Kisah Para Rasul 2

1Mona eteb egens ongga rusnok Yahudi rijeka ofoka Pentakosta ensaga doida fob. Beda rusnok ongga ruroru Yesus rumohoturuma gij mod egens. 2Beda gij mona insa koma rua rig mar erek mof eteb okurc rot owesa doska gij mod ongga rua ringker gij. 3Beda rua rik mar erek mah eisa ofokai ongga oira gij mer efesi insa koma noba ah gu rusnok insa koma orofosut egens egens. 4Beda ainsa koma tein rua nomnaga risma owesa efek jeska Efena Ebsi Allah. Beda rua ragot mar gij oga ongga erek toga toga. Oga ongga toga insa koma bera rua risinsa rinejginaga rot sis fob tein guru. Rua ragot mar gij oga insa koma oisouska mar ongga Efena Ebsi ocunc gu rua gij rudou efesi ojgomu. 5Gij mona insa koma bera rusnok Yahudi rufoukou ongga rin jeska monuh egema egema tein riker gij Yerusalem. Rua bera erek rusnok ongga rugif gu Allah rot tenten. 6Nou ongga rua insa koma ringg Yesus efen rusnok rifesij mar gij oga ongga toga toga insa koma, beda rua rudou oubsaha eteb rot. Jeska Yesus efen rusnok rifesij mar gij rua ongga enjgineg egens egens rerin ruga. Rua rudou oubsaha eteb rot, jefeda rua ruhoturu rejrej Yesus efen rusnok insa koma. 7Beda rua ragot moguma oida, "Wah! Rua rifesij mar gij mifmin muga egens egens, teinefa erek kefo? Jeska rua nomnaga bera rusnok ongga rujga monuh Galilea ojgomu! 8Mimif ongga jeska monuh toga toga bera mig rua rifesij mar gij mifmin muga egens egens. Rua rita koma erek teinefa! 9Jeska mimif mirek rusnok ongga rujga monuh Partia ni, monuh Media ni, monuh Elam ni, monuh Mesopotamia ni, monuh Yudea ni, monuh Kapadokia ni, monuh Pontus ni, monuh Asia ni, 10monuh Frigia ni, monuh Pamfilia ni, monuh Mesir ni, jera monuh ongga angh rejrej Libia doida kota Kirene ni, jera mimif mineya tein ongga min jeska kota Roma gij monuh Italia ni. 11Mineya jeska monuh Kreta jera monuh Arab tein. Noba mineya erek rusnok Yahudi, noba mineya erek rusnok Yahudi guru, tina moira gij agama Yahudi fob. Noba mimif nomnaga mig rua rifesij mar gij mifmin muga egens egens osok gij mar onswos ongga Allah ontunggom fob." 12Rua rudou oubsaha noba eineina gij tein, jefeda rua rijeka moguma rot oida, "Wah! Mar kef efen ofou erek teinefa?" 13Tina rineya jeska rua ruhurmei mar rot Yesus efen rusnok oida, "Ah, rua koma bera ribirfaga erebibei rot mofut efei ojgomu!" 14Erek koma beda Petrus ot jera efen mohujir setka kungkob erfens. Beda ofa agot rot oga eteb gu rusnok rufoukou insa koma ongga rumohoturuma rejrej ofa oida, "Akeineri ongga Yahudi jera iwa enjgineg ongga iker gij kota Yerusalem. Iwa ig rot iskusk jeska didif dimefesij mar gu iwa osok gij mar onswos ongga iwa ingg insa kef fob. 15Erek iwa isujohu rot oida memef mebirfaga erebibei rot mofut efei, tina erek koma guru. Memef menej mofut efei guru, jeska kef erek aras cinja tohkuru gij rahah tenten ros. 16Mar onswos insa kef bera en jeska Efena Ebsi Allah. Efena Ebsi koma bera ongga Allah anggot eimofoj rot gij Mar Efeyi Ebsi sis fob. 17Nabi egens onggu rot mar ongga Allah anggot rot erek kef oida, 'Doida mona ongga enja ejgwaga, beda Didif dumobk Efena Ebsi gu rusnok nomnaga ongga ruroru Didif fob. Yeyin iser runer jera rujager rimefesij rot mar ongga Didif duncunc gu rua gij rudou efesi fob. Noba Didif dumocunc mar onswos gu yeyin iser gij rudou efesi. Noba yeyin runokoner tein rimesih mar ongga Didif ducunc gu rua gij rudou efesi. 