Kolose 2

1Didif dudou os rot oida idou ebriyi gij rot teinefa didif duh dudou efesi rot ahais noba dug dijmeg gij mar nou iwa jera rusnok enjgineg tein ongga ringker gij kota Laodikia jera rusnok enjgineg tein ongga rinek didif enesi. 2Didif dita mar erek koma jeskaseda iwa nomnaga ita idou ongga ahais oisouska idou ongga omokorema fogora iwa ija erek egens ojgomu. Beda oisouska idou ongga erek egens insa koma bera idou emebriyi eteb gij rot Allah efen oga insa koma ongga ah jejema jeska rusnok sis fob. Allah oga insa koma bera osok gij Yesus Kristus ojgomu. 3Noba oisouska Ofa bera mifmin mudou ebriyi gij rot teinefa Allah efen odou ongga efesis eteb noba ongga ebriyi gij mar nomnaga. Sis fob bera rusnok rudou enebriyi gij mar insa koma jinaga guru. Tina ebeibeyaif mifmin mudou ebriyi gij fob. 4Noba didif dagot rot mar insa kef gu iwa jeskaseda enadaij nou rusnok enjgineg rurokrusa iwa rot mar ongga oska ongga rua ruftuftu gu iwa guru. 5Noba didif dineker morototuma jera iwa ebeibeyaif guru, tina gij dudou efesi bera difeneinei rot iwa ojgomuja ros. Erek koma tein, didif dudou erirei eteb jeska iwa ita idou ahais erek egens morototuma fogora iroru Yesus Kristus rot tenten ojgomuja fob. 6Erek koma jefeda, iwa ita mar ongga tenten ojgomu erek rusnok ongga rerin rudou egens jera Yesus Kristus fob. Iwa ita mar insa koma jeni erek rusnok rumftuftu gu iwa osok gij Yesus Kristus ongga erek mifmin Tuhan sis fob. 7Beda yeyin idou efesi imeja erek ahais odudu deika erek mar efej egens ongga eij ofom gij mebi efesi odudu deika fogora ahais. Koma bera erek iwa isisi joug isinsa idou efesi rot ahais ojgomuja osok gij Yesus efen oga ongga rusnok rumftuftu gu iwa sis fob. Noba erek rusnok rii mod egens ojgomuja onjoros mod koma ot rot ahais fob, beda iwa tein yuis oufamofa eteb gu Allah ojgomuja rot mar ongga Ofa ontunggom nou iwa fob. 8Beda iwa ibes ifaga jeska rusnok ongga rudou os rurokrusa iwa jeskaseda iroru mar ongga risinsa ruftuftu rot gu iwa ojgomu. Jeska mar koma ongga rua ruftuftu rot bera erek tenten guru, noba onofij iwa tein jinaga guru. Mar koma bera en jeska rusnok mebif rerin erebent ojgomu, noba koma ororu mar ongga rusnok rusujohu rot gij rudou efesi tein. Noba mar koma bera eretei rot mar ongga Yesus Kristus omftuftu sis fob. 9Didif disisi joug iwa erek insa koma jeska mar nomnaga ongga angh gu Allah bera angh gu Yesus Kristus tein gij mona ongga Ofa engker gu mebif ros. 10Noba iwa tein bera insma eiteij ah ongga efeinah noba ongga ebera rot mar ongga oufamofa oisouska idou ongga egens jera Yesus fob. Ofa bera efen ofoka ongga aksa ekirsa jeska mar nomnaga ongga efen owesa efek noba ongga ofoka ereij keingg rusnok tein. 11Erek koma tein, mar ongga rusnok mebif runtunggom erek riris rufom mareij ofos jeska bera onosuwa rua jeska rerin mar ongga oska jinaga guru. Tina oisouska idou ongga egens jera Yesus Kristus fob bera Allah onsuwa iwa jeska yeyin mar ongga oska fob. 12Jeska gij mona ongga iwa ita baptis gij mei efen beda koma erek orocunc rot oida iwa yanggos jeska yeyin mar ongga oska morototuma jera Yesus gij mona ongga Ofa anggos fob. Beda nou ongga iwa indebecki jeska mei efen insa koma fob, beda koma tein erek orocunc rot eiteij ah ongga efeinah ongga iwa insma morototuma jera Yesus Kristus gij mona ongga Ofa endebecki jeska anggos fob. Noba iwa isma eiteij ah ongga efeinah insa koma oisouska idou ongga ororu rot tenten oida Allah efen owesa efek eteb ongga adaij nou. Jeska Ofa bera ongga ofra Yesus Kristus jeska