Kisah Para Rasul 22

1Paulus agot gu rua oida, "Akeineri jera edohujir nomnaga. Didif dudou os dagot mar rot disinsa gu iwa osok gij mar ongga iwa insujohu rot didif fob. Jefeda iwa ig fog." 2Nou ongga rua rig Paulus anggot mar gij rerin oga Ibrani, beda rua riker toumou ojgomu. Beda Paulus efesij mar gu rua. 3Paulus agot gu rua oida, "Didif tein bera osnok Yahudi egens morototuma erek iwa. Didif dujuj jeska dedin ameina gij kota Tarsus ongga angh gij monuh Kilikia. Tina sis mona ongga duforoka onjoros dumorna eteb bera didif diker gij kota Yerusalem kef. Noba didif dufokor aksa gij hukum Musa ongga mifmin mimower ruroru tein. Noba Guru eteb ongga ofoka Gamaliel bera ongga omftuftu didif gij mar insa koma nomnaga. Noba didif duroru Allah oga rot ahais morototuma erek iwa tein onojoros mona deisef. 4Sis fob didif dita mar ongga efera oska eteb gu rusnok ongga ruroru Yesus oga fogora rineya ongga ranggos. Noba didif dagei runer jera rujager rufoukou jah mod oskusk. 5Noba imam egens ongga ofoka aksa jera ebirfager Yahudi rineya rijginaga rot mar insa koma ongga didif duntunggom fob. Jeska rua bera ongga rita surat ongga eita owesa gu didif jeskaseda dutunggom mar insa koma. Noba didif durka surat egens koma gu skoita ebirfager Yahudi ongga ringker gij kota Damsyik jeskaseda dijagei rusnok ongga ruroru Yesus jah suma fogora dumorka rua jah Yerusalem noba dita mar okum gu rua ojgomu." 6Beda Paulus agot deika oida, "Gij mona ongga didif dija jah kota Damsyik noba dicira gu moroju erek mowa ot deis ros, beda ainsa koma tein efesa ongga eisa eteb jeska mebaga esenin didif jah suma. 7Beda didif disiri gu mebi noba didif dig oga egens ongga ois gu didif oida, 'Sauluso! Teinefa fogora bua budou os bita efera okora gu Didifo?' 8Beda didif dijeka gu Ofa oida, 'Akeina, Bua bera idu?' Beda oga egens koma oroun oida, 'Didif bera Yesus jeska Nazaret ongga bua budou os bita efera okora gu ojgomu.' 9Rusnok ongga ruroru didif jeska Yerusalem nomnaga rik efesa ongga eisa eteb insa koma, tina rua rineg oga egens koma ongga anggot mar gu didif guru. 10Beda didif dijeka gu oga egens koma oida, 'Tuhan, didif dutunggom mar meidu?' Beda Tuhan oroun gu didif oida, 'Bidebecki noba buira gij kota Damsyik. Beda osnok egens emagot gu bua rot mar nomnaga ongga Allah ondou os bua butunggom.' 11Ainsa koma tein mar efesa insa koma eris diteij jefeda dinek mar deika guru. Jefeda dedin edohujir ragei ditma noba ruroun didif jah kota Damsyik. 12Osnok egens ongga ofoka Ananias eker jah suma. Ofa erek osnok egens ongga ororu hukum Musa rot tenten. Noba rua ongga Yahudi nomnaga ongga ringker gij kota Damsyik rudou os ofa eteb. 13Ofa en skoita didif, beda ofa ot desi didif noba agot oida, 'Edohuj Saulus, bua bik mar sons ojgomu!' Beda ainsa koma tein didif dufra dibirfaga noba dik ofa. 14Beda ofa agot gu didif oida, 'Allah, ongga mifmin mimower rugif gu, bera ocunc gu bua fob jeskaseda bua bijginaga rot mar ongga Ofa ondou os rot. Noba Ofa tein oncunc efen efesa Yesus gu bua, noba bua big efen oga tein fob. 15Bua bimerek osnok egens ongga emefesij rot mar ongga bua bingg noba bingk fob skoita rusnok enjgineg si. 16Jefeda bua binahca deika guru, tina bidebecki noba bita baptis ojgomu. Noba buis gu Yesus jeskaseda Ofa osuna bebin mar ongga oska jeska budou efesi.' 17Beda didif duksons jah kota Yerusalem. Gij mona ongga didif dum diteij gij Mod Allah, beda ainsa koma tein Efena Ebsi Allah ocunc mar gu didif gij dudou efesi. 