Kisah Para Rasul 23

1Beda Paulus ohobut ebirfager agama Yahudi koma nomnaga noba agot gu rua oida, "Akeineri, Didif duntunggom mar nomnaga ongga Allah ombk didif rot. Noba didif dijginaga gij dudou efesi rot oida didif duntunggom mar insa koma rot tenten fob ojgomu." 2Nou ongga Paulus anggot mar insa koma, beda Ananias, ongga erek imam egens ongga ofoka aksa eteb, obk osnok egens ongga ont desi Paulus jeskaseda eseda Paulus osum. 3Nou ongga ofa eseda Paulus osum fob, beda Paulus ois gu imam egens insa koma oida, "Allah emeseda bua tein si! Bua bisitit bisinsa bifaga oida bua bera buroru hukum Musa rot tenten. Noba buga ojga rot didif oisouska hukum koma tein. Tina bua buhurmei mar ojgomu, jeska bua bubk osnok egens jeskaseda eseda dusum. Noba hukum Musa bera eyahehir joug rot mar koma ojgomu. Jefeda bua bingkirsa rot hukum insa koma!" 4Rua ongga runt jah Paulus oknama ritaha ofa noba ragot oida, "Ei! Enadaij nou bua buga oska skoita ebirfaga imam Allah ongga ofoka aksa kef jinaga gura!" 5Beda Paulus agot oida, "Edohujia, tenten ei? Jeska didif dinejginaga rot oida ofa bera imam ongga ofoka aksa guru! Jefeda koma tenten, jeska runggu gij Mar Efeyi Ebsi oida, 'Inagot mar ongga oska skoita yeyin ebirfager guru.' " 6Beda Paulus ek, tina ebirfager agama Yahudi insa koma rineya ongga jeska ebic Saduki noba rineya ongga jeska ebic Farisi. Jefeda ofa agot gu rua oida, "Didif bera jeska ebic Farisi. Noba didif tein dunjuj jeska rusnok ongga ebic Farisi. Iwa iroun didif jah sif jeskaseda yuga ojga rot didif jeska didif dusujohu oida rusnok ongga ranggos bera rimedebecki jeska ranggos si." 7Nou ongga Paulus anggot mar insa koma, beda rua ongga ebic Farisi rimekeinggma noba rua ongga ebic Saduki rimekeinggma beda rua ruga omosokuma rot mar ongga Paulus anggot insa koma. 8(Jeska rua ongga Saduki rusujohu oida rusnok ongga ranggos fob bera rinedebecki sons guru. Noba rua tein rusujohu oida malaikat ni, rifena ni, eneker guru. Tina rua ongga ebic Farisi rusujohu oida rusnok ongga ranggos bera rimedebecki jeska ranggos si. Rua tein rusujohu oida malaikat jera rifena tein bera enekerma. 9Jefeda rua nomnaga ruga omosokuma eteb rot mar insa koma. Beda rineya ongga erek Guru Agama jeska ebic Farisi rut noba riseda rua ongga Saduki ruga. Rua ragot oida, "Memef mosujohu rot koisoisa tina, osnok egens kef onotunggom mar oska egema tein guru! Jeska erek efeni ebsi egens era malaikat egens bera anggot mar gu ofa ei. Noba koma enerek oska guru!" 10Rua ruga omosokuma erek insa koma onjoros ruga ofoukou eteb fogora ebirfaga tentarer insa koma emeesa oida ai juens beda rimagob Paulus. Jefeda ofa obk efen tentarer jeskaseda ruroun Paulus jeska rua, noba rurka ofa jah tentarer rerin mod. 11Gij motu egema deika, beda Yesus ocunc mar gu Paulus gij odou efesi. Beda Ofa agot gu Paulus oida, "Bua binemeesa guru. Bua bimfesij mar rot dedin duga gij kota Yerusalem insa kef fob. Noba bua tein bimagot rot mar insa koma gij kota Roma tein si." 12Erek monog rahah tentena, beda rineya ongga Yahudi ris mar moguma rot oida rua rinet maat era rinej mei tein guru onjoros mona ongga rua ranggob Paulus fog. 13Rua ongga rins mar insa koma nomnaga bera erek rusnok rufok setka tohkuru noba ofod. 14Rua rija skoita ebirfager imam-imam Yahudi jera ebirfager Yahudi enjgineg tein jeskaseda ragot gu rua oida, "Memef nomnaga mes mar moguma oida memef menet maat era menej mei egema tein guru onjoros mona ongga memef manggob Paulus fog. 15Jefeda iwa yufij memef erek kef: Iwa jera ebic rusnok ongga rufoka aksa isa surat egens gu ebirfaga tentarer jeskaseda ofa omorka Paulus sons gu iwa. Yagot gu ofa oida iwa idou os ijeka joug Paulus deika. Beda memef mosk joug Paulus fogora memagob ofa ojgomu." 16Tina Paulus meyesa efen efesa eg mar insa erek koma fob. Jefeda ofa ofof jah mod ongga tentarer rerin noba agot rot mar insa koma gu Paulus. 