Kisah Para Rasul 27

1Gij mona ongga rua ranggot rot oida memef meifef meg meifeni egens jah monuh Italia, beda rua raha Paulus jera rusnok rineya ongga runt gij mod oskusk insa gu Yulius. Ofa erek ebirfaga tentarer egens ongga ojga jeska Roma. Ofa tein oira gij ebic tentarer egens ongga rijeka rufoka oida, Resimen Kaisar. 2Memef meifef meg meifeni egens ongga en jeska kota Adramitium. Meg meifeni egens insa koma nou ongga enja jah mei ofoksu egens ongga angh gij monuh Asia. Gij mona insa koma tein osnok egens ongga ofoka Aristarkus, ongga ojga jeska kota Tesalonika gij monuh Makedonia, eifef meg meifeni egens insa koma jera morototuma jera memef. 3Erek monog beda memef menjesaga gu kota Sidon. Beda Yulius ocunc odou ongga oufamofa skoita Paulus fogora ofa oitij oida Paulus ojogog efen mohujir ongga ringker gij kota insa koma jeskaseda rua rufij Paulus rot mar ongga ofa ocosu rot. 4Nou ongga memef meja deika, beda memef meifef meg meifeni egens insa koma ojgomuja. Tina mof efeni erek oska noba ereteitei meg insa koma jah osum rot ahais. Jefeda memef maharira gu mei mojumu efei efembra doida motowohu Siprus, jeska mof eneretei tumu mefmen meg jah suma guru. 5Beda memef meris mei mojumu efei jah mei ogwug. Beda memef mek mei mojumu efei efrembra gij monuh Kilikia jera Pamfilia. Memef motoiru erek koma ojgomuja onjoros mensaga gij kota Mira ongga angh gij monuh Likia. 6Beda ebirfaga tentarer egens ongga omorka memef gij meg meifeni insa koma ek meg meifeni egens ongga en jeska kota Aleksandria ongga angh gij monuh Italia. Jefeda ofa obk memef jeskaseda meifef meg meifeni egens koma. 7Beda memef mecira gij meg egens koma erek mona ofoukou fob, tina meg egens koma enecira rot iskusk guru. Memef meja decideci erek koma onjoros mifemebi estir ojgomu fob. Beda memef mensaga gij kota Knidus. Tina jeska mof ecira erek oska ojgomuja, noba memef menecira aharuka erek monsujohu rot sismeni guru. Jefeda memef meifef meg meifeni jah motowohu Kreta jah degini ojgomu. Beda memef maharira osumfon Salmone jeskaseda mof oska koma eneretei rot meg meifeni koma deika guru. 8Memef mejaharira decideci jah mei mojumu efei efembra gu motowohu insa koma ojgomuja onjoros monjowa jah ofoksu egens ongga ofoka Ofoksu Ongkoska. Ofoksu egens koma ah doida kota Lasea. 9Memef mecira decideci erek koma nou mona ofoukou fob. Jefeda memef mensaga gij monuh insa koma nou mona ongga mei mojumu ofog eteb eckicki fob. Erek koma jefeda Paulus eisisi gu rua ongga ranggei meg koma oida, 10"Edohujia! Didif dusujohu oida, erek mimif micira deika, bera mimif mimagos si. Jeska mona ongga mof eteb ensaga fob. Beda mof koma emedi mimif rot ahais ojgomuja. Beda meg ni, mar ongga murka gij meg meifeni kef ni emeseiseifa si. Noba mimif nomnaga tein mijeseiseifa." 11Tina ebirfaga tentarer egens koma ongga oroun memef jah kota Roma onororu mar ongga Paulus eisisi joug rua rot guru. Tina ofa ororu osnok egens ongga agei meg meifeni egens insa koma efen oga ojgomu. 