora rot Tuhan. 23Noba gij mar meidu ongga iwa intunggom, beda iwa ita mar insa koma rot idou ongga ocosu efei ahtah ojgomu. Jeska mar ongga iwa intunggom insa koma bera nou rusnok ojgomu guru, tina mar koma ongga iwa intunggom bera nou Tuhan Allah tein. 24Iwa ita mar erek koma jeska iwa ijginaga rot oida iwa imesma ifons ongga ongkoska eteb jeska Tuhan Yesus Kristus. Ofa bera ongga yeyin ebirfaga ongga iwa yumfij rot tenten tein. 25Tina Allah bera omofra mar okum eteb keingg rusnok ororu jeni rerin rita mar ongga oska. Jeska Ofa omoga ojga rot rusnok nomnaga ororu jeni rerin rita mar ongga oska era rerin rita mar ongga oufamofa tein si.

will be added

X\