17Beda Paulus ois gu tentara egens noba agot gu ofa oida, "Buroun oforoka efes egens kef skoita bebin ebirfaga, jeska ofa odou os agot rot mar egens gu bebin ebirfaga egens koma." 18Tentara egens koma oroun oforoka efes egens koma skoita efen ebirfaga beda agot gu ofa oida, "Paulus, ongga manggei fob, bera erejgei didif jeskaseda duroun oforoka egens kef skoita bua, jeska ofa odou os agot rot mar egens gu bua." 19Beda ebirfaga egens koma oroun oforoka efes insa koma, noba goga gejeker gu gesinsa. Beda ofa ejeka gu oforoka egens koma oida, "Budou os bagot rot mar meidu gu didifo." 20Beda oforoka efes insa koma oroun oida, "Rusnok ongga Yahudi rudou oromom nou rumois gu bua jeskaseda monog iwa yurka Paulus sons gu ebirfager agama fogora rua rijeka joug ofa deika. 21Tina bua bunororu mar ongga rumois insa koma gu rua guru. Jeska rusnok rufok setka tohkuru rusk joug nou ranggob ofa. Rua ris mar moguma rot oida rua rinet maat era rinej mei egema tein guru onjoros mona ongga rua ranggob Paulus fog. Rua riker nou mar ongga bua banggot rot fogora rua ruw joug moroju rot ojgomu." 22Beda ebirfaga egens koma eisisi joug oforoka efes insa koma oida, "Binagot rot mar insa koma gu rusnok egema tein guru. Bidemi mar koma gij budou efesi ojgomu." 23Nou ongga mar insa koma oisa fob, beda ebirfaga tentarer insa koma ois gu efen tentara gegeka beda agot gu goga oida, "Goga gohoturu tentarer ongga giskini rufok wuntin egeka jera tentarer ongga rifef kuda rufok setka cinja erfeka dokun tentarer ongga rurka meitefaga rufok wuntin egeka. Noba nou motu ainsa kef erek aras cinja tohkuru, beda iwa ija jah kota Kaisarea. 24Noba gesejah kuda egens nou Paulus, beda iwa nomnaga irohrus ofa rot iskusk skoita Gubernur Feliks gij kota egens koma." 25Beda ebirfaga koma ogu surat egens skoita Gubernur Feliks ongga agot erek kef oida, 26"Gu Gubernur Feliks ongga efen ofoka aksa. Surat kef jeska didif, Klaudius Lisias! 27Rusnok ongga Yahudi bera ranggei osnok egens kef jeskaseda ragob ofa. Tina didif jera dedin tentarer bera monskotu ofa jeska rua. Memef monskotu ofa jeska didif dig oida ofa ongga Yahudi egens kef bera eja erek egens jera raja Kaisar efen rusnok fob. 28Didif dudou os dijeka joug rusnok Yahudi rot mar meidu fogora rua ranggei ofa erek koma. Jefeda didif dubk ofa skoita Yahudi rerin ebirfager agama ongga rufoka aksa jeskaseda rijeka joug ofa. 29Tina didif dinek mar ongga oska egema tein ongga ofa ontunggom jeskaseda rikris ofa jah mod oskusk era ragob ofa rot guru. Mar okum ongga rua rudou os rufra keingg ofa bera en jeska risinsa rerin hukum agama ojgomu. 30Tina didif dingg rot oida rua ongga Yahudi rineya rusk joug nou rimagob ofa ojgomu. Jefeda didif dubk ofa ebeirens skoita bua jah ojgomu. Noba didif tein dumobk rusnok Yahudi insa koma skoita bua tein, jeskaseda rua rimagot rot rerin mar oga insa koma skoita bua." 31Nou ongga ofa onggu surat egens insa koma fob, beda tentarer koma ruroru jeni ebirfaga oga fogora rua rurohrus Paulus gij motu insa koma tein. Beda rua rurohrus ofa onjoros kota Antipatris. 32Erek monog deika, beda tentarer insa koma rifef kuda beda rurohrus Paulus onjoros kota Kaisarea. Beda tentarer rineya bera ruksons jah rerin mod gij kota Yerusalem. 33Nou ongga tentarer insa koma ongga rifef kuda rinjesaga gu kota Kaisarea, beda rua rusk surat koma gu Gubernur, noba rua ruroun Paulus gu ofa tein. 34Nou ongga Gubernur engk surat egens insa koma fob, beda ofa ejeka gu Paulus oida, "Bua bujga jeska monuh gaidu?" Nou ongga ofa engg oida Paulus bujga jeska monuh Kilikia fob, beda ofa agot oida, 35"Erek koma jefeda didif dimejeka joug bua rot mar oga insa kef gij mona ongga rusnok Yahudi insa koma rinsaga jah sif fob." Beda ofa obk efen tentarer jeskaseda raha Paulus gij mod eteb ongga Herodes ei sis fob jeskaseda rut joug ofa jah suma.

will be added

X\