anggos fob. 13Noba sis fob bera iwa iker gij yeyin iteij ah ongga oska ros noba iwa tein inejginaga rot Allah enesi. Gij mona insa koma iwa bera erek rusnok ongga ranggos noba rah gij moksu fob. Erek koma tina, Allah onsuna rot yeyin mar ongga oska jeska idou efesi fob. Jefeda koma erek iwa isma eiteij ah ongga efeinah sons morototuma jera Yesus Kristus ongga endebecki jeska anggos fob. 14Sis fob bera iwa ingkirsa rot Allah efen oga ojgomuja. Jefeda koma erek yeyin mar ongga oska ah gu iwa ros. Noba koma bera ongga eragou joug iwa fogora inesma eiteij ah ongga efeinah enesi. Tina oisouska Yesus Kristus, ongga rusnok runtob tumu mega salib, bera Allah anggot rot oida yeyin mar ongga oska insa koma enah gu iwa deika guru. Jeska Ofa onsuna rot mar insa koma jeska idou efesi fob. 15Noba oisouska Yesus Kristus ongga anggos tumu mega salib fob bera Allah oin keingg Bilis fogora efen owesa efek enah keingg mimif deika guru. Beda oisouska mar insa koma bera Allah ocunc rot tomnomna gu rusnok mebif nomnaga rot oida Bilis efen owesa efek koma bera ensiri fob. 16Erek koma jefeda iwa idou enemeesa guru rot rusnok ongga rucunc iwa erek oska rot maat ongga iwa int ni, era mar ongga iwa ij tein ni, era jeska iwa idou enefaga ouka morototuma jera rua gij rerin mona eteb guru ni, era jeska iwa inororu rua gij mona ongga rua ruina maat keingg mesta efeinah era gij mona ongga rerin ari eteb guru ni. 17Mar insa koma nomnaga bera erek hukum rusnok mebif rerin ongga orohuhur reirei ojgomu. Yeyin hukum insa koma bera eneita eiteij ah ongga efeinah gu iwa jinaga guru. Tina hukum koma bera erek mar ongga orocunc rot mona ongga Yesus Kristus emen ojgomu. Jeska Ofa bera ongga eita eiteij ah ongga efeinah gu mimif rot tenten ojgomu. 18Erek koma tein, iwa idou enemeesa rot rusnok ongga rucunc iwa erek oska jeska iwa inougif gu malaikat-malaikat morototuma jera rua tein guru. Noba rua rucuwei mar rot oida Allah oncunc mar ongga onswos gu risinsiyai ojgomu. Noba rua ruin keingg risinsa rufoka gij mar ongga rua ragot jah gu rusnok rudou ojgomu, tina gij rudou efesi bera rua rufra risinsa rufoka erek aksa ekirsa jeska rusnok insa koma ojgomu. 19Tina rua insa koma bera rinebiedi morototuma jera Yesus Kristus ongga Kristen nomnaga efen ebirfaga guru. Noba mimif nomnaga mimebiedima rot ahais erek egens noba misma oufamofa tein oisouska Ofa efen owesa efek ojgomu. Beda mimif muroru Ofa rot ahais odudu deika jeni erek Allah ondou os rot. 20Iwa inja erek egens jera Yesus Kristus ongga anggos nou mimif fob, jefeda Ofa onsuwa iwa jeskaseda inororu erebent ensis ongga en jeska rusnok deika guru. Erek koma jefeda teinefa fogora iwa iroru erebent insa koma ojgomuja roso. 21Jeska iwa iroru erebent ensis ongga agot rot mar erek kef oida, "Iwa inagei mar kef guru ni, inet maat erek koma guru ni, inahtec mar koma guru ni!" 22Jefeda erek iwa iroru mar insa koma ojgomuja, beda koma tein onofij iwa jinaga guru. Jeska mar koma bera erek rusnok rerin erebent ojgomu. Jefeda mar koma nomnaga emeseiseifa jeska mebif ojgomu si. 23Erebent insa koma nomnaga agot mar erek kef oida, "Rusnok rugif gu malaikat ni, ribes rifaga jeska maat ongga erek mar mareij ni, rita rifera okora gu risinsa rifaga ni." Noba rusnok ongga ruftuftu rot mar insa koma bera rusujohu rot oida rerin rudou ongga ebriyi eteb gij mar koma ojgomu. Tina ongga tenten bera, mar insa koma nomnaga efen owesa efek enadaij nou oin keingg mar ongga oska ongga angh gij rusnok rudou efesi jinaga guru.

will be added

X\