Kisah Para Rasul 21

1Nou ongga memef menja, beda memef mois mar gu ebirfager mod ari gij kota Efesus insa koma, beda memef meifef meg meifeni egens jah motowohu Kos. Erek monog deika beda memef monjowa gij motowohu Rodos. Beda memef meifef meg meifeni egens koma onjoros mensaga ofoksu Patara. 2Gij kota Patara bera memef mek meg meifeni egens ongga ai juens emeja jah monuh Fenisia. Jefeda memef meifef meg meifeni egens koma noba mecira onjoros 3memef mek motowohu Siprus ah jah megris. Tina memef meker gij meg meifeni egens koma onjoros mensaga gu monuh Siria. Beda memef mosoka gij kota Tirus jeska rusnok ruhoda mar jeska meg meifeni egens koma jah suma. 4Beda memef mejeresa rua ongga ruroru Yesus gij kota koma, noba memef meker jera rua erek ari egens. Rua ruis gu Paulus oisouska Efena Ebsi Allah jeskaseda ofa eneja jah kota Yerusalem guru. 5Erek ari egens oisa fob, beda memef mesejah nou mecira jah kota Yerusalem. Nou ongga mencira beda rusnok insa koma jera rerin riser tein rija morototuma jera memef jah mei mojumu efei efembra. Beda memef mes mokeibi gu mebi noba mom meiteij morototuma. 6Nou ongga memef manggei metma fob beda memef meifef meg meifeni egens noba rua ruksons jah rerin mod. 7Memef meifef meg meifeni egens koma jeska kota Tirus ojgomuja onjoros mensaga gu kota Ptolemais. Beda memef mejeresa mefmen mohujir ongga ruroru Yesus gij kota koma tein. Noba memef meker jera rua erek mona ongkas egens. 8Erek monog beda memef meja deika onjoros mensaga gu kota Kaisarea. Jah suma beda memef mejeresa Filipus. Ofa tein orka Allah oga gu rusnok enjgineg. Noba memef meker jera ofa jah suma. Ofa erek osnok egens jeska rusnok rufok cinja erfeka ongga ruforoker runcunc gij Yerusalem sis fob. 9Ofa efen efeser ruforoka rujowu rufok tohkuru tein ongga Allah eita owesa efek nou ragot rot Allah oga gu rusnok. 10Memef meker jera Filipus jah suma erek mona ofoukou fob, beda nabi egens ongga ofoka Agabus en jeska monuh Yudea. 11Ofa eita marfeb egens ongga Paulus enrakid tumu okumfoj beda erakid esinsa aki jera etma. Beda ofa agot oida, "Efena Ebsi Allah agot erek kef: 'Gij mona kahma beda rusnok ongga Yahudi rimerakid osnok egens ongga efen marfeb kef gij mona ongga ofa ejeker gij kota Yerusalem. Noba rua rimaha ofa gu rusnok ongga erek Yahudi guru.' " 12Nou ongga memef mengk rot mar insa koma, beda memef nomnaga modou oubsaha rot fogora mois gu Paulus jeskaseda ofa eneja jah kota Yerusalem guru. 13Tina ofa oroun gu memef oida, "Iwa inebisa rot didif erek koma guru. Jeska koma otunggom didif dudou erek okumkum rot tein ojgomu. Erek rusnok Yahudi ragei didif era ragob didif jeska didif duroru Yesus oga ojgomu, beda didif dunokoja rot guru." 14Jeska Paulus onororu moga guru, jefeda memef menagot joug ofa deika guru. Noba memef magot gu ofa oida, "Memef mororu mar ongga Allah ondou os rot ojgomu." 15Memef meker jah suma gij mona ofoukou fob, beda memef mesejah nou meja jah kota Yerusalem. 