Kisah Para Rasul 9

1Gij mona insa koma bera Saulus odou os eita mar ofogog skoita rua ongga ruroru Yesus Kristus ojgomu. Jefeda ofa eja skoita ebirfaga imam-imam egens 2jeskaseda erejgei ofa rot surat egens ongga eragot gu ebirfager imam-imam gij kota Damsyik oida Saulus esma owesa efek jeska imam egens koma fob. Noba ofa ek runer era rujager ongga ruroru Yesus oga gij kota Damsyik, beda ofa emagei rua noba omorka rua jah mod oskusk gij kota Yerusalem. 3Nou ongga ofa eita surat egens insa koma fob beda ofa eja jah kota Damsyik. Tina nou ongga ofa ensaga doida kota Damsyik fob, beda ainsa koma tein mar erek efesa ongga eisa eteb doska jeska mebaga esenin Saulus jah suma. 4Beda ofa esiri gu mebi, noba ofa eg oga egens ongga ois gu ofa oida, "Saulus! Teinefo fogora bua budou os bita difera okora erek komo." 5Beda Saulus ejeka gu Ofa oida, "Tuan, Bua bera idu?" Beda oga egens koma oroun oida, "Didif bera Yesus ongga bua budou os bita difera okora gu ojgomu. 6Tina ebeibeyaif bidebecki noba buira gij kota Damsyik. Jah suma bera osnok egens emagot rot meidu ongga bua bumotunggom." 7Rusnok nomnaga ongga ruroru Saulus jeska Yerusalem rudou osousouyu morototuma noba riker toumou ojgomu. Jeska rua tein rig oga egens insa koma, tina rua rinek osnok egens ai tein guru. 8Beda Saulus edebecki noba ohoda eiteij, tina ofa enek mar deika guru fob. Jefeda rua ragei Saulus etma noba ruroun ofa jah kota Damsyik. 9Gij mona rara orgomu bera ofa eker rot eiteij ofou ojgomu. Noba ofa enet maat era enej mei tein jinaga guru. 10Osnok egens ongga ororu Yesus ongga ofoka Ananias bera eker gij kota koma. Gij mona insa koma Efena Ebsi Allah ocunc mar gu Ananias gij odou efesi. Gij mar koma bera Tuhan Yesus ois gu ofa oida, "Ananias!" Beda Ananias oroun oida, "Tuhan, meidu?" 11Tuhan Yesus agot gu ofa oida, "Bua bija jah mod ongga Yudas efen ongga angh gij moroju ofoka Aharuka. Nou ongga bua binsaga jah suma fob, beda bijeka rot osnok egens ongga ofoka Saulus jeska kota Tarsus. Ofa om eiteij ros, 12noba Efena Ebsi oncunc gu ofa gij odou efesi oida ofa emek bua bimen skoita ofa. Bua bimeja skoita ofa beda baha bitma esij ofa efen eiteij beda eskeira fogora emek mar sons." 13Beda Ananias oroun oida, "Tuhan, Didif dig mar ofoukou jeska rusnok enjgineg osok gij Saulus koma fob. Ofa bera erek osnok egens ongga eita mar ofogog eteb skoita bebin rusnok gij kota Yerusalem. 14Noba orka surat egens jeska ebirfaga imam-imam ongga eita owesa efek gu ofa jeskaseda agei rusnok nomnaga ongga ruroru Bua." 15Tina Tuhan Yesus agot gu Ananias oida, "Bua bija ojgomu. Jeska Didif duncunc ofa fob erek osnok egens ongga omofij Didif fogora ofa emagot mar osok gij Didif gu rusnok enjgineg ongga erek Yahudi guru jera rerin raja-raja tein jera rusnok ongga Yahudi tein si. 16Noba Didif disinsa dumocunc gu ofa rot mar okum ongga emeita efera okora gu ofa jeska ofa ororu Didif fob." 17Erek koma jefeda Ananias eja jah mod ongga Saulus engker gij, beda ofa aha etma esij ofa. Beda ofa agot oida, "Saulus ongga birek edohuj, Tuhan Yesus, ongga orogna keingg bua gu mona ongga ecka fob. Ofa bera obk didif skoita bua jeskaseda biteij ohoda noba bik mar sons fogora bisma owesa efek jeska Efena Ebsi Allah." 18Ainsa koma tein mar ongga erek mos obohobru esiri jeska Saulus eiteij noba ofa ek mar sons. Beda ofa edebecki noba Ananias eita baptis gu ofa. 19Nou ongga ofa ent maat fob, beda efen efaga esma ofora efek sons. Saulus eker gij mona ofoukou jera rusnok ongga ruroru Yesus gij kota Damsyik. 20Ofa eja jah mod ongga rusnok Yahudi rum riteij gu Allah gij, beda ofa efesij gu rusnok oida Yesus bera Allah efen efesa. 21Rusnok insa koma nomnaga rudou oubsaha eteb rot Saulus noba rua ragot moguma oida, "Ofa kef bera ongga ofra mar okum keingg rusnok ongga ruroru Yesus gij kota Yerusalem! Noba ofa en jah sif jeskaseda agei rusnok ongga ruroru Yesus fogora orka rua skoita ebirfaga imam-imam jah Yerusalem tein." 22Tina gij orofosut mona bera Saulus esma owesa efek ekirsa gij mar ongga ofa oftuftu fogora ofa ocunc rot tenten oida Yesus bera Kristus ongga en jeskaseda eita eiteij ah ongga efeinah gu rusnok. Jefeda enadaij nou rusnok Yahudi riseda rot mar ongga ofa oftuftu erek jinaga guru. 23Gij mona ofoukou egema deika, beda rua ongga Yahudi rudou egens nou ragob Saulus. 