Kisah Para Rasul 3

1Gij mona juens erek moworu fob bera rusnok rum riteij gu Allah. Jefeda Petrus jera Yohanes geja jah Mod Allah jeskaseda gom geiteij tein. 2Orofosut mona beda rusnok rineya raha osnok egens ongga aki oskukwok gu montoj ongga rusnok Yahudi rijeka ofoka Montoj Ongkoska. Sis mona ongga ofa onjuj jeska efen mosu onjoros ofa orna fob bera ofa aki ah erek koma ojgomu. Ofa ah gu montoj egens insa koma jeskaseda erejgei rusnok ongga rumoira jah suma nou fifi. 3Nou ongga ofa ek Petrus jera Yohanes gomoira, beda ofa erejgei goga nou fifi egema. 4Beda goga gohobut ofa, noba Petrus agot gu ofa oida, "Biajga magef ojgomu!" 5Jefeda osnok egens ongga aki oskukwok insa koma ohobut goga rot odou eteb jeska ofa osujohu rot oida goga gemeita fifi egema gu ofa si. 6Tina Petrus agot gu ofa oida, "Didif dedin fifi egema guru, tina mar ongga magef mafman bera mameita gu bua si. Jefeda didif dagot oida, oisouska owesa efek jeska Yesus Kristus ongga jeska kota Nazaret bera bua bidebecki noba bicira!" 7Beda Petrus agei osnok egens insa koma etma ognosk fogora oroun ofa jeskaseda edebecki. Beda ainsa koma tein osnok egens koma esma aki ofora efek, 8beda ofa edebecki ebeirens noba ecira. Beda ofa oira gij Mod Allah morototuma jera Petrus jera Yohanes. Ofa ecira rot odou efaga oka eteb noba ofa esitit mar gu Allah ojgomuja. 9Rusnok nomnaga jah suma rik ofa ecira erek koma jefeda rua tein risitit mar gu Allah. 10Rua rijginaga rot oida sis fob osnok egens koma bera aki oskukwok fob. Noba ofa bera ongga engker joug montoj ongga ofoka Montoj Ongkoska ojgomuja jeskaseda erejgei rusnok nou fifi. Rua rufos graga eteb noba rudou oubsaha rot mar ongga rua ringk tumu ofa insa koma fob. 11Osnok egens insa koma ongga esma eskeira fob bera ororu Petrus jera Yohanes ojgomuja. Nou ongga rua rinsaga gij momas ongga angh rejrej Mod Allah ongga rusnok Yahudi rijeka Momas Salomo, beda rusnok riskembemba rin skoita rua jeska rudou oubsaha eteb rot mar onswos ongga rinek insa koma. 12Nou ongga Petrus ek rusnok riskembemba insa koma, beda ofa agot gu rua oida, "Ei, iwa isnok ongga Israel! Teinefa fogora iwa idou oubsaha rot mar kefo? Iwa yuhobut memef rot meidu. Erek iwa isujohu rot oida osnok egens kef ecira jeska ofa esma owesa efek jeska magef ei? Era iwa isujohu rot oida mar insa koma en oisouska magef rot madou ongga ebsi komowa ei? Erek koma guru! 13Jeska Allah ongga Abraham ni, Ishak ni, jera Yakub ni rugif gu, Allah ongga mifmin mimowa rugif gu sis fob, Ofa bera ongga eita ofoka ongga aksa eteb gu Yesus fob. Tina Yesus insa koma bera ongga iwa yangha gu rusnok ongga rufogog jeskaseda ragob Ofa. Noba gij mona insa koma bera iwa tein yukoja rot Gubernur Pilatus oga gij mona ongga ofa odou os osuwa Yesus ojgomu. 14Yesus bera ongga odou eriaga noba odou ebsi komowa, tina iwa yukoja Ofa ojgomu. Noba iwa yuis rot yuga eteb gu Pilatus jeskaseda ofa aha osnok egens ongga odou ofogog gu iwa ojgomu. 15Iwa yagob Ofa ongga eita eiteij ah ongga efeinah gu rusnok, tina Allah eita efena ebah sons gu Ofa. Memef mek mar insa koma nomnaga gu meiteij rot tenten fob. 16Noba osnok egens kef esma aki ongga eskeira oisouska odou ongga ororu Yesus Kristus fob. Jefeda mar insa kef ongga iwa ik gu isinsa iteij bera en oisouska modou ongga ororu Yesus rot tenten, fogora osnok egens koma eita eskeira fob. 17Iwa ongga rusnok Israel bera ongga yanggob Yesus sis fob. Tina ebeibeyaif didif dijginaga rot oida iwa jera yeyin ebirfager idou enebriyi gij mar ongga iwa intunggom gij mona insa koma guru. 18Tina mar insa koma nomnaga bera ah gij efera fob jeni mar ongga Allah anggot oisouska efen nabi-nabi sis fob. Jeska nabi-nabi koma ragot oida, 'Kristus ongga Allah omobk erek raja egens jeskaseda eita eiteij ah ongga efeinah gu rusnok bera emeita efera okora sismeni fog.' 19- 20Erek koma jefeda iwa imeesa joug yeyin mar ongga oska ojgomuja. Noba yuh idou efesi rot ongkas skoita Allah jeskaseda Ofa omosuna rot yeyin mar ongga oska jeska idou efesi. Beda Ofa emeita eskeira gu iwa si, noba Ofa omobk Yesus Kristus skoita iwa. Jeska Ofa bera ongga Allah oncunc sis fob jeskaseda eita eiteij ah ongga efeinah gu rusnok. 21Yesus koma bera eker gu mebaga ojgomuja onjoros mona ongga Allah ensejah nou otunggom mar nomnaga erek efeinah deika fog. Koma ororu jeni mar ongga Allah anggot oisouska efen nabi-nabi sis fob. 22Musa bera erek nabi egens ongga efesij mar osok gij Yesus sis fob. Ofa agot oida, 'Iwa ongga Israel yeyin Allah omocunc nabi egens jeska iwa ifekesa morototuma erek Ofa oncunc didif sis fob. Beda iwa ig mar nomnaga ongga nabi egens koma anggot gu iwa. 23Idu ongga onoroun mar ongga nabi egens insa koma anggot rot tenten guru, beda ofa omorogna jeska efen rusnok Yahudi. Noba ofa ejagos ojgomu.' 24Nabi-nabi ranggot mar insa koma jeska Allah gij mona ongga sis fob. Sismeni fob bera nabi Samuel agot rot mar insa koma, noba nabi-nabi enjgineg tein ongga runtoij ofa rimfesij rot mar insa koma osok gij Yesus Kristus fob. Rua nomnaga rimfesij rot mar ongga encira gij mona ebeibeyaif fob. 25Noba mar nomnaga ongga Allah anggen rot gu efen rusnok Israel oisouska efen nabi-nabi sis fob bera mimif ongga deisef rimesma si. Jeska Allah anggen gu mifmin mimowa Abraham sis fob oida, 'Oisouska bebin efesa egens bera rusnok nomnaga rimesma oufamofa eteb.' 26Erek koma jefeda Allah onocunc Yesus noba obk Ofa skoita mimif rot sismeni jeskaseda Ofa eita oufamofa eteb gu mimif. Ofa oncunc efen oufamofa eteb gu mimif fogora mimif mimeesa joug mifmin mar ongga oska."

will be added

X\