18Gij mar koma bera didif dik Tuhan. Noba Ofa agot gu didif oida, 'Saulus, bua bija ebeirens jeska Yerusalem, jeska rusnok ongga ringker jah sif rumokoja mar ongga bua bifesij rot Didif.' 19Beda didif dagot gu Tuhan oida, 'Tuhan, rua rumoroun mar ongga didif dimefesij rot Bua si. Jeska rua rijginaga rot oida sis fob didif duira gij mod ongga rusnok rum riteij gij beda dagei rua ongga ruroru Yesus, noba rua rita rifera okora jeska didif. 20Erek koma tein gij mona ongga rusnok ongga Yahudi ranggob Stefanus, jeska ofa emfesij mar osok gij Yesus gu rua fob, bera didif tein diker jah suma. Noba didif duitij rot mar insa koma ojgomu. Noba didif bera dagei rerin meisoufa askesi rua rira mamu riredi ofa.' 21Tina Tuhan agot gu didif oida, 'Bua bija jeska kota Yerusalem ojgomu. Jeska Didif dumobk bua skoita rusnok ongga Yahudi guru ongga ringker gij monuh yes.' " 22Rusnok riskemba insa koma ragosuit rot mar ongga Paulus emfesij insa koma, tina nou ongga rua ringg ofa agot oida Allah obk ofa skoita rusnok ongga Yahudi guru, beda rua rutkonu oska eteb noba ruis rot ruga eteb oida, "Ragob osnok egens kef ojgomu! Ofa bera erek mar ongga oska ojgomu!" 23Rua ruis rot ruga eteb noba rij risinsa rerin meisoufa jeska rifaga, noba rut keingg jera mebi tein jeska rua rutkonu oska eteb rot Paulus. 24Jefeda ebirfaga tentarer egens insa koma obk efen tentarer jeskaseda rurka Paulus gij rerin mod efesi. Beda ofa obk rua jeskaseda rangha ofa beda rijeka joug ofa rot ruga ahais jeskaseda ofa agot rot meidu fogora rua ongga Yahudi insa koma ruis mar erek insa koma skoita ofa. 25Tina nou ongga rua rirakid Paulus etma jeskaseda rangha ofa, beda ofa agot gu ebirfaga egens insa koma ongga ont desi ofa oida, "Didif tein dijerek egens jera raja Kaisar efen rusnok fob. Jefeda enadaij nou bua bangha didif guru. Jeska bua bunocunc didif rot mar ongga oska egema tein ongga duntunggom fob enesi!" 26Nou ongga ebirfaga egens insa koma eg rot mar ongga Paulus anggot fob, beda ofa eja skoita ofa efen ebirfaga egens noba agot oida, "Teinefa fogora bua bubk memef jeskaseda mangha Paulus erek komo. Jeska ofa tein bera ejerek egens jera raja Kaisar efen rusnok fob. Jefeda enadaij nou mimif mangha ofa jinaga guru." 27Jefeda ebirfaga tentarer insa koma eja skoita Paulus noba ejeka gu ofa oida, "Bua bera bijerek egens jera raja Kaisar efen rusnok fob ei." Beda Paulus oroun oida, "Tenten. Didif bera dija erek egens jera ofa fob." 28Beda ebirfaga egens koma agot gu Paulus oida, "Didif duh fifi ofoukou gu raja Kaisar jeskaseda eja erek egens jera efen rusnok fob. Teinefa rot bua erek komo." Beda Paulus oroun oida, "Tina didif dijerek egens jera Kaisar efen rusnok gij mona ongga ameina engker rot didif." 29Ainsa koma tein tentarer koma ongga rijeka joug Paulus rija jeska ofa. Noba ebirfaga egens insa koma tein emeesa, jeska ofa erakid Paulus etma, tina Paulus tein erek egens jera raja Kaisar efen rusnok. Noba hukum Kaisar eyahehir joug rot mar insa koma ongga runtunggom skoita Paulus fob. 30Ebirfaga tentarer insa koma odou os ejginaga rot teinefa fogora rua ongga Yahudi rudou oska rot Paulus. Jefeda erek monog beda ofa ois gu Yahudi ebirfager imam-imam jera ebirfager agama ongga rufoka aksa tein jeskaseda rumohoturuma. Beda ofa osuwa Paulus jeska mod insa koma noba oroun ofa skoita rua nomnaga.

will be added

X\