24Tina Saulus eg rot mar insa koma fob. Gij orofosut mona jera motu tein bera rua rusku joug montoj kota koma jeskaseda ragob ofa. 25Tina gij motu juens beda Saulus efen mohujir raha ofa gij morungga eteb gij morongsu. Morongsu egens koma ah skida tembok aksa ongga angh joug kota koma. Beda rua ritki ofa gij morungga jah mebah jeska kota koma fogora ofa oku jeska. 26Saulus oksons jah kota Yerusalem, noba ofa odou os eker erek egens jera rusnok ongga ruroru Yesus jah suma tein. Tina rua rusujohu rot oida ofa onororu Yesus rot tenten enesi, jefeda rua rimeesa rot ofa. 27Tina osnok egens ongga ofoka Barnabas en skoita Saulus. Beda ofa oroun Paulus skoita Yesus efen ruforoker. Barnabas efesij gu rua rot teinefa Saulus ek Tuhan gu moroju gij mona ongga ofa enja jah Damsyik, noba rot teinefa Tuhan anggot mar gu ofa gij mona insa koma. Barnabas tein efesij gu ruforoker koma rot teinefa Saulus omftuftu rusnok rufoukou osok gij Yesus gij kota Damsyik rot odou ongga enemeesa oskiyai tein guru. 28Ofa efesij mar rot Saulus gu ruforoker erek koma, jefeda rua ruroun Saulus erek egens jera rua. Noba gij mona insa koma tein ofa efesij mar osok gij Yesus jah gu Yerusalem rot enemeesa tein guru. 29Ofa eseda Yahudi ruga rot mar nomnaga ongga rua ongga ruga omosokuma rot. Yahudi insa koma bera rujga jeska monuh Yunani. Rua rutkonu oska rot Saulus, jefeda rua rudou os ragob ofa ojgomu. 30Rusnok ongga ruroru Yesus ringg rot oida rusnok Yahudi insa koma rudou os ragob Saulus, jefeda rineya jeska rua ruroun Paulus jah kota Kaisarea fogora rua rubk ofa jah kota Tarsus. 31Erek koma jefeda rusnok ongga ruroru Yesus gij monuh Yudea ni, monuh Galilea ni, monuh Samaria ni, rua nomnaga riker rot ongkoska, jeska rusnok Yahudi ongga runororu Yesus guru bera rineita mar ongga oska skoita rua deika guru. Jefeda rusnok ongga rumororu Yesus rugun odudu dokun deika. Beda rua nomnaga risma owesa efek jeska Tuhan ojgomuja. Efena Ebsi ofij rua rot ahais fob, jefeda rua nomnaga ruroru Yesus rot tenten ojgomu. 32Petrus ecira rejrej monuh ofoukou jeskaseda ogog rusnok ongga ruroru Yesus. Noba gij mona juens ofa ojogog rusnok ongga ruroru Yesus gij kota Lida. 33Ofa ek osnok orna egens ongga ofoka Eneas gij kota koma. Osnok egens koma aki ofumbohah fogora emageima, jefeda gij tahun cinja orfomu fob bera ofa enecira jinaga guru. 34Beda Petrus agot gu Eneas oida, "Eneas! Yesus ongga erek Kristus bera eita eskeira gu bua! Bidebecki noba bug bebin meidibi." Ainsa koma tein Eneas eckicki noba ot. 35Nou ongga rusnok gij kota Lida jera kota Saron ringg rot oida Eneas ecira fob, jefeda rusnok riskemba rudou ororu Yesus tein. 36Ojaga egens ongga ofoka Tabita bera eker gij kota Yope. Ofa erek osnok egens ongga ororu Yesus rot tenten fob. (Ofa efen ofoka Dorkas gij Yunani oga). Ofa erek osnok egens ongga eita mar ongga oufamofa gu rusnok nomnaga noba ofa ofij rusnok ongga rufojingki tein. 37Gij mona insa koma bera ofa maren eteb fogora agos fob. Beda rusnok rut efen efaga ororu agama erebent fogora risah ofa gij morongsu egens ongga angh skida. 38Kota Yope ah doida kota Lida. Beda gij mona insa koma rusnok ongga ruroru Yesus gij kota Yope koma ringg rot oida Petrus ensaga jah kota Lida fob noba eker jah suma. Jefeda rua rubk gosnok gegeka skoita Petrus. Nou ongga goga gensaga jah suma beda goga gerejgei Petrus jeskaseda ofa en ebeirens jah kota Yope. 39Jefeda Petrus oitij rot. Nou ongga ofa ensaga jah suma, beda rusnok ruroun ofa jah morongsu ongga mar agos enah gij. Noba rija mesina rufoukou jah suma rut rejrej Petrus noba ribisa rot Tabita. Rua rucunc meisoufa ongga Tabita eb nou rua sis fob gu ofa. 40Beda Petrus obk rua nomnaga jeska morongsu egens koma. Beda ofa es okeibi gu mebi noba om eiteij gu Allah. Nou ongga ofa om eiteij oisa fob, beda ofa oh odou gu mar agos koma noba agot oida, "Tabita, bidebecki!" Beda Tabita ohoda eiteij noba ek Petrus, beda ofa edebecki. 41Beda Petrus agei efen etma noba oroun ofa jeskaseda ot. Beda ofa ois gu rua ongga ruroru Yesus jah suma jera rija mesina insa koma tein, beda ofa aha Tabita ongga emfena ebah sons gu rua. 42Rusnok rifesij moguma rot mar insa koma rejrej monuh Yope, jefeda rusnok rufoukou ruroru Yesus gij monuh insa koma tein. 43Petrus eker jah suma erek mona ofoukou deika jera osnok egens ongga ofoka Simeon. Simeon koma erek osnok egens ongga ontunggom mar jeska sapi ofos.

will be added

X\