Kisah Para Rasul 20

1Gij mona ongga rusnok rutkonu oska gij kota Efesus oisa fob, beda Paulus ohoturu efen mohujir nomnaga ongga ruroru Yesus gij kota koma jeskaseda eisisi joug rua rudou efesi. Nou ongga ofa eisisi joug rua oisa fob, beda ofa ois oufamofa gu rua noba ecira jah monuh Makedonia. 2Ofa eja jah kota-kota ongga angh gij monuh Makedonia beda ofa eisisi joug rusnok rot mar ofoukou jah suma tein. Ofa otunggom mar erek koma jeskaseda rua ruroru Yesus rot ahais ojgomuja. Beda ofa eja jeska kota-kota insa koma noba ecira jah monuh Yunani. 3Ofa eker gij monuh insa koma erek mesta ortomu. Nou ongga ofa ensejah nou eifef meg meifeni egens jah monuh Siria, beda ofa eg rot oida rusnok ongga Yahudi rudou oromom nou ranggob ofa. Jefeda ofa osujohu oida, "Ongga oufa bera didif dicira daki sons jah monuh Makedonia fogora dimeja jah kota Yerusalem ojgomu." 4Nou ongga Paulus enja jah Makedonia fob, beda efen mohujir rudou os ruroru ofa tein. Rua insa koma bera erek Sopater ongga Pirus efen efesa jeska kota Berea ni, Aristarkus jera Sekundus jeska kota Tesalonika ni, Gayus jeska kota Derbe ni, Timotius ni, jera Tikhikus jera Trofimus jeska monuh Asia tein. 5Rua rukag rot magef jah kota Troas, beda rua riker nou magef jah suma. 6Gij mona eteb ongga Yahudi rint roti ongga enefifij guru oisa fob, beda magef maifef meg meifeni egens jeska kota Filipi. Magef maifef meg meifeni insa koma erek mona cinja fob, beda majesaga kota Troas. Jah suma bera magef marodosu jera mafman mohujir ongga rungkag insa koma. Noba memef nomnaga meker gij ari egens jah suma. 7Gij mona cinja erfens beda memef ongga mororu Yesus momohoturuma jeskaseda met maat morototuma. Beda Paulus efesij mar gu rusnok insa koma ojgomuja onjoros motu deis fob, jeska monog rahah tentena beda ofa odou os eja deika. 8Memef meker gij morongsu ongga ah skida mod egens, noba mah ofoukou eisa gij morongsu insa koma tein. 9Oforoka efes egens ongga ofoka Eutikhus ah jah jendela gij morongsu ongga ah skida insa koma. Tina Paulus efesij mar ofoukou ojgomuja onjoros oforoka efes egens koma ohnohnoha fogora ofa esiri jah mebi. Rua rufra ofa noba rik, tina ofa agos fob. 10Beda Paulus ojuj jah mebi noba ahca esij oforoka efes egens insa koma noba agei rout odou. Beda Paulus agot oida, "Iwa inemeesa guru. Ofa efena ebah ros!" 11Beda Paulus oksons jah morongsu ongga angh skida. Beda ofa ekeba roti jera rua, noba rua nomnaga rit maat morototuma. Beda Paulus efesij mar ofoukou gu rua deika gij motu insa koma onjoros monog rahah tentena, beda ofa eja. 12Rua ruroun oforoka efes egens ongga esiri insa koma jah efen mod. Noba rua rudou efaga ouka eteb rot ojgomu. 13Memef meifef meg meifeni fogora mokag Paulus jah kota Asos jeskaseda morodosu ofa jah suma. Paulus obk memef mokag ofa jeska ofa odou os ecira aki jah kota Asos sismeni fog. 14Gij mona ongga memef morodosu Paulus fob, beda memef nomnaga meifef meg meifeni egens jah kota Metilene. 15Beda memef meja deika noba meifef meg meifeni egens jah motowohu Khios. Erek mona juens fob, beda memef mensaga gu motowohu Samos. Noba memef meja erek mona juens deika, beda mensaga gu kota Miletus. 16Paulus onodou os eker gij monuh Asia dektek guru, jefeda memef meneja jah kota Efesus guru. Paulus odou os eja ebeirens jah kota Yerusalem jeskaseda ensaga jah suma nou mona eteb egens ongga ofoka Pentakosta. 17Gij mona ongga Paulus engker gij kota Miletus ros, beda ofa esa surat egens gu ebirfager rusnok ongga ruroru Yesus gij kota Efesus jeskaseda rua rin skoita ofa jah kota Miletus. 18Nou ongga rua rinsaga jah suma fob, beda Paulus agot gu rua oida, "Edohuji, iwa ijginaga rot teinefa didif diker jera iwa gij mona ongga didif dinsaga monuh Asia jera kota Efesus fob. Didif diker jera iwa rot ongkoska ojgomu. 19Iwa tein ijginaga rot oida gij mona insa koma bera didif difarur nou Tuhan rot dudou ongga eriaga ojgomu. Noba didif dibisa rot iwa jeska dudou okora eteb rot iwa nomnaga. Tina rusnok ongga Yahudi rita efera okora gu didif, noba rua rudou os ranggob didif. 