12Gij mona ongga mei mojumu enckicki bera ofoksu ongga memef mengker gij insa koma ejerek oska eteb rot meg meifeni nomnaga. Jefeda rusnok rufoukou ongga rifef meg egens insa koma rudou os rija ebeirens jeska ofoksu insa koma noba rifef meg meifeni egens koma onjoros rinsaga gu kota Feniks. Beda memef meker jah suma onjoros mona ongga mei mojumu ofog endeider sons. Kota Feniks koma erek kota egens ongga oufamofa rot meg meifeni nomnaga ongga omoira gij mona ongga mei mojumu ofog eteb tein, jeska efen ofoksu ongga ah jah motowohu Kreta enama. Jah suma mei mojumu onofog eteb guru. 13Gij mona insa koma mof eriaga ongga en jeska agosu ojgomu. Jefeda rua ongga ranggei meg meifeni egens insa koma rusujohu oida mona ongkoska nou menja deika. Jefeda rua ruku kamantu noba memef mejaharira gu mei mojumu efei efembra doida motowohu Kreta. 14Erek dektek guru, beda mof eteb ongga rumois ofoka Mof Mog en noba edi mefmen meg rot ahais. 15Mof jera mos eteb en jeska meg osum noba ereteitei tumu meifeni, jefeda enadaij nou memef motoiru gij guru. Jefeda memef moug meifina fogora mof orkorka meg meifeni insa koma rot memef ojgomu. 16Nou ongga memef mekirsa jeska motowohu ofokai egens ongga ofoka Kauda, beda mof esiri oskiyai fob. Jefeda rua ongga ranggei meg egens koma ruku meg ofokai egens ongga rinrakid gu meg eteb egens koma jeskaseda orka gij meg eteb efesi ojgomu. Beda rua rireni rot ahais, tina okum eteb nou rua. 17Beda nou ongga rua rumfra meg ofokai egens koma gij meg eteb efesi fob, beda rua rira marfeb rirakid meg eteb egens insa koma ofogu jeskaseda meg koma ecira rot ahais deika. Beda rua rimeesa rot oida mefmen meg egens koma omot gij mebsta rot rua fogora meg koma omohoda rot rua gu motowohu Sirtis. Jefeda rua rug meifeni noba rin kamantu fogora rusorora gij mei oskiyai fogora mof orkorka meg meifeni egens koma rot memef ojgomuja. 18Mof eteb jera mei mojumu ofog ongga eteb edi meg insa koma rot ahais ojgomuja. Jefeda gij mona ongga efeinah deika beda rua rij mareibra nomnaga ongga angh gij meg meifeni egens koma gij mei mojumu efei jeskaseda meg ecira erek osufou ojgomu. 19Mof edi meg egens koma doska ojgomuja nou mona juens deika. Jefeda rua rij mar ongga meg meifeni egens koma efen nomnaga gij mei mojumu efei tein. 20Mof jera mos eteb edi memef ojgomuja nou mona ofoukou deika, noba memef menek mowa eiteij jera motur tein jinaga guru. Beda memef mosujohu oida memef memagos rot si. 21Rusnok gij meg egens koma rinet maat gij mona ofoukou fob guru. Jefeda Paulus ot gu rifekesa noba agot gu rua oida, "Erek iwa iroru mar ongga disisi joug gu iwa gij mona ongga mimif mingker ofoksu Lasea ros, beda mimif minek mar okum eteb erek kef guru. 22Tina ebeibeyaif tein didif duis gu iwa jeskaseda iwa yutin idou ahais, jeska osnok egens ai tein jeska iwa enagos guru. Meg meifeni egens kef bera emeseiseifa ojgomu. 23Jeska gij motu insa malaikat egens jeska Allah, ongga didif dugif gu, bera en skoita didif. 24Noba malaikat egens koma agot gu didif oida, 'Paulus, bua binemeesa guru. Jeska bua bimeja skoita raja Kaisar jeskaseda ofa oga ojga rot bua si. Noba jeska Allah odou okora rot bua, jefeda rua ongga ringker gij meg meifeni efesi kef nomnaga tein rineseiseifa guru.' " 25Beda Paulus agot deika oida, "Erek koma jefeda iwa nomnaga yutin idou ahais, jeska didif dudou ororu Allah rot tenten oida mar nomnaga ongga malaikat egens koma anggot rot gu didif bera emecira rot jeni erek koma si. 26Tina meg meifeni kef omojot gij moruj gu motowohu egens ojgomu." 