16Mefmen mohujir rineya jeska kota Kaisarea rija morototuma jera memef. Noba rua ruroun memef jah mod ongga Manason efen jeskaseda meker jera ofa jah suma. (Manason erek osnok egens jeska motowohu Siprus ongga ororu Yesus gij mona ongga sismeni fob.) 17Gij mona ongga memef mensaga gu kota Yerusalem fob, beda mefmen mohujir ongga ruroru Yesus jah suma bera ruroun memef rot rudou efaga ouka eteb. 18Erek monog deika beda memef nomnaga meja morototuma jera Paulus skoita Yakobus ongga erek rusnok Kristen efen ebirfaga eteb gij kota Yerusalem. Noba memef momohoturuma jera ofa noba jera ebirfager Kristen rineya jah suma. 19Nou ongga memef manggei metma fob, beda Paulus efesij gu rua rot mar ongga Allah ontunggom efekesa rusnok ongga Yahudi guru gij mona ongga ofa orka Allah oga skoita rua. 20Nou ongga rua ringg mar ongga Paulus emfesij insa koma fob, beda rua nomnaga rudou efaga ouka eteb noba risitit Allah. Beda rua ragot gu Paulus oida, "Bua big fog, jeska rusnok ongga Yahudi rufoukou ongga ruroru Yesus fob. Tina rua nomnaga koma ruroru hukum Musa rot ahais ros. 21Noba rua ringg rot oida bua buftuftu gu rusnok Yahudi ongga ringker gij rusnok enjgineg rifekesa oida rua runororu hukum Musa deika guru, noba rineris rufum mareij ofos jeska rerin ruforoker tein guru, noba runororu Yahudi erebent tein guru. 22- 23Noba gij mona ongga rusnok Yahudi gij kota kef rig oida bua bimen jah sif fob, beda rua rutkonu oska skoita bua rot mar insa koma ongga rua ringg rot fob. Jefeda ongga oufa bera bua buroru mar ongga memef manggot gu bua ojgomu. Runa rufok tohkuru ongga ranggen mar gu Tuhan rineker jah sif. 24Jefeda bua buroru rua jah Mod Allah jeskaseda iwa isiomu gij mei jeni mifmin agama erebent. Beda bua bita bebin fifi erek mar ongga burougif gu Allah rot oisouska rua insa koma jeskaseda rua riris ribirfaga efeji jeni mar ongga rua ranggen gu Allah sis fob. Bua butunggom mar insa koma jeskaseda burocunc gu rusnok nomnaga oida bua buroru Yahudi rerin erebent ros. Beda rua rimejginaga rot oida mar ongga oska ongga rua ringg sis fob bera erek tenten guru. 25Beda memef mogu surat egens skoita rusnok Yahudi ongga ruroru Yesus fob. Noba gij surat egens koma bera memef manggot gu rua rot oida rinet marska ongga rusnok enjgineg rira nou rijiteyi gu mar ongga tenten guru, noba rinet marska enjgineg tein ongga ogufu enah gij ros guru, noba rinej ogufu jeska marska insa koma tein guru, noba rut joug risinsa rot ahais jeskaseda rinesiri morototuma tein guru." 26Paulus ororu mar insa koma ongga rua ranggot gu ofa fob. Jefeda erek monog deika beda ofa eja morototuma jera runa rufok tohkuru insa koma jeskaseda rusiomu gij mei ororu Yahudi agama erebent. Beda rua rija jah Mod Allah jeskaseda ragot gu imam jah suma rot mona kenefo fogora mar ongga rua ranggen rot gu Allah bera omoisa. Noba gij mona ongga omoisa fob, beda rua rumorka mar nou rurougif gu Allah tein. 27Gij mona cinja erfeka insa koma ongga rua ranggen rot gu Allah oisa fob, beda rusnok ongga Yahudi rineya jeska monuh Asia rik Paulus gij momas ongga angh rejrej Mod Allah. Jefeda rua rutkonu oska noba rusos rusnok rufoukou. Beda rua ragei Paulus, 28noba ruis rot ruga eteb oida, "Ei, iwa ongga Israel! Iwa yufij memef ojgomu! Jeska osnok egens kef