20Noba edohuji, iwa ijginaga rot oida didif dinedemdemi mar ongga oufamofa jeska iwa guru. Tina didif duftuftu iwa rot mar nomnaga gij mona ongga mimif mingker morototuma tein fob. Noba didif duftuftu iwa gij yeyin mod egens egens tein. 21Gij orofosut mona bera didif disisi joug iwa ongga Yahudi jera iwa ongga Yahudi guru tein jeskaseda iwa ikikif jeska yeyin mar ongga oska, beda yuh idou efesi rot ongkas gu Allah ojgomu, noba iroru Yesus tein. 22Ebeibeyaif bera didif duntunggom mar nomnaga ongga Efena Ebsi Allah obk didif rot jah sif oisa fob, jefeda didif dimeja jah kota Yerusalem. Noba didif dinejginaga rot mar meidu ongga emecirej didif jah suma guru. 23Orofosut kota ongga didif duira gij, beda Efena Ebsi Allah agot gu didif oida rusnok rimekris didif jah mod oskusk, noba rimeita efera okora gu didif. 24Tina didif dudou onoubsaha rot dedin difaga kef guru. Jeska ongga oufa ekirsa bera didif dicira gij mar ongga Yesus anggot rot gu didif onjoros dimfarur rot oisa fob. Didif difesij rot teinefa Allah oncunc efen odou ongga oufamofa gu rusnok fob. 25Didif dingker jera iwa nomnaga fob, noba didif dimfesij gu iwa rot teinefa Allah ofoka ereij keingg rusnok erek raja ojgomuja. Tina ebeibeyaif didif dudou ejginaga oida erek dinek iwa deika guru. 26Jefeda didif dagot gu iwa rot koisoisa oida erek Allah ofra okum keingg ineya jeska iwa, beda koma jeni mar ongga oska ongga iwa intunggom ojgomu. Mar koma enah gu didif guru. 27Didif dagot mar erek koma gu iwa jeska didif dimfesij gu iwa rot koisoisa osok gij mar nomnaga ongga Allah ondou os rot fob. 28Jefeda iwa yut joug isinsa idou efesi rot ahais ojgomu. Noba iwa tein yut joug rusnok enjgineg ongga ruroru Yesus fob, jeska Efena Ebsi Allah omfra iwa erek ebirfager nou rusnok insa koma. Iwa yut joug rua rot iskusk erek gembala egens ongga ot joug efen domba-domba. Jeska Yesus era efen ogufu fogora orosuna rot mar ongga oska jeska mimif, ongga erek efen domba-domba, mudou efesi fob. Jefeda Allah oroun mimif erek efen rusnok fob. 29Didif dagot mar erek koma jeska gij mona ongga didif dinja jeska iwa fob, beda rusnok ongga rufogog rot iwa bera rimeita mar ongga oska skoita iwa erek serigala egens ongga osoka noba eska domba-domba. 30Iwa tein yeyin ihujir rineya ongga rumoftuftu iwa gij mar ongga erek tenten guru jeskaseda iwa ikikif jeska Yesus noba iroru rua ojgomu. 31Jefeda iwa yut joug isinsa idou efesi rot ahais. Iwa ijginaga rot oida erek gij tahun orgomu fob bera didif duftuftu iwa orofosut mona jera motu rot dudou ongga okora eteb rot iwa. 32Ebeibeyaif didif daha iwa gu Allah jeskaseda Ofa eker joug iwa ojgomuja. Noba iwa yagei Ofa efen oga rot ahais ojgomuja. Jeska Allah oga insa koma bera efen owesa efek eteb ekirsa fogora emeita idou ahais noba emeita mar ongga oufamofa gu iwa. Sis fob Ofa ensejah mar insa koma nou efen rusnok nomnaga. 33Sis mona ongga dinjeker jera iwa onjoros mona deisef tein bera didif dinerejgei iwa rot fifi era meisoufa egema tein guru. 34Iwa ijginaga fob oida didif disinsa dimfarur fogora dingk mar nomnaga ongga didif jera edohujir runcosu rot fob. 35Didif ducunc gu iwa gij mar nomnaga oida mimif mifarur rot ahais erek insa koma jeskaseda mufij rusnok enjgineg ongga runofora efek guru. Iwa idou ah keingg rot mar ongga Yesus anggot rot sis fob oida, 'Mar ongga ongkoska eteb ekirsa bera mimif mineker jeskaseda rusnok enjgineg rufij mimif ojgomuja guru. Tina mimif tein mufij rusnok enjgineg ojgomu. Jeska koma bera ongga ereita oufamofa eteb gu mimif. ' " 36Paulus anggot mar insa koma oisa fob, beda ofa es okeibi gu mebi jera rua nomnaga fogora ofa om eiteij gu Allah. 37Gij mona ongga Paulus enja jeska rua, beda rua rudou oubsaha eteb, noba rua ragei ofa noba ribisa keingg ofa. Beda rua ragot oida, "Paulus biteijo, bahasmero!" 38Rua rudou oubsaha eteb jeska Paulus anggot gu rua oida rinek ofa deika guru. Beda rua ruroun ofa jah meg meifeni egens koma ojgomu.

will be added

X\