Kisah Para Rasul 6

1Rusnok ongga ruroru Yesus rugun odudu dokun deika. Noba gij mona insa koma bera rusnok Yahudi ongga ruroru Yesus fob gij kota Yerusalem riker morototuma jera rusnok Yahudi ongga rujga jeska monuh Yunani. Rua insa koma jeska monuh Yunani ruroru Yesus fob tein. Beda rua ongga monuh Yunani rudou okum skoita Yahudi insa koma ongga kota Yerusalem efen. Jefeda rua ruga erahah gu Yesus efen ruforoker oida, "Yahudi ongga Yerusalem rinekeba maat rot iskusk gu memef ongga Yunani mefmen rija mesina guri!" 2Erek koma jefeda ruforoker rufok setka kungkob erfeka ruhoturu rusnok nomnaga ongga ruroru Yesus fob noba ragot gu rua oida, "Erek memef mekeba maat gu rusnok ojgomuja, beda mefmen efekesa enah nou moftuftu Allah oga gu rusnok guru? 3Jefeda ongga oufa bera, iwa icunc yeyin ihujir jeska ifekesa erek rufok cinja erfeka ongga rudou efesis, noba ongga Efena Ebsi Allah engker gij rudou efesi fob. Beda memef mocunc rua erek rusnok ongga rumfij memef fogora rimekeba maat koma gu yeyin rija mesina tein. 4Beda memef ongga rufok setka kungkob erfeka mom meiteij gu Allah noba moftuftu rot Allah oga gu rusnok ojgomu." 5Rusnok insa koma nomnaga ruitij morototuma rot mar ongga ruforoker ranggot gu rua fob. Jefeda rua rucunc Stefanus erek osnok egens ongga omfij ruforoker. Ofa bera osnok egens ongga ororu Yesus rot tenten, noba Efena Ebsi Allah eita owesa efek gu ofa fob. Noba rua rucunc Filipus ni, Prokhorus ni, Nikanor ni, Timon ni, Parmenas ni, Nikolas ongga jeska Antiokhia ni. Nikolas koma erek rusnok Yahudi guru, tina ofa oira gij agama Yahudi fob. 6Beda rua ruroun rusnok rufok cinja erfeka insa koma skoita Yesus efen ruforoker, beda ruforoker koma raha ritma esij rua noba rum riteij gu Allah jeskaseda Ofa eita owesa efek gu rua. 7Erek koma jefeda rusnok rufoukou ringg rot Allah oga ongga oufamofa rejrej monuh insa koma. Noba rusnok rufoukou gij kota Yerusalem tein ruira odudu jera rua ongga ruroru Yesus fob. Noba rusnok Yahudi rerin imam-imam ofoukou tein ruroru Yesus gij mona insa koma. 8Stefanus bera erek osnok egens ongga eita mar ongga oufamofa oisouska owesa efek eteb jeska Allah. Jefeda ofa otunggom mar onswos ofoukou ongga ereita rusnok rudou oubsaha eteb rot. 9Tina rusnok Yahudi rineya bera rita rudou oska rot ofa. Rusnok insa koma bera erek rua ongga rum riteij gu Allah gij mod ongga rumois ofoka Libertini. Rua bera erek rusnok Yahudi ongga ojga monuh Kirene jera Aleksandria. Rua jera rusnok Yahudi jeska monuh Kilikia jera monuh Asia ruga rimesedema jera Stefanus. 10Tina rua nomnaga risiri gu Stefanus ojgomu, jeska Efena Ebsi Allah ofij ofa fogora eita odou efesis rot mar ongga ofa agot gu rua. 11Jefeda rua rusos rusnok rineya jeskaseda rua rucuwei mar rot Stefanus gu ebirfager oida, "Memef meg Stefanus oga oruh Musa jera Allah ofoka fobo!" 12Beda rua rifesij mar rourou erek insa koma gu rusnok enjgineg jera ebirfager Yahudi jera Guru-Guru agama tein. Jefeda rua nomnaga rutkonu oska eteb rot Stefanus noba rua rijagei ofa. Beda rua ruroun ofa skoita ebirfager imam-imam ongga rufoka aksa eteb. 13Noba rua tein ruhoturu rusnok enjgineg jeskaseda rucuwei mar ofoukou rot Stefanus gu ebirfager insa koma. Rua ragot oida, "Osnok egens kef oga oruh rot Mod Allah ongga ebsi komowa eteb, noba ofa oga oruh Allah oga ongga Ofa eita gu Musa rot mimif sis fob tein. 14Jeska memef meg ofa agot oida Yesus, ongga ojga kota Nazaret, bera omohoda Mod Allah kef nomnaga, noba omosuna mifmin agama erebent ongga mimif minsma jeska Musa!" 15Nou ongga ebirfager insa koma ringg rot mar insa koma nomnaga, beda rua ruhobut Stefanus rot rudou okumkum eteb. Tina rua rik oida Stefanus efen osum efesa egigir eteb erek malaikat efen osum ongga efesa egigir tein ojgomu.

will be added

X\