Kisah Para Rasul 26

1Erek koma beda raja Agripa agot gu Paulus oida, "Bua bagot mar rot bisinsa ojgomu." Beda Paulus ofra etma erek orocunc oida ofa emagot mar. Beda ofa agot erek kef oida, 2"Raja Agripa ongga ofoka eskeiramera eteb! Deisef bera erek mona ongga ongkoska eteb nou didif. Jeska deisef tein bera didif dagot rot disinsa osok gij mar ongga oska ongga rusnok Yahudi runcunc rot didif jah bua budou. 3Noba ongga erek oufa eteb ekirsa bera bua tein erek rusnok Yahudi, jefeda bua bijginaga rot mar ongga mifmin mimower rinrebent fob. Noba bua budou ebriyi gij mar ongga mimif muga omosokuma rot tein. Erek koma jefeda didif direjgei bua ongga bufoka aksa jeskaseda buin keingg budou efesi ai juens fog, noba bagosuit rot mar ongga dagot insa kef. 4Gij mona ongga didif duforoka ros noba dingker gij dedin monuh onojoros mona ebeibeyaif gij kota Yerusalem ros, bera rusnok ongga Yahudi rufoukou rijginaga rot didif fob. 5Rua rijginaga rot didif erek tahun ofoukou fob. Noba adaij nou rua rifesij rot oida sis fob bera didif dita mar erek Yahudi ongga ebic Farisi. Rusnok Yahudi ongga ebic Farisi bera ruroru mar ongga mifmin agama anggot rot erek ahais. Noba didif tein duroru mar insa koma rot ahais ojgomuja sis fob. 6Noba ebeibeyaif didif dut jah sif fogora iwa ijeka joug didif jeska didif duroru mar ongga Allah anggen rot gu mifmin mimower sis eteb fob. Mar koma bera osok gij rusnok ongga ranggos tina rimedebecki jeska ragos si. 7Noba mifmin Yahudi ebic setka kungkob erfeka tein rug moroju nou mar koma ongga Allah anggen rot sis fob. Noba rua rum riteij gu Allah orofosut mona jera motu rot tein. Noba didif tein duroru mar insa koma, jefeda rua ongga Yahudi rudou os rufra mar okum keingg didif. 8Jefeda enadaij nou iwa ita idou ongga oubsaha jeska Allah efen owesa efek ongga adaij nou ofra rusnok jeska ranggos guru. 9Sis fob bera didif tein dusujohu rot oida dutunggom mar oska ojgomu skoita rusnok ongga ruroru Yesus, ongga ojga jeska kota Nazaret. 10Noba ongga tenten bera didif dutunggom erek koma skoita rua gij kota Yerusalem fob. Didif disma surat egens jeska ebirfager imam-imam ongga eita owesa efek gu didif jeskaseda dijagei rua ongga ruroru Yesus jah mod oskusk. Noba didif tein duitij rot oida rua ragos ojgomu. 11Didif duhca rua gij mod ongga memef mom meiteij gij, noba didif diradgodu rua jeskaseda rua ruga oruh Yesus ojgomu. Noba jeska didif dudou os eteb jeskaseda dufra mar okum keingg rua, jefeda didif dijba rua jah monuh enjgineg tein." 12Beda Paulus agot deika oida, "Erek koma beda didif durka surat egens ongga eita owesa efek gu didif jeska ebirfager imam-imam gij kota Yerusalem jah kota Damsyik jeskaseda dijagei rua ongga ruroru Yesus jah suma tein. 13Gij mona ongga didif dinja jah kota Damsyik, noba dicira gu moroju osowu ros, noba erek mowa ot deis ros, beda didif dik efesa ongga eisa eteb jeska mebaga. Noba efesa koma esenin didif jera rusnok ongga ruroru didif rot ahais. 14Beda ainsa koma tein memef nomnaga mesiri gu mebi. Beda didif dig oga egens ongga agot rot oida, 'Sauluso! Teinefo fogora bua budou os bita efera okora gu Didifo?' 15Beda didif dagot oida, 'Akeina, bua bera idu?' Beda oga egens koma oroun oida, 'Didif bera Yesus ongga bua budou os bita efera okora gu ojgomu. 