18Didif dumobk Efena Ebsi gu runer jera rujager ongga rumfij Didif, beda rua rimefesij rot mar ongga Didif duncunc gu rua gij rudou efesi skoita gu rusnok enjgineg. 19Didif dumotunggom mar jah mebaga jera mebi tein ongga otunggom rusnok rudou oubsaha rot. Mar koma emerek ogufu jera mah jera mah efeb. 20Doida mona ongga Didif dufra okum keingg rusnok ongga rufogog, beda rusnok rimek mowa ongkahaha fogora ejerek motkobah noba mesta ejerek ekeni ogufu. 21Beda gij mona insa koma rusnok ongga rumois gu Tuhan bera rimeita eiteij ah ongga efeinah.' " 22Erek koma beda Petrus agot deika oida, "Akeineri ongga erek rusnok Israel. Iwa ig mar kef rot iskusk ojgomu. Yesus, ongga ojga jeska monuh Nazaret, bera ongga Allah oncunc gu iwa oisouska efen owesa efek fob. Noba oisouska Ofa bera Allah ontunggom mar onswos ofoukou gu iwa ifekesa fob. Iwa isinsa ijginaga rot mar insa koma nomnaga fob. 23Yudas ofij iwa jeskaseda yagei Ofa. Noba koma ecira jeni Allah odou ejginaga rot fob. Noba iwa jera rusnok enjgineg ongga rufogog intob Ofa tumu mega salib. 24Tina Allah eita eiteij ah sons gu Ofa fogora osuwa Ofa jeska monuh mar agos. Jeska enadaij nou Yesus eker gij monuh mar agos ojgomuja guru. 25Jeska raja Daud runggu gij Mar Efeyi Ebsi rot Yesus sis fob oida, 'Bua Allah biker joug didif ojgomuja. Jefeda mar egema tein enereneni Didif guru. 26Jefeda dudou efaga ouka rot Bua noba Didif dimesitit mar gu Bua ojgomuja. Didif dumoisum gij Bua rot eiteij ah ongga efeinah ojgomuja. 27Didif bera bebin ebesa ongga dudou ebsi komowa, jefeda Bua binaha difaga ah gij monuh mar agos ojgomuja guru. Dedin difaga enetefa ojgomuja guru. 28Bua buncunc moroju ongga emeita eiteij ah ongga efeinah. Didif dudou efaga ouka eteb rot Bua askesi didif diker morototuma jera Bua.' " 29Beda Petrus agot oida, "Akeineri, mifmin mimowa raja Daud agos sis fob, noba rua risah efen efaga gij moksu fob. Noba efen efaga enah gij moksu koma ojgomuja onojoros mona deisef tein. 30Tina Daud bera erek nabi egens, noba ofa ejginaga rot mar ongga Allah anggen gu ofa fob. Allah anggen gu ofa oida Ofa omocunc osnok egens ongga onjuj jeska Ofa erek raja egens ongga omofoka ereij keingg efen rusnok Yahudi. 31Ofa tein ejginaga rot mar ongga Allah omotunggom gu mona kahma. Jefeda Ofa agot mar insa koma osok gij Yesus erek orocunc rot oida Yesus Kristus bera ongga erek raja egens ongga Allah omobk. Ofa agot oida raja egens koma emedebecki jeska agos. Noba Ofa efen efaga enah gij monuh mar agos ojgomu guru. Noba efen efaga enetefa ojgomuja jinaga tein guru. 32Yesus insa koma bera endebecki jeska agos rot owesa efek jeska Allah fob. Noba memef mek Ofa eker rot efena ebah deika gu mesinsa meiteij fob. 33Allah ofra Ofa jah mebaga noba Ofa eker desi Allah rot efen ofoka ongga aksa eteb fob. Noba Ofa tein bera esma Efena Ebsi ongga Allah agen eimofoj rot sis fob. Noba mar onswos ongga iwa ingg noba ingk insa koma bera en oisouska owesa efek jeska Efena Ebsi ongga Yesus ombk skoita memef. 