bera ongga enja jah monuh ofoukou fogora omftuftu mar gu rusnok rufoukou jeskaseda rua rudou oska skoita mimif ongga Yahudi, noba jeskaseda rudou ekirsa rot mar ongga mifmin mimower Israel rirebent rot fob. Noba ofa oftuftu rusnok jeskaseda rua rikirsa rot hukum Musa noba ruga oruh rot Mod Allah tein. Noba ofa tein oroun rusnok ebireira ongga erek Yahudi guru gij momas ongga ah rerjrej Mod Allah insa kef tein! Noba koma erek ofa oh mar oska eteb skoita mod kef ongga ebsi komowa fob." 29(Rua ragot mar erek koma jeska sis fob rua rik osnok egens ongga ofoka Trofimus ecira morototuma jera Paulus gij kota Yerusalem. Noba rua rusujohu rot oida Paulus oroun ofa gij momas ongga angh rejrej Mod Allah ongga ebsi komowa fob. Trofimus koma bera ojga kota Efesus, noba ofa erek osnok egens ongga Yahudi guru). 30Rusnok rufoukou gij kota insa koma rutkonu oska eteb rot. Jefeda rua ragei Paulus beda rikris ofa jeska momas insa koma. Ainsa koma tein rusnok enjgineg ruf montoj joug momas insa koma. 31Askesi rusnok insa koma rubu Paulus beda osnok egens ofof ebeirens noba agot gu ebirfaga tentarer oida rusnok rufoukou rutkonu oska eteb. 32Jefeda ebirfaga egens koma jera ebirfager tentarer egema jera rerin tentarer rufoukou rija ebeirens jah mod ongga rusnok ruga ofoukou gij insa koma. Nou ongga rusnok insa koma rik ebirfaga tentarer en morototuma jera tentarer rufoukou beda rua runobu Paulus deika guru. 33Beda ebirfaga egens insa koma oskotu Paulus noba obk tentarer jeskaseda rakid efen etma. Beda ofa ejeka rusnok jah suma oida, Paulus koma bera erek idu, noba ofa otunggom mar ongga oska erek meidu. 34Beda rusnok rineya ruis mar rot, noba rineya ruis mar ongga erek toga deika onjoros ebirfaga egens insa koma odou eineina gij mar ongga rua ruis insa koma rot Paulus. Jefeda ofa obk efen tentarer jeskaseda rurka Paulus jah rerin mod fogora rijeka joug ofa jah suma. 35Nou ongga rua rinsaga gij mesiga ofon nou rumoira gij mod, beda rua rubk Paulus jah skida jeska rusnok riskemba ongga rudou os rubu ofa. 36Rusnok riskemba insa koma runtoij tentarer noba ruis rot ruga eteb oida, "Yagob ofa ojgomu!" 37Nou ongga rumoira gij mod efesi, beda Paulus agot gu ebirfaga tentarer egens insa koma oida, "Tuan, didif dudou os dagot mar ai juens gu bua fog." Beda ebirfaga egens koma agot gu Paulus oida, "Bua tein bijginaga rot Yunani oga fob ei. 38Jefeda bua bera jeska monuh Mesir ei era gurei? Jeska didif dusujohu rot oida bua bera osnok egens koma jeska monuh Mesir ongga ok mosuruk skoita raja Kaisar sis fob. Noba osnok egens koma oku rot rusnok rufok ribu tohkuru. Rua ruku rot rerin mocongg jah monuh ongga owowa." 39Beda Paulus oroun gu ofa oida, "Didif bera jeska rua ongga Yahudi. Noba didif dujga jeska kota Tarsus ongga erek ibu kota gij monuh Kilikia. Erek bua buitij rot beda didif dimagot mar gu rusnok riskemba insa koma." 40Ebirfaga egens koma oitij rot, jefeda Paulus agot mar gu rusnok insa koma. Ofa ot gu mesiga ofon ongga skida noba ofa era etma ereni gu rua jeskaseda riker rot moubsaha. Beda ofa agot mar gu rua gij rerin oga Ibrani.

will be added

X\