16Bua bidebecki ojgomu. Didif ducunc disinsa gu bua jeskaseda dufra bua erek dedin osnok egens ongga omofij didif. Noba bua bimejerek osnok egens ongga emefesij gu rusnok rot mar ongga bua bingk jeska Didif deisef si. Noba bua tein bimagot rot mar ongga Didif dumocunc gu bua gij mona kahma tein si. 17Didif dumosuwa bua jeska rusnok ongga Yahudi jera rusnok ongga erek Yahudi guru rerin owesa efek. Noba didif dumobk bua 18skoita rusnok ongga erek Yahudi guru. Jeska rua bera erek rusnok ongga riker gij motkobah ros. Noba rua rirek rusnok ongga riteij ofou tein, jeska rua rinejginaga rot dedin duga jinaga enesi. Beda rua tein rumoira gij eisa fogora Bilis onot keingg rua deika guru. Beda rua tein rimen skoita Allah beda Ofa omosuna rot rerin mar ongga oska jeska rudou efesi. Beda rua tein rumoira jera Allah efen rusnok ongga rerin rudou ongga ebsi komowa oisouska rudou ongga ororu didif si.' " 19Beda Paulus agot deika oida, "Raja Agripa ongga ofoka aksa. Didif duroru mar insa koma nomnaga ongga Tuhan Yesus anggot gu didif rot tenten ojgomu. 20Jefeda didif dijefesij rot mar insa koma gu rusnok rufoukou jeskaseda rua tein rimeesa joug rerin mar ongga oska, noba ruh rudou efesi skoita Allah. Beda rua tein rimeita mar ongga oufamofa ongga erek orocunc oida rua rimeesa joug rerin mar ongga oska fob. Didif difesij mar erek koma sismeni gij kota Damsyik beda gij kota Yerusalem onjoros dimfesij rot mar insa koma rejrej monuh Yudea nomnaga tein fob. Noba didif difesij rot mar insa koma nomnaga tein gu rusnok ongga erek Yahudi guru tein. 21Jefeda rusnok ongga Yahudi ragei didif gij Mod Allah noba rua rudou os ragob didif. 22Tina Allah ont joug didif rot ahais jefeda didif dut jah sif noba difesij mar gu iwa ongga ifoka aksa jera iwa ongga inofoka aksa tein guru. Noba mar ongga didif dinefesij kef bera enerek toga jeska mar ongga nabi-nabi jera mar ongga Musa rimfesij rot sis fob guru. 23Rua ragot mar osok gij Kristus egens koma ongga Allah anggot eimofoj rot nou emen jeskaseda eita eiteij ah ongga efeinah gu rusnok. Rua tein ragot rot teinefa Ofa emeita efera okora sismeni fog fogora Ofa erek osumbohka rot rusnok nomnaga ongga rimedebecki jeska ranggos. Noba Ofa omorka Allah oga ongga oufamofa ongga erek eisa skoita rusnok ongga Yahudi jera rusnok ongga erek Yahudi guru ongga riker gij motkobah ros." 24Askesi Paulus enagot rot mar insa koma ros, beda Festus ois rot oga eteb gu ofa oida, "Paulusa! Merei ok bua fob ei! Jeska bua bufokor aksa eteb fob, jefeda mar koma orotunggom budou erebibei rot ojgomu!" 25Beda Paulus oroun oida, "Gubernur Festus, merei onok didif guru. Mar ongga didif dinagot insa kef bera erek tentenmen ojgomu. Noba adaij nou rusnok ruroru mar insa koma ojgomu. 26Raja Agripa esinsa ejginaga rot mar insa koma nomnaga fob tein. Jeska mar insa koma ongga encirej Yesus bera rusnok nomnaga gij monuhif rijginaga rot fob. Jefeda didif dinemeesa nou difesij osok gij mar insa koma nomnaga gu ofa guru. 27Raja Agripa ongga bufoka eteb! Erek bua tein budou ororu mar ongga nabi-nabi rimfesij insa koma fob ei? Didif dusujohu oida bua tein buroru mar insa koma fob." 28Beda raja Agripa agot gu Paulus oida, "Paulusa! Enadaij nou bua busujohu rot oida gij mona ongga estir kef bera bua bumoftuftu didif fogora dimejerek rua ongga Kristen tein guru." 29Beda Paulus agot oida, "Didif dum diteij gu Allah jeskaseda gij mona estir era gij mona eteb beda bua jera iwa nomnaga tein ongga ingg mar jeska didif gij mona deisef bera imejerek Kristen morototuma erek didif ojgomu. Tina didif dunodou os rot oida rusnok rakid yeyin itma morototuma erek rakid didif ditma guru." 30Erek koma beda raja Agripa ot jeskaseda eja. Beda Gubernur Feliks ni, Bernike ni jera rusnok enjgineg jah suma tein rut morototuma jera raja jeskaseda rija. 31Nou ongga rua rinja jah mebah, beda rua ragot mar moguma oida, "Paulus kef bera onotunggom mar ongga oska egema tein guru. Enadaij nou rua ongga Yahudi ruga ojga rot oida ofa eker gij mod oskusk era agos rot ojgomu jinaga guru." 32Jefeda raja Agripa agot gu Gubernur Festus oida, "Erek ofa onois nou raja Kaisar guru, beda adaij nou bua busuwa ofa ojgomu."

will be added

X\