34Raja Daud onosok jah mebaga guru, tina ofa tein agot rot Yesus Kristus oida, 'Tuhan Allah agot gu dedin Tuhan oida, "Biker jah dugnosk 35rot bufoka ongga aksa, beda Didif dumoin keingg mesa nomnaga fogora rumougif gu Bua si." ' 36Jefeda memef modou os jeskaseda iwa ongga rusnok Israel nomnaga ijginaga rot tenten oida, Yesus ongga iwa intob tumu mega salib, Ofa koma bera ongga Allah ofra fob erek rusnok nomnaga rerin ebirfaga egens ongga erek Tuhan. Noba Ofa tein erek Kristus ongga eita eiteij ah ongga efeinah gu rusnok." 37Nou ongga rusnok insa koma nomnaga ringg mar ongga Petrus anggot fob, beda rudou emeesa eteb rot. Beda rua ragot gu Petrus jera efen mohujir enjgineg tein oida, "Jefeda memef motunggom mar erek meidu?" 38Beda Petrus oroun gu rua oida, "Iwa imeesa joug yeyin mar ongga oska ojgomuja. Beda iwa nomnaga ita baptis fogora iroru Yesus Kristus erek Ofa efen rusnok. Beda Allah omosuna rot yeyin mar ongga oska jeska idou efesi. Beda Ofa omobk Efena Ebsi gu iwa tein. 39Jeska Efena Ebsi ongga Allah anggen eimofoj rot sis fob bera nou mimif nomnaga, jera mifmin miser tein, jera rusnok ongga rangh yes jeska Allah tein. Efena Ebsi insa koma bera nou rusnok nomnaga ongga Allah ois gu jeskaseda ruroru Ofa." 40Petrus agot mar ofoukou deika gu rua jeskaseda rua rikeba jeska rusnok ongga mebif efen ongga erek rufogog fogora Allah onofra mar okum gu rua guru. 41Gij mona insa koma tein rusnok rufoukou ruroru mar ongga Petrus anggot insa koma, noba rua rita baptis. Rua rugun rusnok ongga ruroru Yesus erek ribu orgomu dokun deika. 42Beda rusnok efeinah koma rumohoturuma jeskaseda Yesus efen ruforoker ruftuftu rua ojgomuja. Noba rua ritka roti noba rit morototuma jera noba risisi keingg moguma rot tein noba rua rum riteij morototuma. 43Nou ongga rusnok riskemba rik Yesus efen ruforoker runtunggom mar onswos ofoukou, jefeda rudou oubsaha rot. 44Rusnok insa koma ongga ruroru Yesus nomnaga rita mar morototuma jera rudou egens. Noba rua tein rikeba rerin mareibra morototuma. 45Beda rua ruhu rerin mareibra jeskaseda rimeita fifi, fogora rua rikeba fifi insa koma nou rerin ruhujir ongga rufojingki. 46Gij orofosut mona bera rua rumohoturuma gu Mod Allah. Beda rua ritka roti morototuma erek rireisisi joug risinsa rot Yesus. Noba rua tein rumohoturuma gij rerin mod egens egens jeskaseda rit maat morototuma rot rudou eriagamaga jera rudou ongga efaga ouka eteb. 47Rua risitit gu Allah ojgomuja, noba rusnok enjgineg nomnaga rudou os eteb jera rua. Noba Allah ogun rerin ruhujir rufoukou dokun deika ongga rimeesa joug rerin mar ongga oska fogora oskotu rua tein jeska rerin mar ongga oska fob.

will be added

X\