27Erek motu setka kungkob tohkuru fob, beda mof orkorka meg meifeni rot memef gij mei mojumu efei ogug ojgomuja. Beda gij motu deis rua ongga ranggei meg meifeni egens koma rufos ejginaga oida meg meifeni koma ensaga doida mog efembra fob. 28Jefeda rua rira marfeb rirakid mamu beda rin fogora rusorora jah mei osku jeskaseda rireni mei mojumu osku erek egaho. Beda rua rik, tina mei mojumu osku koma erek meter setka tohkuru. Erek dektek deika guru, beda rua rireni deika. Beda rua rik, tina mei mojumu osku koma erek meter setka orgomu. 29Jefeda rua rimeesa oida meg meifeni egens koma omot tumu moruj beda emebriyi. Jefeda rua rij kamantu tohkuru jah meg osku. Noba rua rudou osos rot oida mowa orogna ebeirens ojgomu. 30Tina rua ongga ranggei meg egens koma rimeesa noba rudou os ruku jeska ojgomu. Jefeda rua ragot oida rua rimeij kamantu egens koma, tina ongga tenten bera rua ritki meg ofoukai koma gij mei mojumu efei jeskaseda rua risinsa ruku gij meg ofokai egens koma ojgomu. 31Beda Paulus agot gu ebirfaga tentarer egens jera efen ruforoker oida, "Erek rua ongga ranggei meg meifeni kef rineker gij meg kef deika guru, bera iwa nomnaga imeseiseifa si." 32Jefeda tentarer insa koma riris marfeb jeska meg ofokai koma fogora esiri gij mei. 33Erek motkobah ros, beda Paulus eisisi joug rua jeskaseda rua nomnaga rit maat oskiyai. Ofa agot gu rua oida, "Erek mona setka kungkob tohkuru fob bera idou emeesa noba erek iwa tein inet maat oskiyai tein guru, jefeda ifora eriaga fob. 34Ongga oufa bera iwa it maat ojgomai fog jeskaseda yuk ifora efek gij. Jeska iwa nomnaga ineseiseifa guru. Noba mar egema tein enecirej iwa tein guru." 35Paulus agot mar erek koma, beda ofa eita roti ofog egens noba ois oufamofa gu Tuhan rot gu rifekesa, beda ofa et. 36Nou ongga rua rik Paulus et maat erek koma, beda rua tein rudou eskeira gij fogora rua tein rit maat. 37Rusnok ongga ringker gij meg meifeni egens koma nomnaga erek rufok wuntin egeka noba setka cinja erfeka noba cinja erfens. 38Nou ongga rua rint maat erek adaij fob, beda rua rij gandum nomnaga jeska meg meifeni koma deika jeskaseda meg eja erek osufou. 39Erek mona fob, beda rua ongga ranggei meg meifeni egens koma rik mebsta gu ofoksu, tina rua rinejginaga oida motowohu kenefa bera koma guru. Beda rua rik ofoksu egens ongga angh jah suma. Jefeda rua rudou os rurka meg meifeni koma jah ofoksu insa koma. 40Beda rua riris marfeb jeska kamantu nomnaga jeskaseda ojuj gij mei. Beda rua tein riris marfeb ongga agei kemudi jeskaseda rurocunc meg egens koma jah ofoksu koma. Beda rua rif meifeti jeskaseda mof okruc meg meifeni egens koma jah mog. 41Tina ainsa koma tein meg meifeni koma oira gij mei mojumu efei ongga omoira, jefeda meg meifeni koma ojot gij mebsta. Beda meg osum eretka mebsta koma noba erek eneineina tein guru. Noba mei mojumu ofog eteb obu meg osku rot ahais, jefeda ejebriyi nomnaga. 42Tentarer rudou os ragob rusnok ongga rua ruroun jeska mod oskusk gij meg egens koma, jeska rua rimeesa oida rusnok insa koma rumoku ojgomu. 43Tina rerin ebirfaga tentarer egens eyahehir joug rua rot ojgomu, jeska ofa odou os ot joug Paulus. Jefeda ofa obk rua ongga rijginaga rot rira mei jeskaseda rua rusoka gij mei noba rira mei jah mog. 44Noba rua ongga rinejginaga rot rira mei guru bera rira meg efebr ongga embriyi noba rumorostoij rua jah mog. Memef motunggom erek koma jefeda memef nomnaga mesaga gu mog noba menagos guru.

will be added

X\